6
1 ང༌ཞའ༌ དཀོན༌མཆོག༌གི༌ ཕྲོ༌པ༌ ལས༌ ཅོ༌ཁན༌གུན༌ ཨིན༌པ༌, ང༌ཞའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ ཐུག༌རྗེ༌བོ༌ སྣང༌མེད༌ ཅོས༌ཏེ༌ ཟུར༌ལ༌ ཕང༌ མི༌ཕང༌ཅེས༌ལ༌ ཞུ༌ཝ༌ ཕུལ༌ལད༌། 2 ཅིའ༌ཟེར༌ན༌ དཀོན༌མཆོག༌གི༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌,
"ངའེ༌ ལྡམ༌ཁན༌ནི༌ ཏུས༌པའེ༌ཀ༌ ངའ༌ ཁྱོ༌ཞ༌གུན༌ནི༌ མོས༌ལམ༌གུན༌ ཚོར༌།
ཐར༌པའེ༌ ཞག༌ག༌, ངའེ༌ ཁྱོ༌ཞ༌གུན༌ལ༌ རོགས༌ ཅོས༌ཏེ༌ ཨིན༌པིན༌།"
ལྟོས༌སའང༌, དི༌རིང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཏུས༌, དི༌རིང༌ ཐར༌པའེ༌ ཏུས༌པོ༌ ཨིན༌ནོག༌། *6:2 ཡེ༌ཤ༌ཡཱའེ༌ སྤེ༌ཆའེ༌ 49:8
པ༌འུ༌ལུའི༌ སྐ༌ལས༌གུན༌།
6:3 ནེ༌ 13
3 སུ༌ཞིག༌གའང༌ སྒག༌ མི༌གྱབ༌ཅེས༌ ཡང༌ ང༌ཞ༌གུན༌ནི༌ ཞབ༌སྟོག༌ ཞུ༌ཁན༌གུན༌ནི༌ ནང༌ང༌, སྐྱོན༌ ཕིང༌ མི༌ཐུབ༌ཅེས༌སི༌ མི༌ཚེ༌ཞིག༌, ང༌ཞ༌གུན༌ནི༌ ཕུད༌དད༌། 4 ང༌ཞ༌གུན༌ནི༌ རྡུག༌ངལ༌, སྐ༌ལས༌ དང༌, ཧུན༌མེད༌དི༌ ཇིགས༌པའེ༌ རིགས༌ ཚང༌མའེ༌ ནང༌ང༌ ཟོད༌པ༌ ཉམ༌པོ༌ དོང༌ལེན༌ ཅོ༌ཅེས༌ གྱུད༌ཏེ༌, ང༌ཞ༌གུན༌ དཀོན༌མཆོག༌གི༌ དེན༌བའེ༌ ཞབ༌སྟོག༌པ༌ ཨིན༌ཁན༌བོ༌ ལྟན༌ན༌ནོག༌། 5 སྤེར༌ན༌, ང༌ཞ༌གུན༌ལ༌ རྡུང༌གྱབ༌ ཏངས༌, ཙོན༌ཁང༌ངི༌ ནང༌ང༌ ཀགས༌, སྲོ༌ཡོང༌ཁན༌ནི༌ མི༌ཚོགས༌གུན༌ལ༌ དོང༌ལེན༌ ཅོ༌གོས༌, ཟུགས༌པོ༌ སིང༌ ངལ༌ངལ༌ ཚོག༌པ༌ ལས༌ ཅོས༌པིན༌, ཚན༌ གང༌པོ༌ ཉིད༌མེད༌པ༌ ཕུད༌གོས༌ ཡང༌ ཟ༌རྒྱུ༌ མེད༌པ༌ ལུས༌། 6 ང༌ཞ༌གུན༌ནི༌ ནང༌ང༌ ཡོད༌ཁན༌ནི༌ རྩང༌མ༌, ཧ༌གོ༌, ཟོད༌པ༌, ཐུག༌རྗེ༌, དམ༌པའེ༌ ཐུག༌ཉིད༌, དེན༌བའེ༌ ཅེས༌པ༌, 7 དྲང༌པོ༌ ཤད༌ཅེས༌, དཀོན༌མཆོག༌གི༌ ཤེད༌དི༌ ནང༌ང༌, ལག༌པ༌ ཡས༌པ༌ དང༌ ཡོ༌མ༌ ཉིས༌ཀོའེ༌ ནང༌ང༌ དྲང༌པོའེ༌ ནོལ༌ཅེས༌སི༌ ལག༌ཆ༌, ཏེ༌གུན༌ནི༌ ང༌ཞའ༌ དཀོན༌མཆོག༌གི༌ དེན༌བའེ༌ ཞབ༌སྟོག༌པ༌ ཨིན༌ཁན༌བོ༌ ལྟན༌ན༌ནོག༌། 8 མི༌གུན༌ནི༌ ང༌ཞ༌གུན༌ལ༌ རྩི༌ཝ༌ ཡ༌ ཁྲེལ༌བ༌, སྨད༌ར༌ ཡ༌ སྟོད༌པ༌ ཏང༌ནའང༌, ང༌ཞའེ༌ དཀོན༌མཆོག༌ག༌ ཞབ༌སྟོག༌ ཞུའད༌། ང༌ཞའ༌ དྲང༌པོ༌ ཨིན༌ནའང༌, ཁོང༌གུན༌ནི༌ ང༌ཞ༌གུན༌ལ༌ ཟུས༌མའེ༌ ཞབ༌སྟོག༌པ༌གུན༌ ཨིན༌ནོག༌ ཟེར༌དུག༌། 9 ཞན༌ ང༌ཞ༌གུན༌ དཀོན༌མཆོག༌གི༌ ཞབ༌སྟོག༌པ༌ ཨིན༌ཁན༌བོ༌ ཚང༌མའེ༌ ཤེས༌ནའང༌ ཁོང༌གུན༌ནི༌ ང༌ཞ༌གུན༌ལ༌ སྣང༌མེད༌ ཅོ༌རུག༌། ང༌ཞ༌གུན༌ ཤི༌ཅེས༌སི༌ ཉེ༌མོའ༌ ལུས༌ནའང༌ ཏ༌རུང༌ངའང༌ སོན༌ཏེའ༌ ཡོད༌, རྡུང༌གྱབ༌ ཏངས༌ ཨིན༌ནའང༌ སད༌ མ༌སདས༌། 10 སྙིང༌གུན༌ནི༌ ནང༌ང༌ རྡུག༌ངལ༌གུན༌ ཡོད༌ནའང༌, ང༌ཞ༌གུན༌ སྐྱིད༌པོ༌ ཡོད༌། ཉལ༌བ༌ཅན༌ ཨིན༌ནའང༌, སེམས༌ཉིད༌དི༌ ཐོག༌ནེ༌ མང༌པོའ༌ ཆུག༌པོ༌ གྱུར༌ཅུག༌གད༌། ཇིག༌རྟེན༌ནི༌ ཐོག༌ནེ༌ ཅའང༌ མེད༌ནའང༌, སེམས༌ཉིད༌དི༌ ཐོག༌ནེ༌ ང༌ཞ༌གུན༌ནི༌ ལག༌ག༌ ཅི༌ཚང༌མ༌ ཡོད༌།
11 ཀོ༌རིན༌ཐི༌པ༌ ཛ༌འོ༌གུན༌, ང༌ཞའེ༌ ཁྱོ༌ཞ༌གུན༌ལ༌ དྲང༌པོ༌ ཟེར༌རད༌, ཏ༌ ང༌ཞའེ༌ སྙིང༌ ཁྱོ༌ཞ༌གུན༌ནི༌ ཕིའ༌ སང༌ ཕེས༌ཏེ༌ ཨིན༌། 12 ང༌ཞ༌གུན༌ནི༌ ཅེས༌པ༌བོ༌ ཁྱོ༌ཞ༌གུན༌ནི༌ ཕིའ༌ གགས༌ཏེ༌ བོར༌ར༌ མེད༌, ཨིན༌ནའང༌ ཁྱོ༌ཞ༌གུན༌ནི༌ ཅེས༌པ༌བོ༌ ང༌ཞ༌གུན༌ནི༌ ཕིའ༌ གགས༌ཏེ༌ བོར༌དུག༌། 13 ངའེ༌ ཁྱོ༌ཞ༌གུན༌ལ༌ ང༌རང༌ངི༌ ཕྲུ༌གུ༌ ཙོགས༌ལ༌ སྤེ༌ར༌ ཏང༌ངད༌, ཁྱོ༌ཞ༌གུན༌ནིའང༌ སྙིང༌བོ༌ སང༌ ཕེས༌སའང༌།
སོན༌པོ༌ དཀོན༌མཆོག༌གི༌ ཆོད༌ཁང༌།
6:14 ནེ༌ 7:4
14 ཁྱོ༌ཞའ༌ ཏད༌པ༌ མེད༌ཁན༌གུན༌ ཉམ༌པོ༌ ཛ༌འོ༌ ཉེ༌མོ༌ མ༌གྱུར༌ཤིག༌། དྲང༌པོ༌ ཀ༌ཟུག༌གི༌ ངན༌པའེ༌ ཕྲོ༌པ༌ གྱུར༌ ཉན༌ཨིན༌? འོད༌ ཀ༌ཟུག༌གི༌ མུན༌གྲིག༌ ཉམ༌པོ༌ དྲེས༌ ཉན༌ཨིན༌? 15 མ༌ཤི༌ཀ༌ དང༌ ཤེ༌ཏན༌ནི༌ པར༌ལ༌ ཅི༌ བྲེལ༌ ཡོད༌ཀྱག༌? ཅའང༌ མེད༌ཀྱག༌། ཏད༌པ༌ཅན༌ཞིག༌ ཏད༌པ༌ མེད༌ཁན༌ཞིག༌གི༌ ཏད༌པ༌ ཅོ༌ཁན༌བོའེ༌ ནང༌ང༌ དྲེས༌ཉན༌ཨིན༌ན༌? མ༌ནེ༌ མི༌ཉན༌། 16 དཀོན༌མཆོག༌གི༌ ཆོད༌ཁང༌ དང༌ སྐུན༌དྲ༌ གུན༌ནི༌ པར༌ལ༌ ཅི༌ བྲེལ༌ ཡོད༌ཀྱག༌? ཅའང༌ མེད༌ཀྱག༌། ང༌དང༌གུན༌, སོན༌པོ༌ དཀོན༌མཆོག༌གི༌ ཆོད༌ཁང༌བོ༌ ཨིན༌ནོག༌, ཀ༌ཟུག༌ དཀོན༌མཆོག༌གི༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌།
" 'ང༌ ཏེ༌གུན༌ནི༌ ཕྲོའ༌ དུགས༌ཏེ༌ ཁོང༌གུན༌ ཉམ༌པོ༌ གྲུལ༌ཨིན༌།
ང༌ ཁོང༌གུན༌ནི༌ དཀོན༌མཆོག༌ ཡང༌ ཁོང༌གུན༌ ངའེ༌ མི༌གུན༌ གྱུར༌ཨིན༌། †6:16 ཁྲིམས༌སི༌ སྤེ༌ཆ༌ ཏང༌པོའེ༌ 26:12; ཡེ༌རེམ༌ཡཱའི༌ སྤེ༌ཆའེ༌ 32:38 དང༌ འི༌ཟི༌ཀེལ༌ལི༌ 37:27 "
17 "ཏེན༌ན༌བོའེ༌ཕིའ༌ ཏད༌པ༌ མེད༌ཁན༌གུན༌ནི༌ ཕྲོ༌ནེ༌ བིངས༌ཏེ༌
ཁྱོ༌ཞ༌རང༌ ཏེ༌གུན༌ནི༌ ཕྲོ༌ནེ༌ སོ༌སོའ༌ བེ༌ཏེ༌ དུག༌གོས༌།
ཁོང༌གུན༌ནི༌ ཁམ༌ལོག༌གི༌ ཅ༌ལག༌གུན༌ལ༌ ལག༌པ༌ མ༌ཐུག༌ཤིག༌,
ཏེ༌ནེ༌ ངའེ༌ ཁྱོ༌ཞ༌གུན༌ལ༌ གའ༌སུས༌ ཞུ༌ཨིན༌། ‡6:17 ཡེ༌ཤ༌ཡཱའེ༌ སྤེ༌ཆའེ༌ 52:11 དང༌ འི༌ཟི༌ཀེལ༌ལི༌ 20:34, 41
18 ཡང༌ ང༌ ཁྱོ༌ཞ༌གུན༌ནི༌ ཨ༌བ༌ དང༌ ཁྱོ༌ཞ༌གུན༌
ངའེ༌ བུ༌ཚ༌ དང༌ བུ༌མོ༌གུན༌ གྱུར༌ཨིན༌། §6:18 ཤ༌མུ༌ཨེལ༌ལི༌ སྤེ༌ཆ༌ ཉིས༌པའེ༌ 7:14 དང༌ 7:8 '
གཙོ༌བོ༌ ཀུན༌ཝང༌ དཀོན༌མཆོག༌གི༌ མོལས༌།"