7
1 ང༌དང༌གུན༌ལ༌ ཏེ༌ ཞལ༌ཆད༌གུན༌ ཡོད༌ པ༌སང༌, ཛ༌འོ༌གུན༌, ང༌ཏི༌ ཟུགས༌པོ༌ དང༌ སེམས༌ཉིད༌ ཚི༌ཏུ༌ ཅོ༌ཁན༌ ཚང༌མ༌ ཕངས༌ཏེ༌ ང༌དང༌རང༌ རྩང༌མ༌ ཅོ༌ཤིག༌, ཡང༌ དཀོན༌མཆོག༌ག༌ ཀུས༌པ༌ ཅོ༌ཨིན༌ ཁོང༌ངི༌ ཇིགས༌སི༌ ནང༌ང༌ ང༌དང༌རང༌ ཅི༌ས༌ཐོག༌ནེ༌ དམ༌པ༌ གྱུར༌ཅུག༌ཅེས༌ལ༌ ལས༌ ཅོ༌ཤིག༌།
2 སྙིང༌ ཤགས༌ཏེ༌ ང༌ཞ༌གུན༌ལ༌ ཅེས༌པ༌ ཅོ༌ཤིག༌གའང༌, ང༌ཞ༌གུན༌ནི༌ སུ༌ཞིག༌གའང༌ ནོར༌ཁྲུལ༌ མ༌ཅོས༌པིན༌, ཡ༌ སུ༌ཞིག༌གའང༌ ལམ༌ ནོར༌ཁན༌ནི༌ཀ༌ ཁྲིད༌ཏེ༌ མ༌ཁྱེར༌པིན༌, ཡ༌ སུ༌ཞིག༌གི༌ ཀ༌ནེའང༌ ཕན༌ཐོགས༌ མ༌ལེན༌པིན༌། 3 ཏེ༌བོ༌ ངའེ༌ ཁྱོ༌ཞ༌གུན༌ལ༌ སྐྱོན༌ ཀལ༌ལ༌ ཟེར༌ར༌མེད༌། ངའེ༌ སྔུན༌ལ༌ ཟེར༌པིན༌, ང༌ཞའེ༌ ཁྱོ༌ཞའ༌ འི༌ཟམ༌ ཅེས༌པ༌ ཅོའད༌, ང༌ཞའ༌ ཁྱོ༌ཞ༌ ཉམ༌པོ༌ སོན༌ཏེའ༌ དུག༌ཅེས༌ ཡ༌ ཤི༌ཅེས༌ལའང༌ གྲལ༌གྲིག༌ ཨིན༌། 4 ངའ༌ ཁྱོ༌ཞ༌གུན༌ནི༌ ནང༌ང༌ ཚང༌མའེ༌སང༌ མང༌ང༌ ལོ༌ཁྱེལ༌ རག༌, ཡང༌ ཁྱོ༌ཞ༌གུན༌ནི༌ ཕིའ༌ ངའ༌ མ༌སྲན༌ཏྲེ༌ ཕོ༌སོ༌ ཚོར༌ར༌རག༌། རྡུག༌ངལ༌ལི༌ ནང༌ངའང༌, ཁྱོ༌ཞ༌གུན༌ནི༌ ངའ༌ མ༌སྲན༌ཏྲེ༌ སྤོས༌པ༌ ཏངས༌ཏེ༌ ཐད༌ཅུགས༌།
པ༌འུ༌ལུའི༌ ཐད༌པོ༌།
7:5 ནེ༌ 16
5 མ༌ཀེ༌དོ༌ནི༌ཡཱ༌ ནང༌ང༌ ལེབ༌བ༌ཅིག༌, ང༌ཞ༌གུན༌ལ༌ ངལ༌ཚོ༌ཅེས༌སི༌ ཏུས༌ མེད༌པིན༌, ཅིའ༌ཟེར༌ན༌ ང༌ཞ༌གུན༌ལ༌ ཆོགས༌ ཚང༌མ༌ནེ༌ ནགས༌ དང༌ བར༌དོ༌ ཐོང༌, ཏེ༌བོ༌ ནི༌ ཕི༌ལོག༌ནེ༌ གྱབ༌གལ༌ ཅོ༌ཁན༌ དང༌ སེམས༌སི༌ ནང༌ང༌ ཚེར༌ཁ༌ གུན༌ ཨིན༌། 6 ཨིན༌ནའང༌ སྤོས༌པ༌ མེད༌ཁན༌གུན༌ལ༌ སྤོས༌པ༌ སྐྱེ༌ ཅུག༌ག༌ ཛད༌ཁན༌ནི༌ དཀོན༌མཆོག༌གི༌, ཏི༌ཏུས༌ ང༌ཞའ༌ ཡོད༌ས༌ ལེབ༌ ཅུག༌ག༌ ཛད༌ཏེ༌, ང༌ཞ༌གུན༌ལ༌ སྤོས༌པ༌ སྐྱེ༌ ཅུག༌ག༌ ཛདས༌། 7 ཁོ༌ ང༌ཞ༌གུན༌ནི༌ ཕྲོའ༌ ལེབ༌ཅེས༌ མ༌ཚད༌, ཁྱོ༌ཞ༌གུན༌ནི༌ ཁོའ༌ སྤོས༌པ༌ ཏང༌ཅེས༌པོ༌ ཚོར༌ཏེ༌, ངའ༌ མ༌ ཐད༌པོ༌ སོང༌། ཁྱོ༌ཞ༌གུན༌ནི༌ ངའ༌ ཐོང༌ཅེས༌སི༌ སྲན༌ཏྲེ༌ དོད༌པ༌, ངའ༌ ཚེར༌ཁ༌ ལྟན༌ཅེས༌སི༌ ཕིའ༌ ཁྱོ༌ཞ༌གུན༌ སྐྱོ༌མོ༌ ཆ༌ཅེས༌, ཡང༌ ངའེ༌ ཏོན༌ལ༌ ཁྱོ༌ཞ༌གུན༌ནི༌ སམ༌བ༌ ཏང༌ཅེས༌གུན༌ ཚོར༌ཏེ༌, ངའ༌ མ༌ ཐད༌པོ༌ སོང༌།
8 ཞན༌ ངའེ༌ སྔུན༌ནི༌ ཨི༌གེ༌བོའེ༌ ཁྱོ༌ཞ༌གུན༌ནི༌ སེམས༌སྐྱོ༌མོ༌ ཅོས༌ཏེ༌ ཡོད༌ནའང༌, དག༌ས༌ ངའ༌ གྱོད༌པ༌ མེ༌རག༌། ཏེ༌བོ༌ ཀལ༌ཏེ༌ སྟིང༌ནེ༌ ངའེ༌ གྱོད༌པ༌ ཅོས༌པིན༌, ཅིའ༌ཟེར༌ན༌ ངའ༌ གྱུས༌སོང༌ ཏེ༌ ཨི༌གེ༌བོའེ༌, ཏུས༌ ཉུ༌ངུན༌ཞིག༌ ཁྱོ༌ཞ༌གུན༌ནི༌ སེམས༌སྐྱོ༌མོ༌ ཅོས༌ཏོག༌། 9 ཅི༌ཨིན༌ནའང༌, ཏེ༌བོ༌ ཀལ༌ཅེས༌པོའ༌ ངའ༌ ཐད༌པོ༌ རག༌, ཏེ༌བོ༌ ཁྱོ༌ཞ༌གུན༌ལ༌ ཚེར༌ཁ༌ བྱུང༌ཅུག༌ཅེས༌ མན༌པ༌, ཏེ༌ ཚེར༌ཁ༌བོའེ༌, ཁྱོ༌ཞ༌གུན༌ལ༌ གྱོད༌པ༌ སྐྱེ༌ཅུགས༌ཏེ༌, ཁྱོ༌ཞའེ༌ མི༌ཚེ༌ ཕུད༌ཚུལ༌བོ༌ སྤོ༌ཅུགས༌། ཏེ༌བོ༌ དཀོན༌མཆོག༌གི༌ ཁོང༌རང༌ངི༌ མི༌གུན༌ལ༌ བྱུང༌ཅུག༌ཅེས༌སི༌ ཐུགས༌དོད༌ ཡོད༌ཁན༌ནི༌ ཚེར༌ཁའེ༌ རིགས༌ཤིག༌ ཨིན༌ནོག༌, སོང༌པ༌སང༌ ང༌ཞའེ༌, ཁྱོ༌ཞ༌གུན༌ལ༌ ཅི༌ཞིག༌གི༌ ཐོག༌ནེའང༌ ནོད༌པ༌ མ༌སྐྱལ༌པིན༌། 10 དཀོན༌མཆོག༌གི༌ ང༌དང༌གུན༌ལ༌ ཐོང༌ངོམས༌ ཆ༌ཅུག༌ག༌ ཛད༌ཅེས༌སི༌ ཚེར༌ཁ༌བོའེ༌, ང༌དང༌གུན༌ སྡིག༌པ༌ནེ༌ ཐག༌རིང༌ང༌ ཁྱེར༌ར༌ ཛད༌ཅེས༌ དང༌ ཐར༌པ༌ ཐོབ༌ ཅུག༌ག༌ ཛད༌ད༌ནོག༌། ཏེ༌ཙོགས༌སི༌ ཚེར༌ཁའེ༌ ཕིའ༌ གྱོད༌པ༌ ཅོ༌གོས༌ མེད༌པ༌ ཨིན༌ནོག༌, ཨིན༌ནའང༌ གྱོད༌པ༌ མེད༌ཁན༌ནི༌ ཇིག༌རྟེན༌ནི༌ ཚེར༌ཁའེ༌ ཐའ༌མེད༌པའེ༌ ཤི༌ཅེས༌ ཁྱོང༌ང༌ནོག༌།
11 ལྟོས༌ཤིག༌, དཀོན༌མཆོག༌ ཐུགས༌ཐད༌ ཅུག༌ཁན༌ནི༌ གྱོད༌པའེ༌, ཁྱོ༌ཞ༌གུན༌ནི༌ ནང༌ང༌ ཀ༌ཟུག༌ ལས༌ ཟང༌པོའེ༌ བྲས༌བུ༌ སྨིན༌དུག༌, སྤེར༌ན༌ སེམས༌སི༌ ནང༌ང༌ དྲང༌པོ༌ ཡང༌ སྐྱོན༌ ཕོག༌ཁན༌གུན༌ མེད༌ཁན༌ ཅོ༌ཅེས༌སི༌ དོད༌པ༌, སྡིག༌པ༌ ཅོ༌ཁན༌གུན༌ནི༌ཀ༌ སྲོ༌ སྲན༌ཏྲེ༌, སྡིག༌པའེ༌ ཇིགས༌ནང༌, ང༌ ཐོང༌ཅེས༌སི༌ དོད༌པ༌, ངའེ༌ ལབ༌ཞ༌གུན༌ ཁ༌ ཉན༌ཅེས༌ལ༌ རིང༌ཤེས༌, ནོར༌ཁྲུལ༌ ཅོ༌ཁན༌བོའ༌ གྱོགས༌པ༌ ཆད༌པ༌ ཀལ༌ཅེས༌, ཏེ༌ ཚང༌མ༌ གྱུད༌ཏེ༌, ཁྱོ༌ཞ༌གུན༌ ནོངས༌མེད༌ ཨིན༌ཁན༌བོ༌ ཁྱོ༌ཞ༌རང༌ངི༌ ལྟན༌ཏེ༌ ཨིན༌ནོག༌། 12 ངའེ༌ སྔུན༌མའེ༌ ཨི༌གེ༌བོ༌, ནོར༌ཁྲུལ༌ ཅོ༌ཁན༌ ཡ༌ ནོད༌པ༌ ཕོག༌ཁན༌ གུན༌ནི༌ སྐོར༌ལ༌ མ༌བྲིས༌པིན༌, ཨིན༌ནའང༌ དཀོན༌མཆོག༌གི༌ སྐུན༌དུན༌ལ༌, ཁྱོ༌ཞ༌གུན༌, ང༌ཞའེ༌ ཕིའ༌ ཙམ༌ཤིག༌གི༌ དད༌ཅན༌ ཨིན༌ ཏེ༌བོ༌ ཁྱོ༌ཞ༌རང༌ངི༌ ཐོང༌ཉན༌ཅེས༌སི༌ གྱུན༌ཚན༌བོའེ༌ ཕིའ༌ བྲིས༌པིན༌། 13 ཏེ༌བོའེ༌ ཞས༌ཏེ༌ ང༌ཞ༌གུན༌ལ༌ སྤོས༌པ༌ སྐྱེས༌ཏེ༌ རག༌།
ང༌ཞའ༌ སྤོས༌པ༌གུན༌ནི༌ ནན༌མའ༌, ཁྱོ༌ཞའེ༌ སྤུན༌ ཏི༌ཏུས༌ལ༌ གའ༌སུས༌ ཡང༌ སེམས༌སི༌ ནང༌ང༌ ཞི༌དེ༌ ཁྱོངས༌ཏེ༌ ཐད༌པོ༌ ཆ༌ཅུག༌ཅེས༌པོའ༌ ང༌ཞ༌གུན༌ མ༌ ཐད༌པོ༌ སོང༌། 14 ཁྱོ༌ཞའེ༌ ཕིའ༌ ང༌ ཙམ༌ཤིག༌གི༌ ཕོ༌སོ༌ ཚོར༌ཁན༌བོ༌ ངའེ༌ ཏི༌ཏུས༌ལ༌ ཤད༌པིན༌, ཡང༌ ཁྱོ༌ཞ༌གུན༌ནི༌ ངའེ༌ རེ༌ཝ༌ མ༌ཅག༌ག༌ ཨིན༌ནོག༌། ཏེ༌བོའེ༌ཕིའ༌ ངའེ༌ ཁྱོ༌ཞ༌གུན༌ལ༌ ཏུས༌གྱུན༌ དྲང༌པོ༌ ཤད༌ད༌ ཙོགས༌ལ༌ དག༌སའང༌ ངའེ༌ ཁྱོ༌ཞའེ༌ སྐོར༌ལ༌ སྤུན༌ ཏི༌ཏུས༌སི༌ དུན༌ལ༌ ཕོ༌སོ༌ ཅོ༌ཁན༌བོ༌ དེན༌བ༌ ཨིན༌ཁན༌ ལྟན༌ན༌ནོག༌། 15 ཁྱོ༌ཞ༌གུན༌ནི༌ ཁོའེ༌ ཁའ༌ཉན༌ཏེ༌ ཇིགས༌ དང༌ སྙིང༌ངི༌ ཐིལ༌ནེ༌ ཀུས༌པ༌ ཉམ༌པོ༌ གའ༌སུས༌ ཞུ༌ཁན༌གུན༌, ཨིད༌ཏུ༌ ཅོས༌ཏེ༌ ཁོའེ༌ ཁྱོ༌ཞ༌གུན༌ལ༌ སྔུན༌ནི༌ སང༌ མང༌ང༌ ཡ༌ཤ༌ ཅོ༌རུག༌། 16 ང༌ མ༌སྲན༌ཏྲེ༌ ཐད༌པོ༌ རག༌ ཅིའ༌ཟེར༌ན༌ ངའ༌ ཁྱོ༌ཞ༌གུན༌ནི༌ ནང༌ང༌ ཐར༌ཁྱེལ༌པའེ༌ ལོ༌ཁྱེལ༌ རག༌།