8
སྙིང༌ ཕེས༌ཏེ༌ སལ༌ཅེས༌།
8:1 ནེ༌ 15
1 སྤུན༌གུན༌ དཀོན༌མཆོག༌གི༌ མ༌ཀེ༌དོ༌ནི༌ཡཱའེ༌ ཆོས༌ཚོགས༌གུན༌ནི༌ ནང༌ང༌ ཁོང༌རང༌ངི༌ ཐུག༌རྗེའེ༌ གྱུད༌ཏེ༌ ཛད༌ཁན༌གུན༌, ངའེ༌ ཁྱོ༌ཞ༌གུན༌ལ༌ ཧ༌གོ༌ ཅུག༌ཉིན༌རག༌། 2 ཁོང༌གུན༌ལ༌ ནགས༌ དང༌ བར༌དོ༌ མང༌པོའེ༌ ཚོད༌ལྟ༌ ཡོངས༌ ཡང༌ མངས༌ཏེའང༌ ཉལ༌བ༌ཅན༌ ཨིན༌ཨིན༌ནའང༌ སྐྱིད༌པོ༌ ཁོང༌གུན༌ནི༌ ནང༌ནེ༌ ལུད༌ཏེ༌ ཆ༌ཅེས༌པོའེ༌, ཁོང༌གུན༌ སྙིང༌ སང༌ ཕེས༌ཏེ༌ སལ༌ཁན༌གུན༌ ཨིན༌ནོག༌།
3 ཁོང༌གུན༌ནི༌ ཁྱུད༌ ནང༌ཞིན༌ ཙམ༌ཤིག༌ ཏང༌ཉན༌ནའང༌ ཏངས༌ མ༌ཚད༌, ཏེ༌སང༌ མང༌ང༌ ཏང༌ཁན༌བོའ༌ ངའེ༌ སྤང༌པོ༌ ཏང༌ ཉན༌ཅེས༌རག༌, ཡང༌ ཏེ༌བོ༌ ཁོང༌གུན༌ནི༌ ཐད༌པོ༌ ཉམ༌པོ༌ ཅོ༌རུག༌། 4 ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ཡོད༌ཁན༌ནི༌ ཏད༌པ༌ཅན༌གུན༌ལ༌ རོགས༌ ཅོ༌ཅེས༌སི༌ རྩི༌ཝའེ༌ ནང༌ང༌ ཁོང༌གུན༌ནིའང༌ ཁག༌ ལེན༌ཉན༌ཅེས༌ལ༌, ང༌ཞའ༌ ཡང༌ནེ༌ ཡང༌ ཇུ༌ཇུ༌ ཟེར༌ཨིན༌ ཞུ༌ཝ༌ ཕུལ༌དུག༌། 5 ཡང༌ ཁོང༌གུན༌ནི༌ ང༌ཞའེ༌ སམ༌ཁན༌ནི༌ སང༌ མང༌ང༌ ཅོས༌, ཅིའ༌ཟེར༌ན༌ དཀོན༌མཆོག༌གི༌ ཐུག༌གོངས༌ ནང༌ཞིན༌ལ༌ ཁོང༌རང༌གུན༌ ཏང༌པོ༌, གཙོ༌བོ༌ ཡེ༌ཤུའ༌ ཏེ༌ནེ༌ ང༌ཞ༌གུན༌ལ༌ ཏང༌དུག༌།
6 ཏེན༌ན༌བོའེ༌ཕིའ༌ ང༌ཞ༌གུན༌ནི༌ སྤུན༌ ཏི༌ཏུས༌སི༌, གོ༌མ༌ ཁྱོ༌ཞ༌གུན༌ལ༌ པེ༌ནེ༌ རོགས༌གུན༌ ལྡུས༌ཏེ༌ ཁྱོང༌ཅེས༌ གོ༌ཟུག༌ ཅོ༌ཅེས༌ལ༌ སྤོས༌པ༌ ཏངས༌། ཏེ༌ པེ༌ནེ༌ རོགས༌གུན༌ ལྡུ༌ཅེས༌པོ༌ གྲུབ༌ཅུག༌ཅེས༌ལ༌ སྤོས༌པ༌ ཏང༌ཅེས༌སི༌ ཕིའ༌, ངའེ༌ ཁོའ༌ ཁྱོ༌ཞའེ༌ཀ༌ ལོགས༌ཏེ༌ ཆ༌ཅེས༌ལ༌ ཞུ༌ཝ༌ ཕུལ༌ལད༌། 7 ཁྱོ༌ཞ༌གུན༌ནི༌ ལས༌ མང༌པོའེ༌ ནང༌ང༌ མ༌ གྱལ༌ལ༌ ཅོས༌ཏེ༌ ཨིན༌ནོག༌, སྤེར༌ན༌ ཏད༌པའེ༌ ནང༌ང༌, སྤེ༌ར༌ ཏང༌ཅེས༌སི༌ ནང༌ང༌, ཤེས༌རབས༌སི༌ ནང༌ང༌, ལས༌ ཅོ༌ཅེས༌སི༌ དོད༌པའེ༌ ནང༌ང༌, ཡང༌ ང༌ཞའེ༌ ཕིའ༌ ཁྱོ༌ཞ༌གུན༌ནི༌ ཅེས༌པའེ༌ ནང༌ང༌། ངའེ༌ དོད༌པ༌བོ༌ ནི༌, ཁྱོ༌ཞའེ༌ སྙིང༌ ཕེས༌ཏེ༌ ཏང༌ཅེས༌སི༌ ལས༌པོའེ༌ ནང༌ངའང༌ གྱལ༌ལ༌ ཅོ༌གོ༌ཤེས༌ ཨིན༌ནོག༌ སམ༌མ༌རག༌།
8 ངའེ༌ ཁྱོ༌ཞ༌གུན༌ལ༌ ཏེ༌བོ༌ ཅོས༌ ཟེར༌ཏེ༌ བཀའ༌ ཏང༌ང༌མེད༌, ཨིན༌ནའང༌ ངའེ༌ ཞན༌ཡང༌ ཆོས༌ཚོགས༌སི༌ ཏང༌དོད༌ཅན༌གུན༌ ཉམ༌པོ༌ ལྡུར༌ཏེ༌ ཁྱོ༌ཞ༌གུན༌ནི༌ ཅེས༌པ༌ ཙམ༌ཤིག༌གི༌ དྲང༌པོ༌ ཨིན༌ཁན༌བོ༌, ཚོད༌ལྟ༌ ཉིན༌རག༌།
9 ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌བོ༌ ཁྱོ༌ཞ༌གུན༌ལ༌ གྱུས༌ཡོད༌ཏེ༌ ཨིན༌ནོག༌། ཞན༌ ནམ༌ཁའེ༌ ནང༌ང༌ ཁོང༌ ཆུག༌པོ༌ ཨིན༌ནའང༌, ཁྱོ༌ཞ༌གུན༌ནི༌ ཏོན༌ལ༌ ཁོང༌ ཉལ༌བ༌ཅན༌ གྱུར༌ར༌ ཛདས༌། ཁྱོ༌ཞ༌གུན༌ ནམ༌ཁའེ༌ ནང༌ང༌ ཆུག༌པོ༌ གྱུར༌ཅུག༌ཅེས༌སི༌ ཕིའ༌, ཁོང༌ ཉལ༌བ༌ཅན༌ གྱུར༌ར༌ ཛདས༌།
10 འི༌བོ༌ ངའེ༌ ཁ༌ད༌ ཨིན༌, ལོ༌ ཅིག༌གི༌ སྔུན༌ལ༌ ཁྱོ༌ཞ༌གུན༌ནི༌ གོ༌ཟུག༌ ཅོ༌ཁན༌ནི༌ ལས༌པོ༌, གྲུབ༌ཅུག༌ན༌ གྱལ༌ལ༌ ཆ༌ཅེས༌ ཨིན༌ནོག༌། སྔུན༌མའེ༌ ལོའེ༌ ནང༌ང༌ ཁྱོ༌ཞ༌གུན༌ ཏང༌པོ༌རང༌ ཨིན༌པིན༌, ཀ༌གུན༌ནི༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ མ༌ཤི༌ཀ༌པ༌གུན༌ལ༌ པེ༌ནེ༌ ཏང༌ཅེས༌སི༌ དོད༌པ༌ ཡོད༌ཅེས༌ མ༌ཚད༌ ཏངས༌ཏེའང༌ ཨིན༌པིན༌། 11 ཏ༌ ཁྱོ༌ཞ༌གུན༌ནི༌ ཀ༌ལས༌པོ༌ སྔུན༌ལ༌ གོ༌ཟུག༌ ཅོས༌ ཏེ༌བོ༌ གྲུབ༌ཅུག༌ གོ༌ཤེས༌ ཨིན༌ནོག༌། ཁྱོ༌ཞ༌གུན༌ནི༌ སྔུན༌ལ༌ ཏང༌ཅེས༌སི༌ སེམས༌སི༌ དོད༌པ༌བོ༌, དག༌ས༌ ཏེན༌ན༌ ཙོགས༌ལ༌ ཏང༌ཅེས༌སི༌ ནང༌ང༌ སྟོན༌ཤིག༌, རང༌རང༌ངི༌ ཁྱུད༌ ནང༌ཞིན༌ལ༌ ཏོང༌ཤིག༌། 12 ཁྱོ༌ཞ༌གུན༌ནི༌ ཅི༌ཞིག༌ ཏང༌ཅེས༌སི༌ ཐག༌ཅད༌ ཅོས༌ གལ༌ཏེས༌ རིངས༌ཨིན༌ཞིག༌ ཏང༌ན༌, ཏེ༌བོའེ༌ དཀོན༌མཆོག༌ ཐུག༌ཉེས༌ ཤུག༌ག༌ནོག༌, ཡང༌ ཏེ༌བོ༌ ཁྱོ༌ཞ༌གུན༌ནི༌ ཏང༌ཅེས༌སི༌ ཁྱུད༌ནེ༌ ཐལ༌ཏེ༌ མན༌པ༌, ཁྱོ༌ཞ༌རང༌ངི༌ ཁྱུད༌ ནང༌ཞིན༌ ཏང༌གོས༌། 13 འོ༌ན༌ ངའེ༌ དོད༌པ༌ ནི༌, ཁྱོ༌ཞ༌གུན༌ནི༌ ཏང༌ཅེས༌པོའེ༌, ཞན༌མ༌གུན༌ནི༌ མི༌ཚེ༌བོ༌ ལ༌མོ༌ཞིག༌ ཡང༌ ཁྱོ༌ཞ༌རང༌གུན༌ནི༌ མི༌ཚེ༌བོ༌ ཀགས༌པོ༌ཞིག༌ གྱུར༌ཅུག༌ཅེས༌པོ༌ མན༌, ཨིན༌ནའང༌ ཚང༌མའ༌ དྲན༌དྲ༌ ཡོང༌གོ༌ཤེས༌པོ༌ ཨིན༌། 14 དག༌ས༌ ཁྱོ༌ཞ༌གུན༌ནི༌ ལག༌ག༌ མང༌པོ༌ ཡོད༌ པ༌སང༌, སྒོས༌དོམ༌ ཡོད༌ཁན༌གུན༌ལ༌ རོགས༌ ཅོ༌ཉན༌ཨིན༌། ཡོང༌ཅེས༌ཅན༌ནི༌ ཏུས༌སི༌ ནང༌ང༌, ཁོང༌གུན༌ལ༌ མང༌པོ༌ ཇོར༌ཏེ༌ ཁྱོ༌ཞ༌གུན༌ལ༌ སྒོས༌དོམ༌ ཡོད༌ ཟ༌ནེ༌, ཁྱོ༌ཞ༌ ཉམ༌པོ༌ བགོ༌ཨིན༌, ཏེ༌ནེ༌ ཚང༌མ༌ དྲན༌དྲ༌ གྱུར༌ཨིན༌། 15 ཀ༌ཟུག༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌།
"མང༌པོ༌ ལྡུས༌ཏེ༌ ཁྱོང༌ཁན༌གུན༌ནི༌ ལག༌ག༌
གོད༌ལ༌ ཏང༌ཅེས༌ལ༌ མ༌ལུས༌ས༌ ཨིན༌ནོག༌།
ཡང༌ ཉུ༌ངུན༌ ལྡུས༌ཏེ༌ ཁྱོང༌ཁན༌གུན༌ནི༌
སྒོས༌དོམ༌ དྲན༌དྲ༌ སོང༌ཏེ༌ ཨིན༌ནོག༌།"*8:15 ཨི༌ཇིབ༌ནེ༌ བིངས༌ཏེ༌ ཆའ༌ཁན༌ནི༌ སྤེ༌ཆའེ༌ 16:18
ཏི༌ཏུས༌ དང༌ ཁོའེ༌ ཕྲོ༌པ༌གུན༌།
8:16 ནེ༌ 24
16 ཨིན༌ནའང༌ དཀོན༌མཆོག༌ག༌ ཐུག༌རྗེ༌ཆེ༌, ཁོང༌ངི༌ ང༌ཞའེ༌ སྤུན༌ ཏི༌ཏུས༌ལའང༌, ཁྱོ༌ཞ༌གུན༌ནི༌ ཕིའ༌ ངའེ༌ ནང༌ང༌ ཡོད༌ཁན༌ནི༌ དོད༌པ༌གུན༌ ཙོགས༌ སལ༌ལ༌ ཛད༌ཏེ༌ དུག༌། 17 ཏི༌ཏུས༌སི༌, ཁྱོ༌ཞའ༌ ཐུག༌ག༌ལ༌ ཡང༌སྐྱར༌ སོང༌ ཟེར༌ཁན༌ནི༌ ང༌ཞའེ༌ ཞུ༌ཝ༌བོའ༌ ཐད༌པོ༌ ཅོས༌། དེན༌བ༌, ཁོ༌ ཁོ༌རང༌, སོང༌ཏེ༌ ཁྱོ༌ཞ༌གུན༌ལ༌ ཐུག༌ཅེས༌ལ༌, རིངས༌ཏེ༌ ཤི༌རུག༌། 18 ང༌ཞ༌གུན༌ནི༌ ཞན༌ སྤུན༌ཞིག༌གའང༌, ཏི༌ཏུས༌ ཉམ༌པོ༌ ལམ༌ཅུག༌གད༌། ཆོས༌ཚོགས༌ ཚང༌མའེ༌ ཁོའ༌ གའ༌མོའེ༌ ནས༌ཚུལ༌ ཤད༌ཅེས༌སི༌ ཞབ༌སྟོག༌གི༌ ཕིའ༌ སྟོད༌པ༌ ཕུལ༌དུག༌། 19 ང༌ཞའེ༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ ཏད༌པ༌ཅན༌གུན༌ནི༌ ཕིའ༌ པེ༌ནེ༌ རོགས༌གུན༌ ཁྱེར༌ ཟ༌ནེ༌, ང༌ཞ༌གུན༌ལ༌ རོགས༌ ཅོ༌ཅེས༌སི༌ ཕིའ༌, ཆོས༌ཚོགས༌གུན༌ནི༌ ཁོ༌ ལྡམས༌ཏེ༌ ཨིན༌པིན༌, ཏེ༌ ཞབ༌སྟོག༌གུན༌ ནི༌, གཙོ༌བོ༌ ཡེ༌ཤུའ༌ སྤལ༌ ཁྱོང༌ཅེས༌ ཡང༌ ང༌ཞ༌གུན༌ རོགས༌ ཅོ༌ཅེས༌ལ༌ རིངས༌ཨིན༌ ཡོད༌ཁན༌ ལྟན༌ན༌ནོག༌།
20 ང༌ཞའ༌ པེ༌ནེ༌ མང༌པོའེ༌ རོགས༌པོ༌ ནོར༌ཏེ༌ ཀོལ༌དུག༌ ཟེར༌ཅེས༌ནེ༌ སྐྱོབ༌ཅེས༌སི༌ ཕིའ༌, ང༌ཞའེ༌ ཁོ༌ དང༌ ཏི༌ཏུས༌ ཉིས༌ཀོ༌ ང༌ཞའ༌ ཉམ༌པོ༌ ཡེ༌རུ༌ཤ༌ལེམ༌མི༌ གྱལ༌ས༌ ཁྱེར༌ཨིན༌། 21 ང༌ཞ༌གུན༌ནི༌ ཅོ༌ཁན༌ དྲང༌པོ༌ ཨིན༌ཁན༌བོ༌ གཙོ༌བོའེ༌ ཟིག༌ཤེས༌ མ༌ཚད༌ མི༌གུན༌ནིའང༌ ཐོང༌ཅེས༌ལ༌ རྩོན༌གྲུས༌ ཅོའད༌།
22 ང༌ཞ༌གུན༌ནི༌ ཁོང༌ ཉིས༌ཀོ༌ ཉམ༌པོ༌ ཞན༌ཡང༌ སྤུན༌ཞིག༌གའང༌ ལམ༌ཅུག༌གད༌, ཁོའེ༌ ཏུས༌སྐབས༌ མང༌པོ༌ཞིག༌གི༌ ནང༌ང༌, ཁོ༌རང༌ ཙམ༌ཤིག༌གི༌ གཙོ༌བོའ༌ ཞབ༌སྟོག༌ ཞུ༌ཅེས༌ལ༌ རིངས༌ཨིན༌ ཡོད༌ཁན༌བོ༌, ལན༌ མང༌པོ༌ ལྟན༌ཏེ༌ ཏངས༌། ཁྱོ༌ཞ༌གུན༌ནི༌ ནང༌ང༌ མང༌ང༌ ལོ༌ཁྱེལ༌ ཡོད༌ཅེས༌པོའེ༌, ཏ༌ དག༌ས༌ ཁོ༌ མང༌ང༌ རིངས༌ཨིན༌ ཨིན༌ནོག༌། 23 ཏི༌ཏུས༌ ནི༌, ངའེ༌ ཕྲོ༌པ༌ ང༌ ཉམ༌པོ༌ ཁྱོ༌ཞའ༌ རོགས༌ ཅོ༌ཁན༌བོ༌ ཨིན༌, ཡང༌ ཁོ༌ ཉམ༌པོ༌ ཡོད༌ཁན༌ནི༌ སྤུན༌ ཉིས༌ཀོ༌, ཆོས༌ཚོགས༌གུན༌ནི༌ ལམ༌ཅུགས༌ཏེ༌ ཨིན༌, ཡང༌ མ༌ཤི༌ཀའ༌ རྩི༌ཝ༌ ཁྱོང༌ང༌ནོག༌། 24 ཏེན༌ན༌བོའེ༌ཕིའ༌ ཁོང༌ སུམ༌ཀོ༌ དང༌ ཞན༌ ཆོས༌ཚོགས༌གུན༌ནི༌ དུན༌ལ༌ ཁྱོ༌ཞའེ༌ ཅེས༌པ༌ དང༌ ང༌ཞའེ༌ ཁྱོ༌ཞ༌གུན༌ནི༌ སྐོར༌ལ༌ ཕོ༌སོ༌ ཅོ༌ཁན༌བོ༌ ཏན༌ཏན༌ ཨིན༌ཁན༌ སྟོན༌ཤིག༌།