9
ཡེ༌རུ༌ཤ༌ལེམ༌མི༌ མ༌ཤི༌ཀ༌པ༌གུན༌ནི༌ ཕིའ༌ པེ༌ནེ༌ རོག༌རམ༌ ལྡུ༌ཅེས༌།
9:1 ནེ༌ 15
1 ཡེ༌རུ༌ཤ༌ལེམ༌མི༌ ཏད༌པ༌ཅན༌གུན༌ནི༌ ཕིའ༌ ཞབ༌སྟོག༌གི༌ སྐོར༌ལ༌ ངའེ༌ ཁྱོ༌ཞ༌གུན༌ལ༌ བྲི༌གོས༌ མེད༌པ༌ ཨིན༌ནོག༌། 2 ཅིའ༌ཟེར༌ན༌ ཁྱོ༌ཞའ༌ ཀོ༌རིན༌ཐི༌ ཆོས༌ཚོགས༌གུན༌ རོགས༌ ཅོ༌ཅེས༌ལ༌ ཙམ༌ཤིག༌ རིངས༌ཨིན༌ ཡོད༌ཁན༌བོ༌ ངའ༌ གྱུས༌ཡོད༌། ཡང༌ ཁྱོ༌ཞའ༌ ཨ༌ཀ༌ཡཱའེ༌ *9:2 ཀོ༌རིན༌ཐི༌ གྱལ༌ས༌ ནི༌ ཨ༌ཀ༌ཡཱའེ༌ ནང༌ང༌ ཡོད༌ཏེ༌ ཨིན༌ནོག༌། ནང༌ང༌ ཡོད༌ཁན༌གུན༌ནི༌, ལོ༌ ཅིག༌ནེ༌ པར༌ལ༌ རོགས༌སི༌ པེ༌ནེ༌ ཀལ༌ཆོག༌ཆོག༌ ཡོད༌ཁན༌བོ༌, ངའེ༌ མ༌ཀེ༌དོ༌ནི༌ཡཱའེ༌ ཆོས༌ཚོགས༌གུན༌ནི༌ དུན༌ལ༌ ཕོ༌སོ༌ ཅོས༌ཏེ༌ ཤད༌པིན༌། དེན༌བ༌, ཁྱོ༌ཞ༌གུན༌ནི༌ རོགས༌ ཅོ༌ཅེས༌སི༌ དོད༌པ༌ ཆེན༌མོའེ༌ ཞས༌ཏེ༌, མ༌ཀེ༌དོ༌ནི༌ཡཱའེ༌ ནང༌ང༌ ཡོད༌ཁན༌ནི༌ ཏད༌པ༌ཅན༌ མང༌པོ༌ཞིག༌གིའང༌ ཏང༌ཅེས༌ གོ༌ཟུག༌།
3 ཨིན༌ནའང༌ ཁྱོ༌ཞ༌གུན༌ནི༌ སྐོར༌ལ༌ ངའེ༌ ཕོ༌སོ༌ ཅོ༌ཁན༌བོ༌ ནོར༌ཏེ༌ མན༌ཁན༌ ཡང༌ ངའེ༌ ཟེར༌ཁན༌ ཙོགས༌ལ༌ ཁྱོ༌ཞ༌གུན༌ནི༌ པེ༌ནེ༌ ཚང༌མ༌ ལྡུས༌ཏེ༌ གྲལ༌གྲིག༌ ཅོ༌ཐུབ༌ཅེས༌སི༌ ཕིའ༌, ངའེ༌ ཁྱོ༌ཞ༌གུན༌ནི༌ཀ༌ འི༌ སྤུན༌ སུམ༌ཀོ༌ ཀལ༌ལད༌། 4 གལ༌ཏེས༌ མ༌ཀེ༌དོ༌ནི༌ཡཱའེ༌ ཏད༌པ༌ཅན༌ ཁ༌ཅིག༌ ངའ༌ ཉམ༌པོ༌ ཡོངས༌ཏེ༌ ཁྱོ༌ཞ༌གུན༌ གྲལ༌གྲིག༌ མེད༌ཁན༌བོ༌ ཐོང༌ན༌, ཏེ༌ནེ༌ ངའེ༌ ཕོ༌སོ༌ ཅོ༌ཁན༌བོའེ༌ཀ༌ ང༌ ཅིག༌པོ༌ མ༌ཚད༌ ཁྱོ༌ཞ༌གུན༌ནའང༌ ཁྲེལ༌བ༌ ཆ༌ཅེས༌ ཨིན༌ནོག༌། 5 ཏེ༌ནེ༌ ཁྱོ༌ཞ༌གུན༌ནི༌ དམ༌ཆ༌ ཅོས༌ཁན༌ནི༌ པེ༌ནེ༌གུན༌ གྲལ༌གྲིག༌ ཡོད༌ཅེས༌སི༌ ཕིའ༌ ངའེ༌ འི༌ སྤུན༌ ཚང༌ཀོ༌ ངའེ༌ སང༌ སྔུན༌ལ༌ ལམ༌ཅུག༌གད༌། ཨིན༌ནའང༌ ཏེ༌བོ༌ ཏང༌ཉིན༌ མེད༌ཨིན༌ ཏང༌ཁན༌ནི༌ སྐྱེས༌ཤིག༌ མན༌པ༌, ཐད༌ཏེ༌ ཏང༌ཁན༌ནི༌ སྐྱེས༌ཤིག༌ ཡོང༌གོས༌ སམ༌མ༌རག༌།
6 འི༌བོ༌ མ༌ཞེད༌ཤིག༌, ས༌འོན༌ ཉུ༌ངུན༌ ཏབ༌ཁན༌ནི༌ ཞིང༌བད༌པ༌ཞིག༌ག༌ སྟོན༌ཐོག༌གའང༌, ཉུ༌ངུན༌ཞིག༌ མ༌ནེ༌ སྨིན༌ན༌ མ༌ནོག༌། ཨིན༌ནའང༌ སྙིང༌ ཕེས༌ཏེ༌ ས༌འོན༌ ཏབ༌ཁན༌བོའེ༌ སྟོན༌ཐོག༌གའང༌, མང༌པོ༌ རྔ༌ཨེན༌། 7 ཙམ༌ཤིག༌ ཏང༌ཉན༌ཅེས༌རག༌, ཏེ༌བོ༌ ཁྱོ༌ཞའ༌ རེ༌རེའེ༌ རང༌ངི༌ སྙིང༌ངི༌ ནང༌ང༌ ཐག༌ཅད༌གོས༌། སེམས༌ མ༌ཐད༌ད༌ ཡ༌ ཝང༌ངི༌ ནང༌ང༌ མ༌ཏང༌ཤིག༌, ཅིའ༌ཟེར༌ན༌ དཀོན༌མཆོག༌ ཐད༌པོ༌ ཉམ༌པོ༌ ཏང༌ཁན༌བོའ༌ ཐུགས༌ཐད༌ད༌ ཛད༌ད༌ནོག༌། †9:7 ཏམ༌སྤེའེ༌ སྤེ༌ཆའེ༌ 22:8 8 ཡང༌ དཀོན༌མཆོག༌གི༌ ཁྱོ༌ཞ༌གུན༌ལ༌ སྒོས༌དོམ༌གུན༌ སྙིང༌ ཕེས༌ཏེ༌ སལ༌ལ༌ ཛད༌ད༌ནོག༌། ཏེ༌ནེ༌ ཏུས༌གྱུན༌ ཁྱོ༌ཞའེ༌ སྒོས༌དོམ༌ ཚང༌མ༌ གྲུབ༌ཅེས༌ མ༌ཚད༌, ཞན༌མ༌གུན༌ལའང༌ ཡ༌ཏོ༌ ཅོ༌ ཉན༌ཨིན༌། 9 ཀ༌ཟུག༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌།
"ཁོང༌ངི༌ སྒོས༌དོམ༌ ཡོད༌ཁན༌ ཚང༌མ༌ལ༌ སྙིང༌ ཕེས༌ཏེ༌ སལ༌ལ༌ནོག༌,
ཁོང༌ དྲང༌པོ༌ ཨིན༌ཁན༌བོ༌ ཏུས༌གྱུན༌ ལུས༌ཨིན༌།"‡9:9 སུང༌གུར༌རི༌ སྤེ༌ཆའེ༌ 112:9
10 ཡང༌ ཞིང༌བད༌པའ༌ དཀོན༌མཆོག༌གི༌ ས༌འོན༌ རིག༌ག༌ ཙོགས༌ལ༌ ཏ༌གིའང༌ སལ༌ལ༌ ཛད༌ད༌ནོག༌། ཏེན༌ན༌ ཙོགས༌ལ༌ ཁོང༌ངི༌ ཁྱོ༌ཞ༌གུན༌ནི༌ སྒོས༌དོམ༌གུན༌ རིག༌ག༌ ཛད༌ཏེ༌ ཁྱོ༌ཞ༌གུན༌ལ༌ ཡོད༌ཁན༌གུན༌ ཕེལ༌ ཅུག༌ག༌ ཛད༌ད༌ནོག༌། ཏེ༌ནེ༌ ཁྱོ༌ཞ༌གུན༌ནི༌ ནང༌ང༌ སྙིང༌ ཕེས༌ཏེ༌ མང༌ང༌ ཏང༌ཅེས༌སི༌ སྟོན༌ཐོགས༌ སྨིན༌ཨིན༌།
11 འོ༌ན༌ ཏུས༌གྱུན༌ སྙིང༌ ཕེས༌ཏེ༌ ཏང༌ཅེས༌སི༌ ཕིའ༌, ཁྱོ༌ཞ༌གུན༌ལ༌ ཅི༌ས༌ཐོག༌ནེ༌ ཅིན༌ལབས༌ སལ༌ལ༌ ཛད༌ཨིན༌། ཡང༌ ནམ༌ ང༌ཞའེ༌ ཁྱོ༌ཞ༌གུན༌ནི༌ ཀ༌ནེ༌ ཏེ༌ པེ༌ནེ༌གུན༌ ཁྱེར༌ཏེ༌ སྒོས༌དོམ༌ ཡོད༌ཁན༌གུན༌ལ༌ ཏང༌ང༌ཅིག༌, ཁོང༌གུན༌ནི༌ དཀོན༌མཆོག༌ག༌ ཐུག༌རྗེ༌ཆེ༌ ཞུའ༌ནོག༌། 12 ཏེ༌ནེ༌ འི༌ ཏང༌ཅེས༌ཅན༌ནི༌ ཞབ༌སྟོག༌པའེ༌ བྲས༌བུ༌ ཟང༌པོ༌ སྨིན༌ན༌ནོག༌, ཏང༌པོ༌ ཡེ༌རུ༌ཤ༌ལེམ༌མི༌ ཏད༌པ༌ཅན༌གུན༌ལ༌ སྒོས༌དོམ༌གུན༌ ཐོབ༌ཅེས༌ ཡང༌ ཉིས༌པ༌ ཁོང༌གུན༌ནི༌ ཐད༌པོ༌ ཉམ༌པོ༌ དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཅེས༌གུན༌ ཨིན༌ནོག༌།
13 ཁྱོ༌ཞ༌གུན༌ནི༌ ཞབ༌སྟོག༌གི༌ བྲས༌བུའི༌, ཁོང༌གུན༌ནི༌ དཀོན༌མཆོག༌ག༌ སྤལ༌ ཐོབ༌ཅུག༌ག༌ ནོག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ཁོང༌གུན༌ དང༌ ཏད༌པ༌ ཡོད༌ཁན༌ ཚང༌མ༌ལ༌, སྙིང༌ ཕེས༌ཏེ༌ ཏང༌ཅེས༌པོ༌ གྱུད༌ཏེ༌, ཁྱོ༌ཞ༌གུན༌ མ༌ཤི༌ཀའེ༌ གའ༌མོའེ༌ ནས༌ཚུལ༌ ཁའ༌ཉན༌ཁན༌ ཨིན༌ཁན༌བོ༌, ལྟན༌ན༌ནོག༌། 14 ཡང༌ དཀོན༌མཆོག༌གི༌ ཁྱོ༌ཞ༌གུན༌ལ༌ སལ༌ལ༌ ཛད༌ཁན༌ནི༌ ཐུག༌རྗེ༌ ཁྱོ༌ཞ༌གུན༌ནི༌ ནང༌ནེ༌ ལུད༌ཨིན༌ ཡོད༌ཅེས༌པོའེ༌, ཁོང༌གུན༌ནི༌ སྙིང༌ནེ༌ ཁྱོ༌ཞ༌གུན༌ནི༌ ཕིའ༌ མོས༌ལམ༌ ཞུའ༌ནོག༌། 15 ཙམ༌ཤིག༌གི༌ ཧ༌ལས༌ཤེས༌ དང༌ ཚིགས༌ གྱུད༌ཏེ༌ ཤད༌ མི༌ཉན༌ཅེས༌སི༌ དཀོན༌མཆོག༌གི༌ ཐར༌པའེ༌ སྐྱེས༌སི༌ ཕིའ༌, དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཤིག༌།