ཐེ༌ས༌ལོ༌ནི༌ཀའེ༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌ ཉིས༌པ༌།
ཐེ༌ས༌ལོ༌ནི༌ཀའེ༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌ ཉིས༌པའེ༌ སྐོར༌།
འི༌ ཆག༌བྲིས༌པོ༌ གཙོ༌བོ༌ ཡེ༌ཤུའི༌ སྐུ༌ཚབས༌ པ༌འུ༌ལུའི༌ བྲིའ༌ ཛད༌ཁན༌བོ༌ ང༌དང༌ང༌ འི༌ ཆག༌བྲིས༌ དང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ནི༌ སྤང༌པོ༌གུན༌ནེ༌ གྱུས༌ ཆའ༌ནོག༌།
ཆོས༌སི༌ ཁས༌པ༌གུན༌ནི༌ སམ༌མ༌ནོག༌, པ༌འུ༌ལུའི༌ འི༌ ཆག༌བྲིས༌པོ༌ ཀོ༌རིན༌ཐི༌ གྱལ༌སའེ༌ ནང༌ང༌ ཡོད༌ ཟ༌ནེ༌, ནམ༌ སི༌ལས༌ དང༌ ཏི༌མོ༌ཐི༌ ཉིས༌ཀོ༌ ཐེ༌ས༌ལོ༌ནི༌ཀ༌པ༌གུན༌ལ༌ ཆག༌བྲིས༌ ཏང༌པོ༌བོ༌ ཁྱེར༌ཏེ༌ ལོགས༌ཏེ༌ ལེབས༌ཏེ༌ སྟིང༌ནེ༌ བྲིའ༌ ཛད༌ཏེ༌ ཨིན༌ནོག༌། ཁོང༌ངི༌ འི༌ ཆག༌བྲིས༌པོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ རྕུ༌དགུ༌ནེ༌ ཉི༌ཤུའི༌ ཉེ༌ཁོར༌ལ༌ བྲིའ༌ ཛད༌ཏེ༌ ཨིན༌ནོག༌།
པ༌འུ༌ལུའི༌ ཐེ༌ས༌ལོ༌ནི༌ཀའེ༌ ནང༌ང༌ ཡོད༌ཁན༌ནི༌ མ༌ཤི༌ཀ༌པ༌གུན༌ལ༌, འི༌ ཆག༌བྲིས༌ བྲི༌ཅེས༌སི༌ གྱུན༌ཚན༌གུན༌ ནི༌:-
ཏང༌པོ༌, ཁོང༌གུན༌ ཏད༌པ༌, ཅམས༌པ༌ དང༌ ཟོད༌པའེ༌ ནང༌ང༌ ལྡན༌ཁན༌བོའེ༌ ཕིའ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌ ཟེར༌ཏེ༌ སྤོས༌པ༌ ཏང༌ཅེས༌།
ཉིས༌པ༌, མ༌ཤི༌ཀ༌ ལོགས༌ཏེ༌ སྐྱོད༌ ཟ༌ནེ༌, ཁོང༌གུན༌ལ༌ ནགས༌བར༌དོ༌གུན༌ནི༌ ཀ༌ནེ༌ ཐར༌པ༌ ཡང༌ ཏད༌པ༌ མེད༌ཁན༌གུན༌ལ༌ ཁྲིམས༌ཅད༌ ཁྱོང༌ང༌ ཛད༌ཅེས༌པོ༌ ཤད༌ཅེས༌།
སུམ༌པ༌, མ༌ཤི༌ཀ༌ ལོགས༌ཏེ༌ སྐྱོད༌ ཚར༌ཏེ༌ ཨིན༌ནོག༌ ཟེར༌ཁན༌ནི༌ འུ༌ཡ༌བོ༌ ཟུན༌བ༌ ཨིན༌ནོག༌ ཟེར༌ཏེ༌ ཤད༌ཅེས༌།
ཞི༌པ༌, ཁོང༌ངི༌ ལབ༌ཞ༌གུན༌ ཁོང༌རང༌ངི༌ ཤད༌ཏེ༌ ཡ༌ ཆག༌བྲིས༌ བྲིས༌ཏེ༌ ཨིན༌གྲོ༌ ཏེ༌གུན༌ལ༌ ཁའ༌ཉན༌ཅེས༌སི༌ ཕིའ༌ སྤོས༌པ༌ ཏང༌ཅེས༌།
ལྔ༌པ༌, ཁའ༌ མ༌ཉན༌ཁན༌གུན༌ ཀ༌ཟུག༌གི༌ སྐྱོང༌ཨིན༌ ཏེ༌བོའེ༌ སྐོར༌ལ༌ ལབ༌ཞ༌ ཏང༌ཅེས༌།།
1
པ༌འུ༌ལུའི༌ ཆོགས༌ནེ༌ ཇུ༌།
1:1 ནེ༌ 2
1 ང༌, པ༌འུ༌ལུ༌ ཡང༌ ངའེ༌ ཕྲོ༌པ༌ སི༌ལས༌ *1:1 གིརིས༌སི༌ སྐད༌དི༌ ནང༌ང༌ སིལ༌ཝ༌ནས༌ ཟེར༌ཏེ༌ བྲིས༌ཏེ༌ དུག༌། དང༌ ཏི༌མོ༌ཐི༌ གུན༌ནི༌ ཆོགས༌ནེ༌ འི༌ ཨི༌གེ༌བོ༌ དཀོན༌མཆོག༌ ང༌དང༌ངི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཨིན༌ཁན༌ནི༌ ཐེ༌ས༌ལོ༌ནི༌ཀའེ༌ ཆོས༌ཚོགས༌ལ༌ བྲིའད༌།
2 ང༌དང༌གུན༌ནི༌ ཡབ༌ དཀོན༌མཆོག༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ དང༌ ཞི༌དེ༌ ཁྱོ༌ཞའ༌ ཚང༌མ༌ལ༌ ཐོབ༌ཤིག༌།
ནགས༌སི༌ ཏུས༌ལ༌ སྤོས༌པ༌ ཛདས༌།
1:3 ནེ༌ 12
3 ཅེས༌པའེ༌ སྤུན༌གུན༌, ཁྱོ༌ཞའེ༌ ཕིའ༌ ང༌ཞ༌གུན༌ནི༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཅེས༌པོ༌ འོས༌པ༌ཞིག༌ ཨིན༌ནོག༌, ཅིའ༌ཟེར༌ན༌ ཞག༌པ༌སང༌ཞག༌ ཁྱོ༌ཞ༌གུན༌ ཏད༌པའེ༌ ནང༌ང༌ ལྡན༌ཨིན༌ སོང༌ཏེ༌ ཅིག༌ དང༌ ཅིག༌ག༌ ཅེས༌པ༌ ཅོ༌ཅེས༌པོ༌ ཕེལ༌ཨིན༌ ཆ༌དུག༌། 4 ཏེ༌བོའེ༌ཕིའ༌ ང༌ཞའེ༌, ཁྱོ༌ཞ༌གུན༌ལ༌ རྡུག༌ངལ༌ དང༌ བར༌དོ༌ ཐོང༌ནའང༌, ཁྱོ༌ཞ༌གུན༌ནི༌ སྙིང༌རུས༌ དང༌ ཏད༌པའེ༌ ནང༌ང༌ སྟན༌པོ༌ ཡོད༌ཁན༌བོ༌ དཀོན༌མཆོག༌གི༌ ཞན༌ ཆོས༌ཚོགས༌གུན༌ནི༌ ནང༌ང༌ མ༌ སྤལ༌ངམས༌ ཉམ༌པོ༌ ཤད༌དད༌། 5 འི༌ ནས༌ལུག༌པོའེ༌ དཀོན༌མཆོག༌གི༌ སྡིག༌པའེ༌ཀ༌ ཁྲིམས༌ཅད༌ ཅོའ༌ ཛད༌ཅེས༌པོ༌, འོས༌པ༌ ཨིན༌ཁན༌ ལྟན༌དུག༌, མ༌ཚད༌ ཁྱོ༌ཞ༌གུན༌ ཁོང༌ངི༌ གྱལ༌སྲིད༌དི༌ ཕིའ༌ འོས༌པ༌ཅན༌ རིག༌ གྱུར༌ ཅུག༌ག༌ནོག༌, ཀ༌བོའེ༌ ཕིའ༌ ཁྱོ༌ཞ༌གུན༌ལ༌ རྡུག༌ངལ༌ ཐོང༌ཨིན༌ ཨིན༌ནོག༌། 6 དཀོན༌མཆོག༌ ནི༌ འོས༌པ༌ ཛད༌ཁན༌ ཞུགས༌ཏེ༌ ཨིན༌། ཁོང༌ངི༌ ཁྱོ༌ཞའ༌ ནགས༌ ལྟན༌ཁན༌གུན༌ལ༌ ནགས༌ ལྟན༌ན༌ ཛད༌ཨིན༌།
7 གཙོ༌བོ༌ ཡེ༌ཤུ༌ ནམ༌ཁའ༌ནེ༌ རང༌ངི༌ སྟོབས༌ཤུག༌ཅན༌ནི༌ ཕོ༌ཉ༌གུན༌ དང༌ མེ༌ལྗབ༌ ཆེན༌མོ༌ ཉམ༌པོ༌ སྔོན༌ ཟ༌ནེ༌, ཁོང༌ངི༌ ཁྱོ༌ཞའ༌ ནགས༌ ཁུར༌ཁན༌གུན༌ དང༌ ང༌ཞ༌གུན༌ནའང༌ ཐར༌ ཅུག༌ག༌ ཛད༌ཨིན༌། 8 ཡང༌ དཀོན༌མཆོག༌ མ༌ཤེས༌ཁན༌ དང༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ གའ༌མོའེ༌ ནས༌ཚུལ༌ལ༌ ཁའ༌ མ༌ཉན༌ཁན༌གུན༌ལ༌ མེའེ༌ ཆད༌པ༌ ཕོག༌ཨིན༌། 9 ཏེ༌གུན༌ལ༌ ཐའ༌མེད༌པའེ༌ རྡུག༌ངལ༌ལི༌ ཆད༌པ༌ ཕོག༌ཨིན༌, ཡང༌ ཁོང༌གུན༌ གཙོ༌བོ༌ དང༌ ཁོང༌ངི༌ ཟིར༌རྗིད༌ཅན༌ནི༌ ཝང༌གུན༌ནེ༌ སོ༌སོ༌ ཕེས༌ཏེ༌ བོར༌ཨིན༌། 10 ཁོང༌ ཏེ༌ ཞག༌ག༌ ཕེབས༌ས༌ཅིག༌, ཁོང༌ང༌ ཁོང༌ངི༌ དམ༌པའེ༌ མི༌གུན༌ནི༌ ཆོགས༌ནེ༌ སྤལ༌ ཐོབ༌ཨིན༌, ཡང༌ ཁོང༌ངི༌ཀ༌ ཏད༌པ༌ ཁྱོང༌ཁན༌ ཚང༌མའེ༌ ཁོང༌ང༌ སྟོད༌པ༌ ཕུལ༌ཨིན༌། ཁྱོ༌ཞ༌གུན༌ནའང༌ ཏེ༌གུན༌ནི༌ ཕྲོའ༌ ཨིན༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ང༌ཞའེ༌ སྤང༌པོ༌ ཏང༌ཁན༌གུན༌ནི༌ཀ༌ ཏད༌པ༌ ཁྱོངས༌ཏེ༌ ཨིན༌ནོག༌།
11 ཏེན༌ན༌བོའེ༌ཕིའ༌ ང༌ཞ༌གུན༌ནི༌ ཏུས༌གྱུན༌ འི༌ མོས༌ལམ༌གུན༌ ཞུའད༌, ཁྱོ༌ཞ༌གུན༌ལ༌ དཀོན༌མཆོག༌གི༌ བོད༌ད༌ ཛད༌ཁན༌ནི༌ འོས༌པའེ༌ མི༌ཚེ༌ རིག༌ ཕུད༌ཅུག༌ག༌ ཛད༌ཤིག༌། ཡང༌ ཁོང༌ངི༌ ཤེད༌ གྱུད༌ཏེ༌ ཁྱོ༌ཞ༌གུན༌ནི༌ ཏད༌པའེ༌ ལས༌ ཟང༌པོ༌ ཅོ༌ཅེས༌སི༌ དོད༌པ༌ ཡོད༌ཁན༌གུན༌ གྲུབ༌ ཅུག༌ག༌ ཛད༌ཤིག༌། 12 ཏེ༌ནེ༌ ཁྱོ༌ཞའེ༌ ཏེ༌ཙོགས༌སི༌ མི༌ཚེ༌ ཕུད༌ཅེས༌སི༌ ཞས༌ཏེ༌, ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཚན༌ལ༌ རྩི༌ཝ༌ ཐོབས༌ཏེ༌, ཁྱོ༌ཞ༌གུན༌ལའང༌ ཁོང༌ ཉམ༌པོ༌ རྩི༌ཝ༌ ཐོབ༌ཨིན༌། འི༌ ཚང༌མ༌ ང༌དང༌གུན༌ནི༌ གཙོ༌བོ༌ དང༌ དཀོན༌མཆོག༌ ཡེ༌ཤུ༌ མ༌ཤི༌ཀའེ༌ ཐུག༌རྗེའེ༌ གྱུད༌ཏེ༌ གྲུབ༌ ཐུབ༌ཨིན༌།