2
གཙོ༌བོ༌ ཡེ༌ཤུ༌ ལོགས༌ཏེ༌ ཕེབས༌ཤེས༌སི༌ སྐོར༌།
2:1 ནེ༌ 12
1 སྤུན༌གུན༌ ཏ༌ ཁྱོ༌ཞའ༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབ༌ཤེས༌སི༌ ཏུས༌ དང༌ ཁོང༌ངི༌ སྐུན༌དུན༌ལ༌ ང༌དང༌ ཚང༌མ༌ ཛོམ༌ཅེས༌སི༌ སྐོར༌ལ༌ འི༌ ཞུ༌ཝ༌བོ༌ ཞུའད༌། 2 ང༌ཞའེ༌ ཆོགས༌ནེ༌ ལུང༌སྟན༌ ཡ༌ ལོན༌ ཡ༌ ཨི༌གེ༌ དུག༌ ཟེར༌ཏེ༌, གལ༌ཏེས༌ སུ༌ཞིག༌གི༌ གཙོ༌བོ༌ ཡེ༌ཤུ༌ ལོགས༌ཏེ༌ ཕེབ༌ཤེས༌སི༌ ཏུས༌པོ༌ ལེབ༌ ཚར༌ཏེ༌ ཨིན༌ནོག༌ ཟེར༌ན༌, ཁྱོ༌ཞའེ༌ ཏད༌པ༌ ཡ༌ ཐར༌པའེ༌ཀ༌ ཐེ༌ཚོམས༌ མ༌ཅོ༌ཤིག༌། 3 ཇུ༌ཇུ༌ སུ༌ཞིག༌གིའང༌ ཁྱོ༌ཞ༌གུན༌ལ༌ གོབ༌སྐོར༌ མ༌ཅུག༌ཤིག༌ ཅིའ༌ཟེར༌ན༌ ཏེ༌ ཞག༌པོ༌ ཏེ༌ཏེ༌ཚོག༌པ༌ མི༌ལེབ༌, ནམ༌ཚོག༌པ༌ དཀོན༌མཆོག༌ག༌ ངོ༌ལོག༌ ཅོ༌ཅེས༌སི༌ ཏུས༌པོ༌ མི༌ལེབ༌ ཡང༌ བཀའ༌ཁྲིམས༌ མེད༌ཁན༌ནི༌ མི༌བོ༌ སྔོན༌ མི༌སྔོན༌, ཁོ༌ ཁྲེས༌སྟོར༌ ཆ༌ཅེས༌སི༌ ཆོགས༌ལ༌ ཆེན༌ ཨིན༌ནོག༌། 4 མི༌གུན༌ནི༌ དཀོན༌མཆོག༌ རྩི༌ཁན༌ ཡ༌ ཅོལ༌ཁན༌ ཚང༌མ༌ལ༌ འི༌ མི༌བོའེ༌ གྱབ༌གལ༌ ཅོས༌ཏེ༌ ཁོ༌རང༌ང༌ ཏེ༌གུན༌ནི༌ སང༌ རྩི༌ཝ༌ མང༌ང༌ ཏང༌ང༌ནོག༌། ཁོ༌ དཀོན༌མཆོག༌གི༌ ཆོད༌ཁང༌ངི༌ ནང༌ང༌ ཁྲིས༌སི༌ཀ༌ དུགས༌ཏེ༌ ཁོ༌རང༌ དཀོན༌མཆོག༌ ཨིན༌ ཟེར༌ར༌ནོག༌།
5 ང༌ ཁྱོ༌ཞའ༌ ཉམ༌པོ༌ ཡོད༌ ཟ༌ནེ༌, ཏེ༌གུན༌ནི༌ སྐོར༌ལ༌ ཁྱོ༌ཞ༌གུན༌ལ༌ ཟེར༌ཁན༌གུན༌ ཨིད༌ཏུ༌ མེ༌རག༌ག༌? 6 བཀའ༌ཁྲིམས༌ མེད༌ཁན༌ནི༌ མི༌, ཏུས༌པོའེ༌ སང༌ སྔུན༌ལ༌ སྔོན༌ མ༌ཅུག༌ག༌ གགས༌ཏེ༌ བོར༌ར༌ ཛད༌ཁན༌བོ༌ ཁྱོ༌ཞའ༌ གྱུས༌ཨིན༌ནོག༌། 7 ཤེ༌ཏན༌ནི༌ ཝང༌ངི༌ སང༌ཝའེ༌ ཚུལ༌ལ༌ ལས༌ ཅོ༌ཅེས༌ གོ༌ ཟུག༌ ཚར༌ཏེ༌ ཨིན༌ནོག༌། ཨིན༌ནའང༌ གགས༌ཏེ༌ བོར༌ར༌ ཛད༌ཁན༌བོའེ༌, ཁོ༌ ཏེ༌ཏེ༌ཚོག༌པ༌ གགས༌ཏེ༌ བོར༌ཨིན༌ ནམ༌ཚོག༌པ༌ དཀོན༌མཆོག༌གི༌ ཁོང༌ ཏེ༌ ལམ༌མི༌ ཀ༌ནེ༌ ཐེན༌ན༌ མི༌ཛད༌། 8 ཏེ༌ནེ༌ ཏེ༌ ཁྲིམས༌ མེད༌ཁན༌བོ༌ ཡོང༌ཨིན༌, ཨིན༌ནའང༌ གཙོ༌བོ༌ ཡེ༌ཤུའི༌ འུགས༌ ཅིག༌ ཉམ༌པོ༌ བཀའ༌ སལ༌ཏེ༌, ཁོའ༌ ཕམ༌ཀལ༌ལ༌ ཛད༌ཨིན༌། *2:8 གིརིས༌སི༌ སྐད༌དི༌ ནང༌ང༌ ཁོའ༌ ཁོང༌ངི༌ ཞལ༌ནེ༌ བིང༌ང༌ ཛད༌ཁན༌ནི༌ འུགས༌པོ༌ ཉམ༌པོ༌ མེད༌ཁན༌ ཛད༌ཨིན༌། ཡང༌ ཁོང༌ ཟིར༌རྗིད༌དི༌ ནང༌ང༌ སྐྱོད༌ཅེས༌པོའེ༌, ཁོ༌ མེད༌ཁན༌ ཛད༌ཨིན༌།
9 ཏེ༌ ཁྲིམས༌ མེད༌ཁན༌བོ༌ ཤེ༌ཏན༌ནི༌ སྟོབས༌ ཉམ༌པོ༌ ཡོང༌ཨིན༌, ཡང༌ ཟུན༌མའེ༌ ལྟས༌ དང༌ སྟགས༌ དང༌ ཁྱུད༌དི༌ རིགས༌ ཚང༌མ༌ ལྟན༌ཨིན༌། 10 ཁོའེ༌ ཏེ༌ ཁྲེས༌སྟོར༌ ཆ༌ཅེས༌སི༌ ལམ༌མི༌ཀ༌ གྲུལ༌ཁན༌ ཚང༌མ༌ལ༌ ངན༌པའེ༌ གོབ༌སྐོར༌ སྣ༌ཚོགས༌སི༌ ནང༌ང༌ ཁྱོང༌ཨིན༌, ཅིའ༌ཟེར༌ན༌ ཁོང༌གུན༌ནི༌ སྐྱོབ༌ཐུབ༌ཁན༌ནི༌ ལོན༌ དྲང༌པོའ༌ ཅམས༌པ༌ ཅོའ༌ མི༌རུག༌། 11 ཏེན༌ན༌བོའེ༌ཕིའ༌ དཀོན༌མཆོག༌གི༌ གོབ༌སྐོར༌ ཆེན༌མོ༌ཞིག༌ བྱུང༌ ཅུག༌ག༌ ཛད༌ཨིན༌, ཀ༌བོའེ༌ ཏེ༌གུན༌ལ༌ ཤེ༌ཏན༌ནི༌ ཟུས༌མ༌ ལས༌གུན༌ལ༌ ཨིད༌ཤེས༌ ཅོ༌ཅུག༌ཨིན༌། 12 ཁོང༌གུན༌ནི༌ ལོན༌ དྲང༌པོ༌བོའེ༌ཀ༌ ཏད༌པ༌ མ༌ཅོའ༌, ངན༌པ༌བོའ༌ ཐད༌པོ༌ ཅོ༌ཅེས༌པོའེ༌ ཞས༌ཏེ༌, ཁོང༌གུན༌ནི༌ཀ༌ ཤི༌ཅེས༌སི༌ ཐག༌ཅད༌ སལ༌ཨིན༌།
ཏད༌པའེ༌ ནང༌ང༌ སྟན༌པོ༌ དུག༌ཅེས༌སི༌ སྐོར༌།
2:13 ནེ༌ 17
13 གཙོ༌བོའེ༌ ཅེས༌པ༌ ཛད༌ཁན༌ནི༌ སྤུན༌གུན༌, ང༌ཞའེ༌ ཁྱོ༌ཞ༌གུན༌ནི༌ ཕིའ༌ དཀོན༌མཆོག༌ག༌ ཏུས༌གྱུན༌ ཐུག༌རྗེ༌ཆེ༌ ཞུ༌ཅེས༌པོ༌ འོས༌པ༌ ཚོར༌ར༌རག༌། ཅིའ༌ཟེར༌ན༌ དཀོན༌མཆོག༌གི༌ ཁྱོ༌ཞ༌གུན༌ ཐར༌པའེ༌ ཕིའ༌ ཇིག༌རྟེན༌ ཆགས༌སི༌ སང༌ སྔུན༌ལ༌, དམ༌པའེ༌ ཐུག༌ཉིད༌དི༌ རྩང༌མ༌ ཛད༌ཅེས༌ དང༌ གཙོ༌བོ༌ ཡེ༌ཤུའི༌ སྐོར༌ལ༌ དྲང༌པོའེ༌ ལོན༌བོའེ༌ཀ༌ ཏད༌པ༌ ཅོ༌ཁན༌ གུན༌ གྱུད༌ཏེ༌, ལྡམ༌མ༌ ཛད༌ཏེ༌ ཨིན༌ནོག༌། 14 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྤལ༌ལི༌ ནང༌ང༌ དྲེས༌ ཐུབ༌ཅེས༌སི༌ ཕིའ༌ དཀོན༌མཆོག༌གི༌, ཁྱོ༌ཞ༌གུན༌ ང༌ཞའེ༌ གའ༌མོའེ༌ ནས༌ཚུལ༌ ཤད༌ཁན༌གུན༌ གྱུད༌ཏེ༌, ཐར༌པ༌ ཐོབ༌ཅེས༌ལ༌ བོད༌ད༌ ཛད༌ཏེ༌ ཨིན༌ནོག༌།
15 ཏེ༌བོའེ༌ཕིའ༌ སྤུན༌གུན༌ ང༌ཞའེ༌ ཁའ༌ནེ༌ ཚོར༌ཁན༌ ཡ༌ ཨི༌གེ༌ ནང༌ང༌ བྲིས༌ཁན༌ནི༌ ལབ༌ཞ༌གུན༌ནི༌ཀ༌ ཐེ༌ཚོམས༌ མ༌ཆའ༌ སྟན༌པོ༌ དུག༌ཤིག༌།
16 ང༌དང༌ང༌ ཅེས༌པ༌ ཛད༌ཏེ༌ ཐུག༌རྗེ༌ ཟིགས༌ཏེ༌ ཐའ༌མེད༌པའེ༌ སེམས༌དེ༌ དང༌ ཧ༌ལས༌སི༌ རེ༌ཝ༌ཞིག༌ སལ༌ལ༌ ཛད༌ཁན༌ནི༌, ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ དང༌ དཀོན༌མཆོག༌ ང༌དང༌ངི༌ ཡབ༌ ཉིས༌ཀོའེ༌, 17 ཁྱོ༌ཞའེ༌ སེམས༌ལ༌, ལས༌ དང༌ སྤེ༌ར༌ ཟང༌པོ༌ གུན༌ནི༌ ནང༌ང༌, སྤོས༌པ༌ དང༌ སྟོབས༌ སལ༌ལ༌ ཛད༌ཤིག༌།
*2:8 2:8 གིརིས༌སི༌ སྐད༌དི༌ ནང༌ང༌ ཁོའ༌ ཁོང༌ངི༌ ཞལ༌ནེ༌ བིང༌ང༌ ཛད༌ཁན༌ནི༌ འུགས༌པོ༌ ཉམ༌པོ༌ མེད༌ཁན༌ ཛད༌ཨིན༌།