ཏི༌མོ༌ཐིའ༌ པ༌འུ༌ལུའི༌ ཆག༌བྲིས༌ ཉིས༌པ༌།
ཏི༌མོ༌ཐིའ༌ པ༌འུ༌ལུའི༌ ཆག༌བྲིས༌ ཉིས༌པའེ༌ སྐོར༌།
ང༌དང༌ང༌ འི༌ ཆག༌བྲིས༌ གཙོ༌བོ༌ ཡེ༌ཤུའི༌ སྐུ༌ཚབས༌ པ༌འུ༌ལུའི༌ བྲིའ༌ ཛད༌ཁན༌བོ༌ གྱུས༌ཨིན༌ནོག༌, ཅིའ༌ཟེར༌ན༌ ཁོང༌ངི༌ འི༌ ཆག༌བྲིས༌སི༌ ནང༌ང༌ ང༌དང༌གུན༌ལ༌ ཤད༌ད༌ ཛད༌དུག༌།
ཆོས༌སི༌ ཁས༌པ༌གུན༌ གྱུད༌ཏེ༌ འི༌ ཆག༌བྲིས༌པོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌, ལོ༌ 32 ནེ༌ 33 ཉེ༌ཁོར༌ལ༌, པ༌འུ༌ལུ༌ ལན༌ ཉིས༌པ༌ རོམ༌མི༌ གྱལ༌སའེ༌ ཙོན༌ཁང༌ངི༌ ནང༌ང༌ ཡོད༌ཏུས༌ བྲིའ༌ ཛད༌ཁན༌བོ༌ ང༌དང༌གུན༌ལ༌ གྱུས༌ ཆའ༌ནོག༌།
པ༌འུ༌ལུའི༌ གྱུན༌ཚན༌ སུམ༌མི༌ ཕིའ༌ འི༌ ཆག༌བྲིས༌པོ༌ བྲིའ༌ ཛདས༌།
ཏང༌པོ༌, ཁོང༌ངི༌ ཏི༌མོ༌ཐིའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཆག༌ལས༌པོའེ༌ ནང༌ང༌ ཨིད༌ཤེས༌ཅན༌ དུག༌ཅེས༌ལ༌ ཨིད༌ཏུ༌ སྐུལ༌ལ༌ ཐད༌དད༌པིན༌།
ཉིས༌པ༌, མ༌ཤི༌ཀ༌པ༌ ཏད༌པ༌ཅན༌གུན༌ལ༌ རོམ༌མི༌ གྱལ༌པོ༌ ནེ༌རོའེ༌ རྡུག༌ངལ༌ ལྟན༌ཅེས༌པོའེ༌ ཚེར༌ཁ༌ ཡོད༌པིན༌། ཁོང༌ངི༌ ཏི༌མོ༌ཐིའ༌ གའ༌མོའེ༌ ནས༌ཚུལ༌ སྐྱོབ༌ཅེས༌ དང༌, ཁོའ༌ རྡུག༌ངལ༌ ཐོང༌ནའང༌ གའ༌མོའེ༌ ནས༌ཚུལ༌ལི༌ ཆོས༌ཤད༌ཨིན༌ དུག༌ཅེས༌ལ༌, མ༌སྲན༌ཏྲེ༌ སྤང༌པུད༌ད༌ ཛདས༌།
སུམ༌པ༌, ལུ༌ཀ༌ ཅིག༌པོའེ༌ མན༌པ༌, ཚང༌མའེ༌ ཁོང༌ ཕངས༌ཏེ༌ སོང༌ པ༌སང༌, པ༌འུ༌ལུའི༌ ཏི༌མོ༌ཐི༌ ཁོང༌ ཡོད༌ས༌ ཡོང༌ཅེས༌སི༌ དོད༌པ༌ ཅོའད༌པིན༌༎
1
པ༌འུ༌ལུའི༌ ཆོགས༌ནེ༌ ཇུ༌།
1:1 ནེ༌ 2
1 འི༌ ཨི༌གེ༌བོ༌ དཀོན༌མཆོག༌གི༌ ཐུག༌གོངས༌ ནང༌ཞིན༌, མ༌ཤི༌ཀ༌ ཡེ༌ཤུའི༌ སྐུ༌ཚབས༌ལ༌ ལྡམ༌མ༌ ཛད༌ཁན༌ནི༌ ང༌ པ༌འུ༌ལུའི༌ ཆོགས༌ནེ༌ ཨིན༌། མ༌ཤི༌ཀ༌ ཡེ༌ཤུའི༌ ནང༌ང༌ ཏད༌པ༌ གྱུད༌ཏེ༌, ཐའ༌མེད༌པའེ༌ མི༌ཚེ༌ སལ༌ཅེས༌སི༌ ཁོང༌ངི༌ ཞལ༌ཆད༌པོའེ༌ སྐོར༌ལ༌ ཤད༌ཅེས༌ལ༌, ང༌ ཀལ༌ལ༌ ཛད༌ཏེ༌ ཨིན༌།
2 འི༌ ཨི༌གེ༌བོ༌ ངའེ༌ ཅེས༌པའེ༌ བུ༌ཚ༌ ཙོགས༌ ཏི༌མོ༌ཐིའ༌ བྲིའད༌། དཀོན༌མཆོག༌ ཡབ༌ དང༌ ང༌དང༌གུན༌ནི༌ གཙོ༌བོ༌ མ༌ཤི༌ཀ༌ ཡེ༌ཤུའི༌, ཁྱོ༌རང༌ང༌ ཐུག༌རྗེ༌, སྙིང༌རྗེ༌ དང༌ ཞི༌དེ༌ སལ༌ཤིག༌།
པ༌འུ༌ལུའི༌ ཏི༌མོ༌ཐིའ༌ སྤོས༌པ༌།
1:3 ནེ༌ 18
3 ཏི༌མོ༌ཐི༌, ཁྱོ༌རང༌ངི༌ ཕིའ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌, ཁོང༌ང༌ ངའེ༌ སེམས༌ ལག༌མོ༌ ཉམ༌པོ༌ ཞབ༌སྟོག༌ ཞུའད༌, ཀ༌ཟུག༌ ངའེ༌ ཕ༌མེས༌པོ༌གུན༌ནི༌ ཞུས༌ཏེ༌ ཨིན༌པིན༌, ཉིན༌ཚན༌ མེད༌པ༌ ངའེ༌ མོས༌ལམ༌མི༌ ནང༌ང༌ ཁྱོ༌རང༌ ཨིད༌ཏུ༌ ཅོའད༌། 4 ང༌དང༌གུན༌ བེ༌ཏེ༌ ཆ༌ ཟ༌ནེ༌, ཁྱོ༌རང༌ངི༌ ཆི༌མ༌ ཨིད༌ཏུ༌ ཡོངས༌ཏེ༌, ང༌ ཁྱོ༌རང༌ ཉམ༌པོ༌ ཐུག༌ཅེས༌སི༌ དོད༌པ༌ སྲན༌ཏྲེ༌ རག༌། ང༌དང༌གུན༌ ཡང༌སྐྱར༌ ཉམ༌པོ༌ ཛོམ༌མ༌ཅིག༌, ངའ༌ སྐྱིད༌པོའེ༌ གང༌ཅེས༌ རག༌།
5 ང༌ ཁྱོ༌རང༌ངི༌ དེན༌བའེ༌ ཏད༌པ༌བོ༌ ཨིད༌ཏུའ༌ ཡོངས༌, ཀ༌བོ༌ སྔུན༌ལ༌ ཁྱོ༌རང༌ངི༌ ཨ༌བི༌ ལུ༌འེས༌ དང༌ ཁྱོ༌རང༌ངི༌ ཨ༌མ༌ ཨེའུ༌ནི༌ཀེ༌ གུན༌ནི༌ ཅོའད༌པིན༌། ཏེན༌ན༌ ཏད༌པ༌བོ༌ ཁྱོ༌རང༌ངི༌ ནང༌ང༌ དག༌སའང༌ ཡོད༌ཅེས༌པོ༌ ང༌ ལོ༌ཁྱེལ༌ རག༌། 6 ཏེན༌ན༌ གྱུན༌ཚན༌བོའེ༌ ཕིའ༌ ངའེ༌ ཁྱོ༌རང༌ངི༌ཀ༌ ལག༌པ༌ བོར༌ ཟ༌ནེ༌, དཀོན༌མཆོག༌གི༌ སལ༌ལ༌ ཛད༌ཁན༌ནི༌ ཁྱུད༌པོ༌ སྟན༌པོ༌ དང༌ གྱས༌ ཅུགས༌ཅེས༌ལ༌ ཨིད༌ཏུ༌ སྐུལ༌ལད༌། 7 དཀོན༌མཆོག༌གི༌ ང༌དང༌གུན༌ལ༌ ཇིག༌ཤེས༌ དང༌ སེམས༌ཤུགས༌ མེད༌ཁན༌ནི༌ སེམས༌ཞིག༌ སལ༌ལ༌ མ༌ཛད༌ད༌ སྟོབས༌, ཅེས༌པ༌ དང༌ རང༌སེམས༌ཅུན༌ ཐུབ༌ཁན༌ནི༌ སེམས༌ཞིག༌ སལ༌ལ༌ ཛད༌ཏེ༌ ཨིན༌ནོག༌།
8 ཏེ༌བོའེ༌ཕིའ༌ ང༌དང༌ངི༌ གཙོ༌བོ༌ མ༌ཤི༌ཀའེ༌ སྐོར༌ལ༌ ཞན༌མ༌གུན༌ལ༌ ཤད༌ཅེས༌ ཡང༌ ཁོང༌ངི༌ ཏོན༌ལ༌ ང༌ ཙོན༌ནི༌ ནང༌ང༌ ཡོད༌ཁན༌བོའ༌, ཁྱོ༌རང༌ ཁྲེལ༌ མ༌ཁྲེལ༌། དཀོན༌མཆོག༌གི༌ ཁྱོ༌རང༌ང༌ སལ༌ཁན༌ནི༌ སྟོབས༌ ཉམ༌པོ༌ གའ༌མོའེ༌ ནས༌ཚུལ༌ ཤད༌ཅེས༌སི༌ ནང༌ང༌, ང༌ ཉམ༌པོ༌ ནགས༌བར༌དོ༌ ཁུར༌ཅེས༌སི༌ ཕིའ༌ གྲལ༌གྲིག༌ ཅོས༌། 9 དཀོན༌མཆོག༌གི༌ ང༌དང༌གུན༌ སྐྱོབ༌བ༌ ཛད༌ཏེ༌ མི༌ཚེ༌ དམ༌པ༌ཞིག༌ ཕུད༌ཅེས༌ལ༌ བོད༌ད༌ ཛད༌ཏེ༌ ཨིན༌ནོག༌། འི༌བོ༌ ང༌དང༌རང༌ངི༌ ལས༌ ཅོ༌ཁན༌བོའེ༌ ཞས༌ཏེ༌ མན༌པ༌, ཁོང༌ངི༌ ཐབས༌ དང༌ ཐུག༌རྗེ༌ ཞས༌ཏེ༌ ཨིན༌ནོག༌། ཏུས༌ གོ༌ཟུག༌གི༌ སང༌ སྔུན༌ལ༌, འི༌ ཐུག༌རྗེ༌བོ༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ ཁོང༌ངི༌ ང༌དང༌གུན༌ལ༌ སལ༌ལ༌ ཛད༌ཅེས༌པོ༌ ཨིན༌པིན༌། 10 ཏ༌ མ༌ཤི༌ཀ༌ ཡེ༌ཤུ༌ ང༌དང༌ངི༌ སྐྱབ༌གོན༌ ཕེབ༌ཅེས༌པོའེ༌, དཀོན༌མཆོག༌གི༌ ཏེ༌གུན༌ སལ༌པོ༌ ཅོས༌ཏེ༌ སྔོན༌ ཅུག༌ག༌ ཛད༌ཏེ༌ ཨིན༌ནོག༌། མ༌ཤི༌ཀ༌ ཡེ༌ཤུའི༌ ཤི༌ཅེས༌སི༌ ཝང༌བོ༌ མེད༌ཁན༌ ཅོའ༌ ཛད༌ཏེ༌, གའ༌མོའེ༌ ནས༌ཚུལ༌ གྱུད༌ཏེ༌ དེན༌བའེ༌ མི༌ཚེ༌ དང༌ ཏུས༌གྱུན༌ སོན༌ཏེའ༌ ལུས༌ཤེས༌སི༌ ལམ༌བོ༌ ལྟན༌ན༌ ཛད༌ཏེ༌ ཨིན༌ནོག༌། 11 འི༌ གའ༌མོའེ༌ ནས༌ཚུལ༌ལི༌ ཏོན༌ལ༌ དཀོན༌མཆོག༌གི༌ ངའ༌ ཆོས༌ཤད༌ཁན༌, སྐུ༌ཚབས༌ དང༌ གེར༌གན༌ ཞིག༌ ལྡམ༌མ༌ ཛདས༌།
12 ཏེ༌བོའེ༌ཕིའ༌ ངའ༌ འི༌རུ༌ ཙོན༌ཁང༌ངི༌ ནང༌ང༌ རྡུག༌ངལ༌ ཐོང༌ཨིན༌ ཡོད༌། ཨིན༌ནའང༌ ངའ༌ ཏེ༌བོའེ༌ ཕིའ༌ ཁྲེལ༌ལ༌ མེ༌རག༌, ཅིའ༌ཟེར༌ན༌ ང༌ གྱུས༌ཡོད༌ སུའི༌ཀ༌ ངའེ༌ ཏད༌པ༌ ཅོའད༌, ཡང༌ ངའ༌ ཏན༌ཏན༌ ལོ༌ཁྱེལ༌ རག༌, ཁོང༌ ལོགས༌ཏེ༌ སྐྱོད༌ཅེས༌སི༌ ཞག༌ ཚོག༌པ༌ ཁོང༌ངི༌ ཆག༌ག༌ ངའེ༌ སྟད༌ཁན༌ ཚང༌མ༌ སྐྱོབས༌ཏེ༌ བོར༌ར༌ ཛད༌ཨིན༌།
13 ཁྱོ༌རང༌ངི༌ ངའེ༌ ཀ༌ནེ༌ ཚོར༌ཁན༌ ཚང༌མ༌, ལབ༌ཞ༌ ཟང༌པོའེ༌ སྤེ༌ཞིག༌གི༌ ཚུལ༌ལ༌ ཀོལ༌གོ༌ཤེས༌ ཨིན༌ནོག༌། ཁྱོ༌རང༌ང༌ མ༌ཤི༌ཀ༌ ཡེ༌ཤུའི༌ ནང༌ང༌ ཡོད༌ཁན༌ནི༌ ཏད༌པ༌ དང༌ ཅེས༌པ༌ ཉམ༌པོ༌ ཏེ༌གུན༌ ཅོས༌། 14 ཡང༌ ང༌དང༌ངི༌ ནང༌ང༌ ཡོད༌ཁན༌ནི༌ དམ༌པའེ༌ ཐུག༌ཉིད༌དི༌ རོགས༌ གྱུད༌ཏེ༌, དཀོན༌མཆོག༌གི༌ ཁྱོ༌རང༌ངི༌ ལག༌ག༌ སྟད༌ད༌ ཛད༌ཁན༌ནི༌ རིན༌ཅན༌ དེན༌བ༌གུན༌ལ༌ གྱལ༌ལ༌ ཅོས༌ཏེ༌ སྲུང༌སྐྱོབ༌ ཅོ༌གོས༌།
15 ཨ༌སི༌ཨཱ༌ནེ༌ ཨིན༌ཁན༌ནི༌ མ༌ཤི༌ཀའེ༌ ཞབ༌སྟོག༌པ༌ ངའེ༌ ཕྲོ༌པ༌ ཚང༌མའེ༌ ང༌ ཕངས༌ཏེ༌ ཨིན༌ཁན༌བོ༌ ཁྱོ༌རང༌ང༌ གྱུས༌ཨིན༌ནོག༌, པི༌གེ༌ལུས༌ དང༌ ཧེར༌མོ༌གེ༌ནས༌ གུན༌ནིའང༌ ང༌ ཕངས༌ཏེ༌ སོང༌།
16 ཨོ༌ནེས༌སི༌ཕོ༌རུས༌སི༌ ནང༌ཚང༌གུན༌ནི༌ཀ༌ དཀོན༌མཆོག༌གི༌ ཐུག༌རྗེ༌ ཟིགས༌ཤིག༌, ཅིའ༌ཟེར༌ན༌ ང༌ ཙོན༌པ༌ ཨིན༌ ཨིན༌ནའང༌ ཁོ༌ མ༌ནེ༌ མ༌ཁྲེལ༌ལ༌, ལན༌ མང༌པོ༌ ང༌ ཐུག༌ག༌ ཡོངས༌ ཡང༌ སེམས༌སོ༌ ཏངས༌། 17 རོམ༌མི༌ ནང༌ང༌ ལེབས༌ཏེ༌ ཁོའེ༌ ང༌ ཐོབ༌ཐོབ༌ ཚོག༌པ༌ ཀ༌རུང༌ས༌ ཚང༌མ༌ལ༌ ཙལ༌ཏོག༌། 18 མ༌ཤི༌ཀ༌ ལོགས༌ཏེ༌ ཕེབས༌སི༌ ཏུས༌ལ༌, གཙོ༌བོའེ༌ ཁོའ༌ སྙིང༌རྗེ༌ ཛད༌ཤིག༌། ཨེ༌ཕེ༌སས༌སི༌ ནང༌ང༌ ཁོའེ༌ ངའ༌ ཙམ༌ཤིག༌གི༌ ཞབ༌སྟོག༌ གྱལ༌ལ༌ ཅོས༌ཏེ༌ ཞུས༌ཁན༌བོ༌ ཏི༌མོ༌ཐི༌ ཁྱོ༌རང༌ང༌ གྱལ༌ལ༌ ཅོས༌ཏེ༌ གྱུས༌ཨིན༌ནོག༌།