2
ཡེ༌ཤུ༌ མ༌ཤི༌ཀའེ༌ མག༌མི༌ ཟང༌པོ༌།
2:1 ནེ༌ 13
1 ཏི༌མོ༌ཐི༌, ངའེ༌ བུ༌ཚ༌, དཀོན༌མཆོག༌གི༌ ཁྱོ༌རང༌ང༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ སལ༌ལ༌ ཛད༌ཁན༌ནི༌ ཐུག༌རྗེའེ༌ ནང༌ང༌ སྟོབས༌ཅན༌ གྱུར༌། 2 ངའེ༌ མི༌ མང༌པོའེ༌ དུན༌ལ༌ ལབ༌ཞ༌ ཏང༌ཁན༌གུན༌ ཁྱོ༌རང༌ངི༌ ཚོར༌ཏེ༌ ཨིན༌ནོག༌, ཏ༌ ཏེ༌ ལབ༌ཞ༌གུན༌ ཁྱོ༌རང༌ངི༌ ཨིད༌ཤེས༌ཅན༌ནི༌ མི༌གུན༌ལ༌ ལབ༌གོས༌, ཏེ༌ནེ༌ ཞན༌མའ༌ ཤད༌ཅེས༌སི༌ ལོབ༌ཇོང༌ ཁོང༌གུན༌ལ༌ ཐོབ༌ཨིན༌།
3 མ༌ཤི༌ཀ༌ ཡེ༌ཤུའི༌ མག༌མི༌ ཟང༌པོ༌ཞིག༌གི༌ ཚུལ༌ལ༌ ང༌ ཉམ༌པོ༌ བར༌དོ༌གུན༌ ཁུར༌། 4 མག༌མི༌གུན༌ནི༌ མག༌མི༌ མན༌ཁན༌ མི༌གུན༌ནི༌ མི༌ཚེའེ༌ ནང༌ང༌ ཐེས༌སྟོག༌ ཏང༌ང༌ མ༌ནོག༌, ཅིའ༌ཟེར༌ན༌ ཁོང༌གུན༌ནི༌ ཁོ༌རང༌ངི༌ མག༌མི༌ འུ༌སྐྱོང༌ ཐད༌ཅུག༌ཅེས༌སི༌ རྩོན༌གྲུས༌ ཅོའ༌ནོག༌། 5 ཡང༌ རྩལ༌ཡངས༌ རྩེ༌ཁན༌ཞིག༌ག༌ གྱལ༌ཁའེ༌ སོལ༌རས༌ ཐོབ༌བ༌ མ༌ནོག༌, ནམ༌ཚོག༌པ༌ ཁོང༌གུན༌ ཁྲིམས༌སི༌ཀ༌ གྲུལ༌ མི༌གྲུལ༌། 6 ཏེན༌ན༌ ཙོགས༌ལ༌, རྩོན༌གྲུས༌ ཅོ༌ཁན༌ནི༌ ཞིང༌བད༌པ༌, ཁོ༌རང༌ངི༌ ལས༌ ཅོ༌ཁན༌ནི༌ བྲས༌བུ༌ ཉང༌ཁན༌ ཏང༌པོ༌བོ༌ ཨིན༌གོས༌། 7 ངའེ༌ ཅི༌རིག༌ ཟེར༌རད༌, ཏེ༌གུན༌ནི༌ སྐོར༌ལ༌ སམ༌བ༌ ཏོང༌། གཙོ༌བོའེ༌ ཁྱོ༌རང༌ང༌ འི༌ ཚང༌མའ༌ ཧ༌གོ༌ཅེས༌སི༌ ནང༌ང༌ རོགས༌ ཛད༌ཨིན༌།
8 གྱལ༌པོ༌ དཱ༌བིད༌དི༌ པུར༌གྱུད༌, ཡེ༌ཤུ༌ མ༌ཤི༌ཀ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ ཨིན༌ཁན༌བོ༌ ཨིད༌ཏུ༌ ཅོས༌, ཏེ༌བོ༌ ནི༌ ངའེ༌ ཤད༌ཁན༌ནི༌ གའ༌མོའེ༌ ནས༌ཚུལ༌བོ༌ ཨིན༌། 9 ཀ༌བོའེ༌ ཕིའ༌ ང༌ རྡུག༌ངལ༌ ཐོང༌དུག༌, ཡང༌ ཁྲིམས༌ཅག༌ཁན༌ཞིག༌ ཙོགས༌ལ༌ ལྕག༌ཐག༌ ཉམ༌པོ༌ ཅིངས༌ཏེ༌ བོརས༌། ཨིན༌ནའང༌ དཀོན༌མཆོག༌གི༌ བཀའ༌བོ༌ ལྕག༌ཐག༌ག༌ ལྡམས༌ཏེ༌ བོར༌ མི༌ཉན༌། 10 ཏེ༌བོའེ༌ཕིའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མི༌གུན༌ལ༌ ཐར༌པ༌ ཐོབ༌ཅེས༌ལ༌ ང༌ རྡུག༌ངལ༌ ཅི༌ཞིག༌ བྱུང༌ནའང༌ ཁུར༌ཅེས༌ལ༌ ཐད༌པོ༌ ཨིན༌། ཏེ༌ ཐར༌པ༌བོ༌ མ༌ཤི༌ཀ༌ ཡེ༌ཤུའི༌ ནང༌ང༌ ཐའ༌མེད༌པའེ༌ ཟིར༌རྗིད༌ ཉམ༌པོ༌ དུག༌ཅེས༌པོ༌ ཨིན༌།
11 འི༌གུན༌ ཨིད༌ཤེས༌ཅན༌ནི༌ ཟེར༌ལོ༌ ཨིན༌ནོག༌།
"གལ༌ཏེས༌ ང༌དང༌གུན༌ མ༌ཤི༌ཀ༌ ཉམ༌པོ༌ ཤི༌ན༌,
ང༌དང༌གུན༌ ཁོང༌ ཉམ༌པོ༌ སོན༌ཏེའང༌ ལུས༌ཨིན༌།
12 གལ༌ཏེས༌ ང༌དང༌གུན༌ནི༌ རྡུག༌ངལ༌ ཁུར༌ན༌,
ཁོང༌ ཉམ༌པོ༌ ང༌དང༌གུན༌ནི༌ ཝང༌ངའང༌ སྲུལ༌ཨིན༌།
གལ༌ཏེས༌ ང༌དང༌གུན༌ནི༌ ཁོང༌ ཤེས༌ས༌མེད༌ ཟེར༌ན༌,
ཁོང༌ངིའང༌ ང༌དང༌གུན༌ ཤེས༌ས༌མེད༌ མོལ༌ཨིན༌།
13 གལ༌ཏེས༌ ང༌དང༌གུན༌ ཨིད༌ཤེས༌ཅན༌ མ༌ལུས༌ན༌,
ཁོང༌ ཨིད༌ཤེས༌ཅན༌ ཞུགས༌ས༌ནོག༌, ཅིའ༌ཟེར༌ན༌
ཁོང༌ངི༌ ཁོང༌ སུ༌ ཨིན༌ཁན༌བོའེ༌ གྱབ༌གལ༌ མི༌ཛད༌།
དཀོན༌མཆོག༌ ཐུགས༌ཐད༌ ཅུག༌ཁན༌ནི༌ ཞབ༌སྟོག༌པ༌ཞིག༌།
2:14 ནེ༌ 26
14 ཏེ༌ ལབ༌ཞ༌གུན༌ནི༌ སྐོར༌ལ༌ མི༌ཚང༌མ༌ལ༌ ཨིད༌ཏུ༌ སྐུལ༌, ཡང༌ ཏེ༌གུན༌ལ༌ སྤེ༌ར༌ ཁག༌ཅན༌ མན༌ཁན༌ནི༌ཀ༌ ཁྲབ༌ཅེས༌གུན༌ གོག༌ ཟེར༌ཏེ༌ དཀོན༌མཆོག༌གི༌ སྐུན༌དུན༌ལ༌ ལྡམ༌ཞག༌ ཏོང༌། འི༌ཙོགས༌སི༌ ཛིང༌མོའེ༌ ཀ༌ནེ༌ ཕན༌ཐོགས༌ མེད༌པ༌, ཏེ༌བོ༌ ཉན༌ཁན༌ ཏད༌པ༌ཅན༌གུན༌ནི༌ མི༌ཚེ༌ དོད༌མེད༌ ཅོའ༌ནོག༌། 15 དཀོན༌མཆོག༌གི༌ སྐུན༌དུན༌ལ༌ ཁོང༌ ཐུགས༌ཐད༌ ཅུག༌ཁན༌ཞིག༌ ལྟན༌ཅེས༌ལ༌ རྩོན༌གྲུས༌ ཅོས༌། ཁྱོ༌རང༌ ཁྲེལ༌གོས༌ མེད༌ཁན༌ དང༌ དེན༌བའེ༌ བཀའ༌གུན༌ གྱལ༌ལ༌ ཅོས༌ཏེ༌ ཧ༌གོ༌ཅུག༌ ཉན༌ཁན༌ནི༌ ཞབ༌སྟོག༌པ༌ ཟང༌པོ༌ཞིག༌ ཡོང༌གོས༌། 16 ཏོན༌ཏག༌ མེད༌ཁན༌ དང༌ སམ༌བ༌ མེད༌ཁན༌ནི༌ སྤེ༌ར༌ གུན༌ནེ༌ ཐག༌རིང༌ང༌ དུག༌ཤིག༌, ཀ༌གུན༌ནི༌ མང༌ང༌ སྕོད༌པ༌ ངན༌པ༌ ཆོགས༌ལ༌ ཁྲིད༌ཏེ༌ ཁྱེར༌ར༌ནོག༌། 17 ཏེ༌ཙོགས༌སི༌ སྤེ༌ར༌གུན༌ ཤ༌ ཟའ༌ཁན༌ནི༌ མ༌ཁའ༌ ངན༌པ༌ ཙོགས༌ལ༌ གྱས༌ས༌ནོག༌, སྤེར༌ན༌ ཧེ༌མི༌ན༌ཡུས༌ དང༌ པི༌ལི༌དུས༌ གུན༌ ཙོགས༌ ཨིན༌ནོག༌། 18 ཁོང༌གུན༌ནི༌ མ༌ཤི༌ཀའེ༌ ནང༌ང༌ ཏད༌པ༌ཅན༌ ཤི༌ཁན༌གུན༌ སོན༌ཏེའ༌ ལང༌ ཚར༌ཏེ༌ ཨིན༌ནོག༌ ཟེར༌ཏེ༌ དེན༌བའེ༌ ལམ༌བོ༌ ཕངས༌ཏེ༌ ཨིན༌ནོག༌། ཡང༌ ཏེ༌ཟུག༌ ཟེར༌ཏེ༌ ཏད༌པ༌ཅན༌ ཁ༌ཅིག༌གི༌ སོན༌ཏེའ༌ ལང༌ཅེས༌སི༌ རེ༌ཝ༌བོ༌ ཅགས༌ཏེ༌ ཁོང༌གུན༌ནི༌ ཏད༌པ༌ མེད༌ཁན༌ ཅོས༌ཏེ༌ ཨིན༌ནོག༌།
19 ཨིན༌ནའང༌ དཀོན༌མཆོག༌གི༌ དེན༌བ༌བོ༌ རྩིགས༌རྨང༌ ཙོགས༌ལ༌ སྟན༌པོ༌ ལུས༌ཨིན༌ ཀ༌བོའེ༌ཀ༌: "གཙོ༌བོའེ༌ ཁྱེན༌ན༌ནོག༌ ཁོང༌ངི༌ ཨིན༌ཁན༌གུན༌"*2:19 རྩི༌རུག༌གི༌ ཟེར༌ཁན༌ནི༌ སྤེ༌ཆའེ༌ 16:5 ཡང༌ "ཡེ༌ཤུ༌, ངའེ༌ གཙོ༌བོ༌ ཨིན༌ ཟེར༌ཁན༌ ཚང༌མ༌, ངན༌པ༌ ཅོ༌ཅེས༌ནེ༌ གྱུར༌གོས༌" བྲིའ༌ ཛད༌ཏེ༌ ཡོད༌ཏེ༌ ཨིན༌ནོག༌།
20 སྤེར༌ན༌ ནང༌ཚངས༌ ཆུག༌པོ༌ཞིག༌གི༌ ཁང༌པའེ༌ ནང༌ང༌ ནོད༌ ཁ༌ཅིག༌ སེར༌ དང༌ མུལ༌ལི༌ ཡང༌ ཁ༌ཅིག༌ ཤིང༌ དང༌ ཀ༌ལག༌ གུན༌ནི༌ ཅོས༌ཏེ༌ ཡོད༌ཏེ༌ ཨིན༌ནོག༌། རིན༌ཅན༌ནི༌ ནོད༌གུན༌ མིག༌སལ༌ལི༌ གའ༌སྟོན༌ནི༌ ཕིའ༌ ཡང༌ ཁྱེ༌མོ༌ ནོད༌གུན༌ ཞག༌ཏང༌ངི༌ སྒོས༌དོམ༌མི༌ ནང༌ང༌ ཀོལ༌ལ༌ནོག༌། 21 ངའེ༌ སྔུན༌ལ༌ ཟེར༌ཁན༌གུན༌ནི༌ ཀ༌ནེ༌ རྩང༌མ༌ བོར༌ཁན༌གུན༌, མིག༌སལ༌ལི༌ རྩི༌ཝའེ༌ ཕིའ༌ ཀོལ༌ལ༌ ཛད༌ཅེས༌སི༌ ལག༌ཆ༌ རིག༌ གྱུར༌ཨིན༌, དམ༌པ༌ གྱུད༌ཏེ༌ སྤོན༌བོའེ༌ ཕིའ༌ ཕན༌ཐོགས༌ཅན༌ གྱུར༌ཨིན༌, ཡང༌ ལས༌ ཟང༌པོ༌ ཚང༌མ༌ ཅོ༌ཅེས༌ལ༌ གྲལ༌གྲིག༌ དུག༌ཨིན༌།
22 ཞོན༌ནུའི༌ ལུས༌སི༌ དོད༌པ༌ ངན༌པ༌གུན༌ནེ༌ ཤོར༌ཏེ༌ དྲང༌པོ༌ དང༌ ཨིད༌ཤེས༌ཅན༌ནི༌ མི༌ཚེ༌ ཕུད༌ཅེས༌, ཅེས༌པ༌ དང༌, ཞི༌དེ༌ གུན༌ནི༌ གྱབ༌ནེ༌ བང༌ཏོང༌ཤིག༌, ཏེ༌གུན༌ མ༌ཚད༌ ཁྱོ༌ཞའེ༌ བྲེལ༌, སེམས༌ ལག༌མོ༌ ཉམ༌པོ༌ དཀོན༌མཆོག༌ག༌ མོས༌ལམ༌ ཕུལ༌ཁན༌གུན༌ ཉམ༌པོ༌ ལྡན༌ཅུག༌གོ༌ཤེས༌ ཨིན༌ནོག༌།
23 ཡང༌སྐྱར༌ ངའེ༌ ཟེར༌རད༌, སམ༌བ༌ མེད༌ཁན༌ དང༌ ཏོན༌ཏག༌ མེད༌ཁན༌ནི༌ ཛིང༌མོ༌ གུན༌ནི༌ ནང༌ང༌ མ༌དྲེས༌, ཅིའ༌ཟེར༌ན༌ འི༌ཀ༌ནེ༌ ནོལ༌ཅེས༌ ཅིག༌པོ༌ སྨིན༌ན༌ནོག༌། 24 གཙོ༌བོའེ༌ ཞབ༌སྟོག༌པ༌ ཛིང༌མོ༌ མ༌ཏང༌ང༌, མི༌ཚང༌མ༌ལ༌ སྙིང༌རྗེ༌ ལྟན༌ཁན༌, མི༌ སྐྱོང༌པོ༌གུན༌ ཉམ༌པོ༌ ཟོད༌པ༌ཅན༌ ཡང༌ གྱལ༌ལ༌ ཅོས༌ཏེ༌ ལབ༌ཉན༌ཁན༌ཞིག༌ ཡོང༌གོས༌། 25 པས༌མོ༌ ཉམ༌པོ༌ གྱབ༌གལ༌ ཅོ༌ཁན༌གུན༌ལ༌ ལབ༌ཞ༌ ཏོང༌། ཅི༌གྱུས༌, དཀོན༌མཆོག༌གི༌ ཁོང༌གུན༌ནི༌ སྙིང༌གུན༌ གྱུར༌ ཅུག༌ག༌ ཛད༌ཏེ༌ དེན༌བའེ༌ ལབ༌ཞའེ༌ གྱབ༌ནེ༌ གྲུལ༌ཅེས༌ལ༌ སྐབས༌ སལ༌སྲིད༌ཅེས༌ ཨིན༌ནོག༌། 26 ཏེ༌ནེ༌ ཁོང༌གུན༌ སམ༌བ༌ཅན༌ གྱུར༌ཏེ༌ རྡུད༌གུན༌ནི༌ གོ༌བའེ༌ ཟུམས༌ཏེ༌ བོར༌ཏེ༌ ཡོད༌ཁན༌བོའེ༌ ནང༌ནེ༌ ཐར༌ཨིན༌, ཀ༌བོའེ༌ ཁོང༌གུན༌ ཁོའེ༌ དོད༌པ༌ ནང༌ཞིན༌ ཅོ༌ཅུག༌ཅེས༌ལ༌ ཟུམས༌ཏེ༌ ཡོད༌པིན༌།