3
ཐའ༌མའེ༌ ཞག༌གུན༌ནི༌ ཇིགས༌པ༌གུན༌།
3:1 ནེ༌ 9
1 ཏི༌མོ༌ཐི༌, ཐའ༌མའེ༌ ཞག༌གུན༌ནི༌ ནང༌ང༌ མ༌སྲན༌ཏྲེ༌ ཇིགས༌ནང༌ཅན༌ནི༌ ཏུས༌ རིག༌གའང༌ ཡོང༌ཅེས༌པོ༌ ཁྱོ༌རང༌ང༌ གྱུས༌ ཡོང༌གོ༌ཤེས༌ ཨིན༌ནོག༌། 2 སྤེར༌ན༌ མི༌གུན༌ ཁོ༌རང༌ དང༌ ཁོ༌རང༌ངི༌ པེ༌ནེ༌ གུན༌ལ༌ ཡ༌ཤ༌ ཅོ༌ཁན༌, རང༌སྟོད༌ ཏང༌ཁན༌ དང༌ ཕོ༌སོ༌ཅན༌, ཏམ༌ངན༌ ཏང༌ཁན༌, ཁོང༌རང༌གུན༌ནི༌ ཕ༌མ༌གུན༌ནི༌ ཁའ༌ མ༌ཉན༌ཁན༌, ཏྲིན༌ མི༌དྲན༌ཁན༌ དང༌, ཁོང༌གུན༌ནི༌ ཅི༌ཞིག༌གའང༌ དམ༌པ༌ ཐེའ༌ མ༌ནོག༌། 3 ཅེས༌པ༌ མེད༌ཁན༌, ཤགས༌པ༌ མ༌ཏང༌ཁན༌, ཞན༌མ༌གུན༌ནི༌ སྕོད༌པའེ༌ སྐོར༌ལ༌ ངན༌པ༌ ཟེར༌ཁན༌, རང༌སེམས༌ཅུན༌ མ༌ཉན༌ཁན༌, ནགས༌ ལྟན༌ན༌ ཐད༌ཁན༌ དང༌, ཟང༌པོའེ༌ གྱབ༌གལ༌ ཅོ༌ཁན༌ ཨིན༌ནོག༌། 4 ཛ༌འོ༌གུན༌ལ༌ ངོ༌ལོག༌ ཅོ༌ཁན༌, གྱོགས༌པ༌ སམ༌བ༌ མ༌ཏང༌ང༌ ལས༌ ཅོ༌ཁན༌, མངས༌ཏེའང༌ ཕོ༌སོ༌ཅན༌ དང༌, དཀོན༌མཆོག༌གི༌ སང༌ ཇིག༌རྟེན༌ནི༌ སྐྱིད༌པོའ༌ ཡ༌ཤ༌ ཅོ༌ཁན༌ ཡོང༌ཨིན༌། 5 ཁོང༌གུན༌ནི༌ ལྟན༌ཅེས༌སི༌ ཕིའ༌ དཀོན༌མཆོག༌གི༌ སྕོད༌ལམ༌མི༌ ནང༌ང༌ གྲུལ༌ཟུན༌ ཏང༌ང༌ནོག༌, ཨིན༌ནའང༌ ཏེ༌བོའེ༌ ཁྱུད༌པོའེ༌ ནང༌ང༌ ཨིད༌ཤེས༌ ཅོའ༌ མ༌ནོག༌། ཏེ༌ཙོགས༌སི༌ མི༌གུན༌ནེ༌ ཐག༌རིང༌ང༌ དུག༌ཤིག༌།
6 ཏེ༌ཙོགས༌སི༌ མི༌གུན༌ནི༌ ཞན༌མ༌གུན༌ནི༌ ནང༌ང༌ ལོ༌ཁྱེལ༌ ཁྱོངས༌ཏེ༌ ཁོང༌གུན༌ནི༌ ཁང༌པ༌ སོང༌ཏེ༌, སྡིག༌པའེ༌ ནོངས༌སི༌ ལྕིད༌ དང༌ ཇིག༌རྟེན༌ནི༌ ཞན༌ཡང༌ དོད༌པའེ༌ ཡོག༌ག༌ ནན༌ཁན༌ནི༌ བུ༌མོ༌ འུ༌ཐུགས༌གུན༌ནི༌ ཀ༌ནེ༌ ཕན༌ཐོགས༌ ལེན༌ཨིན༌། 7 ༼ཏེ༌ཙོགས༌སི༌ བུ༌མོ༌གུན༌ ཏུས༌གྱུན༌ ལབ༌ཞ༌ སོ༌མ༌ རིག༌གི༌ སྟིང༌རང༌ནེ༌ ཆའ༌ནོག༌, ཨིན༌ནའང༌ ཁོང༌གུན༌ལ༌ དེན༌བ༌བོ༌ མ༌ནེ༌ ཧ༌གོ༌ ཐུབ༌བ༌ མ༌ནོག༌༽། 8 ཡ༌ནེས༌ དང༌ ཡམ༌བ༌རེས༌ གུན༌ནི༌ ལུང༌སྟོན༌པ༌ མོ༌ཟེས༌སི༌ གྱབ༌གལ༌ ཅོའ༌ ཙོགས༌ལ༌, ཏེ༌ མི༌གུན༌ནི༌ དེན༌བའེ༌ གྱབ༌གལ༌ ཅོའ༌ནོག༌། ཏེ༌གུན༌ལ༌ སམ༌བ༌ ངན༌པ༌ དང༌ ཟུས༌མའེ༌ ཏད༌པ༌ ཡོད༌ཏེ༌ ཨིན༌ནོག༌། 9 ཨིན༌ནའང༌ ཁོང༌གུན༌ནི༌ མང༌པོ༌ཞིག༌ ཡར༌གྱས༌ མི༌ཅོ༌, ཅིའ༌ཟེར༌ན༌ ཡ༌ནེས༌ དང༌ ཡམ༌བ༌རེས༌ གུན༌ནི༌ ནས༌ལུག༌ ཙོགས༌ལ༌, ཁོང༌གུན༌ནི༌ ལས༌གུན༌ སམ༌བ༌ མེད༌ཁན༌ ཨིན༌ཁན༌བོ༌ མི༌ཚང༌མའེ༌ སལ༌པོ༌ ཅོས༌ཏེ༌ ཐོང༌ཨིན༌།
པ༌འུ༌ལུའི༌ ཏི༌མོ༌ཐིའ༌ ལབ༌ཞ༌ སལས༌།
3:10 ནེ༌ 4:8
10 ཨིན༌ནའང༌ ཏི༌མོ༌ཐི༌, ངའེ༌ ཅི༌ ལབ༌བད༌, ངའེ༌ མི༌ཚེ༌ ཕུད༌ཚུལ༌, ཅི༌ དོན༌ནི༌ ཕིའ༌ ངའེ༌ མི༌ཚེ༌ ཨིན༌, ངའེ༌ ཏད༌པ༌ ངའེ༌ ཟོད༌པ༌, ངའེ༌ ཅེས༌པ༌, ཡང༌ ངའེ༌ རྡུག༌ངལ༌ ཁུར༌ཅེས༌སི༌ ཁྱུད༌གུན༌ ཁྱོ༌རང༌ང༌ གྱུས༌ཨིན༌ནོག༌། 11 ཨན༌ཏི༌ཡོག༌, ཨི༌ཀོ༌ནི༌འམ༌ དང༌, ལིས༌ཏྲའ༌ གུན༌ནི༌ ནང༌ང༌ ངའ༌ ནགས༌ དང༌ བར༌དོ༌ སྟནས༌། ཏེ༌རུ༌ ཡོད༌ ཟ༌ནེ༌ ངའེ༌ ཙམ༌ཤིག༌གི༌ ནགས༌ དང༌ རྡུག༌ངལ༌ གུན༌ ཁུརས༌, ཨིན༌ནའང༌ གཙོ༌བོའེ༌ ང༌ ཏེ༌ ཚང༌མའེ༌ ནང༌ནེ༌ ཐར༌ ཅུག༌ག༌ ཛད༌ཁན༌བོ༌ ཁྱོ༌རང༌ང༌ གྱུས༌ཨིན༌ནོག༌། 12 འོ༌ན༌, མ༌ཤི༌ཀ༌ ཡེ༌ཤུའི༌ ནང༌ང༌ དཀོན༌མཆོག༌གི༌ ལམ༌མི༌ཀ༌ གྲུལ༌ཨིན༌ མི༌ཚེ༌ ཕུད༌ཉིན༌ ཡོད༌ཁན༌ ཚང༌མ༌ ནགས༌ ཐོང༌ཨིན༌། 13 ཨིན༌ནའང༌ མི༌ངན༌ དང༌ གོབ༌སྐོར༌ཁན༌ གུན༌, རྩོག༌པོ༌ ནེ༌ ཐུ༌ཤོག༌ ཆོགས༌ལ༌ ཆེན༌། ཁོང༌གུན༌ནི༌ ཞན༌མ༌གུན༌ལ༌ གོབ༌སྐོར༌ཨིན༌, ཡང༌ ཁོ༌རང༌གུན༌ནའང༌ གོབ༌སྐོར༌རི༌ ནང༌ང༌ སོང༌ཏེ༌ ཨིན༌ནོག༌།
14 ཨིན༌ནའང༌ ཁྱོ༌རང༌ང༌ ལབ༌ཞའ༌ ཐོབ༌ཁན༌གུན༌ནི༌ཀ༌ སྟན༌པོ༌ དུགས༌ཏེ༌ ཏེ༌གུན༌ དེན༌བ༌ ཨིན༌ཁན༌བོ༌ ཏད༌པ༌ ཅོས༌, ཅིའ༌ཟེར༌ན༌ ཁྱོ༌རང༌ང༌ ཏེ༌ ལབ༌ཁན༌ནི༌ མི༌གུན༌ ཨིད༌ཤེས༌ཅན༌ ཨིན༌ཁན༌བོ༌ གྱུས༌ཨིན༌ནོག༌། 15 ཁྱོ༌རང༌ང༌ ཕྲུ༌གུའི༌ ཏུས༌ནེ༌ ཕར༌ལ༌ དམ༌པའེ༌ སུང༌རབས༌སི༌ ནང༌ནེ༌ ལབས༌ཏེ༌ ཨིན༌པིན༌། ཡང༌ ཏེ༌ ལབ༌ཞ༌གུན༌ནི༌ ཁྱོ༌རང༌ང༌ མ༌ཤི༌ཀ༌ ཡེ༌ཤུའི༌ ནང༌ང༌ ཨིད༌ཤེས༌ ཅོ༌ཅེས༌ གྱུད༌ཏེ༌, ཐར༌པ༌ ཐོབ༌ཅེས༌ལ༌ ཤེས༌རབས༌པོ༌ སལ༌ཏེ༌ ཨིན༌། 16 དམ༌པའེ༌ སུང༌རབས༌ ཚང༌མ༌, མི༌ གྱུད༌ཏེ༌ དཀོན༌མཆོག༌གི༌ བྲིའ༌ཛད༌ཏེ༌ ཨིན༌ནོག༌, ཡང༌ ཏེ༌བོ༌ ང༌དང༌གུན༌ལ༌ ལབ༌ཅེས༌, སྐྱོན༌རྗོད༌ ཅོ༌ཅེས༌, ལམ༌ དྲང༌པོ༌ ལྟན༌ཅེས༌ དང༌ མི༌ཚེ༌ དྲང༌པོ༌ཞིག༌ ཕུད༌ཅེས༌ལ༌ ཁྲིད༌ཅེས༌ གུན༌ནི༌ ནང༌ང༌ ཕན༌ཐོགས༌ཅན༌ ཨིན༌ནོག༌། 17 དཀོན༌མཆོག༌གི༌ ཏེ༌བོ༌ ཁོང༌རང༌ངི༌ མི༌གུན༌ལ༌ ལས༌ ཟང༌པོ༌ ཚང༌མ༌ ཅོ༌ཅེས༌སི༌ ཁྱུད༌ སལ༌ཏེ༌ གྲལ༌གྲིག༌ བོར༌ར༌ ཛད༌ཅེས༌ལ༌ ཀོལ༌ལ༌ ཛད༌ད༌ནོག༌།