1 འིན༌ན༌ ཏུས༌ལ༌ གཙོ༌བོའེ༌ ལོབ༌ཕྲུགས༌ ཚང༌མ༌ སད༌ཨིན༌ ཟེར༌ཁན༌ནི༌ ས༌འུལ༌ བླ༌མ༌ ཆེན༌མོའེ༌ཀ༌ སོང༌ཏེ༌, 2 མ༌ཤི༌ཀའེ༌ ལམ༌མི༌ཀ༌ གྲུལ༌ཁན༌ནི༌ བུ༌ཚ༌ དང༌ བུ༌མོ༌ ཚང༌མ༌ ཟུམས༌ཏེ༌, ཙོན༌པ༌ ཅོས༌ཏེ༌ ཡེ༌རུ༌ཤ༌ལེམ༌མ༌ ཁྱོང༌ཉན༌ཅེས༌ལ༌ ཁོའ༌ ཆོགས༌སྐྱོར༌ ཅོས༌ ཟེར༌ཏེ༌ དཱ༌མེས༌ཁས༌སི༌ ཡ༌ཧུ༌དཱ༌པའེ༌ དུ༌ཁང༌གུན༌ནི༌ ནང༌ང༌ ལྟན༌ཅེས༌ལ༌ ཨི༌གེ༌ཞིག༌ བྲིས༌ཏེ༌ ཏོང༌ ཞུས༌། 3 ས༌འུལ༌ དཱ༌མེས༌ཁས༌སི༌ ཉེ༌མོའ༌ ལེབ༌བ༌ཅིག༌, ཧུན༌མེད༌ལ༌ ནམ༌ཁའ༌ནེ༌ བབས༌ཁན༌ནི༌ འོད༌ ལྡང༌ཤན༌ཞིག༌གི༌ ཁོའ༌ སྐོརས༌། 4 ཁོ༌ སའེ༌ཀ༌ གྱེལ༌, ཡང༌ ཁོའ༌ སུང༌སྐད༌ཅིག༌ ཚོར༌, "ས༌འུལ༌ ས༌འུལ༌ ཁྱོ༌རང༌ངི༌ ང༌ ཅིའ༌ ནགས༌བར༌དོ༌ ལྟན༌ནད༌?"

5 ས༌འུལ༌ལི༌ ཟེརས༌, "གཙོ༌བོ༌ ཉེ༌རང༌ སུ༌ ཨིན༌།"

ཁོང༌ངི༌ ལན༌སལས༌, "ང༌ ནི༌ ཡེ༌ཤུ༌, ཁྱོ༌རང༌ངི༌ ནགས༌བར༌དོ༌ ལྟན༌ཁན༌བོ༌ ཨིན༌། 6 ཏ༌ ཁྱོ༌རང༌ གྱལ༌ས༌ སོང༌, ཡང༌ ཏེ༌རུ༌ ཁྱོ༌རང༌ང༌ ཅོ༌གོ༌ཤེས༌པོ༌ ཤད༌ཨིན༌།"

7 ས༌འུལ༌ ཉམ༌པོ༌ ཆའ༌ཁན༌ནི༌ མི༌གུན༌ ཧ༌ལས༌ཏེ༌ ཧན༌གྲང༌ སོང༌ ཅིའ༌ཟེར༌ན༌ ཁོང༌གུན༌ལ༌ སྐད༌ ཚོར༌ ཨིན༌ནའང༌ སུའང༌ མ༌ཐོང༌། 8 ས༌འུལ༌ལི༌ སེ༌ཀ༌ནེ༌ ལངས༌ཏེ༌ མིག༌ ཕེས༌པ༌ ཁོའ༌ ཅའང༌ མ༌ཐོང༌། ཁོའེ༌ ཕྲོ༌པ༌གུན༌ནི༌ ཁོའ༌ ལག༌པ༌ ཐམས༌ཏེ༌ དཱ༌མེས༌ཁས༌ལ༌ ཁྲིད༌ཏེ༌ ཁྱེརས༌། 9 ཞག༌ སུམ༌ ཚག༌པ༌, ཁོའ༌ མིག༌ནེ༌ མ༌ཐོང༌ ཡང༌ ཏེན༌ན༌ ཏུས༌པོ༌ ཁོའེ༌ ཅའང༌ ཟའང༌ མ༌ཟོས༌, ཅའང༌ ཐུང༌ངའང༌ མ༌ཐུངས༌།

10 དཱ༌མེས༌ཁས༌སི༌ ནང༌ང༌ ཡེ༌ཤུའི༌ཀ༌ ཏད༌པ༌ ཅོ༌ཁན༌ ཨ༌ན༌ནི༌ཡཱས༌ ཟེར༌ཁན༌བོ༌ དུག༌གད༌པིན༌, གཙོ༌བོའེ༌ ཞལ༌ཟིགས༌ཤིག༌གི༌ ནང༌ང༌ ཁོའ༌ མོལས༌, "ཨ༌ན༌ནི༌ཡཱས༌།"

ཁོའེ༌ ལན༌ཏངས༌, "གཙོ༌བོ༌ལེ༌།"

11 གཙོ༌བོའེ༌ ཁོའ༌ མོལས༌, "ཁ༌དྲང༌ ཟེར༌ཁན༌ནི༌ སྲང༌ངི༌ ནང༌ང༌ ཡོད༌ཁན༌ནི༌ ཡུ༌དཱའེ༌ ཁང༌པ༌ སོང༌ཏེ༌, ཏར༌སས༌པ༌ ས༌འུལ༌ ཟེར༌ཁན༌ནི༌ མི༌བོའེ༌ སྐོར༌ལ༌ ཏྲིས༌, དག༌ས༌ ཁོའེ༌ མོས༌ལམ༌ ཞུ༌རུག༌། 12 ས༌འུལ༌ལ༌ ཞལ༌ཟིགས༌ཤིག༌གི༌ ནང༌ང༌ ཨ༌ན༌ནི༌ཡཱས༌ ཡོངས༌ཏེ༌ ཡང༌སྐྱར༌ ཐོང༌ཐུབ༌ཅེས༌ལ༌ ཁོའེ༌ གོའེ༌ཀ༌ ལག༌པ༌ བོར༌ར༌ ཐོང༌།"

13 ཨ༌ན༌ནི༌ཡཱས༌སི༌ ཞུས༌, "ཀྱེ༌ གཙོ༌བོ༌, འི༌ མི༌བོའེ༌ ཉེ༌རང༌ངི༌ དམ༌པ༌ མི༌གུན༌ ཉམ༌པོ༌ ཡེ༌རུ༌ཤ༌ལེམ༌མི༌ ནང༌ང༌ ཙམ༌ཤིག༌ ནོད༌པ༌ སྐྱལ༌ཁན༌བོའེ༌ སྐོར༌ལ༌ ངའ༌ ཞན༌མི༌ མང༌པོ༌ནེ༌ ཚོར༌། 14 ཁོ༌ འི༌རུའང༌ བླ༌མ༌ འུ༌སྐྱོང༌གུན༌ནི༌ ཆོགས༌ནེ༌ ཝང༌ཆ༌ ཐོབ༌ཏེ༌ ཉེ༌རང༌ངི༌ ཚན༌ ཁུར༌ཁན༌ ཚང༌མ༌ ཟུམས༌ཏེ༌ ཁྱེར༌ཅེས༌སི༌ ཕིའ༌ ཡོངས༌ཏེ༌ ཨིན༌ནོག༌།"

15 ཨིན༌ནའང༌ གཙོ༌བོའེ༌ ཨ༌ན༌ནི༌ཡཱས༌ལ༌ མོལས༌, "ཏ༌ ཁྱོ༌རང༌ སོང༌ ཅིའ༌ཟེར༌ན༌ ཁོ༌ ངའེ༌ ལྡམས༌ཁན༌ནི༌ ཞབ༌སྟོག༌པ༌ ཡ༌ཧུ༌དཱ༌པ༌ མན༌ཁན༌གུན༌, གྱལ༌པོ༌གུན༌ དང༌ ཨིས༌ར༌ཨེལ༌པ༌གུན༌ལ༌ ངའེ༌ སྐོར༌ལ༌ ཤད༌ཁན༌བོ༌ ཨིན༌། 16 ངའེ༌ ཚན༌ ཁུར༌ཅེས༌ལ༌ ཁོའ༌ ཙམ༌ཤིག༌གི༌ ནགས༌ ལེན༌གོ༌ཤེས༌པོ༌ ངའེ༌ ཁོའ༌ ལྟན༌ཨིན༌།"

17 ཏེ༌ནེ༌ ཨ༌ན༌ནི༌ཡཱས༌ ས༌འུལ༌ དུགས༌ཏེ༌ ཡོད༌སའེ༌ ཁང༌པ༌ ལེབ༌ ཡང༌ ནང༌ཀུག༌ག༌ སོང༌ཏེ༌ ཁོའེ༌ ལག༌པ༌ ས༌འུལ༌ལི༌ཀ༌ བོར༌ཏེ༌ མོལས༌, "སྤུན༌ ས༌འུལ༌, ཁྱོ༌རང༌ འི༌རུ༌ ཡོང༌ ཟ༌ནེ༌ ལམ༌མ༌ གཙོ༌བོ༌ ཡེ༌ཤུ༌ ཇལ༌ཏེ༌ ཨིན༌པིན༌། ཁོང༌ངི༌ ཁྱོ༌རང༌ང༌ ཡང༌སྐྱར༌ ཐོང༌ཅེས༌ དང༌ དམ༌པའེ༌ ཐུག༌ཉིད༌དི༌ གང༌ཅེས༌སི༌ ཕིའ༌ ང༌ འི༌ཀ༌ ཀལ༌ལ༌ ཛདས༌།" 18 ཏེན༌ན༌མལ༌ལ༌ ས༌འུལ༌ལི༌ མིག༌གི༌ ཀ༌ནེ༌ པགས༌པ༌ ཙོགས༌ཤིག༌ བུད༌ཏེ༌ ཁོའ༌ ཡང༌སྐྱར༌ ཐོང༌ཐུབ༌། ཏེ༌ནེ༌ ལངས༌ཏེ༌ ཁོའེ༌ ཁྲུས༌ལེནས༌, 19 ཁར༌ཇི༌ ཟོས༌ཏེ༌ སྟིང༌ནེ༌ ཁོའེ༌ ཟུགས༌པོའེ༌ ནང༌ང༌ སྟོབས༌ སྐྱེས༌།

ཏེ༌ནེ༌ ས༌འུལ༌ ཞག༌བན༌ཤིག༌ ལོབ༌ཕྲུགས༌གུན༌ ཉམ༌པོ༌ དཱ༌མེས༌ཁས༌ལ༌ དུགས༌ 20 ཡང༌ ཡ༌ཧུ༌དཱ༌པའེ༌ དུ༌ཁང༌གུན༌ནི༌ ནང༌ང༌ ཡེ༌ཤུའི༌ སྐོར༌ལ༌ ཤད༌ཅེས༌ གོ༌ཟུགས༌ཏེ༌ མོལས༌, "ཁོང༌ ནི༌ དཀོན༌མཆོག༌གི༌ སྲས༌ ཏན༌ཏན༌ ཨིན༌ནོག༌།" 21 ཏེ༌རུ༌ ཡོད༌ཁན༌གུན༌ནི༌ ཁོང༌ངི༌ ལབ༌ཞ༌ ཚོར༌ར༌ཅིག༌ ཧ༌ལས༌ཏེ༌ ཅིག༌ དང༌ ཅིག༌ག༌ ཏྲིས༌, "འི༌ མི༌བོ༌ ཡེ༌རུ༌ཤ༌ལེམ༌མི༌ ནང༌ང༌ གཙོ༌བོ༌ ཡེ༌ཤུའི༌ ཚན༌ ཁུར༌ཁན༌གུན༌ ཁྲེས༌སྟོར༌ ཅོ༌ཅེས༌སི༌ རྩོན༌གྲུས༌ སྲན༌ཏྲེ༌ ཅོ༌ཁན༌ ཡང༌ འི༌རུའང༌ ཁོང༌གུན༌ ཟུམས༌ཏེ༌ ཙོང༌པ༌ ཅོས༌ཏེ༌ བླ༌མ༌ འུ༌སྐྱོང༌གུན༌ནི༌ དུན༌ལ༌ ཁྱེར༌ར༌ལ༌ ཡོངས༌ཏེ༌ མ༌ནོག༌ག༌?" 22 ས༌འུལ༌ ཆོས༌ཤད༌ཅེས༌སི༌ ནང༌ང༌ མང༌ང༌ སྟོབས༌ཅན༌ གྱུར༌ཨིན༌ སོང༌, ཡང༌ དཱ༌མེས༌ཁས༌སི༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པ༌གུན༌ནི༌, ས༌འུལ༌ལི༌, ཡེ༌ཤུ༌ ནི༌ ཏན༌ཏན༌ལ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌ ལྟན༌ཁན༌བོའེ༌ གྱབ༌གལ༌ལ༌ ཅའང༌ ཟེར༌ མ༌ཉན༌།

23 ཏུས༌བན༌ཤིག༌གི༌ སྟིང༌ནེ༌ ཡ༌ཧུ༌དཱ༌པ༌གུན༌ནི༌ ཁོང༌ སད༌ཅེས༌སི༌ གྲབས༌ ཏངས༌, 24 ཨིན༌ནའང༌ ས༌འུལ༌ལ༌ ཁོང༌གུན༌ནི༌ ཅུས༌ངན༌གུན༌ གྱུས༌སོང༌། ཏེ༌གུན༌ ཚན༌ཉིན༌ མེད༌པ༌ གྱལ༌སའེ༌ སྒོ༌གུན༌ནི༌ཀ༌ ཁོང༌ སད༌ཅེས༌ལ༌ སྲུངས༌ཏེ༌ དུག༌གད༌པིན༌། 25 ཨིན༌ནའང༌ ས༌འུལ༌ལི༌ ལོབ༌ཕྲུགས༌གུན༌ནི༌ ཁོང༌ ཚན༌ལ༌ ཙེ༌པོ༌ཞིག༌གི༌ ནང༌ང༌ གྱངས༌ཏེ༌ གྱལ༌སའེ༌ རྩིག༌པའེ༌ *9:25 སྔུན༌མའེ༌ ཏུས༌ལ༌ གྱལ༌ས༌ ཚང༌མ༌ གྲ༌འོའེ༌ ཇིགས༌པ༌ནེ༌ སྐྱོབ༌ཅེས༌ལ༌ གྱང༌ ཐོན༌པོ༌ སྐོར༌ཏེ༌ ཡོང༌ངད༌ཀྱག༌། ནང༌ང༌ ཡོད༌ཁན༌ནི༌ ཀར༌ཁུང༌ཞིག༌ནེ༌ ཐུར༌ལ༌ ཕབས༌།

26 ཁོང༌ ཡེ༌རུ༌ཤ༌ལེམ༌མ༌ ལེབ༌བ༌ཅིག༌, ལོབ༌ཕྲུགས༌གུན༌ ཉམ༌པོ༌ དུག༌ཅེས༌སི༌ རྩོན༌གྲུས༌ ཅོས༌, ཨིན༌ནའང༌ ཁོང༌ ཚང༌མ༌ ཇིགས༌ ཅིའ༌ཟེར༌ན༌, ས༌འུལ༌ དེན༌བ༌ མ༌ཤི༌ཀའེ༌ ལོབ༌ཕྲུགས༌ གྱུར༌ཏེ༌ ཨིན༌ཁན༌བོའེ༌ཀ༌ ཁོང༌གུན༌ དེན༌ མ༌ཤེས༌། 27 ཨིན༌ནའང༌ བཱར༌ན༌བས༌ ཟེར༌ཁན༌བོའེ༌, ས༌འུལ༌ ཁོང༌རང༌ ཉམ༌པོ༌ སྐུ༌ཚབས༌གུན༌ནི༌ ཕྲོའ༌ ཁྲིད༌ཏེ༌ ཁྱོངས༌། བཱར༌ན༌བས༌སི༌ ཁོང༌གུན༌ལ༌ ཟེརས༌, ས༌འུལ༌ ལམ༌ནེ༌ ཆེན༌ ཡོད༌ ཟ༌ནེ༌ གཙོ༌བོ༌ ཇལ༌ཏེ༌ ཁོ༌ ཉམ༌པོ༌ ཞལ༌ཏའ༌ ཛད༌ཁན༌ ཡང༌ ཀ༌ཟུག༌ ཧམ༌པ༌ ཉམ༌པོ༌ དཱ༌མེས༌ཁས༌སི༌ ནང༌ང༌ ཁོང༌ངི༌ ཡེ༌ཤུའི༌ སྤང༌པོ༌ ཏངས༌ཁན༌གུན༌ནི༌ སྐོར༌ལ༌ ཤདས༌། 28 ས༌འུལ༌ སྐུ༌ཚབས༌གུན༌ ཉམ༌པོ༌ དུགས༌, ཡང༌ ཡེ༌རུ༌ཤ༌ལེམ༌ གང༌པོའེ༌ ནང༌ང༌ ཧམ༌པ༌ ཉམ༌པོ༌ གཙོ༌བོའེ༌ སྐོར༌ལ༌ ཤད༌ཨིན༌ གྲུལས༌། 29 ཁོང༌ངི༌ གིརིས༌སི༌ སྐད༌ ཏང༌ཁན༌ནི༌ ཡ༌ཧུ༌དཱ༌པ༌གུན༌ ཉམ༌པོའང༌ གྲོས༌དུར༌ ཅོའད༌པིན༌, ཨིན༌ནའང༌ ཏེ༌གུན༌ནི༌ ཁོང༌ སད༌ཅེས༌སི༌ རྩོན༌གྲུས༌ ཅོས༌། 30 ཏད༌པ༌ཅན༌གུན༌ལ༌ ཏེ༌བོ༌ གྱུས༌ཆའ༌ཅིག༌, ཁོང༌གུན༌ ཡོངས༌ཏེ༌ ས༌འུལ༌ ཀཱེ༌སར༌རིའ༌ གྱལ༌ས༌ ཁྱེར༌ཏེ༌ ཏར༌སས༌སི༌ གྲོང༌ཁྱེར༌ལ༌ ལམ༌ཅུགས༌།

31 ཏེ༌ནེ༌ ཡ༌ཧུ༌དཱ༌, གཱ༌ལིལ༌ལི༌ དང༌ ས༌མར༌རི༌ཡཱ༌ ཡུལ༌ གང༌པོའེ༌ ནང༌ང༌ ཡོད༌ཁན༌ནི༌ ཆོས༌ཚོགས༌གུན༌ལ༌ རྡུག༌ངལ༌ མ༌ཐོང༌ང༌ ཞི༌དེ༌ ཡོད༌པིན༌། དམ༌པའེ༌ ཐུག༌ཉིད༌ གྱུད༌ཏེ༌ ཁོང༌གུན༌ལ༌ ཤེད༌ དང༌ སྤོས༌པ༌ ཐོབ༌, ཡང༌ གཙོ༌བོའེ༌ ཇིགས༌ དང༌ རྩི༌ཝའེ༌ ནང༌ང༌ མི༌ཚེ༌ ཕུད༌ཅེས༌པོའེ༌ ཁོང༌གུན༌ནི༌ ཀྲངས༌ཀ༌ གྱས༌ཨིན༌ སོང༌།

32 པི༌ཏྲར༌ ནས༌ས༌ ཅིག༌ནེ༌ ཅིག༌ག༌ ཆའ༌ ཟ༌ནེ༌, ཁོང༌ ལིད༌དཱ༌ གྲོང༌ཁྱེར༌རི༌ ནང༌ང༌ དུག༌ཁན༌ནི༌ ཏད༌པ༌ཅན༌གུན༌ནི༌ ཕྲོའ༌ ལེབ༌། 33 ཏེ༌རུ༌ ཁོང༌ང༌ ཨེ༌ནི༌ཡཱས༌ ཟེར༌ཁན༌ནི༌ མི༌ཞིག༌ ཐུག༌ ཀ༌བོའ༌ ཟའ༌ཕོག༌ཏེ༌ གྲུལ༌ མ༌ཉན༌ན༌ མལ༌ཙའེ༌ཀ༌ དུགས༌ཏེ༌ ལོ༌ རྒྱད༌ ཆའད༌པིན༌། 34 ཏེ༌ནེ༌ པི༌ཏྲར༌རི༌ ཁོའ༌, "ཨེ༌ནི༌ཡཱས༌ ཡེ༌ཤུ༌ མ༌ཤི༌ཀའེ༌ ཁྱོ༌རང༌ ཕན༌ཅུག༌ག༌ ཛད༌ཏེ༌ ཨིན༌; ཏ༌ ལོངས༌, རང༌ངི༌ མལ༌ཙ༌ སྲིལ༌" མོལ༌པ༌ ཁོ༌ ཏེན༌ན༌མལ༌ལ༌ ཀོའག༌ ལངས༌། 35 ཏེ༌ མི༌ ཐོང༌ཁན༌ ལིད༌དཱ༌པ༌ དང༌ ཤ༌རོན༌པ༌ ཚང༌མའེ༌ གཙོ༌བོའེ༌ཀ༌ ཏད༌པ༌ ཁྱོངས༌།

36 ཡོ༌པའ༌ གྲོང༌ཁྱེར༌རི༌ ནང༌ང༌ ཏ༌བི༌ཏའ༌ ༼གིརིས༌སི༌ སྐད༌དི༌ ནང༌ང༌ དོར༌ཀས༌༽ ཟེར༌ཁན༌ནི༌ ཏད༌པ༌ཅན༌ནི༌ བུ༌མོ༌ཞིག༌ ཡོད༌པིན༌། ཁོའེ༌ ཏུས༌གྱུན༌ ལས༌ ཟང༌པོ༌ དང༌ ཉལ༌བ༌ཅན༌ གུན༌ལ༌ རོགས༌ ཅོའད༌པིན༌། 37 པི༌ཏྲར༌ ལིད༌དཱའེ༌ ནང༌ང༌ ཡོད༌ཏུས༌, ཏེ༌ བུ༌མོ༌བོའ༌ ཟུ༌མོ༌ སྲན༌ཏྲེ༌ ཡོངས༌ཏེ༌ ཤི༌, ཡང༌ ཁོའེ༌ ཟུགས༌པོ༌ ཁྲུས༌ཏེ༌ སྟང༌ཐོག༌གི༌ ནང༌ཞིག༌གི༌ ནང༌ང༌ བོརས༌། 38 ལིད༌དཱ༌ གྲོང༌ཁྱེར༌བོ༌ ཡོ༌པའ༌ནེ༌ ཉེ༌མོ༌ ཡོད༌པ༌, ལོབ༌ཕྲུགས༌གུན༌ལ༌ པི༌ཏྲར༌ ལིད༌དཱ༌ ཡོད༌ཁན༌བོ༌ ཚོར༌ཏེ༌, ཁོང༌གུན༌ནི༌ པི༌ཏྲར༌རི༌ཀ༌ མི༌ ཉིས༌, "ཐུག༌རྗེ༌ ཛད༌ཏེ༌ འི༌རུ༌ གྱོགས༌པ༌ སྐྱོད༌ད༌ ཛད༌" ཞུའ༌ལ༌ ལམ༌ཅུགས༌།

39 པི༌ཏྲར༌ ཏེ༌ མི༌ ཉིས༌ཀོ༌ ཉམ༌པོ༌ སྐྱོདས༌ ཡང༌ ཁོང༌ ཏེ༌རུ༌ ལེབ༌བ༌ཅིག༌, མི༌གུན༌ནི༌ ཁོང༌ སྟང༌ཐོག༌གི༌ ནང༌བོའེ༌ ནང༌ང༌ ཁྱེརས༌། ཏེ༌རུ༌ ཨ༌ནེ༌ མ༌རང༌མོ༌ ཚང༌མ༌ ངུ༌ཨིན༌, དོར༌ཀས༌ ཁོང༌གུན༌ ཉམ༌པོ༌ ཡོད༌ ཟ༌ནེ༌ ཁོའེ༌ ཙེམས༌ཁན༌ནི༌ ཀོས༌ལག༌གུན༌ པི༌ཏྲར༌ལ༌ སྟནས༌།

40 པི༌ཏྲར༌རི༌ ཏེ༌ ནང༌ངི༌ ནང༌ང༌ ཡོད༌ཁན༌ ཚང༌མ༌ ཕི༌ལོག༌ག༌ ཕིངས༌, ཡང༌ པིག༌དོང༌ ཙུགས༌ཏེ༌ མོས༌ལམ༌ ཞུའ༌ ཛདས༌། ཏེ༌ནེ༌ ཤི༌ཁན༌ནི༌ ཟུགས༌པོའེ༌ ཆོགས༌ལ༌ ལྟས༌ཏེ༌, "ཏ༌བི༌ཏའ༌ ལོངས༌" མོལས༌། ཏ༌བི༌ཏའེ༌ རང༌ངི༌ མིག༌ ཕེས༌ ཡང༌ པི༌ཏྲར༌ ཐོང༌ཏེ༌ ལངས༌། 41 པི༌ཏྲར༌རི༌ ལག༌པ༌ ཐམས༌ཏེ༌ ཁོ༌ རྐང༌པའེ༌ཀ༌ ལང༌ ཅུག༌ག༌ ཛདས༌། ཏེ༌ནེ༌ ཏད༌པ༌ཅན༌ དང༌ ཨ༌ནེ༌ མ༌རང༌མོ༌ གུན༌ བོད༌ཏེ༌ ཏ༌བི༌ཏའ༌ སོན༌ཏེའ༌ ཨིན༌ཁན༌བོ༌ ལྟན༌ན༌ ཛདས༌། 42 འི༌ སྐོར༌རི༌ ནས༌ཚུལ༌གུན༌ ཡོ༌པའ༌ གྲོང༌ཁྱེར༌ གང༌པོའེ༌ ནང༌ང༌ ཁྱེབས༌, ཡང༌ མི༌ མང༌པོའེ༌ གཙོ༌བོའེ༌ཀ༌ ཏད༌པ༌ ཁྱོངས༌། 43 པི༌ཏྲར༌ ཞག༌བན༌ཤིག༌ ཡོ༌པའེ༌ ནང༌ང༌ ཤི༌མོན༌ ཀོ༌འ༌ ཉེ༌ཁན༌ནི༌ ཁང༌པ༌ དུགས༌།