8
1 ཡང༌ སྟེ༌ཕན༌ སད༌ཅེས༌སི༌ ནང༌ང༌ ས༌འུལ༌ལིའང༌ ཆོགས༌སྐྱོར༌ ཅོས༌ཏེ༌ ཨིན༌ནོག༌།
ཡེ༌རུ༌ཤ༌ལེམ༌མི༌ ཆོས༌ཚོགས༌ལ༌ ནགས༌ སྟནས༌།
8:1b ནེ༌ 3
ཏེན༌ན༌ ཞག༌ནེ༌ ཕར༌ལ༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ ཆོས༌ཚོགས༌ལ༌ སྲན༌ཏྲེ༌ ནགས༌ ལྟན༌ཅེས༌ གོ༌ཟུག༌, ཏེ༌བོའེ༌ ཞས༌ཏེ༌ སྐུ༌ཚབས༌གུན༌ མ༌སྟོག༌ ཞན༌ ཏད༌པ༌ཅན༌ ཚང༌མ༌ ཡ༌ཧུ༌དཱ༌ དང༌ ས༌མར༌རི༌ཡཱ༌ ཡུལ༌ཇོངས༌ གང༌པོའེ༌ ནང༌ང༌ བེ༌ཏེ༌ ཤོར༌གོས༌། 2 དཀོན༌མཆོག༌གི༌ སྕོད༌ལམ༌མི༌ཀ༌ གྲུལ༌ཁན༌ ཁ༌ཅིག༌གི༌ སྟེ༌ཕན༌ནི༌ སྤུར༌བོ༌ ཁྱེར༌ཏེ༌ སྤུར༌ཁང༌ངི༌ ནང༌ང༌ བོརས༌, ཡང༌ ཁོང༌ངི༌ ཕིའ༌ རྡུག༌པོ༌ སྲན༌ཏྲེ༌ ཅོས༌། 3 ཨིན༌ནའང༌ ས༌འུལ༌ལི༌, ཆོས༌ཚོགས༌ ཁྲེས༌སྟོར༌ ཅོ༌ཅེས༌ གོ༌ཟུག༌, ཁང༌པ༌ རེ༌རེའེ༌ ནང༌ང༌ སོང༌ཏེ༌ ཁོའེ༌ ཏད༌པ༌ཅན༌ནི༌ བུ༌ཚ༌ དང༌ བུ༌མོ༌ ཚང༌མ༌ དྲུད༌ཏེ༌ ཁྱེར༌ཏེ༌ ཙོན༌ལ༌ ཀག༌གད༌པིན༌།
ཕི༌ལིབ༌བི༌ ས༌མར༌རི༌ཡཱ༌ ནང༌ང༌ གའ༌མོའེ༌ ནས༌ཚུལ༌ ཤདས༌།
8:4 ནེ༌ 8
4 ཏད༌པ༌ཅན༌ ཤོར༌ཁན༌ནི༌ མི༌གུན༌ ཀ༌རུ༌ ལེབ༌ནའང༌ གའ༌མོའེ༌ ནས༌ཚུལ༌ ཤད༌ཨིན༌ སོང༌། 5 ཕི༌ལིབ༌ ས༌མར༌རི༌ཡཱའེ༌ གྱལ༌ས༌ ལེབ༌བ༌ཅིག༌, ཁོའེ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀའེ༌ སྐོར༌ལ༌ ཤདས༌། 6 ཕི༌ལིབ༌བི༌ སྤེ༌ར༌གུན༌ ཚོར༌ཏེ༌ ཡང༌ ཁོའེ༌ ཧ༌ལས༌ཤེས༌སི༌ ཛད༌པ༌གུན༌ ཐོང༌པ༌, མི༌གུན༌ནི༌ ཁོའེ༌ སྤེ༌ར༌གུན༌ མ༌ ནང༌སྟག༌ ཏངས༌ཏེ༌ ཉན༌ནད༌པིན༌། 7 སྤེར༌ན༌ མི༌ མང༌པོ༌ཞིག༌གི༌ ནང༌ནེ༌ གོང༌པོ༌གུན༌ ཕིངས༌པ༌ ཏེ༌གུན༌ ཀུ༌ཅོ༌ ཏང༌ཨིན༌ བིང༌ཏེ༌ སོང༌, ཡང༌ ཁོངས༌ཁན༌ དང༌ ཞ༌འོ༌ མང༌པོ༌ གྱལ༌། 8 ཏེ༌བོའེ༌ ཞས༌ཏེ༌ ཏེ༌ གྱལ༌སའེ༌ མི༌གུན༌ མང༌པོ༌ ཐད༌།
ཤི༌མོན༌ ཇའ༌དུ༌ ཅོ༌ཁན༌།
8:9 ནེ༌ 25
9 ཏུས༌བན༌ཤིག༌གི༌ སྔུན༌ལ༌ ཤི༌མོན༌ ཟེར༌ཁན༌ནི༌ མི༌ཞིག༌གི༌ ཁོ༌རང༌ངི༌ ཇའ༌དུ༌ ཅོ༌ཅེས༌སི༌ ཁྱུད༌ གྱུད༌ཏེ༌ ས༌མར༌རི༌ཡཱ༌ གྱལ༌སའེ༌ མི༌ཚང༌མ༌ ཧ༌ལས༌ ཅུགས༌ཏེ༌ ཁོའེ༌ ཁོ༌རང༌ མ༌ མི༌ཀྲག༌པོ༌ཞིག༌ ཨིན༌ ཟེར༌རད༌པིན༌། 10 ཏེ༌ ཡུལ༌ལི༌མི༌ ཁག༌ཅན༌ དང༌ ཉམ༌ཤུང༌ ཚང༌མའེ༌, ཁོའེ༌ ཟེར༌ཁན༌གུན༌ལ༌ སྣང༌ང༌ མ༌སྲན༌ཏྲེ༌ ཏངས༌ཏེ༌ ཁོང༌གུན༌ནི༌ ཟེར༌རད༌པིན༌, "འི༌ མི༌བོའེ༌ ནང༌ང༌ དཀོན༌མཆོག༌གི༌ ཤེད༌ ཆེན༌མོ༌ དུག༌།" 11 ཏུས༌བན༌ཤིག༌ནེ༌ ཕར༌ལ༌ ཁོའེ༌ ཇའ༌དུ༌ ཅོ༌ཅེས༌ གྱུད༌ཏེ༌ མི༌ཚང༌མ༌ ཧ༌ལས༌ ཅུགས༌པ༌ མི༌གུན༌ནི༌ ཁོའེ༌ སྤེ༌ར༌གུན༌ལ༌ གྱལ༌ལ༌ ཅོས༌ཏེ༌ ཉན༌ནད༌པིན༌།
12 ཨིན༌ནའང༌ ཕི༌ལིབ༌བི༌ དཀོན༌མཆོག༌གི༌ གྱལ༌སྲིད༌ དང༌ ཡེ༌ཤུ༌ མ༌ཤི༌ཀའེ༌ སྐོར༌ལ༌ ཆོས༌ཤད༌ཅེས༌པོའེ༌, མི༌གུན༌ནི༌ ཏད༌པ༌ ཅོས༌ཏེ༌ ཁྲུས༌ལེནས༌, བུ༌ཚ༌ དང༌ བུ༌མོ༌ ཉིས༌ཀོའེ༌། 13 ཇའ༌དུ༌ ཅོ༌ཁན༌ ཤི༌མོན༌ནིའང༌ ཏད༌པ༌ ཅོས༌ཏེ༌ ཁྲུས༌ལེནས༌། ཕི༌ལིབ༌ ཀ༌རུ༌ ཆ༌ནའང༌ ཁོ༌ སྟིང༌རང༌ནེ༌ སོང༌ ཡང༌ ཧ༌ལས༌ཤེས༌སི༌ ཛད༌པ༌ དང༌ སྟགས༌ གུན༌ ཐོང༌ཏེ༌ ཁོ༌ ཧན༌གྲང༌ སོང༌།
14 ཏེ༌ནེ༌ ཡེ༌རུ༌ཤ༌ལེམ༌མི༌ ནང༌ང༌ སྐུ༌ཚབས༌གུན༌ལ༌ ས༌མར༌རི༌ཡཱ༌པ༌གུན༌ནི༌ དཀོན༌མཆོག༌གི༌ བཀའེ༌ཀ༌ ཏད༌པ༌ ཁྱོངས༌ཏོག༌ ཟེར༌ཏེ༌ ཚོར༌པ༌, ཁོང༌གུན༌ནི༌ པི༌ཏྲར༌ དང༌ ཡོ༌ཧཱ༌ནན༌ ཉིས༌ཀོ༌ ཏེ༌ ཡུལ༌ལ༌ ཀལས༌། 15 པི༌ཏྲར༌ དང༌ ཡོ༌ཧཱ༌ནན༌ ཏེ༌རུ༌ ལེབ༌བ༌ཅིག༌, ས༌མར༌རི༌ཡཱ༌པ༌ ཏད༌པ༌ཅན༌གུན༌ལ༌ ཐུག༌ཉིད༌ བབས༌ཤེས༌སི༌ ཕིའ༌ མོས༌ལམ༌ ཞུའ༌ ཛདས༌, 16 ཅིའ༌ཟེར༌ན༌ ཁོང༌གུན༌ལ༌ གཙོ༌བོ༌ ཡེ༌ཤུའི༌ ཚན༌ནི༌ ནང༌ང༌ ཁྲུས༌ ཐོབ༌ནའང༌ ཏ༌རུང༌ ཚོག༌པ༌ སུ༌ཞིག༌གི༌ཀའང༌ དམ༌པའེ༌ ཐུག༌ཉིད༌ མ༌བབས༌ས༌ ཨིན༌པིན༌། 17 ཏེ༌ནེ༌ ཁོང༌ ཉིས༌ཀོའེ༌ ཁོང༌གུན༌ནི༌ཀ༌ ལག༌པ༌ བོར༌ར༌ ཛད༌ད༌ཅིག༌, ཁོང༌ ཚང༌མའེ༌ཀ༌ དམ༌པའེ༌ ཐུག༌ཉིད༌ བབས༌།
18 སྐུ༌ཚབས༌གུན༌ནི༌ ཆག༌ བོར༌ཅེས༌པོའེ༌ དམ༌པའེ༌ ཐུག༌ཉིད༌ ཐོབ༌བ༌ ཐོང༌ང༌ཅིག༌, ཤི༌མོན༌ནི༌ ཁོང༌ ཉིས༌ཀོའེ༌ དུན༌ལ༌ པེ༌ནེ༌ ཕུལ༌ཏེ༌ ཟེརས༌ 19 "ངའེ༌ ལག༌པ༌ བོར༌ཁན༌གུན༌ལའང༌ དམ༌པའེ༌ ཐུག༌ཉིད༌ ཐོབ༌ཅེས༌སི༌ ཁྱུད༌པོ༌ ངའ༌ སལ༌ལ༌ ཛད༌།"
20 ཨིན༌ནའང༌ པི༌ཏྲར༌རི༌ ཁོའ༌ མོལས༌, "ཁྱོ༌རང༌ངི༌ པེ༌ནེ༌ ཏངས༌ཏེ༌ དཀོན༌མཆོག༌གི༌ ཁྱུད༌པོ༌ ཉོ༌ཉན༌ན༌ནོག༌ སམ༌བ༌ ཁྱོ༌རང༌ དང༌ ཁྱོ༌རང༌ངི༌ པེ༌ནེ༌ ཉིས༌ཀོ༌ མེད༌ཁན༌ སོང༌ཤིག༌། 21 ཁྱོ༌རང༌ངི༌ སྙིང༌ དཀོན༌མཆོག༌གི༌ སྐུན༌དུན༌ལ༌ དྲང༌པོ༌ མེད༌ཅེས༌པོའེ༌ ཁྱོ༌རང༌ང༌ ང༌ཞའ༌ ཉམ༌པོ༌ འི༌ ལས༌ ཅོ༌ཅེས༌སི༌ ནང༌ང༌ ཅའང༌ ཁག༌ མེད༌པ༌ ཨིན༌ནོག༌། 22 ཁྱོ༌རང༌ངི༌ ནང༌ང༌ ངན༌སེམས༌ སྐྱེ༌ཁན༌བོའེ༌ ཕིའ༌ གྱོད༌པ༌ ཅོས༌ཏེ༌ གཙོ༌བོའ༌ མོས༌ལམ༌ ཞུས༌། ཅི༌ གྱུས༌ ཁོང༌ངི༌ ཁྱོ༌རང༌ངི༌ ཏེ༌ སེམས༌ངན༌ སམ༌ཁན༌བོའ༌ ཤགས༌པ༌ སལ༌སྲིད༌ཨིན༌། 23 ང༌ ཐོང༌ཅེས༌ལ༌ ཁྱོ༌རང༌ངི༌ སྙིང༌ ཚིག༌རི༌ གངས༌ཏེ༌ ཁྱོ༌རང༌ སྡིག༌པའེ༌ ཟུམས༌ཏེ༌ བོར༌ཏེ༌ དུག༌།" 24 ཏེ༌ནེ༌ ཤི༌མོན༌ནི༌ ཟེརས༌, "ཉེ༌རང༌ངི༌ མོལ༌ཁན༌གུན༌ ངའེ༌ཀ༌ མི༌བབས༌ཤེས༌སི༌ ཕིའ༌ ཇུ༌ཇུ༌ གཙོ༌བོའ༌ མོས༌ལམ༌ ཞུའ༌ ཛད༌།"
25 པི༌ཏྲར༌ དང༌ ཡོ༌ཧཱ༌ནན༌ནི༌ གཙོ༌བོའེ༌ བཀའ༌ ཤད༌ད༌ ཛད༌ཅེས༌ དང༌ སྤང༌པོ༌ སལ༌ཏེ༌ སྟིང༌ནེ༌ ཡེ༌རུ༌ཤ༌ལེམ༌མ༌ ལོགས༌ཏེ༌ སྐྱོད༌ ཟ༌ནེ༌ ས༌མར༌རི༌ཡཱའེ༌ གམ༌ཡུལ༌ མང༌པོ༌ཞིག༌གི༌ ནང༌ངའང༌ གའ༌མོའེ༌ ནས༌ཚུལ༌ ཤད༌ད༌ ཛདས༌།
ཕི༌ལིབ༌ དང༌ ཨེ༌ཐོ༌པི༌པ༌ ཐུག༌།
8:26 ནེ༌ 40
26 གཙོ༌བོའེ༌ ཕོ༌ཉ༌ཞིག༌གི༌ ཕི༌ལིབ༌བ༌ མོལས༌, "ཏ༌ ལྷོ༌ ཆོགས༌ལ༌ ཡེ༌རུ༌ཤ༌ལེམ༌ནེ༌ ག༌ཟ༌ ཆོགས༌ལ༌ ཆའ༌ཁན༌ནི༌ ཐང༌ལམ༌བོའེ༌ཀ༌ སོང༌། 27 ཏེ༌ནེ༌ ཁོ༌ སོང༌ ཡང༌ ལམ༌མ༌ ཁོའ༌ ཨི༌ཐོ༌པི༌པ༌ མི༌ཞིག༌ ཐུག༌, ཀ༌བོ༌ ཨེ༌ཐོ༌པི༌པའེ༌ གྱལ༌མོ༌ ཀེན༌གྲས༌ ཟེར༌ཁན༌བོའེ༌ བང༌ཛོད༌དི༌ ལོན༌པོ༌ མ༌ ཝང༌ཅན༌ཞིག༌ ཨིན༌པིན༌། ཁོ༌ ཡེ༌རུ༌ཤ༌ལེམ༌མི༌ ཆོད༌ཁང༌ང༌ ཅོལ༌ལ༌ སོང༌ཏེ༌ 28 རྟ༌རེལ༌ལི༌ཀ༌ ཞོན༌ཏེ༌ རང༌ཡུལ༌ལ༌ ལོགས༌ཏེ༌ ཆའ༌ ཟ༌ནེ༌ ལུང༌སྟོན༌པ༌ ཡེ༌ཤ༌ཡཱའེ༌ སྤེ༌ཆ༌ སིལ༌ལད༌པིན༌།
29 ཏེ༌ནེ༌ དམ༌པའེ༌ ཐུག༌ཉིད༌དི༌ ཕི༌ལིབ༌བ༌ མོལས༌, "ཏ༌ རྟ༌རེལ༌ ཉེ༌མོའ༌ སོང༌།"
30 ཕི༌ལིབ༌ གྱུགས༌ཏེ༌ རྟ༌རེལ༌ ཉེ༌མོའ༌ སོང༌, ཡང༌ ཤིང༌རྟའེ༌ཀ༌ ཞོན༌ཏེ༌ ཡོད༌ཁན༌བོའེ༌ ལུང༌སྟོན༌པ༌ ཡེ༌ཤ༌ཡཱའེ༌ སྤེ༌ཆ༌ སིལ༌ཨིན༌ ཡོད༌ཁན༌བོ༌ ཚོར༌། ཕི༌ལིབ༌བི༌ ཁོའ༌ ཏྲིས༌, "ཉེ༌རང༌ངི༌ སིལ༌ཨིན༌ ཡོད༌ཁན༌ནི༌ ཏོན༌བོ༌ ཉེ༌རང༌ང༌ ཧ༌གོའ༌?"
31 ཏེ༌ མི༌བོའེ༌ ལན༌ཏངས༌, "ཧ༌གོ༌ཅུག༌ཁན༌ མེད༌པ༌, ང༌ ཀ༌ཟུག༌གི༌ ཧ༌གོ༌ ཐུབ༌ཨིན༌", ཡང༌ ཕི༌ལིབ༌བ༌ ཁོ༌ ཉམ༌པོ༌ ཤིང༌རྟའེ༌ ནང༌ང༌ ཞོན༌ན༌ལ༌ ཟེརས༌།
32 ཁོའེ༌ སིལ༌ཨིན༌ ཡོད༌ཁན༌ནི༌ དམ༌པའེ༌ སུང༌རབས༌པོ༌ ནི༌,
"ཁོང༌ ལུག༌ ཙོགས༌ལ༌ སད༌ད༌ལ༌ ཁྱེརས༌,
ཡང༌ ཀ༌ཟུག༌ ལུག༌ རང༌ངི༌ བལ༌ བྲག༌ཁན༌ནི༌ དུན༌ལ༌
ཁའ༌རོགས༌ཏེ༌ དུག༌གད༌, ཏེན༌ན༌ ཙོགས༌ལ༌
ཁོང༌ངིའང༌ རང༌ངི༌ ཞལ༌ མ༌ཕེས༌།
33 ཁྲེལ༌བ༌ ཅོ༌ཨིན༌ནའང༌ ཁོང༌ང༌ དྲང༌པོ༌ ཤགས༌ མ༌ཅོས༌།
ཁོང༌ངི༌ པུར༌གྱུད༌དི༌ སྐོར༌ལ༌ སུའིང༌ ཤད༌ མི༌ཉན༌,
ཇིག༌རྟེན༌ནི༌ ཀ༌ནེ༌ ཁོང༌ངི༌ མི༌ཚེ༌ ཆུ༌ངུན༌ལ༌ ཀོགས༌ཏེ༌ ཁྱེརས༌།"*8:33 ཡེ༌ཤ༌ཡཱའེ༌ སྤེ༌ཆའེ༌ 53:7, 8
34 ལོན༌པོ༌བོའེ༌ ཕི༌ལིབ༌བ༌ ཟེརས༌, "ལུང༌སྟོན༌པའེ༌ འི༌ ཚིགས༌པོ༌ ཁོང༌རང༌ངི༌ སྐོར༌ལ༌ བྲིའ༌ ཛད༌ཏེ༌ ཨིན༌ནོག༌ག༌ ཡ༌ ཞན༌མ༌ཞིག༌གི༌ སྐོར༌ལ༌, ཐུག༌རྗེ༌ ཛད༌ཏེ༌ ང༌ ཧ༌གོ༌ཅུག༌ག༌ཛད༌།" 35 ཏེ༌ནེ༌ ཕི༌ལིབ༌བི༌ སུང༌རབས༌སི༌ ཏེན༌ན༌ ཚིགས༌པོ༌ནེ༌ གོ༌ཟུགས༌ཏེ༌ ཁོའ༌ ཡེ༌ཤུའི༌ སྐོར༌ལ༌ གའ༌མོའེ༌ ནས༌ཚུལ༌ ཤད༌ད༌ ཛདས༌།
36 ཁོང༌གུན༌ ལམ༌ནེ༌ ཆའ༌ ཟ༌ནེ༌ ཆུ༌ ཡོད༌སའེ༌ ནས༌ས༌ཞིག༌ག༌ ལེབ༌པ༌, ལོན༌པོའེ༌ ཟེརས༌, "ཟིགས༌སའང༌ འི༌ཀ༌ ཆུ༌ དུག༌, ཏ༌ ཅིའ༌ ངའེ༌ ཁྲུས༌ མི༌ལེན༌།" 37 †8:37 སྔུན༌མའེ༌ གིརིས༌སི༌ སྤེ༌ཆའེ༌ ནང༌ང༌ རྐང༌པ༌ 37 མེད༌ཏེ༌ ཨིན༌ནོག༌, ཀ༌བོ༌ ནི༌ ཕི༌ལིབ༌བི༌ ཁོང༌ང༌ མོལས༌, "གལ༌ཏེས༌ ཉེ༌རང༌ངི༌ སྙིང༌ནེ༌ ཏད༌པ༌ ཅོའད༌ན༌ ཏེ༌ནེ༌ ཁྲུས༌ལེན༌ན༌ གྲིག༌" མོལས༌། ཏེ༌ ལོན༌པོའེ༌ ཁོང༌ང༌ ཞུས༌, "ངའེ༌ ཏད༌པ༌ ཅོའད༌ ཡེ༌ཤུ༌ མ༌ཤི༌ཀ༌ དཀོན༌མཆོག༌གི༌ སྲས༌ ཨིན༌ནོག༌།" 38 ཁོའེ༌ ཤིང༌རྟ༌བོ༌ སྒོག༌ ཟེར༌ཏེ༌ བཀའ༌ ཏངས༌, ཕི༌ལིབ༌ དང༌ ལོན༌པོ༌ ཉིས༌ཀོ༌ ཆུའི༌ ནང༌ང༌ ཞུགས༌, ཡང༌ ཕི༌ལིབ༌བི༌ ཁོའ༌ ཁྲུས༌ཏངས༌། 39 ཁོང༌གུན༌ ཆུ༌ནེ༌ ཕི༌ལོག༌ག༌ བིང༌ང༌ཅིག༌, དཀོན༌མཆོག༌གི༌ ཐུག༌ཉིད༌དི༌ ཕི༌ལིབ༌ ཁོའེ༌ དུན༌ནེ༌ ཁྱེར༌ར༌ ཛད༌པ༌ ལོན༌པོའེ༌ ཁོང༌ ཡང༌ མ༌ནེ༌ མ༌ཐུག༌, ཡང༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཁོ༌རང༌ངི༌ ཡུལ༌ལ༌ ལོགས༌ཏེ༌ སོང༌། 40 ཕི༌ལིབ༌བི༌ ཁོ༌རང༌ ཨ༌ཟོ༌ཏུས༌ གྱལ༌ས༌ ལེབས༌ཏེ༌ ཐོང༌, ཡང༌ ཀཱེ༌སར༌རིའ༌ ལེབ༌ ལེབ༌ ཚག༌པ༌ ཁོང༌ ཆའ༌ཁན༌ནི༌ གྲོང༌ཁྱེར༌ ཚང༌མའེ༌ ནང༌ང༌ གའ༌མོའེ༌ ནས༌ཚུལ༌ ཤད༌ཨིན༌ སོང༌།
*8:33 8:33 ཡེ༌ཤ༌ཡཱའེ༌ སྤེ༌ཆའེ༌ 53:7, 8
†8:37 8:37 སྔུན༌མའེ༌ གིརིས༌སི༌ སྤེ༌ཆའེ༌ ནང༌ང༌ རྐང༌པ༌ 37 མེད༌ཏེ༌ ཨིན༌ནོག༌, ཀ༌བོ༌ ནི༌ ཕི༌ལིབ༌བི༌ ཁོང༌ང༌ མོལས༌, "གལ༌ཏེས༌ ཉེ༌རང༌ངི༌ སྙིང༌ནེ༌ ཏད༌པ༌ ཅོའད༌ན༌ ཏེ༌ནེ༌ ཁྲུས༌ལེན༌ན༌ གྲིག༌" མོལས༌། ཏེ༌ ལོན༌པོའེ༌ ཁོང༌ང༌ ཞུས༌, "ངའེ༌ ཏད༌པ༌ ཅོའད༌ ཡེ༌ཤུ༌ མ༌ཤི༌ཀ༌ དཀོན༌མཆོག༌གི༌ སྲས༌ ཨིན༌ནོག༌།"