16
པ༌འུ༌ལུ༌ དང༌ སི༌ལས༌ལ༌ ཏི༌མོ༌ཐི༌ ཐུག༌།
16:1 ནེ༌ 5
1 པ༌འུ༌ལུ༌ དང༌ སི༌ལས༌ དེར༌བེ༌ སྟིང༌ནེ༌ ལིས༌ཏྲའ༌ལ༌ སྐྱོདས༌, ཏེ༌རུ༌ ཏི༌མོ༌ཐི༌ ཟེར༌ཁན༌ནི༌ ལོབ༌ཕྲུགས༌ཞིག༌ དུག༌གད༌པིན༌། ཁོའེ༌ ཨ༌མ༌ ཡ༌ཧུ༌དཱ༌པ༌ ཏད༌པ༌ཅན༌ཞིག༌ ཡང༌ ཨ༌བ༌ གིརིས༌པ༌ ཨིན༌པིན༌། 2 ལིས༌ཏྲའ༌ དང༌ ཨི༌ཀོ༌ནི༌འམ༌མི༌ ནང༌ང༌ ཡོད༌ཁན༌ ཏད༌པ༌ཅན༌གུན༌ནི༌ ཏི༌མོ༌ཐི༌ སྕོད༌ལམ༌གུན༌ལ༌ སྟོད༌དད༌པིན༌། 3 པ༌འུ༌ལུའ༌ ཏི༌མོ༌ཐི༌ ཁོང༌ ཉམ༌པོ༌ ཁྱེར༌ཅེས༌ལ༌ དོད༌པ༌ ཡོད༌པ༌, ཁོང༌ངི༌ ཏི༌མོ༌ཐིའ༌ སུན༌ནད༌ *16:3 བུ༌ཚའེ༌ ཤའེ༌ ཀ༌ནེ༌ པགས༌པ༌ ཅད༌ཏེ༌ སྟགས༌ ཅོ༌ཅེས༌པོའ༌ སུན༌ནད༌ ཟེར༌ར༌ནོག༌། ཅོ༌ ཅུགས༌, ཅིའ༌ཟེར༌ན༌ ཏེ༌ ཡུལ༌ལི༌ ཉེ༌ཁོར༌ལ༌ ཡོད༌ཁན༌ནི༌ ཡ༌ཧུ༌དཱ༌པ༌གུན༌ལ༌ ཁོའེ༌ ཨ༌བ༌ གིརིས༌པ༌ ཨིན༌ཁན༌བོ༌ གྱུས༌ཡོད༌པིན༌། 4 ཁོང༌གུན༌ གྲོང༌ཁྱེར༌ ཅིག༌ནེ༌ ཅིག༌ག༌ སྐྱོད༌ ཟ༌ནེ༌, ཏེ༌ ཡུལ༌ལི༌ ཏད༌པ༌ཅན༌གུན༌ལ༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ སྐུ༌ཚབས༌ དང༌ འུ༌སྐྱོང༌ གུན༌ནི༌ ཐག༌ཅད༌ཁན༌གུན༌ སིལ༌ཏེ༌ ཤད༌ཨིན༌, ཡང༌ ཏེ༌གུན༌ ཁའ༌ཉན༌ཅེས༌ལ༌ སྤོས༌པ༌ སལ༌ཨིན༌ སྐྱོདས༌། 5 ཏེ༌ཟུག༌ ཛད༌ཅེས༌པོའེ༌ ཆོས༌ཚོགས༌གུན༌ ཏད༌པའེ༌ ནང༌ང༌ སྟན༌པོ༌ སོང༌ ཡང༌ ཏད༌པ༌ཅན༌གུན༌ནི༌ ཀྲངས༌ཀ༌ ཞག༌ཏང༌ གྱས༌ཨིན༌ སོང༌།
པ༌འུ༌ལུའ༌ ཞལ༌ཟིགས༌ ཐོང༌།
16:6 ནེ༌ 10
6 པ༌འུ༌ལུ༌ དང༌ ཁོང༌ངི༌ ཕྲོ༌པ༌གུན༌ལ༌ དམ༌པའེ༌ ཐུག༌ཉིད༌དི༌ ཨ༌སི༌ཨཱ༌ ནང༌ང༌ ཆོས༌ཤད༌ཅེས༌ནེ༌ སྒག༌ག༌ ཛདས༌པ༌ ཁོང༌གུན༌ ཕིརིག༌འེ༌ཡཱ༌ དང༌ གཱ༌ལ༌ཏི༌ཡཱ༌ ཡུལ༌གུན༌ གྱུད༌ཏེ༌ སྐྱོདས༌། 7 ཁོང༌གུན༌ མི༌སི༌འ༌ ཡུལ༌ལི༌ སན༌ཚམས༌ལ༌ ལེབ༌བ༌ཅིག༌, ཁོང༌གུན༌ནི༌ བི༌ཏི༌ནི༌ཡཱ༌ ནང༌ང༌ སྐྱོད༌ཅེས༌ ཅོས༌ ཨིན༌ནའང༌ ཡེ༌ཤུའི༌ ཐུག༌ཉིད༌དི༌ ཁོང༌གུན༌ ཏེ༌རུ༌ སྐྱོད༌ མ༌ཅུགས༌། 8 ཏེ༌བོའེ༌ཕིའ༌ ཁོང༌གུན༌ མི༌སི༌འ༌ ཡུལ༌ གྱུད༌ཏེ༌ ཏྲོ༌འེས༌ གྱལ༌ས༌ སྐྱོདས༌།
9 ཏེན༌ན༌ ཚན༌ལ༌ ཞལ༌ཟིགས༌ཤིག༌གི༌ ནང༌ང༌ པ༌འུ༌ལུའ༌ མ༌ཀེ༌དོ༌ནི༌ཡཱ༌པ༌ ཞིག༌ ཁོང༌ངི༌ དུན༌ལ༌ ལངས༌ཏེ༌, "ཇུ༌ཇུ༌ མ༌ཀེ༌དོ༌ནི༌ཡཱ༌ སྐྱོད༌ཏེ༌ ང༌ཞའ༌ རོགས༌ ཛད༌" ཟེར༌ཨིན༌ ཞུ༌ཝ༌ ཕུལ༌ལ༌ ཐོང༌། 10 པ༌འུ༌ལུའི༌ ཞལ༌ཟིགས༌པོ༌ ཟིགས༌ཏེ༌ སྟིང༌ནེ༌ ཏེན༌ན༌མལ༌ལ༌ ང༌ཞའེ༌ མ༌ཀེ༌དོ༌ནི༌ཡཱ༌ ཆ༌ཅེས༌སི༌ གྲལ༌ ཅོས༌, ཅིའ༌ཟེར༌ན༌ དཀོན༌མཆོག༌གི༌ ང༌ཞའ༌, ཁོང༌གུན༌ལ༌ གའ༌མོའེ༌ ནས༌ཚུལ༌ ཤད༌ཅེས༌ལ༌ བོད༌ད༌ ཛད༌ཁན༌བོ༌ ཧ༌གོ༌།
ཕི༌ལི༌པི༌པ༌ ལི༌དི༌ཡཱའེ༌ ཏད༌པ༌ ཁྱོངས༌།
16:11 ནེ༌ 15
11 ཏྲོ༌འེས༌ནེ༌ ང༌ཞ༌གུན༌ གྲུ༌ཟིང༌ང༌ ཞོན༌ཏེ༌ སུ༌མོ༌ཏྲ༌ཀེའ༌ ལེབ༌, ཡང༌ སྟིང༌མ༌ཞག༌པོའ༌ ནེ༌ཡཱ༌པོ༌ལུས༌ལ༌ ལེབ༌། 12 ཏེ༌ཀ༌ནེ༌ ང༌ཞ༌གུན༌ མ༌ཀེ༌དོ༌ནི༌ཡཱ༌ ཡུལ༌ཇོངས༌སི༌ གྱལ༌ས༌ མ༌ རྩད༌ཅན༌ ཕི༌ལི༌པིའ༌ སོང༌པིན༌, ཀ༌བོའེ༌ ནང༌ང༌ རོམ༌པ༌ མང༌པོ༌ཞིག༌ དུག༌གད༌པིན༌། ཏེ༌རུ༌ ང༌ཞ༌གུན༌ ཞག༌བན༌ཤིག༌ དུགས༌པིན༌།
13 ཤབ༌བད༌དི༌ ངལ༌ཚོའེ༌ ཞག༌ག༌ མོས༌ལམ༌ ཞུས༌སེ༌ ནས༌ས༌ཞིག༌ ཐོབ༌ཨིན༌ སམ༌ཏེ༌ ང༌ཞ༌གུན༌ གྱལ༌སའེ༌ སྒོ༌ནེ༌ བིངས༌ཏེ༌ ལྩངས༌པོ༌ ཆོགས༌ལ༌ སོང༌པིན༌། ཏེ༌རུ༌ ཛོམས༌ཏེ༌ ཡོད༌ཁན༌ནི༌ བུ༌མོ༌གུན༌ ཡོད༌ས༌ དུགས༌ཏེ༌ ཁོང༌གུན༌ ཉམ༌པོ༌ སྤེ༌ར༌ ཏངས༌པིན༌། 14 སྤེ༌ར༌ ཉན༌ཁན༌གུན༌ནི༌ ཕྲོའ༌ ལི༌དི༌ཡཱ༌ ཟེར༌ཁན༌ བུ༌མོ༌ཞིག༌ དུག༌པིན༌, ཁོ༌ ཐི༌འ༌ཏི༌རཱ༌ གྱལ༌ས༌ནེ༌ གྱལ༌པོའེ༌ ཀོས༌ལག༌ ཙོགས༌ རས༌ རིན༌ཅན༌ནི༌ ཚོང༌ ཅོ༌ཁན༌ དང༌ དཀོན༌མཆོག༌ག༌ ཅོལ༌ཁན༌ཞིག༌ ཨིན༌པིན༌། གཙོ༌བོའེ༌, ཁོའེ༌ སེམས༌ པ༌འུ༌ལུའི༌ མོལ༌ཁན༌གུན༌ལ༌ ཏད༌པ༌ ཁྱོང༌ཅེས༌སི༌ ཕིའ༌ ཕེའ༌ཛདས༌། 15 ཁོ༌ དང༌ ཁོའེ༌ ནང༌མི༌ གུན༌ནི༌ ཁྲུས༌ལེནས༌ ཡང༌ ཁོའེ༌ ང༌ཞའ༌ ཞུ༌ཝ༌ ཕུལས༌, "གལ༌ཏེས༌ ཉེ༌ཞའེ༌ ང༌ གཙོ༌བོ༌ ཡེ༌ཤུའི༌ ནང༌ང༌ ཏད༌པ༌ཅན༌ཞིག༌ ཨིན༌ནོག༌ སམ༌མད༌ན༌, སྐྱོད༌ཏེ༌ ངའེ༌ ཁང༌པ༌ ཞུགས༌ས༌ ཛད༌།" ཁོའེ༌ ང༌ཞའ༌ ཞུ༌ཝ༌ ཕུལ༌ཨིན༌ དུགས༌པ༌ ང༌ཞ༌གུན༌ ཁོའེ༌ ཁང༌པ༌ དུགས༌པིན༌།
པ༌འུ༌ལུ༌ དང༌ སི༌ལས༌ གུན༌ ཟུམས༌།
16:16 ནེ༌ 40
16 ཞག༌ཤིག༌ ང༌ཞའ༌ མོས༌ལམ༌ ཞུས༌སེ༌ ནས༌ས༌ ཆོགས༌ལ༌ ཆེན༌ ཡོད༌ ཟ༌ནེ༌, ང༌ཞ༌གུན༌ལ༌ ཚེ༌ཡོག༌ བུ༌མོ༌ཞིག༌ ཐུག༌, ཁོའེ༌ ནང༌ང༌ ལྷའ༌ ཞུགས༌ཏེ༌ མི༌གུན༌ལ༌ ཡོང༌ཅེས༌ཅན༌ནི༌ ཏུས༌སི༌ སྐོར༌ལ༌ སྔུན༌ཁྱེན༌ ཏངས༌ཏེ༌ ཁོའེ༌ དག༌པོ༌གུན༌ནི༌ ཕིའ༌ པེ༌ནེ༌ མང༌པོ༌ ཅོའད༌པིན༌། 17 བུ༌མོ༌བོ༌ པ༌འུ༌ལུ༌ དང༌ ང༌ཞའེ༌ སྟིང༌རང༌ནེ༌ ཡོངས༌ཏེ༌ ཀུ༌ཅོ༌ ཏང༌ཨིན༌ ཟེརས༌, "ཀུན༌ཝང༌ དཀོན༌མཆོག༌གི༌ ཞབ༌སྟོག༌པ༌ ཨིན༌ཁན༌ནི༌ འི༌ མི༌གུན༌ནི༌ ཁྱོ༌ཞ༌གུན༌ལ༌ ཐར༌པའེ༌ ལམ༌མི༌ སྐོར༌ལ༌ ཤད༌ད༌ནོག༌།"
18 ཁོའེ༌ ཞག༌ཏང༌ ཏེན༌ན༌ ཙོགས༌ ཅོ༌ཨིན༌ དུགས༌པ༌, སྟིང༌ཇུག༌ག༌ མ༌སྲན༌ཏྲེ༌ སྣང༌ང༌ ཚེར༌ཏེ༌ པ༌འུ༌ལུའི༌ གྱབ༌ལོག༌ག༌ ཟིགས༌ ཡང༌ སེམས༌ཉིད༌ ངན༌པ༌བོའ༌ མོལས༌, "ངའེ༌ ཁྱོ༌རང༌ང༌ ཡེ༌ཤུ༌ མ༌ཤི༌ཀའེ༌ ཚན༌ནི༌ ནང༌ང༌ ཁོའེ༌ ནང༌ནེ༌ བིངས༌ཏེ༌ ཡོང༌ཅེས༌ལ༌ བཀའ༌ ཏང༌ངད༌།" ཏེན༌ན༌མལ༌ལ༌ ཏེ༌ སེམས༌ཉིད༌ ངན༌པ༌བོ༌ ཁོའེ༌ ནང༌ནེ༌ བིངས༌ཏེ༌ སོང༌།
19 ཁོའེ༌ དག༌པོ༌གུན༌ནི༌ པེ༌ནེ༌ ཅོ༌ཅེས༌སི༌ སྐབས༌ མེད༌ཁན༌ ཆའ༌ཁན༌བོ༌ ཧ༌གོའ༌ཅིག༌, ཁོང༌གུན༌ནི༌ པ༌འུ༌ལུ༌ དང༌ སི༌ལས༌ ཟུམས༌ཏེ༌ ཁྲོམས༌སི༌ ནང༌ང༌ ཝང༌སྲུལ༌པ༌གུན༌ནི༌ དུན༌ལ༌ དྲུད༌ཨིན༌ ཁྱེརས༌། 20 ཁོང༌གུན༌ ཁྲིམས༌པོན༌གུན༌ནི༌ དུན༌ལ༌ ལེབ༌བ༌ཅིག༌, "འི༌ ཡ༌ཧུ༌དཱ༌པ༌གུན༌ ང༌དང༌ངི༌ གྱལ༌སའེ༌ ནང༌ང༌ ཡོངས༌ཏེ༌ ཧི༌ལིངས༌ ཕིང༌དུག༌, 21 ཡང༌ ང༌དང༌ངི༌ རོམ༌པའེ༌ བཀའ༌ཁྲིམས༌ནེ༌ གལ༌ཁན༌ནི༌ ལམ༌ ལུག༌སྲོལ༌ རིག༌ ང༌དང༌ང༌ ལབ༌དུག༌" ཟེརས༌།
22 ཏེ༌བོ༌ ཚོར༌ར༌ཅིག༌ མི༌ཚོགས༌སིའང༌ པ༌འུ༌ལུ༌ དང༌ སི༌ལས༌སི༌ གྱབ༌གལ༌ ཅོས༌, ཡང༌ ཁྲིམས༌པོན༌གུན༌ནི༌ ཁོང༌ ཉིས༌ཀོའ༌ ལྗེར༌ཉལ༌ ཕུད༌ཏེ༌ བེར༌ཀ༌ ཏང༌ཅེས༌སི༌ བཀའ༌ ཏངས༌། 23 ཁོང༌གུན༌ལ༌ བེར༌ཀ༌ ཉམ༌པོ༌ མ༌སྲན༌ཏྲེ༌ རྡུངས༌ ཡང༌ ཙོན༌ལ༌ ཀགས༌ཏེ༌ ཙོན༌ཁང༌ངི༌ སྤོན༌བོའ༌ གྱལ༌ལ༌ ཅོས༌ཏེ༌, སྲུང༌ཅུག༌ཅེས༌ལ༌ བཀའ༌ ཏངས༌། 24 བཀའ༌ ཏངས༌ཁན༌བོ༌ ཐོབ༌བ༌ཅིག༌, ཁོའེ༌ ཁོང༌ ཉིས༌ཀོ༌ ཚང༌མའེ༌སང༌ ནང༌ཀུག༌ག༌ ཡོད༌ཁན༌ནི༌ ཙོན༌ཁང༌ངི༌ ནང༌ང༌ རྐང༌པ༌གུན༌ ཤིང༌ངི༌ ནང༌ང༌ ཅུགས༌ཏེ༌ ལྡམས༌ཏེ༌ བོརས༌།
25 ཚན༌ཕེད༌ལ༌ པ༌འུ༌ལུ༌ དང༌ སི༌ལས༌ ཉིས༌ཀོའེ༌ དཀོན༌མཆོག༌ག༌ མོས༌ལམ༌ ཞུ༌ཨིན༌, གུར༌མ༌ ཏང༌ངད༌པིན༌, ཡང༌ ཞན༌ ཙོན༌པ༌གུན༌ནི༌ ཁོང༌ང༌ ཉན༌ཏེ༌ ཡོད༌པིན༌། 26 ཧུན༌མེད༌ལ༌ སང༌གུལ༌ ཀྲག༌པོ༌ ཡོངས༌ཏེ༌ ཙོན༌ཁང༌ངི༌ མག༌ལྡན༌གུན༌ སྐུལས༌། ཏེན༌ན༌མལ༌ལ༌ སྒོ༌ ཚང༌མ༌ བེ༌, ཡང༌ ཏེ༌རུ༌ ཡོད༌ཁན༌ནི༌ ཙོན༌པ༌ ཚང༌མའེ༌ ལྕག༌ཐག༌གུན༌ བྲོལ༌ཏེ༌ བུད༌། 27 ཙོན༌ཁང༌ངི༌ སྤོན༌བོའ༌ ཉིད༌ཚད༌ ཡང༌ ཁོའེ༌ ཙོན༌ཁང༌ངི༌ སྒོ༌གུན༌ ཕེས༌ཏེ༌ ཐོང༌། ཙོན༌པ༌ ཚང༌མ༌ ཤོར༌ཏེ༌ མེད༌ཀྱག༌ སམ༌ཏེ༌, ཁོའེ༌ རང༌ངི༌ ར༌འི༌ ཕིངས༌ཏེ༌ རང༌སྲོག༌ ཅད༌ཅེས༌ ཅོས༌། 28 པ༌འུ༌ལུའི༌ ཀུ༌ཅོ༌ ཏངས༌ཏེ༌ ཁོའ༌ མོལས༌, "རང༌ངི༌ སྲོག༌ མ༌ཅད༌, ང༌ཞའ༌ ཚང༌མ༌ འི༌ནེ༌ཀ༌ནེ༌ ཡོད༌།"
29 ཙོན༌ཁང༌ངི༌ སྤོན༌བོའེ༌ འོད༌ ཁྱོང༌ ཟེར༌ཏེ༌ བོདས༌ ཡང༌ ཁོ༌ ནང༌ཀུག༌ག༌ བང༌ཏངས༌ཏེ༌ སོང༌ ཡང༌ དར༌ཨིན༌ཞིག༌ པ༌འུ༌ལུ༌ དང༌ སི༌ལས༌སི༌ དུན༌ལ༌ གྱེལ༌། 30 ཁོའེ༌ ཁོང༌གུན༌ ཕི༌ལོག༌ག༌ ཁྱོངས༌ཏེ༌ ཟེརས༌, "སྤོན༌བོ༌ལེ༌ ངའེ༌ ཐར༌པ༌ ཐོབ༌ཅེས༌ལ༌ ཅི༌ ཅོ༌གོས༌?"
31 ཁོང༌གུན༌ནི༌ ལན༌སལས༌, "གཙོ༌བོ༌ ཡེ༌ཤུའི༌ཀ༌ ཏད༌པ༌ ཁྱོང༌, ཏེ༌ནེ༌ ཁོ༌རང༌ང༌ ཐར༌པ༌ ཐོབ༌ཨིན༌, མ༌ཚད༌ ཁྱོ༌རང༌ངི༌ ཁང༌པའེ༌ ནང༌ང༌ དུག༌ཁན༌གུན༌ནའང༌"། 32 ཁོང༌གུན༌ནི༌ ཙོན༌ཁང༌ངི༌ སྤོན༌བོ༌ དང༌ ཁོའེ༌ ནང༌མི༌ གུན༌ལ༌ གཙོ༌བོ༌ ཡེ༌ཤུའི༌ སྐོར༌ལ༌ ཤད༌ད༌ ཛདས༌། 33 ཚན༌ནི༌ ཏེན༌ན༌ ཏུས༌ལ༌ ཙོན༌ཁང༌ངི༌ སྤོན༌བོ༌བོའེ༌ ཁོང༌གུན༌ ཁྱེར༌ཏེ༌ ཁོང༌གུན༌ནི༌ ཾཾཾཾཾམ༌ཁའ༌གུན༌ ཁྲུས༌, ཡང༌ ཏེན༌ན༌ ཏུས༌ལ༌ ཁོ༌ དང༌ ཁོའེ༌ ནང༌མི༌ ཚང༌མའེ༌ ཁྲུས༌ལེནས༌། 34 ཁོའེ༌ པ༌འུ༌ལུ༌ དང༌ སི༌ལས༌ ཁོ༌རང༌ངི༌ ཁང༌པ༌ ཁྱེར༌ཏེ༌ དོན༌ཏང༌ ཕུལས༌, ཁོ༌ དང༌ ཁོའེ༌ ནང༌མི༌ ཚང༌མའ༌ སྐྱིད༌པོ༌ སོང༌ ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌གི༌ཀ༌ ཏད༌པ༌ ཁྱོངས༌།
35 ནམ༌ལངས༌ས༌ཅིག༌, ཁྲིམས༌པོན༌གུན༌ནི༌ ཙོན༌ཁང༌ངི༌ སྤོན༌བོའེ༌ཀ༌ མག༌མི༌གུན༌ ཀལ༌ཏེ༌, "ཁོང༌གུན༌ ཕུད༌དོང༌" ཟེར༌ཏེ༌ བཀའ༌ ཏངས༌། 36 ཙོན༌ཁང༌ངི༌ སྤོན༌བོ༌བོའེ༌ པ༌འུ༌ལུ༌ ཞུས༌, "ཁྲིམས༌པོན༌གུན༌ནི༌ ཉེ༌ཞའ༌ ཕུད༌ ཟེར༌ཏེ༌ བཀའ༌ ཏངས༌ཏོག༌། ཏ༌ ཉེ༌ཞའ༌གུན༌ ཞི༌དེ༌ ཉམ༌པོ༌ སྐྱོད༌།"
37 ཨིན༌ནའང༌ པ༌འུ༌ལུའི༌ ལན༌སལས༌, "ང༌ཞའ༌ རོམ༌པ༌ ཨིན༌ཏེའང༌ ཁྲིམས༌པོན༌གུན༌ནི༌ ང༌ཞའེ༌ཀ༌ ཁྲིམས༌ མ༌སྲུལ༌ལ༌ མི༌གུན༌ནི༌ དུན༌ལ༌ ང༌ཞའ༌ རྡུངས༌ཏེ༌ ཙོན༌ཁང༌ང༌ ཀགས༌། ཏ༌ ཅི༌ ཁོང༌གུན༌ནི༌ ང༌ཞའ༌ སུའང༌ གྱུས༌ ཆ༌ མ༌ཅུག༌ག༌ ཕུད༌ཏང༌ཨིན༌ སམ༌མ༌ནོག༌ག༌? ང༌ཞའ༌ མི༌ཆའ༌། ཁོ༌རང༌གུན༌ འི༌ཀ༌ ཡོངས༌ཏེ༌, ང༌ཞའ༌ ཙོན༌ནེ༌ ཕིངས༌ཏེ༌ ཁྱེར༌གོས༌།"
38 མག༌མི༌གུན༌ སོང༌ཏེ༌ སྤེ༌ར༌གུན༌ ཤདས༌ ཡང༌ པ༌འུ༌ལུ༌ དང༌ སི༌ལས༌ གུན༌ རོམ༌པ༌ ཨིན༌ཁན༌བོ༌ ཚོར༌ཏེ༌ ཁྲིམས༌པོན༌གུན༌ སྲན༌ཏྲེ༌ ཇིགས༌། 39 ཁྲིམས༌པོན༌གུན༌ ཙོན༌ཁང༌ང༌ ཡོངས༌ ཡང༌ པ༌འུ༌ལུ༌ དང༌ སི༌ལས༌ལ༌ གོངས༌པ༌ སལ༌ཅེས༌ལ༌ ཞུས༌། ཁོང༌གུན༌ ཙོན༌ནེ༌ ཕི༌ལོག༌ག༌ ཁྱེར༌ཏེ༌ ཁོང༌གུན༌ལ༌ གྱལ༌ས༌ནེ༌ བིངས༌ཏེ༌ ཆ༌ཅེས༌ལ༌ ཞུ༌ཝ༌ ཕུལས༌། 40 པ༌འུ༌ལུ༌ དང༌ སི༌ལས༌ ཙོན༌ཁང༌ནེ༌ བིང༌ཏེ༌ ལི༌དི༌ཡཱའེ༌ ཁང༌པ༌ སྐྱོདས༌, ཏེ༌རུ༌ ཁོང༌གུན༌ སྤུན༌གུན༌ ཉམ༌པོ༌ ཐུག༌ཏེ༌ ཁོང༌གུན༌ལ༌ སྤོས༌པ༌ སལ༌ལ༌ ཛདས༌, ཡང༌ ཏེ༌ ཡུལ༌ནེ༌ སྐྱོདས༌།