20
པ༌འུ༌ལུ༌ མ༌ཀེ༌དོ༌ནི༌ཡཱ༌, གིརིས༌ དང༌ ཏྲོ༌འེས༌ལ༌ སྐྱོདས༌།
20:1 ནེ༌ 6
1 ཧི༌ལིངས༌ ཚང༌མ༌ མེད༌ཁན༌ ཆའ༌ཅིག༌, པ༌འུ༌ལུའི༌ ལོབ༌ཕྲུགས༌གུན༌ བོད༌ད༌ ཛད༌ཏེ༌ ཁོང༌གུན༌ལ༌ སྤོས༌པ༌ སལས༌, ཡང༌ སྟིང༌ཇུག༌གི༌ ཇུ༌ མོལ༌ཏེ༌ ཁོང༌ མ༌ཀེ༌དོ༌ནི༌ཡཱ༌ སྐྱོདས༌། 2 བེས༌སི༌ ཏུས༌ལ༌ ཁོང༌ ལེབས༌སེ༌ ནས༌ས༌གུན༌ནི༌ ནང༌ང༌ ཏད༌པ༌ཅན༌གུན༌ལ༌ སྤོས༌པ༌ སལ༌ཨིན༌ སྐྱོདས༌, གིརིས༌སི༌ ཡུལ༌ཇོངས༌ལ༌ ལེབས༌ཏེ༌ སྟིང༌ནེ༌ 3 ཏེ༌རུ༌ ཁོང༌ ཟླ༌ཝ༌ སུམ༌ ཞུགས༌། ཁོང༌ གྲུ༌ཟིང༌ངི༌ ནང༌ང༌ སི༌རི༌ཡཱ༌ སྐྱོད༌ཅེས༌སི༌ གྲལ༌གྲིག༌ ཅོའ༌ ཟ༌ནེ༌, ཡ༌ཧུ༌དཱ༌པ༌གུན༌ནི༌ ཁོང༌ སད༌ཅེས༌སི༌ ཅུས༌ངན༌ ལྡིངས༌ཁན༌བོ༌ ཚོར༌པ༌, ཁོང༌ངི༌ ལོགས༌ཏེ༌ མ༌ཀེ༌དོ༌ནི༌ཡཱ༌ གྱུད༌ཏེ༌ ཆ༌ཅེས༌ལ༌ ཐག༌ཅདས༌། 4 ཁོང༌ ཉམ༌པོ༌ བེ༌རེ༌ཨཱ༌ནེ༌ པིར༌རུའི༌ བུ༌ཚའ༌ སོ༌པ༌ཏེར༌, ཐེ༌ས༌ལོ༌ནི༌ཀ༌ནེ༌ ཨ༌རིས༌ཏར༌ཀུས༌ དང༌ སེ༌ཀུན༌དུས༌, དེར༌བེ༌ནེ༌ གཱ༌ཡུས༌, ཨ༌སི༌ཨཱའེ༌ ཡུལ༌ཇོངས༌ནེ༌ ཏི༌ཁི༌ཀུས༌ དང༌ ཏྲོ༌ཕི༌མུས༌ ཡང༌ ཏི༌མོ༌ཐི༌ ཆ༌ཅེས༌ ཡོད༌པིན༌། 5 ཁོང༌གུན༌ པ༌འུ༌ལུའི༌ སང༌ སྔུན༌ལ༌ སོང༌ཏེ༌ ཏྲོ༌འེས༌ གྱལ༌སའེ༌ ནང༌ང༌ ང༌ཞའེ༌ ཕིའ༌ སྲུངས༌ཏེ༌ དུགས༌། 6 སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ནི༌ སྟིང༌ནེ༌ ང༌ཞ༌གུན༌ ཕི༌ལི༌པི༌ནེ༌ གྲུ༌ཟིང༌ང༌ ཞོན༌ཏེ༌ སོང༌པིན༌, ཡང༌ ཞག༌ ལྔའེ༌ སྟིང༌ནེ༌ ཏྲོ༌འེས༌ གྱལ༌སའ༌ ལེབས༌ཏེ༌ ཞན༌མ༌ ཕྲོ༌པ༌གུན༌ ཐུག༌, ང༌ཞའ༌ ཏེ༌རུ༌ ཞག༌པོ༌ རྡུན༌ དུགས༌པིན༌།
པ༌འུ༌ལུའི༌ ཁྱོག༌ཏོང༌ཞིག༌ སོན༌ཏེའ༌ ལང༌ང༌ ཛདས༌།
20:7 ནེ༌ 12
7 ཟ༌ཉི༌མའེ༌ ཞག༌ག༌, གཙོ༌བོའེ༌ དོན༌ཏང༌ ཟའ༌ཅེས༌ལ༌ ང༌ཞའ༌ ཏེ༌རུ༌ ཡོད༌ཁན༌ནི༌ ཆོས༌ཚོགས༌ ཉམ༌པོ༌ ཛོམས༌, སྟིང༌མ༌ཞག༌པོ༌ པ༌འུ༌ལུ༌ ཆ༌ཅེས༌ ཨིན༌པ༌ ཁོང༌ ཚན༌ཕེད༌ ཚག༌པ༌ ཆོས༌ཤད༌ཨིན༌ ཞུགས༌། 8 སྟང༌ཐོག༌ག༌ ང༌ཞ༌གུན༌ ཛོམས༌ཏེ༌ ཡོད༌ཁན༌ནི༌ ནང༌བོའེ༌ ནང༌ང༌ འོད༌ མང༌པོ༌ ཏུགས༌ཏེ༌ ཡོད༌པིན༌། 9 ཁོང༌གུན༌ནི༌ ཕྲོའ༌ ཨེའུ༌ཏི༌ཀུས༌ ཟེར༌ཁན༌ནི༌ ཁྱོག༌ཏོང༌ཞིག༌ ཀར༌ཁུང༌ངི༌ཀ༌ དུགས༌ཏེ༌ ཡོད༌པིན༌, པ༌འུ༌ལུའི༌ གོར༌གོར༌ ཚག༌པ༌ གྲོས༌དུར༌ ཛད༌ཅེས༌པོའེ༌ ཁོའ༌ ཉིད༌ ལྕིན༌ཏྲེ༌ ཡོངས༌, ཡང༌ ཐོག༌ཚད༌ སུམ༌ནེ༌ ཐུར༌ལ༌ བུད༌ཏེ༌ ཤི༌། 10 པ༌འུ༌ལུ༌ ཡོག༌ག༌ སྐྱོད༌ཏེ༌ ཁྱོག༌ཏོང༌བོའེ༌ ཟུགས༌པོའ༌ ཁྲིལ༌ཏེ༌, "ཇིག༌ མ༌ཇིག༌ཤིག༌, ཁོ༌ སོན༌ཏེ༌ ཨིན༌ནོག༌" མོལས༌། 11 ཏེ༌ནེ༌ པ༌འུ༌ལུ༌ ཁེ༌ཐོག༌ག༌ ལོགས༌ཏེ༌ སྐྱོད༌ཏེ༌ དོན༌ཀྱིར༌ ཅག༌ཏེ༌ ཚང༌མ༌ ཛོམས༌ཏེ༌ ཟོས༌, ཡང༌ ནམ༌ལངས༌ ཚག༌པ༌ གྲོས༌དུར༌ ཛདས༌, ཏེ༌ནེ༌ ཁོང༌ ཏེ༌ཀ༌ནེ༌ སྐྱོདས༌། 12 ཁོང༌གུན༌ནི༌ ཏེ༌ བུ༌ཚ༌བོ༌ སོན༌ཏེའ༌ ཁོའེ༌ ཁང༌པ༌ ཁྱེར༌ཉན༌པ༌ ཁོང༌གུན༌ལ༌ ཞི༌དེ༌ ཐོབ༌།
པ༌འུ༌ལུའི༌ ཨེ༌ཕེ༌སས༌པའེ༌ འུ༌སྐྱོང༌གུན༌ལ༌ སྟིང༌ཇུག༌གི༌ ཇུ༌ ཞུས༌།
20:13 ནེ༌ 38
13 པ༌འུ༌ལུ༌ ཨ༌སོས༌ གྲོང༌ཁྱེར༌ལ༌ ཞབ༌གྲུལ༌ལ༌ སྐྱོད༌ཅེས༌ ཡང༌ ང༌ཞའ༌ ཏེ༌རུ༌ གྲུ༌ཟིང༌ངི༌ ནང༌ང༌ སོང༌ཏེ༌ ཁོང༌ ཉམ༌པོ༌ ཛོམ༌ཅེས༌ལ༌ ཁོང༌ངི༌ ཐབས༌ལྡིངས༌། 14 ཨ༌སོས༌ལ༌ ཁོང༌ ང༌ཞ༌གུན༌ ཉམ༌པོ༌ ཐུག༌ག༌ཅིག༌, ང༌ཞའེ༌ ཁོང༌ གྲུ༌ཟིང༌ང༌ སྐྱོན༌ཏེ༌ མི༌ཏི༌ལེ༌ནེ༌ གྲོང༌ཁྱེར༌ལ༌ སོང༌པིན༌། 15 ཐོ༌རེ༌ཟུག༌པོ༌ ཏེ༌ཀ༌ནེ༌ གྲུ༌ཟིང༌ང༌ ཞོན༌ཏེ༌ ང༌ཞ༌གུན༌ ཀི༌འུས༌ ཚོ༌ལིང༌ང༌ ལེབ༌, ཡང༌ སྟིང༌མ༌ཞག༌པོ༌ ས༌མོས༌ ཚོ༌ལིང༌ང༌ ལེབ༌། ཏེ༌ སང༌ སྟིང༌མ༌ཞག༌པོ༌ ང༌ཞ༌གུན༌ མི༌ལི༌ཏུས༌ གྲོང༌ཁྱེར༌ལ༌ ལེབ༌། 16 པ༌འུ༌ལུ༌ ཨེ༌ཕེ༌སས༌སི༌ ནང༌ང༌ དུག༌ག༌ མ༌ཛདས༌, ཅིའ༌ཟེར༌ན༌ ཨ༌སི༌ཨཱའེ༌ ནང༌ང༌ ཞུགས༌ཏེ༌ ཏུས༌ གོད༌ལ༌ མ༌ཏང༌ང༌ ཙམ༌ ཐུབ༌ཉན༌ནའང༌ ཡེ༌རུ༌ཤ༌ལེམ༌མ༌ གྱོགས༌པ༌ སྐྱོད༌ཅེས༌སི༌ དོད༌པ༌ ཛདས༌། གལ༌ཏེས༌ ཉན༌ན༌ པེན༌ཏི༌ཀོས༌སི༌ ཏུས༌ཆེན༌ནི༌ ཞག༌ཚག༌པ༌ ཏེ༌རུ༌ ལེབ༌ཅེས༌ལ༌ ཐད༌དད༌པིན༌།
17 མི༌ལི༌ཏུས༌ནེ༌ པ༌འུ༌ལུའི༌ ཨེ༌ཕེ༌སས༌སི༌ ཆོས༌ཚོགས༌སི༌ འུ༌སྐྱོང༌གུན༌ལ༌ ཁོང༌ང༌ ཐུག༌ག༌ལ༌ ཡོང༌ མོལ༌ཏེ༌ ལོན༌ ཀལས༌། 18 འུ༌སྐྱོང༌གུན༌ ལེབ༌བ༌ཅིག༌, པ༌འུ༌ལུའི༌ ཁོང༌གུན༌ལ༌ མོལས༌, "ཨ༌སི༌ཨཱ༌ ནང༌ང༌ གོ༌མ༌རང༌ ལེབ༌བི༌ ཞག༌ནེ༌ དག༌ས༌ ཚག༌པ༌ ངའེ༌ ཁྱོ༌ཞ༌གུན༌ ཉམ༌པོ༌ མི༌ཚེ༌ ཀ༌ཟུག༌ཤིག༌ག༌ ཕུདས༌, ཁྱོ༌ཞ༌གུན༌ལ༌ གྱུས༌ཨིན༌ནོག༌། 19 ང༌ ཡ༌ཧུ༌དཱ༌པ༌གུན༌ནི༌ ཅུས༌ངན༌ མང༌པོའེ༌ དོང༌ལེན༌ ཅོ༌གོས༌ནའང༌, ངའེ༌ ང༌རང༌ངི༌ མི༌ཚེའེ༌ ནང༌ང༌ མ༌ ཉམ༌ཤུང༌ དང༌ ཆི༌མ༌ ཉམ༌པོ༌ གཙོ༌བོའེ༌ ཞབ༌སྟོག༌ ཞུས༌པིན༌། 20 ཁྱོ༌ཞའེ༌ ཁང༌པའེ༌ ནང༌ང༌ ཨིན༌གྲོ༌ ཡ༌ ཕི༌ལོག༌ག༌ མི༌མངས༌སི༌ དུན༌ལ༌ ཁྱོ༌ཞ༌གུན༌ལ༌ ཕན༌ཐོགས༌ཅན༌ནི༌ ལབ༌ཞ༌ ཏང༌ཅེས༌ལ༌ ངའེ༌ ཐེ༌ཚོམས༌ མ༌ནེ༌ མ༌ཅོས༌པིན༌། 21 དཀོན༌མཆོག༌གི༌ སྐུན༌དུན༌ལ༌ ཤགས༌པ༌ ཟུམས༌ཏེ༌ ང༌དང༌ངི༌ གཙོ༌བོ༌ ཡེ༌ཤུའི༌ཀ༌ ཏད༌པ༌ ཁྱོང༌གོ༌ཤེས༌སི༌ སྤང༌པོ༌ ངའེ༌ ཡ༌ཧུ༌དཱ༌པ༌ དང༌ གིརིས༌པ༌ གུན༌ལ༌ ཏངས༌པིན༌།"
22 "ཏ༌ དམ༌པའེ༌ ཐུག༌ཉིད༌དི༌ ངའེ༌ སེམས༌ ཁྲིད༌ཏེ༌ ཁྱེར༌ར༌ ཛད༌ཅེས༌པོའེ༌ ང༌ ཡེ༌རུ༌ཤ༌ལེམ༌མ༌ ཆ༌གོས༌། ང༌ གྱུས༌མེད༌ ཏེ༌རུ༌ ང༌ ཉམ༌པོ༌ ཅི༌ ཆེན༌། 23 ང༌ གྱུས༌ཡོད༌, དམ༌པའེ༌ ཐུག༌ཉིད༌དི༌ གྱལ༌ས༌ ཚང༌མའེ༌ ནང༌ང༌ ངའེ༌ ཕིའ༌ ཙོན༌ དང༌ རྡུག༌ངལ༌ གུན༌ སྲུངས༌ཏེ༌ ཡོད༌ཁན༌བོའེ༌ སྤང༌པུད༌ད༌ ཛད༌དད༌། 24 གལ༌ཏེས༌ དཀོན༌མཆོག༌གི༌ ཐུག༌རྗེ༌ སྐོར༌རི༌ གའ༌མོའེ༌ ནས༌ཚུལ༌ ཤད༌ཅེས༌སི༌ ཁག༌ ཀ༌བོ༌ གཙོ༌བོ༌ ཡེ༌ཤུའི༌ ངའ༌ སྟད༌ད༌ ཛདས༌, ཏེ༌བོ༌ གྲུབ༌ཅུག༌ མ༌ཐུབ༌ན༌ ངའེ༌ སྲོག༌པོ༌ ངའེ༌ ཕིའ༌ རིན༌མེད༌ ཨིན༌།"
25 "དག༌ས༌ ཚག༌པ༌ ངའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤད༌པིན༌, ཨིན༌ནའང༌ ང༌ གྱུས༌ཡོད༌ ཏ༌ནེ༌ཕར༌ལ༌ ཁྱོ༌ཞའེ༌ ཕྲོ༌ནེ༌ སུ༌ཞིག༌གིའང༌ ང༌ ཡང༌སྐྱར༌ མ༌ནེ༌ མི༌ ཐོང༌། 26 དི༌རིང༌ ངའེ༌ ཁྱོ༌ཞ༌གུན༌ལ༌ ཟེར༌རད༌, སུ༌ཞིག༌ ཏད༌པ༌ མེད༌པ༌ ཤི༌ཏེ༌ དཀོན༌མཆོག༌གི༌ ཐའ༌མེད༌ཁན༌ནི༌ ཆད༌པ༌ ཕོག༌ན༌ ཏེ༌བོ༌ ངའེ༌ སྐྱོན༌ མན༌, 27 ཅིའ༌ཟེར༌ན༌ ངའེ༌ ཁྱོ༌ཞ༌གུན༌ལ༌ ཐེ༌ཚོམས༌ མེད༌པ༌ དཀོན༌མཆོག༌གི༌ ང༌དང༌གུན༌ནི༌ ཕིའ༌ ཛད༌ཁན༌ནི༌ ཐབས༌ལྡིངས༌ ཚང༌མའེ༌ སྐོར༌ལ༌ སྤང༌པོ༌ ཏངས༌པིན༌། 28 ཁྱོ༌ཞ༌རང༌ དང༌ དཀོན༌མཆོག༌གི༌ ལུག༌ ཚང༌མ༌ སྐྱོབ༌ཏེ༌ བོར༌ཤིག༌, ཀ༌བོའེ༌ཀ༌ ཁྱོ༌ཞ༌གུན༌ དམ༌པའེ༌ ཐུག༌ཉིད༌དི༌ འུ༌སྐྱོང༌ང༌ ལྡམ༌མ༌ ཛད༌ཏེ༌ ཨིན༌, གཙོ༌བོའེ༌ རང༌ངི༌ སྐུ༌ཁྲག༌ ཤལ༌ལ༌ ཛད༌ཏེ༌ ཉོའ༌ ཛད༌ཁན༌ནི༌ ཆོས༌ཚོགས༌པོའ༌ ལུག༌རྫི༌ ཙོགས༌ལ༌ ལྟ༌སྟོག༌ ཅོ༌ཤིག༌། 29 ང༌ སོང༌ཏེ༌ སྟིང༌ནེ༌ ཁྱོ༌ཞ༌གུན༌ནི༌ ཕྲོའ༌ ནོད༌པ༌ སྐྱལ༌ཁན༌ནི༌ ཤང༌ཀུ༌གུན༌ ཡོངས༌ཏེ༌ ཆོས༌ཚོགས༌སི༌ ནང༌ང༌ ནོད༌པ༌ སྐྱལ༌ཅེས༌པོ༌ ང༌ གྱུས༌ཡོད༌། 30 ཁྱོ༌ཞ༌རང༌ངི༌ ཕྲོ༌ནེ༌ དཀོན༌མཆོག༌གི༌ དེན༌བའེ༌ ལོན༌བོ༌ གྱུར༌ཏེ༌ ཟུན༌ ཏང༌ཁན༌གུན༌ བིངས༌ཏེ༌ མ༌ཤི༌ཀའེ༌ ལོབ༌ཕྲུགས༌གུན༌ ཁོ༌རང༌གུན༌ནི༌ གྱབ༌ནེ༌ ཁྲིད༌ཏེ༌ ཁྱེར༌ཅེས༌སི༌ རྩོན༌གྲུས༌ ཅོ༌ཨིན༌། 31 ཤང༌ ཅོ༌ཤིག༌, ཁྱོ༌ཞ༌གུན༌ ཉམ༌པོ༌ ལོ༌ སུམ༌ ཡོད༌ ཟ༌ནེ༌, ཚན༌ཉིན༌ མེད༌པ༌ ངའེ༌ ཆི༌མ༌ ཉམ༌པོ༌ ཁྱོ༌ཞ༌གུན༌ལ༌ དཀོན༌མཆོག༌གི༌ ལམ༌མི༌ ཀ༌ནེ༌ ཐག༌རིང༌ང༌ མི༌ཆ༌ཅེས༌ལ༌ ཏུས༌གྱུན༌ སྤང༌པུད༌ཁན༌བོ༌ ཨིད༌ཏུ༌ ཅོ༌ཤིག༌།"
32 "ཏ༌ ངའེ༌ དཀོན༌མཆོག༌ དང༌ ཁོང༌ངི༌ ཐུག༌རྗེ༌ སྐོར༌རི༌ ལོན༌བོ༌ ཁྱོ༌ཞ༌གུན༌ནི༌ ལག༌ག༌ སྟད༌དད༌, ཏེ༌ ལོན༌བོའེ༌ ཁྱོ༌ཞ༌གུན༌ ཏད༌པའེ༌ ནང༌ང༌ ལྡན༌ ཅུག༌ག༌ ཛད༌ཅེས༌, ཡང༌ དམ༌པ༌ ཛད༌ཁན༌ ཚང༌མའེ༌ ཕྲོའ༌ ཁྱོ༌ཞ༌གུན༌ལ༌ ནོར༌སྐལ༌ སལ༌ལ༌ ཛད༌ཉན༌ཨིན༌། 33 ཞན༌མའེ༌ སེར༌ ཡ༌ མུལ༌ ཡ༌ ཀོས༌ལག༌གི༌ དོད༌པ༌ ངའེ༌ མ༌ཅོས༌པིན༌། 34 ངའེ༌ རང༌ངི༌ ལག༌པ༌ བད༌ཏེ༌ ང༌རང༌ དང༌ ངའེ༌ ཕྲོ༌པ༌གུན༌ནི༌ སྒོས༌དོམ༌ དྲན༌དྲ༌ ཅོས༌ཁན༌བོ༌ ཁྱོ༌ཞའ༌ གྱུས༌ཨིན༌ནོག༌། 35 ངའེ༌ ཅོ༌ཁན༌ ཚང༌མའེ༌ ནང༌ང༌ ཁྱོ༌ཞ༌གུན༌ལ༌ རྩོན༌གྲུས༌ ཉམ༌པོ༌ ལས༌ ཅོས༌ཏེ༌ ང༌དང༌གུན༌ནི༌ ཉམ༌ཤུང༌གུན༌ལ༌ རོགས༌ ཅོ༌གོ༌ཤེས༌པོ༌ ལྟན༌པིན༌། ང༌དང༌གུན༌ནི༌ གཙོ༌བོ༌ ཡེ༌ཤུའི༌ མོལ༌ཁན༌བོ༌ ཨིད༌ཏུའ༌ བོར༌ཤིག༌, 'ལེན༌ཅེས༌སི༌ སང༌ ཏང༌ཅེས༌པོ༌ མང༌ང༌ ཅིན༌ལབས༌ཅན༌ ཨིན༌'།"
36 ཏེ༌ ཞལ༌ཏ༌གུན༌ མོལ༌ཏེ༌ སྟིང༌ནེ༌ པ༌འུ༌ལུའི༌ ཚང༌མ༌ ཉམ༌པོ༌ པིག༌དོང༌ ཙུགས༌ཏེ༌ མོས༌ལམ༌ ཞུས༌། 37 ཁོང༌ ཚང༌མའེ༌ པ༌འུ༌ལུའ༌ ཁྲིལ༌ཨིན༌ ཕུག༌ཏང༌ཨིན༌ སྟིང༌ཇུག༌གི༌ ཇུ༌ ཞུ༌ཨིན༌ ངུས༌། 38 ཁོང༌གུན༌ནི༌ ཕིའ༌ ཚང༌མའེ༌ སང༌ ཚེར༌ཁ༌ ཆེན༌མོ༌བོ༌ ནི༌ པ༌འུ༌ལུའི༌ ཏ༌ནེ༌ཕར༌ལ༌ ཁོང༌གུན༌ནི༌ ཁོང༌ ཡང༌སྐྱར༌ མི༌ཐོང༌ མོལ༌ཅེས༌པོ༌ ཨིན༌པིན༌། ཏེ༌ནེ༌ ཁོང༌ ཚང༌མ༌ གྲུ༌ཟིང༌ ཚག༌པ༌ པ༌འུ༌ལུ༌ སྐྱལ༌ལ༌ སོང༌།