23
ཡ༌ཧུ༌དཱ༌པའེ༌ ཚོགས༌དུའི༌ ནང༌ང༌ པ༌འུ༌ལུའི༌ སྤང༌པོ༌།
23:1 ནེ༌ 11
1 པ༌འུ༌ལུའི༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌གུན༌ལ༌ ཟིགས༌ཏེ༌ མོལས༌, "ཡ༌ཧུ༌དཱ༌པའེ༌ སྤུན༌གུན༌, དི༌རིང༌ ཚག༌པ༌ ངའེ༌ དཀོན༌མཆོག༌གི༌ སྐུན༌དུན༌ལ༌ སེམས༌ ལག༌མོ༌ ཉམ༌པོ༌ མི༌ཚེ༌ ཕུད༌པིན༌།"
2 ཏེ༌བོ༌ ཚོར༌ར༌ཅིག༌, བླ༌མ༌ ཆེན༌མོ༌ ཨ༌ན༌ནི༌ཡཱས༌སི༌ པ༌འུ༌ལུའི༌ དུན༌ལ༌ ལངས༌ཏེ༌ ཡོད༌ཁན༌ནི༌ མི༌གུན༌ལ༌ ཁོང༌ང༌ གྲམ༌ལྕགས༌ ཏོང༌ ཟེརས༌། 3 ཏེ༌ནེ༌ པ༌འུ༌ལུའི༌ ཁོའ༌ མོལས༌, "ཁ༌ཆོས༌པ༌, ཀར༌ཙི༌ སྐུས༌ཁན༌ནི༌ རྩིག༌པ༌, འི༌བོའེ༌ ལན༌ ཁྱོ༌རང༌ང༌ དཀོན༌མཆོག༌གི༌ སལ༌ཨིན༌། བཀའ༌ཁྲིམས༌ ནང༌ཞིན༌ ངའ༌ ཁྲིམས༌ཅད༌ད༌ལ༌ ཁྱོ༌རང༌ ཏེ༌ཀ༌ དུགས༌ཏེ༌ མན༌ན༌, ཁྱོ༌རང༌ངི༌ ང༌ རྡུང༌ཅེས༌ལ༌ བཀའ༌ ཏངས༌ཏེ༌ བཀའ༌ཁྲིམས༌པོ༌ ཅག༌དུག༌།"
4 པ༌འུ༌ལུའི༌ དུན༌ལ༌ ཡོད༌ཁན༌གུན༌ནི༌ ཁོང༌ང༌ ཟེརས༌, "ཁྱོ༌རང༌ངི༌ དཀོན༌མཆོག༌གི༌ བླ༌མ༌ ཆེན༌མོའ༌ ངན༌པ༌ ཟེར༌ཅེས༌སི༌ ཧམ༌པ༌ ཅོའ༌དའ༌།"
5 པ༌འུ༌ལུའི༌ ལན༌སལས༌, "ཡ༌ཧུ༌དཱ༌པ༌ སྤུན༌གུན༌ ང༌ ཁོང༌ བླ༌མ༌ ཆེན༌མོ༌ ཨིན༌ཁན༌བོ༌ གྱུས༌ མེད༌པིན༌། སུང༌རབས༌སི༌ ནང༌ང༌ 'ཁྱོ༌ཞའེ༌ ཁྱོ༌ཞ༌རང༌ངི༌ ཝང༌སྲུལ༌པ༌ ངན༌པ༌ ཟེར༌ མ༌གོས༌' བྲིའ༌ ཛད༌ཏེ༌ དུག༌།"*23:5 ཨི༌ཇིབ༌ནེ༌ བིངས༌ཏེ༌ ཆའ༌ཁན༌ནི༌ སྤེ༌ཆའེ༌ 22:28
6 པ༌འུ༌ལུའ༌ ཚོགས༌དུའི༌ ནང༌ང༌ ཁ༌ཅིག༌ སད༌དུ༌ཀི༌པ༌ ཡང༌ ཁ༌ཅིག༌ ཕ༌རུ༌ཤི༌པ༌ ཨིན༌ཁན༌བོ༌ གྱུས༌ཡོད༌པིན༌། ཁོང༌ངི༌ ཀུ༌ཅོ༌ སལ༌ཏེ༌ མོལས༌, "ཡ༌ཧུ༌དཱ༌པའེ༌ སྤུན༌གུན༌, ང༌ ཕ༌རུ༌ཤི༌པ༌ ཨིན༌, ཡང༌ ངའེ༌ ཨ༌བའང༌། ངའེ༌ ཤི༌ཁན༌གུན༌ སོན༌ཏེའ༌ ལང༌ཅེས༌སི༌ ནང༌ང༌ རེ༌ཝ༌ བོར༌ཅེས༌པོའེ༌ ང༌ འི༌ཀ༌ ཁྲིམས༌ཅད༌ད༌ལ༌ ཁྱོངས༌ཏེ༌ ཨིན༌ནོག༌།"
7 ཏེ༌གུན༌ མོལ༌ལ༌ཅིག༌, ཕ༌རུ༌ཤི༌པ༌ དང༌ སད༌དུ༌ཀི༌པ༌ མི༌མངས༌སི༌ ནང༌ང༌ ཟེར༌ཟེར༌ སྲན༌ཏྲེ༌ སོང༌, ཡང༌ ཚོགས༌དུའི༌ ནང༌ང༌ ཁག༌ཉིས༌ བུད༌ 8 ༼ཕ༌རུ༌ཤི༌པ༌གུན༌ནི༌ ཤི༌ཁན༌གུན༌ སོན༌ཏེའ༌ ལང༌ཅེས༌, ཕོ༌ཉ༌ དང༌ སེམས༌ཉིད༌ གུན༌ ཡོད༌ཀྱག༌ ཟེར༌ར༌ནོག༌, ཨིན༌ནའང༌ སད༌དུ༌ཀི༌པ༌གུན༌ནི༌ ཏེ༌གུན༌ནི༌ཀ༌ ཏད༌པ༌ ཅོའ༌ མ༌ནོག༌༽ 9 ཚོགས༌དུའི༌ ནང༌ང༌ ཧི༌ལིངས༌ སྲན༌ཏྲེ༌ ཞུགས༌, ཡང༌ ཕ༌རུ༌ཤི༌པའེ༌ ཆོས༌ཁྲིམས༌ལ༌ ཁས༌པའེ༌ མི༌ ཁ༌ཅིག༌ ལངས༌ཏེ༌ སད༌དུ༌ཀི༌པ༌གུན༌ནི༌ གྱབ༌གལ༌ སྲན༌ཏྲེ༌ ཅོས༌ཏེ༌ ཟེརས༌, "ང༌ཞའ༌ འི༌ མི༌བོའེ༌ ནང༌ང༌ ཅའང༌ སྐྱོན༌ མ༌ཐོབ༌, གལ༌ཏེས༌ ཕོ༌ཉ༌ཞིག༌ ཡ༌ སེམས༌ཉིད༌ ཅིག༌གི༌ ཁོང༌ང༌ སྤེ༌ར༌ ཏངས༌ཏེ༌ ཡོད༌ན༌ ཅི༌ སོང༌།" 10 ཛིང༌མོ༌ མ༌ རྩོག༌པོ༌ སོང༌པ༌, མག༌སྟོང༌ངི༌ སྤོན༌བོའེ༌ ཏེ༌གུན༌ནི༌ པ༌འུ༌ལུ༌ ཚེད༌ཚེད༌ ཅོས༌ མི༌ཏང༌ང༌ སམས༌ཏེ༌ ཇིགས༌། ཁོའེ༌ མག༌མི༌གུན༌ལ༌ ཡོག༌ག༌ སོང༌, ཡང༌ ཝང༌ ཏངས༌ཏེ༌ ཚོགས༌དུའི༌ ཕྲོ༌ནེ༌ པ༌འུ༌ལུ༌ སྐྱོབས༌ཏེ༌ ཀི༌ལའེ༌ ནང༌ང༌ ཁྱེར༌ ཟེར༌ཏེ༌ བཀའ༌ ཏངས༌། 11 ཏེན༌ན༌ ཚན༌ལ༌ གཙོ༌བོ༌ ཡེ༌ཤུ༌ པ༌འུ༌ལུའི༌ དུན༌ལ༌ ཇལ༌ཏེ༌ མོལས༌, "ཧམ༌པ༌ ཅོས༌, ཡེ༌རུ༌ཤ༌ལེམ༌མི༌ ནང༌ང༌ ངའེ༌ ཕིའ༌ སྤང༌པོ༌ ཏང༌ཁན༌ ཙོགས༌ལ༌ ཁྱོ༌རང༌ངི༌ རོམ༌མི༌ གྱལ༌སའེ༌ ནང༌ངའང༌ ངའེ༌ ཕིའ༌ སྤང༌པོ༌ ཏང༌གོས༌།"
པ༌འུ༌ལུ༌ སད༌ཅེས༌སི༌ ཅུས༌ངན༌ ལྡིངས༌།
23:12 ནེ༌ 22
12 སྟིང༌མ༌ཞག༌པོ༌ ང༌ཏོག༌ནེ༌ ཡ༌ཧུ༌དཱ༌པ༌གུན༌ ཅུས༌ངན༌ ལྡིང༌ཅེས༌ལ༌ ཛོམས༌ ཡང༌ ནའ༌ ཁུར༌ཏེ༌ ནམ༌ཚོག༌པ༌ པ༌འུ༌ལུ༌ མི༌སད༌ ཏེ༌ཏེ༌ཚོག༌པ༌ ཁོང༌གུན༌ནི༌ མི༌ཟའ༌ ཡ༌ མི༌ཐུང༌ ཟེརས༌། 13 ཏེ༌ ཅུས༌ངན༌བོའེ༌ ནང༌ང༌ ཧ༌ལམ༌ མི༌ ཞིབ༌ཅུ༌ སང༌ མང༌ང༌ ཐུས༌། 14 ཁོང༌གུན༌ བླ༌མ༌ ཆེན༌མོ༌ དང༌ ཡ༌ཧུ༌དཱ༌པའེ༌ འུ༌སྐྱོང༌ གུན༌ ཡོད༌ས༌ སོང༌ཏེ༌ ཟེརས༌, "ནམ༌ཚོག༌པ༌ པ༌འུ༌ལུ༌ སད༌ མི༌སད༌ ཏེ༌ཏེ༌ཚོག༌པ༌ ང༌ཞའེ༌ ཅའང༌ མི༌ཟ༌ ཟེར༌ཏེ༌ དཀོན༌མཆོག༌གི༌ སྐུན༌དུན༌ལ༌ ནའ༌ སྲན༌ཏྲེ༌ ཁུར༌ཏེ༌ ཨིན༌། 15 ཏ༌ ཉེ༌རང༌ དང༌ ཡ༌ཧུ༌དཱ༌པའེ༌ ཚོགས༌དུའི༌, མག༌སྟོང༌ངི༌ སྤོན༌བོའ༌ པ༌འུ༌ལུའི༌ ཤགས༌པོའ༌ ཡང༌སྐྱར༌ སྔོན༌ནི༌ སང༌ གྱལ༌ལ༌ ཅོས༌ཏེ༌ རྩར༌ཅོད༌ ཏང༌ཅེས༌ལ༌ ཁོ༌ ཉེ༌ཞའ༌ ཡོད༌ས༌ ཁྱོང༌ མོལ༌། ང༌ཞའེ༌ ཁོ༌ ལམ༌བར༌ལ༌ སད༌ཨིན༌།"
16 ཨིན༌ནའང༌ ཏེ༌ ཅུས༌ངན༌བོ༌ པ༌འུ༌ལུའི༌ སྲིང༌མོའེ༌ བུ༌ཚ༌ ཚོར༌པ༌ ཁོ༌ གྱུགས༌ཏེ༌ ཀི༌ལའེ༌ ནང༌ང༌ སོང༌ཏེ༌ པ༌འུ༌ལུའ༌ ཤདས༌། 17 ཏེ༌ནེ༌ པ༌འུ༌ལུའི༌ ཏེ༌ཀ༌ ཡོད༌ཁན༌ནི༌ མག༌མི༌རྒྱའེ༌ སྤོན༌བོ༌ཞིག༌ག༌ བོད༌ཏེ༌, "འི༌ ཁྱོག༌ཏོང༌བོ༌ མག༌སྟོང༌ངི༌ སྤོན༌བོའེ༌ཀ༌ ཁྱེར༌, ཁོའ༌ སྤེ༌ར༌ ཁག༌ཅན༌ཞིག༌ ཤད༌གོ༌ཤེས༌ དུག༌" མོལས༌། 18 ཁོའེ༌ ཏེ༌ ཁྱོག༌ཏོང༌བོ༌ མག༌སྟོང༌ངི༌ སྤོན༌བོའེ༌ཀ༌ ཁྱེར༌ཏེ༌ ཞུས༌, "ཙོན༌པ༌ པ༌འུ༌ལུའི༌ ང༌ བོད༌ཏེ༌ འི༌ ཁྱོག༌ཏོང༌བོ༌ ཉེ༌རང༌ངི༌ཀ༌ ཁྱེར༌, ཟེར༌ར༌རག༌, ཅིའ༌ཟེར༌ན༌ ཁོའ༌ ཉེ༌རང༌ང༌ སྤེ༌ར༌ཞིག༌ ཤད༌ཅེས༌ དུག༌།"
19 ཏེ༌ནེ༌ མག༌སྟོང༌ངི༌ སྤོན༌བོའེ༌, ཁྱོག༌ཏོང༌བོ༌ ལག༌པ༌ ཐམས༌ཏེ༌ འ༌ཟམ༌ཤིག༌ག༌ ཁྱེར༌ཏེ༌ ཏྲིས༌, "ཁྱོ༌རང༌ངི༌ ང༌ ཅི༌ ཤད༌ཅེས༌ཡོད༌?"
20 ཁོའེ༌ ཟེརས༌, "ཡ༌ཧུ༌དཱ༌པ༌གུན༌ནི༌ སྐྱོན༌ ཀོལ༌ཏེ༌ པ༌འུ༌ལུའི༌ ཤགས༌པོའ༌ སྔོན༌ནི༌ སང༌ གྱལ༌ལ༌ ཅོས༌ཏེ༌ རྩར༌ཅོད༌ ཏང༌ཅེས༌ལ༌ ཐོ༌རེ༌ ཁོང༌ ཚོགས༌དུའི༌ དུན༌ལ༌ ཁྱོང༌ ཟེར༌ཏེ༌ ཉེ༌རང༌ང༌ ཞུ༌ཝ༌ ཕུལ༌ཅེས༌ལ༌ ཁའ༌ཆམས༌། 21 ཁོང༌ངི༌ ཞུ༌ཝ༌བོ༌ ཉན༌ན༌ མ༌ཛད༌ ཅིའ༌ཟེར༌ན༌ ཡ༌ཧུ༌དཱ༌པ༌ ཞིབ༌ཅུའི༌ སང༌ མང༌ང༌ཞིག༌ པ༌འུ༌ལུའ༌ སྤུང༌གོལ༌ ཅོ༌ཅེས༌ལ༌ སྲུངས༌ཏེ༌, ནམ༌ཚོག༌པ༌ ཁོང༌ མི༌སད༌ ཏེ༌ཏེ༌ཚོག༌པ༌ མི༌ཟ༌ ཡ༌ མི༌ཐུང༌ ཟེར༌ཏེ༌ ཁོང༌གུན༌ནི༌ ནའ༌ ཁུར༌ཏེ༌ དུག༌། ཁོང༌གུན༌ གྲལ༌གྲིག༌ ཅོས༌ཏེ༌ ཉེ༌རང༌ངི༌ ཁོང༌ངི༌ ཞུ༌ཝ༌ ལག༌ལེན༌ལ༌ ཁྱོང༌ཅེས༌ལ༌ སྲུངས༌ཏེ༌ དུག༌།" 22 མག༌སྟོང༌ངི༌ སྤོན༌བོའེ༌ ཁྱོག༌ཏོང༌ ལོགས༌ཏེ༌ ཀལ༌ཨིན༌ བཀའ༌ ཏངས༌, "ཁྱོ༌རང༌ངི༌ ང༌ འི༌ ལོན༌བོ༌ ཁྱོངས༌པིན༌ ཟེར༌ཏེ༌ སུའང༌ མ༌ཤད༌།"
པ༌འུ༌ལུ༌ ཀཱེ༌སར༌རིའ༌ ཀལས༌།
23:23 ནེ༌ 35
23 ཏེ༌ནེ༌ ཁོའེ༌ མག༌མི༌རྒྱའེ༌ སྤོན༌བོ༌ ཉིས༌ལ༌ བོད༌ཏེ༌ ཟེརས༌, "ར༌འི༌ ཁུར༌ཁན༌ ཉིབ༌གྱ༌, རྟ༌ ཞོན༌ཁན༌ རྡུན༌ཅུ༌ དང༌ མདུང༌ ཁུར༌ཁན༌ ཉིབ༌རྒྱའི༌ མག༌མི༌ གུན༌ དི༌རིང༌ ཚན༌ནི༌ ཆུ༌ཚོད༌ དགུ༌པའེ༌ཀ༌ ཀཱེ༌སར༌རིའ༌ ཆ༌ཅེས༌ལ༌ གྲལ༌གྲིག༌ ཅོས༌། 24 པ༌འུ༌ལུའང༌ ཞོན༌ཅེས༌ལ༌ རྟ༌ཞིག༌ ཏོང༌ ཡང༌ ཁོ༌ ཀའ༌ལོན༌ ཕེ༌ལིགས༌སི༌ཀ༌ ཁམ༌ཟང༌ ལེབ༌ཅུག༌།" 25 ཁོའེ༌ འི༌ ཨི༌གེ༌བོའང༌ ཀལས༌,
26 "ངའ༌ ཀོལོ༌དི༌འས༌ ལི༌སི༌འས༌སི༌, རྩི༌ཝ༌ཅན༌ ཀའ༌ལོན༌ ཕེ༌ལིགས༌ལ༌ ཇུ༌ ཞུའད༌།
27 འི༌ མི༌བོ༌ ཡ༌ཧུ༌དཱ༌པ༌གུན༌ནི༌ ཟུམས༌ཏེ༌ སད༌ཅེས༌ དུག༌པིན༌, ཨིན༌ནའང༌ ཁོ༌ རོམ༌པ༌ ཨིན༌ཁན༌བོ༌ གྱུས༌ཆའ༌ཅིག༌, ང༌ མག༌མི༌གུན༌ ཉམ༌པོ༌ སོང༌ཏེ༌ ཁོ༌ སྐྱོབས༌པིན༌། 28 ཁོའེ༌ཀ༌ ཅི༌ ཉད༌གལ༌ ཀལ༌དུག༌ ལྟ༌ཅེས༌ལ༌ ངའེ༌ ཁོ༌ ཡ༌ཧུ༌དཱ༌པའེ༌ ཚོགས༌དུའི༌ དུན༌ལ༌ ཁྱེར༌པིན༌། 29 པ༌འུ༌ལུའི༌ཀ༌ ཉད༌གལ༌བོ༌ ཁོ༌རང༌གུན༌ནི༌ བཀའ༌ཁྲིམས༌སི༌ སྐོར༌ལ༌ ཨིན༌ཁན༌བོ༌ ང༌ ཧ༌གོ༌, ཨིན༌ནའང༌ ཉད༌གལ༌བོ༌, ཁོ༌ ཙོན༌ཁང༌ང༌ ཀག༌ཅེས༌ ཡ༌ སད༌ཅེས༌སི༌ འོས༌པ༌ མི༌དུག༌། 30 ང༌ འི༌ མི༌བོའེ༌ གྱབ༌གལ༌ལ༌ ཅུས༌ངན༌ ལྡིང༌དུག༌ ཟེར༌ཏེ༌ གྱུས༌ཆའ༌ཅིག༌, ངའེ༌ ཏེན༌ན༌མལ༌ལ༌ ཁོ༌ ཉེ༌རང༌ངི༌ཀ༌ ཀལ༌པིན༌, ཡང༌ ཁོའ༌ ཉད༌གལ༌ ཀལ༌ཁན༌གུན༌ལའང༌ ཁོའེ༌ གྱབ༌གལ༌ལ༌ ཟེར༌ཁན༌གུན༌ ཉེ༌རང༌ངི༌ཀ༌ སོང༌ཏེ༌ ཤོད༌ ཟེར༌ཏེ༌ བཀའ༌ ཏངས༌པིན༌།"
31 ཏེ༌ནེ༌ བཀའ༌ ཏང༌ཁན༌ ནང༌ཞིན༌ མག༌མི༌གུན༌ནི༌ པ༌འུ༌ལུ༌ ཚན༌ལ༌ ཨན༌ཏི༌པ༌ཏྲིས༌ གྱལ༌ས༌ ཚག༌པ༌ ཁྱེརས༌། 32 སྟིང༌མ༌ཞག༌པོ༌ པ༌འུ༌ལུ༌ རྟ༌ ཞོན༌ཁན༌ མག༌མི༌གུན༌ལ༌ སྟད༌ཏེ༌ ཞན༌ མག༌མི༌གུན༌ ལོགས༌ཏེ༌ ཀི༌ལའ༌ སོང༌། 33 རྟ༌པ༌ མག༌མི༌གུན༌ ཀཱེ༌སར༌རིའ༌ ལེབ༌བ༌ཅིག༌, ཁོང༌གུན༌ནི༌ ཨི༌གེ༌པོ༌ ཀའ༌ལོན༌ལ༌ ཏངས༌ཏེ༌ པ༌འུ༌ལུ༌ ཁོའ༌ སྟདས༌། 34 ཀའ༌ལོན༌ནི༌ ཨི༌གེ༌པོ༌ སིལ༌ཏེ༌ པ༌འུ༌ལུའ༌ ཀ༌ཡུལ༌ནེ༌ ཨིན༌ ཟེར༌ཏེ༌ ཏྲིས༌། ཁོའ༌ ཁོང༌ ཀཱི༌ལི༌ཀི༌ཡཱ༌ནེ༌ ཨིན༌ཁན༌བོ༌ གྱུས༌ཆའ༌ཅིག༌, 35 ཁོའེ༌ ཟེརས༌, "ཁྱོ༌རང༌ང༌ ཉད༌གལ༌ ཀལ༌ཁན༌གུན༌ ལེབ༌བ༌ཅིག༌, ངའེ༌ ཁྱོ༌རང༌ངི༌ ཤགས༌པོ༌ ཉན༌ཨིན༌།" ཡང༌ ཁོའེ༌ པ༌འུ༌ལུ༌ ཧེ༌རོ༌དཱའི༌ ཁར༌རི༌ ནང༌ང༌ བོར༌ཏེ༌ མག༌མི༌ སྲུང༌ཁན༌གུན༌ ཏང༌ཅེས༌ལ༌ བཀའ༌ ཏངས༌།