25
པ༌འུ༌ལུ༌ ཕེས༌ཏུས༌ ཡོད༌ས༌ ཁྱོངས༌།
25:1 ནེ༌ 12
1 ཀཱེ༌སར༌རིའེ༌ གྱལ༌ས༌ ཀའ༌ལོན༌ ཕེས༌ཏུས༌ ལེབས༌ཏེ༌ ཞག༌ སུམ༌མི༌ སྟིང༌ནེ༌ ཁོ༌ ཡེ༌རུ༌ཤ༌ལེམ༌མ༌ སོང༌། 2 ཏེ༌རུ༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ ཁོའ༌ ཐུག༌ག༌ ཡོངས༌ཏེ༌, པ༌འུ༌ལུའི༌ གྱབ༌གལ༌ལ༌ སྐྱོན༌གུན༌ ཀལས༌། 3 པ༌འུ༌ལུའ༌ ཤགས༌པོ༌ ཡེ༌རུ༌ཤ༌ལེམ༌མ༌ ཅོ༌ཅེས༌སི༌ ཕིའ༌, ཁོང༌ ཏེ༌རུ༌ ཀལ༌ཅེས༌ལ༌ བཀའ༌ ཏངས༌ཏེ༌ ཀའ༌ཀྲིན༌ ཅོ༌ཅེས༌ལ༌ ཁོང༌གུན༌ནི༌ ཕེས༌ཏུས༌ལ༌ ཞུ༌ཝ༌ ཕུལས༌ ༼ཁོང༌གུན༌ནི༌ སྤུང༌གོལ༌ ཅོས༌ཏེ༌ པ༌འུ༌ལུ༌ ལམ༌བར༌ལ༌ སད༌ཅེས༌སི༌ ཅུས༌ངན༌ ལྡིངས༌༽། 4 ཨིན༌ནའང༌ ཕེས༌ཏུས༌སི༌ ལན༌ཏངས༌, "པ༌འུ༌ལུ༌ ཀཱེ༌སར༌རིའེ༌ ནང༌ང༌ བོར༌ཏེ༌ ཡོད༌, ང༌ ཏེ༌རུ༌ གྱོགས༌པ༌ ལོགས༌ཏེ༌ ཆ༌ཅེས༌ ཨིན༌། 5 ཁྱོ༌ཞའེ༌ འུ༌སྐྱོང༌ ཁ༌ཅིག༌ ང༌ ཉམ༌པོ༌ ལམ༌ཅུག༌, གལ༌ཏེས༌ ཁོའེ༌ ནོར༌ཁྲུལ༌ ཅོས༌ཏེ༌ ཡོད༌ན༌ ཏེན༌ན༌རུ༌ ཁོའེ༌ གྱབ༌གལ༌ལ༌ སྐྱོན༌རྗོད༌ ཅོས༌།"
6 ཡེ༌རུ༌ཤ༌ལེམ༌མི༌ ནང༌ང༌ ཁོང༌གུན༌ ཉམ༌པོ༌ ཞག༌ རྒྱད༌ ཡ༌ རྕུ༌ དུགས༌ཏེ༌ སྟིང༌ནེ༌, ཕེས༌ཏུས༌ ཀཱེ༌སར༌རིའ༌ ལོགས༌ཏེ༌ སོང༌། ལེབས༌ཏེ༌ སྟིང༌མ༌ཞག༌པོ༌ ཁྲིམས༌ཁུང༌ངི༌ ནང༌ང༌ ཁྲིས༌སི༌ཀ༌ དུགས༌ཏེ༌ ཁོའེ༌ པ༌འུ༌ལུ༌ ཁྱོང༌ཅེས༌ལ༌ བཀའ༌ ཏངས༌། 7 པ༌འུ༌ལུ༌ ཁྱོང༌ང༌ཅིག༌, ཡེ༌རུ༌ཤ༌ལེམ༌ནེ༌ ཡོངས༌ཁན༌ནི༌ ཡ༌ཧུ༌དཱ༌པ༌གུན༌ ཁོང༌ང༌ ཀིར༌ སྐོར༌ཏེ༌ དུགས༌ཏེ༌ ཉད༌གལ༌ སྲན༌ཏྲེ༌ མང༌པོ༌ ཀལས༌, ཨིན༌ནའང༌ ཅིག༌གའང༌ དེན༌བ༌ ཨིན༌ཁན༌བོ༌ ཏན༌ཏན༌ ཅོ༌ མ༌ཉན༌། 8 ཏེ༌ནེ༌ པ༌འུ༌ལུའི༌ ཁོང༌རང༌ ནོངས༌མེད༌ ཨིན༌ཁན༌ ལྟན༌ཏེ༌ ཞུས༌, "ངའེ༌ ཡ༌ཧུ༌དཱ༌པའེ༌ བཀའ༌ཁྲིམས༌ ཡ༌ ཆོད༌ཁང༌ ཡ༌ རོམ༌མི༌ གྱལ༌པོའེ༌ གྱབ༌གལ༌ལ༌ མན༌ཁན༌ ཅའང༌ མ༌ཅོས༌པིན༌།"
9 ཨིན༌ནའང༌ ཕེས༌ཏུས༌སི༌ ཡ༌ཧུ༌དཱ༌པ༌གུན༌ལ༌ ཀའ༌ཀྲིན༌ ལྟན༌ཅེས༌སི༌ དོད༌པ༌ ཅོས༌ཏེ༌ ཁོའེ༌ པ༌འུ༌ལུའ༌ ཟེརས༌, "ཁྱོ༌རང༌ ཡེ༌རུ༌ཤ༌ལེམ༌མི༌ ནང༌ང༌ ངའེ༌ དུན༌ལ༌ འི༌ ཤགས༌པོའ༌ ཁྲིམས༌ཅད༌ཅེས༌ལ༌ ཆའ༌ ཐད༌ད༌རག༌ག༌?"
10 ཨིན༌ནའང༌ པ༌འུ༌ལུའི༌ མོལས༌, "ང༌ རོམ༌མི༌ གྱལ༌པོའེ༌ ཁག༌ཁུར༌པའེ༌ ཁྲིམས༌ཁུང༌ང༌ ཨིན༌, ངའེ༌ ཤགས༌སི༌ ཁྲིམས༌ཅད༌ འིན༌ན༌རུ༌ ཆ༌གོས༌། ངའེ༌ ཡ༌ཧུ༌དཱ༌པ༌གུན༌ནི༌ གྱབ༌གལ༌ལ༌ སྐྱོན༌ ཅའང༌ མ༌ཅོས༌ཁན༌བོ༌ ཉེ༌རང༌ང༌ གྱལ༌ལ༌ ཅོས༌ཏེ༌ གྱུས༌ཨིན༌ནོག༌། 11 གལ༌ཏེས༌ ང༌ གལ༌ཏེ༌ ཤི༌ཅེས༌སི༌ ཆད༌པ༌ ཕོག༌ནའང༌, ང༌ ཤི༌ཅེས༌སི༌ ཕིའ༌ ཇིགས༌ས༌ མེ༌རག༌། ཨིན༌ནའང༌ གལ༌ཏེས༌ འི༌ ཡ༌ཧུ༌དཱ༌པ༌གུན༌ནི༌ ངའེ༌ཀ༌ ཉད༌གལ༌ ཀལ༌ཁན༌གུན༌ དེན༌བ༌ མ༌བིང༌ན༌ ཏེ༌ནེ༌ ང༌ འི༌ མི༌གུན༌ནི༌ ལག༌ག༌ སྟད༌ཅེས༌སི༌ ཝང༌ སུ༌ཞིག༌གའང༌ མེད༌། ངའེ༌ རོམ༌མི༌ གྱལ༌པོའ༌ འི༌ ཤགས༌སི༌ ཁྲིམས༌ཅད༌ ཛད༌ཅེས༌ལ༌ ཞུ༌ཝ༌ ཕུལ༌ལད༌།" 12 ཕེས༌ཏུས༌སི༌ ཁོ༌རང༌ངི༌ ཁས༌པ༌ ཁད༌ད༌ ཏང༌ཁན༌གུན༌ ཉམ༌པོ༌ གྲབས༌ ཅོས༌ཏེ༌ ཟེརས༌, "ཁྱོ༌རང༌ངི༌ རོམ༌མི༌ གྱལ༌པོའ༌ ཞུ༌ཝ༌ ཕུལ༌པ༌, རོམ༌མི༌ གྱལ༌པོའེ༌ཀ༌ ཀལ༌ཨིན༌།"
ཕེས༌ཏུས༌ དང༌ གྱལ༌པོ༌ ཨག༌རི༌པ༌།
25:13 ནེ༌ 27
13 ཞག༌ ཁ༌ཅིག༌གི༌ སྟིང༌ནེ༌ གྱལ༌པོ༌ ཨག༌རི༌པ༌ དང༌ ཁོའེ༌ ནོ༌མོ༌ བེར༌ནི༌ཀཱ༌ ཀཱེ༌སར༌རིའ༌ ཕེས༌ཏུས༌ལ༌ གའ༌སུས༌ ཅོས༌ཏེ༌ ཀུས༌པ༌ ལྟན༌ན༌ལ༌ ཡོངས༌། 14 ཁོང༌གུན༌ ཞག༌བན༌ཤིག༌ ཏེ༌རུ༌ དུགས༌པ༌, ཕེས༌ཏུས༌སི༌ པ༌འུ༌ལུའི༌ ཤགས༌པོའེ༌ སྐོར༌ལ༌ གྱལ༌པོའ༌ ཤདས༌, "འི༌རུ༌ ཕེ༌ལིགས༌སི༌ ཙོན༌ལ༌ ཀགས༌ཁན༌ནི༌ མི༌ཞིག༌ དུག༌། 15 ང༌ ཡེ༌རུ༌ཤ༌ལེམ༌མ༌ ཡོད༌ ཟ༌ནེ༌, བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ འི༌ མི༌བོའེ༌ གྱབ༌གལ༌ལ༌ སྐྱོན༌ ཀལ༌ཏེ༌ ཁོའ༌ ཤི༌ཅེས༌སི༌ ཆད༌པ༌ ཏང༌ཅེས༌ལ༌ ང༌ ཟེར༌ར༌རག༌། 16 ངའེ༌ ཁོང༌གུན༌ལ༌ རོམ༌པའེ༌ ཁྲིམས༌ ནང༌ཞིན༌, ནམ༌ཚོག༌པ༌ མི༌ཞིག༌ག༌ ཁོའ༌ སྐྱོན༌ ཀལ༌ཁན༌གུན༌ནི༌ དུན༌ལ༌ ཁོ༌རང༌ སྐྱོབ༌ཅེས༌ལ༌ སྐབས༌ མ༌ཏང༌ང༌ སུ༌ཞིག༌གི༌ ལག༌ག༌ ཆད༌པ༌ ཅད༌ཅེས༌ལ༌ སྟད༌ཆོག༌ག༌ མ༌ནོག༌ ཟེར༌པིན༌།"
17 "ཁོང༌གུན༌ འི༌རུ༌ ལེབ༌བ༌ཅིག༌, ངའེ༌ གོར༌ མ༌ཅུག༌ག༌ ཐོ༌རེ༌ཟུག༌པོ༌ ཁོ༌ ཁྲིམས༌ཅད༌ད༌ལ༌ ཁྱོང༌ཅེས༌སི༌ བཀའ༌ ཏངས༌པིན༌། 18 ཁོང༌གུན༌ནི༌ ཀལ༌ཁན༌ནི༌ ཉད༌གལ༌གུན༌, སད༌ཅེས༌སི༌ ཆད༌པ༌ ཕོག༌ཅེས༌སི༌ འོས༌པ༌ མི༌དུག༌པིན༌ ཀ༌ཟུག༌ ངའེ༌ སམ༌ཏེ༌ ཡོད༌པིན༌། 19 ཁོང༌གུན༌ནི༌ ཛིང༌མོ༌བོ༌ ཁོང༌རང༌གུན༌ནི༌ ཆོས༌སི༌ ལབ༌ཞ༌ ཁ༌ཅིག༌གི༌ཀ༌ ཁའ༌མི༌ཆམས༌ཅེས༌ དང༌ ཤི༌ཁན༌ནི༌ མི༌ ཡེ༌ཤུ༌ ཟེར༌ཁན༌བོའེ༌ སྐོར༌ལ༌ ཨིན༌ནོག༌, ཀ༌བོ༌ པ༌འུ༌ལུའི༌ སོན༌པོ༌ ཨིན༌ ཟེར༌དུག༌། 20 འི༌ཙོགས༌སི༌ ནས༌ལུག༌གི༌ རྩར༌ཅོད༌ ཏང༌ཅེས༌ ངའ༌ ཧ༌མ༌གོ༌པ༌, ངའེ༌ ཁོའ༌ ཁྱོ༌རང༌ ཡེ༌རུ༌ཤ༌ལེམ༌མ༌ ཏེ༌ ཤགས༌པོའ༌ ཁྲིམས༌ཅད༌ ཅུག༌ཅེས༌ལ༌ ཆའ༌ལ༌ ཐད༌ད༌ རག༌ག༌ ཟེར༌ཏེ༌ ཏྲིས༌པིན༌། 21 ཨིན༌ནའང༌ པ༌འུ༌ལུའི༌ རོམ༌མི༌ གྱལ༌པོའ༌ ཏེ༌ ཤགས༌པོ༌ ཐག༌ཅད༌ཅུག༌ཅེས༌སི༌ ཕིའ༌ ཞུ༌ཝ༌ ཕུལས༌, ཏེ༌བོའེ༌ཕིའ༌ ངའེ༌ ཁོ༌ རོམ༌མི༌ གྱལ༌པོའེ༌ཀ༌ ཀལ༌ཅེས༌སི༌ གྲལ༌གྲིག༌ ཆ༌ཆ༌ ཚག༌པ༌ འི༌རུ༌ བོར༌ཅེས༌ལ༌ བཀའ༌ ཏངས༌པིན༌།"
22 ཏེ༌ནེ༌ གྱལ༌པོ༌ ཨག༌རི༌པའེ༌ ཕེས༌ཏུས༌ལ༌ ཟེརས༌, "ང༌ ཏེ༌ སྤེ༌ར༌གུན༌ ཏེན༌ན༌ མི༌བོའེ༌ ཁའ༌ནེའང༌ ཚོར༌ཉིན༌ རག༌།"
ཕེས༌ཏུས༌སི༌ ཟེརས༌, "ཉེ༌རང༌ངི༌ ཁོའ༌ ཐོ༌རེ༌ ཉན༌ཐུབ༌ཨིན༌།"
23 སྟིང༌མ༌ཞག༌པོ༌ གྱལ༌པོ༌ ཨག༌རི༌པ༌ དང༌ བེར༌ནི༌ཀཱ༌ མ༌ སྟབས༌ ཆེན༌མོ༌ ཉམ༌པོ༌ ཏེ༌ གྲོང༌ཁྱེར༌རི༌ མི༌ རྩི༌ཝ༌ཅན༌ དང༌ མག༌མི༌ སྤོན༌བོ༌ ཆེན༌མོ༌ གུན༌ ཁྲིད༌ཏེ༌ ཚོགས༌ཁང༌ངི༌ ནང༌ང༌ ཡོངས༌། ཕེས༌ཏུས༌སི༌ བཀའ༌ ཏངས༌པ༌ པ༌འུ༌ལུ༌ ཚོགས༌ཁང༌ངི༌ ནང༌ང༌ ཁྱོངས༌། 24 ཕེས༌ཏུས༌སི༌ ཟེརས༌, "གྱལ༌པོ༌ ཨག༌རི༌པ༌ དང༌ འི༌ཀ༌ ང༌ཞའ༌ ཉམ༌པོ༌ ཡོད༌ཁན༌ནི༌ མི༌མངས༌, འི༌ མི༌བོའ༌ ལྟོས༌, ཁོའེ༌ གྱབ༌གལ༌ལ༌ ཡ༌ཧུ༌དཱ༌པ༌ ཚང༌མའེ༌ ཡེ༌རུ༌ཤ༌ལེམ༌མི༌ ནང༌ང༌ མ༌ཚད༌ འི༌རུའང༌ ཀུ༌ཅོ༌ ཏང༌ཨིན༌ ངའ༌ ཟེརས༌, 'འི༌ མི༌བོའ༌ སད༌ཅེས༌སི༌ ཆད༌པ༌ ཕོག༌ཅེས༌སི༌ འོས༌པ༌ ཨིན༌ནོག༌།' 25 ཨིན༌ནའང༌ ངའ༌ གྱུས༌སོང༌, སད༌གོ༌ཤེས༌སི༌ ཆད༌པ༌ ཕོག༌ཅེས༌སི༌ ལས༌ ཁོའེ༌ ཅའང༌ མ༌ཅོས༌ཏོག༌། ཁོའེ༌ རོམ༌མི༌ གྱལ༌པོའ༌ ཁོའེ༌ ཤགས༌པོའ༌ ཐག༌ཅད༌ཅེས༌སི༌ ཞུ༌ཝ༌ ཕུལ༌པ༌ ངའེ༌ ཁོ༌ རོམ༌མི༌ གྱལ༌པོའེ༌ཀ༌ ཀལ༌ཅེས༌ ཐག༌ཅད༌པིན༌།"
26 "ཨིན༌ནའང༌ རོམ༌མི༌ གྱལ༌པོའ༌ ཁོའེ༌ གྱབ༌གལ༌ལ༌ ཏན༌ཏན༌ ཅའང༌ བྲི༌ཅེས༌ མེད༌ པ༌སང༌, ངའེ༌ ཁོ༌ ཁྱོ༌ཞའ༌ ཚང༌མ༌ དང༌ མིག༌སལ༌ ཅོས༌ཏེ༌ གྱལ༌པོ༌ ཨག༌རི༌པའེ༌ སྐུན༌དུན༌ལ༌ ཁྱོངས༌ཏེ༌ ཨིན༌། ཡང༌ ང༌དང༌ངི༌ ཁོའ༌ རྩར༌ཅོད༌ ཏང༌ཏེ༌ སྟིང༌ནེ༌ ང༌ ཁོའེ༌ ཤགས༌སི༌ སྐོར༌ལ༌ སྤེ༌ར༌ རིག༌ རོམ༌མི༌ གྱལ༌པོའ༌ བྲི༌ཅེས༌ལ༌ ཐོབ༌ཨིན༌། 27 ཅིའ༌ཟེར༌ན༌ ཙོན༌པ༌ཞིག༌གི༌ སྐྱོན༌གུན༌ ལག༌མོ༌ མ༌ཤད༌ད༌ རོམ༌མི༌ གྱལ༌པོའེ༌ཀ༌ ཀལ༌ཅེས༌པོ༌ འོས༌པ༌ མ༌ནོག༌ སམ༌མ༌རག༌།"