3
ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ པ༌འུ༌ལུའི༌ ཆག༌ལས༌།
3:1 ནེ༌ 13
1 ཏེན༌ན༌བོའེ༌ཕིའ༌ ང༌ པ༌འུ༌ལུའི༌, མ༌ཤི༌ཀ༌ ཡེ༌ཤུའི༌ ཞབ༌སྟོག༌ ཞུས༌ཏེ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ལ༌ གའ༌མོའེ༌ ནས༌ཚུལ༌ ཤད༌ཅེས༌པོའེ༌, ང༌ ཙོན༌ནི༌ ནང༌ང༌ ཡོད༌། 2 ངའ༌ ཏན༌ཏན༌ རག༌, ཁྱོ༌ཞ༌གུན༌ནི༌ འི༌བོ༌ ཚོར༌ཏེ༌ ཡོད༌གྲོ༌, དཀོན༌མཆོག༌གི༌ ང༌ ཁྱོ༌ཞ༌གུན༌ ཉམ༌པོ༌ ཁོང༌ངི༌ ཐུག༌རྗེ༌ བགོ༌ཅེས༌སི༌ ཁག༌ རྩད༌ཅན༌བོ༌ སལ༌ལ༌ ཛདས༌། 3 དཀོན༌མཆོག༌གི༌ སང༌ཝའེ༌ ཐབས༌ ང༌ སྔོན༌ ཅུག༌ག༌ ཛད༌ཁན༌བོ༌ ངའེ༌ དོར༌ལྡུས༌ཏེ༌ འི༌ འི༌གྱེ༌ ནང༌ང༌ བྲིས༌ཏེ༌ ཨིན༌། 4 ཏེ༌བོ༌ སིལ༌ ཟ༌ནེ༌, མ༌ཤི༌ཀའེ༌ ཕིའ༌ སང༌ཝའེ༌ ཐབས༌ ངའ༌ ཧ༌གོ༌ཁན༌བོ༌ ཁྱོ༌ཞ༌གུན༌ལ༌ གྱུས༌ ཆ༌ཐུབ༌ཨིན༌། 5 སྔུན༌ནི༌ མི༌རབས༌གུན༌ལ༌, ཏེ༌ སང༌ཝའེ༌ ཐབས༌པོ༌ སྔོན༌ ཅུག༌ག༌ མ༌ཛད༌ཀྱག༌། ཨིན༌ནའང༌ ཏ༌ དམ༌པའེ༌ ཐུག༌ཉིད༌ གྱུད༌ཏེ༌ དཀོན༌མཆོག༌གི༌ ཁོང༌རང༌ངི༌ དམ༌པ༌ སྐུ༌ཚབས༌ དང༌ ལུང༌སྟོན༌པ༌ གུན༌ལ༌, ཏེ༌བོ༌ སྔོན༌ ཅུག༌ག༌ ཛདས༌།
6 ཏེ༌ སང༌ཝའེ༌ ཐབས༌པོ༌ ནི༌ འི༌བོ༌ ཨིན༌ནོག༌, གའ༌མོའེ༌ ནས༌ཚུལ༌ལ༌ ཏད༌པ༌ ཅོ༌ཅེས༌པོའེ༌ ཡ༌ཧུ༌དཱ༌པ༌ མན༌ཁན༌གུན༌ལའང༌ ཡ༌ཧུ༌དཱ༌པ༌གུན༌ ཙོགས༌སི༌ ནོར༌སྐལ༌ ཐོབ༌ཨིན༌། ཡེ༌ཤུ༌ མ༌ཤི༌ཀའེ༌ ནང༌ང༌, ཏེ༌ ཉིས༌ཀོ༌ ཟུགས༌པོ༌ ཅིག༌གི༌ ཡན༌ལག༌ གྱུར༌ཏེ༌ དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ ནང༌ངའང༌ དྲེས༌ ཐུབ༌ཨིན༌། 7 དཀོན༌མཆོག༌གི༌ ཤེད༌ དང༌ ཁོང༌ངི༌ ཐུག༌རྗེ༌ཅན༌ནི༌ སོལ༌རས༌ གྱུད༌ཏེ༌, ངའ༌ གའ༌མོའེ༌ ནས༌ཚུལ༌ ཤད༌ཁན༌ནི༌ ཞབ༌སྟོག༌པ༌ གྱུར༌ཏེ༌ ཨིན༌།
8 དཀོན༌མཆོག༌གི༌ དམ༌པ༌ མི༌ ཚང༌མའེ༌ ནང༌ནེ༌ ངའ༌ ཚང༌མའེ༌སང༌ རྩིས༌མེད༌ ཨིན༌ཨིན༌ཞིག༌ དང༌, ཁོང༌ངི༌ ཡ༌ཧུ༌དཱ༌པ༌ མན༌ཁན༌གུན༌ལ༌ མ༌ཤི༌ཀའེ༌ ཧ༌ལས༌ཤེས༌སི༌ བང༌ཛོད༌དི༌ སྐོར༌ལ༌ ཤད༌ཅེས༌སི༌ ཐུག༌རྗེ༌བོ༌ ང༌ སལ༌ལ༌ ཛདས༌། 9 ཡང༌ ཅི༌ཚང༌མ༌ ཛད༌ཁན༌ནི༌ དཀོན༌མཆོག༌གི༌ དག༌ས༌ ཚོག༌པ༌ སྦས༌ཏེ༌ བོར༌ར༌ ཛད༌ཁན༌ནི༌ ཐབས༌ལྡིངས༌པོ༌, མི༌གུན༌ལ༌ ཧ༌གོ༌ཅུག༌ཅེས༌ལ༌ ང༌ ལྡམ༌མ༌ ཛདས༌།
10 དཀོན༌མཆོག༌གི༌ ཐུགས༌དོད༌པོ༌ ནི༌ ཆོས༌ཚོགས༌གུན༌ གྱུད༌ཏེ༌ ཁོང༌ངི༌ ཤེས༌རབས༌ སྣ༌ཚོགས༌ ཚང༌མ༌ ནམ༌ཁའེ༌ ནང༌ང༌ ཡོད༌ཁན༌ནི༌ ཝང༌སྲུལ༌པ༌ དང༌ ཝང༌ གུན༌ལ༌ ལྟན༌ན༌ ཛད༌ཅེས༌པོ༌ ཨིན༌ནོག༌། 11 ཏེན༌ན༌བོ༌ ནི༌ དཀོན༌མཆོག༌གི༌ ཐའ༌མེད༌པའེ༌ ཐབས༌ལྡིངས༌པོ༌ ཨིན༌པིན༌, ཀ༌བོ༌ མ༌ཤི༌ཀ༌ ཡེ༌ཤུ༌ ང༌དང༌ངི༌ གཙོ༌བོའེ༌ ནང༌ང༌ ཁོང༌ངི༌ གྲུབ༌ ཅུག༌ག༌ ཛདས༌།
12 ང༌དང༌གུན༌ནི༌ མ༌ཤི༌ཀའེ༌ཀ༌ ཏད༌པ༌ དང༌ ཁོང༌ ཉམ༌པོ༌ བྲེལ༌ ཡོད༌ཅེས༌པོའེ༌, མོས༌ལམ༌ དང༌ ཅོལ༌ ཟ༌ནེ༌ ང༌དང༌གུན༌ ཇིགས༌ མ༌ཇིགས༌ས༌ སྤོས༌པ༌ ཉམ༌པོ༌ དཀོན༌མཆོག༌གི༌ སྐུན༌དུན༌ལ༌ ཡོང༌ཐུབ༌ཨིན༌། 13 ཏེན༌ན༌བོའེ༌ཕིའ༌ ངའེ༌ ཞུ༌ཝ༌ ཨིན༌, ཁྱོ༌ཞའ༌ གའ༌མོའེ༌ ནས༌ཚུལ༌ ཤད༌ཅེས༌པོའེ༌ ང༌ རྡུག༌ངལ༌ ཐོང༌ཨིན༌ ཡོད༌ཁན༌བོའེ༌ཀ༌ སེམས༌ཤུགས༌ མ༌ཆག༌ག༌, སྤལ༌ངམས༌ ཚོར༌ཤིག༌།
ཨེ༌ཕེ༌སས༌སི༌ ཆོས༌ཚོགས༌སི༌ ཕིའ༌ མོས༌ལམ༌།
3:14 ནེ༌ 21
14-15 ཏེན༌ན༌ གྱུན༌ཚན༌བོའེ༌ ཕིའ༌ ནམ༌ཁའ༌ དང༌ ཇིག༌རྟེན༌ནི༌ ནང༌ང༌ སྲོག༌ ཡོད༌ཁན༌ ཚང༌མའ༌ ཅོའ༌ ཛད༌ཁན༌ནི༌ དཀོན༌མཆོག༌ ང༌དང༌ངི༌ ཡབ༌བ༌ ངའེ༌ པིག༌དོང༌ ཙུག༌ཏེ༌ མོས༌ལམ༌ ཞུའད༌, 16 ངའེ༌ མོས༌ལམ༌ ནི༌, དཀོན༌མཆོག༌གི༌ སྟོབས༌ ཉམ༌པོ༌ དམ༌པའེ༌ ཐུག༌ཉིད༌ གྱུད༌ཏེ༌, ཁོང༌ངི༌ ཧ༌ལས༌ཤེས༌སི༌ གུ༌ནོར༌རི༌ ཁྱོ༌ཞ༌གུན༌ནི༌ སེམས༌ ཤེད༌ཅན༌ ཛད༌ཤིག༌། 17 ཏེ༌ནེ༌ ཏད༌པའེ༌ ཞས༌ཏེ༌ མ༌ཤི༌ཀ༌ ཁྱོ༌ཞའེ༌ སེམས༌སི༌ ནང༌ང༌ ཞུགས༌ཨིན༌, ཡང༌ ཁྱོ༌ཞ༌གུན༌ དཀོན༌མཆོག༌གི༌ ཅམས༌པའེ༌ ནང༌ང༌ པ༌ཀྲག༌ ཟུམས༌ཏེ༌ གྱས༌ཤེས༌པོ༌ ངའེ༌ མོས༌ལམ༌ ཨིན༌། 18 དཀོན༌མཆོག༌གི༌ མི༌ དམ༌པ༌ ཚང༌མ༌ ཉམ༌པོ༌, མ༌ཤི༌ཀའེ༌ ཅམས༌པ༌བོ༌ ཙམ༌ཤིག༌གི༌ ཞང༌ཅན༌, རིང༌མོ༌, ཐོན༌པོ༌ དང༌ ཏིང༌ཟབ༌མོ༌ ཨིན༌ཁན༌བོ༌ ཧ༌གོ༌ཅེས༌སི༌ ཁྱུད༌ ཁྱོ༌ཞ༌གུན༌ལ༌ སལ༌ཤིག༌། 19 ང༌དང༌ང༌ གང༌པོ༌ ཧ༌གོ༌ མ༌ཐུབ༌ཁན༌ནི༌ མ༌ཤི༌ཀའེ༌ ཅམས༌པ༌ ཀྲག༌པོ༌, ཁྱོ༌ཞ༌གུན༌ལ༌ ཐོང༌ངོམས༌ ཆའ༌ཅིག༌, དཀོན༌མཆོག༌གི༌ ཁོང༌རང༌ངི༌ སྕོད༌ལམ༌ གང༌པོ༌ ཁྱོ༌ཞ༌གུན༌ནི༌ ནང༌ང༌ སྐང༌ང༌ ཛད༌ཨིན༌།
20 ང༌དང༌གུན༌ནི༌ དཀོན༌མཆོག༌ག༌ སྟོད༌པ༌ ཕུལ༌ཨིན༌, ཅིའ༌ཞུ༌ན༌ ང༌དང༌ངི༌ ནང༌ང༌ ཆག༌ལས༌ ཛད༌ཁན༌ ཁོང༌ངི༌ སྟོབས༌པོའེ༌, ང༌དང༌གུན༌ནི༌ ཞུ༌ཁན༌ ཡ༌ སམ༌ཁན༌ ཚང༌མའེ༌སང༌ མང༌ང༌ ཛད༌ ཉན༌ན༌ནོག༌། 21 མི༌རབས༌ ཚང༌མའེ༌ ཆོས༌ཚོགས༌ དང༌ མ༌ཤི༌ཀ༌ ཡེ༌ཤུའི༌ ཨིན༌ཁན༌ གུན༌ནེ༌ དཀོན༌མཆོག༌ག༌ ཏུས༌གྱུན༌ནེ༌གྱུན༌ སྤལ༌ ཐོབ༌ཤིག༌, ཨ༌མེན༌།