2
ཤི༌ཅེས༌ནེ༌ མི༌ཚེ༌ ཆོགས༌ལ༌།
2:1 ནེ༌ 10
1 དཀོན༌མཆོག༌གི༌ ཁའ༌ མི༌ཉན༌ཅེས༌ དང༌ སྡིག༌པ༌ གུན༌ནི༌ ཞས༌ཏེ༌, ཁྱོ༌ཞ༌གུན༌ སེམས༌ཉིད༌དི༌ ཐོག༌ནེ༌ ཤི༌ཏེ༌ ཨིན༌པིན༌། 2 ཏེ༌ཏུས༌ལ༌ ཁྱོ༌ཞ༌གུན༌ ཇིག༌རྟེན༌པ༌ ཏད༌པ༌ མེད༌ཁན༌གུན༌ནི༌ ལམ༌མི༌ཀ༌ གྲུལ༌ལད༌པིན༌, ཡང༌ ཇིག༌རྟེན༌ནི༌ སེམས༌ཉིད༌ ངན༌པ༌གུན༌ནི༌ ཝང༌སྲུལ༌པ༌ ཤེ༌ཏན༌ནི༌ སྟིང༌རང༌ནེ༌ སོང༌ཏེ༌ ཨིན༌པིན༌། ཁོའེ༌ ཏ༌རུང༌ངའང༌ དཀོན༌མཆོག༌གི༌ ཁའ༌ མི༌ཉན༌ཁན༌གུན༌ནི༌ ནང༌ང༌ ལས༌ ཅོའ༌ནོག༌། 3 སྐབས༌ཤིག༌ག༌, ང༌དང༌གུན༌ནའང༌ ཁོང༌གུན༌ ཙོགས༌ལ༌ སྡིག༌པའེ༌ དོད༌པ༌ ཚང༌མ༌ གྲུབ༌ཅུག༌ཨིན༌, ཏེ༌ སྡིག༌པའེ༌ དོད༌པ༌ དང༌ སམ༌ཚུལ༌ལི༌ ལམ༌མི༌ཀ༌ གྲུལ༌ལད༌པིན༌། ཁོང༌གུན༌ ཙོགས༌ལ༌ ང༌དང༌གུན༌ནི༌ཀའང༌ དཀོན༌མཆོག༌གི༌ ཐུགས༌སྲོ༌ དང༌ ཆད༌པ༌ བབས༌ཤེས༌པོ༌ འོས༌པ༌ ཨིན༌པིན༌།
4-5 སྡིག༌པ༌གུན༌ནི༌ ཞས༌ཏེ༌ ང༌དང༌གུན༌ སེམས༌ཉིད༌དི༌ ཐོག༌ནེ༌ ཤི༌ཏེ༌ ཨིན༌ཏེའང༌, སྙིང༌རྗེ༌ གངས༌ཏེ༌ ཡོད༌ཁན༌ནི༌ དཀོན༌མཆོག༌གི༌ ང༌དང༌གུན༌ལ༌ ཅམས༌པ༌ ཆེན༌མོ༌ ཛདས༌པ༌, ཁོང༌ངི༌ ང༌དང༌གུན༌ མ༌ཤི༌ཀ༌ ཉམ༌པོ༌ སོན༌ ཅུག༌ག༌ ཛདས༌། ཁོང༌ངི༌ ཐུག༌རྗེ༌ ཅིག༌པོ༌ གྱུད༌ཏེ༌, ཁྱོ༌ཞ༌གུན༌ སྐྱོབ༌བ༌ ཛདས༌། 6 ང༌དང༌གུན༌ནི༌ ཐུན༌བྲེལ༌ མ༌ཤི༌ཀ༌ ཡེ༌ཤུ༌ ཉམ༌པོ༌ ཡོད༌ཅེས༌པོའེ༌, ཁོང༌ངི༌ ང༌དང༌གུན༌ མ༌ཤི༌ཀ༌ ཉམ༌པོ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌, ནམ༌ཁའེ༌ ནང༌ང༌ ཞུགས༌ཁྲིས༌གུན༌ནི༌ཀ༌ མ༌ཤི༌ཀ༌ ཉམ༌པོ༌ བོར༌ར༌ ཛདས༌། 7 དཀོན༌མཆོག༌གི༌ ཏེ༌བོ༌ ཅོའ༌ ཛདས༌, ཅིའ༌ཟེར༌ན༌ མ༌འོངས༌པའེ༌ ཏུས༌སི༌ ནང༌ང༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ ང༌དང༌གུན༌ནི༌ ཕིའ༌ ཁོང༌ངི༌ ཀའ༌ཀྲིན༌ དང༌ ཐུག༌རྗེ༌ ཙམ༌ཤིག༌གི༌ ཧ༌ལས༌ཤེས༌ ཨིན༌ཁན༌བོ༌, ཚང༌མ༌ལ༌ ལྟན༌ཅེས༌སི༌ ཐུགས༌དོད༌ ཡོད༌ཏེ༌ ཨིན༌ནོག༌།
8 ཏད༌པ༌ གྱུད༌ཏེ༌ ཐུག༌རྗེ༌ ཞས༌ཏེ༌, ཁྱོ༌ཞ༌གུན༌ལ༌ ཐར༌པ༌ ཐོབ༌ཏེ༌ ཨིན༌པིན༌, ཡང༌ ཏེ༌ ཐར༌པ༌བོ༌ ཁྱོ༌ཞའེ༌ རྩོན༌གྲུས༌ མན༌པ༌, དཀོན༌མཆོག༌གི༌ ཆོགས༌ནེ༌ སལ༌ཁན༌ནི༌ སོལ༌རས༌ ཨིན༌ནོག༌། 9 ཐར༌པ༌བོ༌ ང༌དང༌ངི༌ ལས༌ ཟང༌པོའེ༌ ཞས༌ཏེ༌ མན༌ པ༌སང༌, ང༌དང༌ སུ༌ཞིག༌གིའང༌ ཏེ༌བོའེ༌ཀ༌ ཕོ༌སོ༌ ལྟན༌ མི༌ཉན༌། 10 ང༌དང༌ དག༌ས༌ ཡོད༌ཁན༌བོ༌ དཀོན༌མཆོག༌གི༌ ཅོའ༌ ཛད༌ཏེ༌ ཨིན༌ནོག༌། དཀོན༌མཆོག༌གི༌ སྔུན༌ལ༌, གྲལ༌གྲིག༌ ཅོའ༌ ཛད༌ཁན༌ནི༌ ལས༌ ཟང༌པོ༌གུན༌ ཅོ༌ཅེས༌སི༌ ཕིའ༌, ཁོང༌ངི༌ ང༌དང༌གུན༌ མ༌ཤི༌ཀ༌ ཡེ༌ཤུའི༌ ནང༌ང༌, མི༌ སོ༌མ༌ རིག༌ ཅོའ༌ ཛདས༌།
མ༌ཤི༌ཀའེ༌ ནང༌ང༌ ཅིག༌གྲིལ༌།
2:11 ནེ༌ 18
11 ཏ༌ འི༌བོ༌ ཨིད༌ཏུ༌ བོར༌ཤིག༌, ཁྱོ༌ཞའ༌ སྐྱེ༌ ཟ༌ནེ༌ ཡ༌ཧུ༌དཱ༌པ༌ མན༌ཁན༌ ཡང༌ ཡ༌ཧུ༌དཱ༌པ༌གུན༌ནི༌ ཁྱོ༌ཞའ༌ སུན༌ནད༌ མ༌ཅོ༌ཁན༌ ཚི༌ཏུ༌གུན༌ ཟེར༌རད༌པིན༌, ཅིའ༌ཟེར༌ན༌ ཁོང༌གུན༌ སུན༌ནད༌ ཅོ༌ཁན༌ ཨིན༌ཁན༌བོའེ༌ཀ༌ མ༌སྲན༌ཏྲེ༌ ཕོ༌སོ༌ ཅོའད༌པིན༌, ཀ༌བོའེ༌ ཁོང༌ངི༌ སེམས༌གུན༌ལ༌ མན༌པ༌, ཟུགས༌པོ༌ ཅིག༌པོའ༌ གྱུར༌ཇ༌ ཁྱོང༌ང༌ནོག༌། 12 ཏེ༌ ཟ༌ནེ༌ ཁྱོ༌ཞ༌གུན༌ནི༌ མ༌ཤི༌ཀ༌ ཉམ༌པོ༌ ཅའང༌ བྲེལ༌ མེད༌པིན༌། ཁྱོ༌ཞ༌གུན༌ ཨིས༌ར༌ཨེལ༌ལི༌ མིར༌གྱུད༌དི༌ ཕྲོའ༌ ཐེའ༌ མེད༌པིན༌, ཡང༌ དཀོན༌མཆོག༌གི༌ ཁོང༌གུན༌ལ༌ ཛད༌ཁན༌ནི༌ ཞལ༌ཆད༌དི༌ ནང༌ང༌ ཁྱོ༌ཞ༌གུན༌ སྲེའ༌ མ༌ཛདས༌། ཁྱོ༌ཞ༌གུན༌ འི༌ ཇིག༌རྟེན༌ནི༌ ནང༌ང༌ དཀོན༌མཆོག༌ དང༌ རེ༌ཝ༌ མེད༌ཁན༌ནི༌ མི༌གུན༌ ཨིན༌པིན༌། 13 ཨིན༌ནའང༌ སྔུན༌ལ༌ དཀོན༌མཆོག༌ནེ༌ མའ༌ ཐག༌རིང༌ང༌ ཡོད༌ཁན༌གུན༌, མ༌ཤི༌ཀའེ༌ སྐུ༌ཁྲག༌ རྐྱང༌ཤིང༌ངི༌ཀ༌ ཕོའ༌ ཛད༌ཅེས༌པོའེ༌, དག༌ས༌ དཀོན༌མཆོག༌གི༌ མ༌ཤི༌ཀ༌ ཡེ༌ཤུའི༌ ནང༌ང༌ ཁྱོ༌ཞ༌གུན༌ ཁོང༌རང༌ངི༌ ཉེ༌མོའ༌ ཁྱོང༌ང༌ ཛད༌ཏེ༌ ཨིན༌།
14 མ༌ཤི༌ཀ༌ ཁོང༌རང༌ངི༌ ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌ གུན༌ནི༌ ནང༌ང༌ ཞི༌དེ༌ ཁྱོང༌ང༌ ཛདས༌། མ༌ཤི༌ཀའེ༌ འི༌ སྡེ༌ ཉིས༌ཀོའེ༌ ནང༌ང༌ ཡོད༌ཁན༌ནི༌ ནཕ༌རད༌དི༌ རྩིག༌པ༌བོ༌ ཤིག༌ག༌ ཛད༌ཏེ༌ ཅིག༌ གྱུར༌ ཅུག༌ག༌ ཛདས༌། 15 ཁོང༌ངི༌ ཡ༌ཧུ༌དཱ༌པ༌གུན༌ནི༌ ཆོས༌སི༌ བཀའ༌ཁྲིམས༌ དང༌ བཀའ༌རྒྱའ༌ གུན༌ མེད༌ཁན༌ ཅོའ༌ ཛད༌ཏེ༌ མ༌ཤི༌ཀའེ༌ འི༌ སྡེ༌ ཉིས༌ཀོ༌, ཁོང༌རང༌ངི༌ ནང༌ང༌ མི༌རིགས༌ སོ༌མ༌ཞིག༌ ཅོའ༌ ཛད༌ཅེས༌པོའེ༌, ཁོང༌གུན༌ནི༌ ནང༌ང༌ ཞི༌དེ༌ ཁྱོང༌ང༌ ཛདས༌། 16 ཁོང༌ རྐྱང༌ཤིང༌ངི༌ཀ༌ ཀྲོངས༌ས༌ ཛད༌ཅེས༌པོའེ༌ ཁོང༌ངི༌ འི༌ མི༌རིགས༌ ཉིས༌ཀོ༌ དཀོན༌མཆོག༌ ཉམ༌པོ༌ ཐུན༌ཅུག༌ག༌ ཛད༌ཏེ༌, འི༌ ཉིས༌ཀོའེ༌ ནང༌ང༌ ཡོད༌ཁན༌ནི༌ ནཕ༌རད༌བོ༌ མེད༌ཁན༌ ཅོའ༌ ཛདས༌།
17 མ༌ཤི༌ཀ༌ ཕེབས༌ཏེ༌ ཁྱོ༌ཞའ༌ དཀོན༌མཆོག༌ནེ༌ མའ༌ ཐག༌རིང༌ང༌ ཡོད༌ཁན༌ དང༌ ང༌ཞའ༌ དཀོན༌མཆོག༌གི༌ ཉེ༌མོའ༌ ཡོད༌ཁན༌ ཉིས༌ཀོའ༌ ཞི༌དེ༌ གའ༌མོའེ༌ ནས༌ཚུལ༌ ཤད༌ད༌ ཛདས༌། 18 ཅིའ༌ཞུ༌ན༌ མ༌ཤི༌ཀ༌ གྱུད༌ཏེ༌, ང༌དང༌གུན༌ནི༌ ཡབ༌ དཀོན༌མཆོག༌ག༌ དམ༌པའེ༌ ཐུག༌ཉིད༌ ཅིག༌ གྱུད༌ཏེ༌ མོས༌ལམ༌ ཞུ༌ཐུབ༌ཨིན༌།
གཙོ༌བོའེ༌ ཕིའ༌ ཆོད༌ཁང༌།
2:19 ནེ༌ 22
19 ཏེན༌ན༌བོའེ༌ཕིའ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌, ཏ༌ནེ༌ཕར༌ལ༌ མ༌ཤེས༌ཁན༌ དང༌ ཞན༌ཡུལ༌ལི༌ མི༌རིག༌ མ༌ནོག༌། དཀོན༌མཆོག༌གི༌ དམ༌པའེ༌ མི༌གུན༌ ཉམ༌པོ༌ ཁྱོ༌ཞ༌གུན༌ནའང༌, ཁོང༌ངི༌ གྱལ༌སྲིད༌དི༌ མི༌, ཡང༌ དཀོན༌མཆོག༌ ཁོང༌རང༌ངི༌ ནང༌མི༌གུན༌ ཨིན༌ནོག༌། 20 ང༌དང༌གུན༌ དཀོན༌མཆོག༌གི༌ ཁང༌པ༌ ཨིན༌ནོག༌, ཀ༌བོ༌ སྐུ༌ཚབས༌གུན༌ དང༌ ལུང༌སྟོན༌པ༌གུན༌ནི༌ རྩིགས༌རྨང༌ངི༌ཀ༌ རྩིགས༌ཏེ༌ ཨིན༌, ཡང༌ མ༌ཤི༌ཀ༌ ཡེ༌ཤུ༌ ཁོང༌རང༌ ནི༌, ཏེ༌ ཁང༌པའེ༌ ཀྲུ༌རྡོའ༌ ཁག༌ཅན༌བོ༌ ཨིན༌། 21 མ༌ཤི༌ཀའེ༌ ནང༌ང༌ ཛོམས༌ཏེ༌ ང༌དང༌གུན༌ གཙོ༌བོའེ༌ ཕིའ༌, དམ༌པའེ༌ ཆོད༌ཁང༌ཞིག༌ ལྡན༌ཨིན༌ ཨིན༌ནོག༌། 22 ཡང༌ མ༌ཤི༌ཀ༌ གྱུད༌ཏེ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནའང༌, དཀོན༌མཆོག༌གི༌ དམ༌པའེ༌ ཐུག༌ཉིད༌ ནས༌ས༌ ཛད༌ཁན༌ནི༌ ནས༌ས༌ གྱུར༌ཨིན༌ ཨིན༌ནོག༌།