ཨེ༌ཕེ༌སས༌སི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌།
ཨེ༌ཕེ༌སས༌སི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌སི༌ སྐོར༌།
འི༌ ཆག༌བྲིས༌ དང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ གྱུད༌ཏེ༌, ང༌དང༌ང༌ འི༌ ཆག༌བྲིས༌པོ༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌ པ༌འུ༌ལུའི༌ བྲིའ༌ ཛད༌ཁན༌བོ༌ གྱུས༌ ཆའ༌ནོག༌།
ང༌དང༌གུན༌ལ༌ ཆོས༌སི༌ ཁས༌པ༌གུན༌ གྱུད༌ཏེ༌, འི༌ ཆག༌བྲིས༌པོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 27 ནི༌ ཉེ༌ཁོར༌ལ༌ བྲིའ༌ ཛད༌ཁན༌བོ༌ གྱུས༌ ཆའ༌ནོག༌། འི༌བོ༌ རོམ༌མི༌ ནང༌ང༌ ཁོང༌ ཏང༌པོ༌རང༌ ཙོན༌ལ༌ ཀགས༌ཏེ༌ ཡོད༌ཏུས༌ བྲིའ༌ ཛད༌ཁན༌བོ༌ སམ༌མ༌ནོག༌།
པ༌འུ༌ལུའི༌ འི༌ ཆག༌བྲིས༌ བྲི༌ཅེས༌སི༌ གྱུན༌ཚན༌བོ༌, དཀོན༌མཆོག༌གི༌ ཁོང༌རང༌ངི༌ མི༌གུན༌ནི༌ ཕིའ༌ ཁོང༌ངི༌ ཐའ༌མེད༌པའེ༌ ཐབས༌ལྡིངས༌པོ༌ ཨེ༌ཕེ༌སས༌སི༌ མ༌ཤི༌ཀ༌པ༌གུན༌ལ༌ ཧ༌གོ༌ཤེས༌ལ༌ རོགས༌ ཅོའ༌ ཛད༌ཅེས༌པོ༌ ཨིན༌པིན༌།
པ༌འུ༌ལུའི༌ ཆོས༌ཚོགས༌ལ༌ འི༌གུན༌ ཧ༌གོ༌ཅུག༌ཅེས༌སི༌ དོད༌པ༌ ཡོད༌པིན༌:
1 ང༌དང༌གུན༌ ང༌དང༌རང༌ངི༌ ཕན༌ཐོགས༌སི༌ ཕིའ༌ མན༌པ༌, དཀོན༌མཆོག༌ ཁོང༌རང༌ང༌ སྟོད༌པ༌ དང༌ སྤལ༌ལི༌ ཕིའ༌ སྐྱོབ༌བ༌ ཛད༌ཏེ༌ ཨིན༌ནོག༌།
2 སྟིང༌ཇུག༌གི༌ ཏུས༌སི༌ ནང༌ང༌ ཛམ༌བུ༌ལིང༌ངི༌ ནང༌ང༌ སྲོག༌ ཡོད༌ཁན༌ ཚང༌མ༌ མ༌ཤི༌ཀའེ༌ ཝང༌ངི༌ ཡོག༌ག༌ བོར༌ར༌ ཛད༌ཨིན༌།
3 དཀོན༌མཆོག༌ ཉམ༌པོ༌ ང༌དང༌གུན༌ནི༌ ཡང༌སྐྱར༌ ཐུན༌བྲེལ༌བོ༌ ཁོང༌ངི༌ ཐུག༌རྗེ༌ ཞས༌ཏེ༌ ཨིན༌ནོག༌།
4 དཀོན༌མཆོག༌གི༌ ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌ ཏད༌པ༌ཅན༌གུན༌ནི༌ ནང༌ང༌ ཐུན༌བྲེལ༌ ཁྱོང༌ང༌ ཛདས༌།
5 ང༌དང༌གུན༌ ཏ༌, ཟུགས༌པོ༌ ཅིག༌ ཡང༌ན༌ ཆོས༌ཚོགས༌ གྱུར༌ཏེ༌ ཨིན༌ནོག༌, ཀ༌བོའེ༌ གོ༌ ནི༌ མ༌ཤི༌ཀ༌ ཨིན༌།
6 ཆོས༌ཚོགས༌སི༌ ནང༌ང༌ ཅིག༌གྲིལ༌ དང༌ ཆོས༌ཚོགས༌པོ༌ སམ༌བ༌ཅན༌ གྱུར༌ཅེས༌སི༌ ཕིའ༌ ང༌དང༌གུན༌ལ༌ དཀོན༌མཆོག༌གི༌ ཆོགས༌ནེ༌ ཁྱུད༌གུན༌ ཐོབ༌ཏེ༌ ཨིན༌ནོག༌།།
1
པ༌འུ༌ལུའི༌ ཇུ༌ ཞུས༌།
1:1 ནེ༌ 2
ང༌ པ༌འུ༌ལུ༌ དཀོན༌མཆོག༌གི༌ ཐུག༌གོངས༌ ནང༌ཞིན༌ལ༌, མ༌ཤི༌ཀའེ༌ སྐུ༌ཚབས༌ ཨིན༌།
ངའེ༌ འི༌ ཨི༌གེ༌བོ༌ ཨེ༌ཕེ༌སས༌སི༌ གྱལ༌སའེ༌ ནང༌ང༌ ཡོད༌ཁན༌ དཀོན༌མཆོག༌གི༌ མི༌ དམ༌པ༌གུན༌ དང༌ ཏད༌པ༌ཅན༌ ཡེ༌ཤུ༌ མ༌ཤི༌ཀའེ༌ གྱབ༌ནེ༌ གྲུལ༌ཁན༌གུན༌ལ༌ བྲིའད༌།
ང༌དང༌ངི༌ དཀོན༌མཆོག༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ དང༌ ཞི༌དེ༌ ཁྱོ༌ཞ༌གུན༌ལ༌ སལ༌ཤིག༌།
སེམས༌ཉིད༌དི༌ ཅིན༌ལབས༌གུན༌།
1:3 ནེ༌ 14
ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཡབ༌, དཀོན༌མཆོག༌ག༌ སྟོད༌པ༌ ཕུལ༌ཤིག༌། ཁོང༌ངི༌ མ༌ཤི༌ཀ༌ གྱུད༌ཏེ༌ ང༌དང༌གུན༌ལ༌ ནམ༌ཁའེ༌ ཐུག༌ཉིད༌དི༌ ཅིན༌ལབས༌ ཚང༌མ༌ སལ༌ལ༌ ཛད༌ཏེ༌ ཨིན༌ནོག༌། མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ སྐུན༌དུན༌ལ༌ དམ༌པ༌ དང༌ སྐྱོན༌མེད༌ ཛད༌ཅེས༌སི༌ ཕིའ༌ ཇིག༌རྟེན༌ མ༌ཆགས༌སི༌ སང༌ སྔུན༌ལ༌ ཁོང༌ངི༌ ང༌དང༌ང༌ ཅེས༌པ༌ ཛད༌ཏེ༌ ལྡམ༌མ༌ ཛདས༌། དཀོན༌མཆོག༌གི༌ ཁོང༌རང༌ངི༌ ཐུག༌གོངས༌ དང༌ ཐུགས༌ཐད༌ ནང༌ཞིན༌, ཡེ༌ཤུ༌ མ༌ཤི༌ཀ༌ གྱུད༌ཏེ༌ ང༌དང༌གུན༌ ཁོང༌ངི༌ སོས༌བུ༌ ལེན༌ན༌ ཛད༌ཅེས༌ལ༌ སྔུན༌ནེ༌ པར༌ལ༌ ཐག༌ཅད༌ད༌ ཛདས༌། ཏེ༌བོའེ༌ཕིའ༌ ཁོང༌ངི༌ ཁོང༌རང༌ངི༌ སྲས༌ ཅེས༌པ༌ གྱུད༌ཏེ༌, ང༌དང༌གུན༌ལ༌ རིན༌ མེད༌པ༌ སལ༌ཁན༌ནི༌ ཏེ༌ སྤལ༌ཅན༌ནི༌ ཐུག༌རྗེ༌བོའ༌ སྟོད༌པ༌ ཕུལ༌ཨིན༌། དཀོན༌མཆོག༌ ནི༌ ཐུག༌རྗེ༌ བང༌ཛོད༌ ཨིན༌ པ༌སང༌, ཁོང༌རང༌ངི༌ སྲས༌སི༌ ཁྲག༌ གྱུད༌ཏེ༌, ང༌དང༌གུན༌ལ༌ རང༌ཝང༌ ཉོའ༌ ཛད༌ཏེ༌ ང༌དང༌ངི༌ སྡིག༌པ༌གུན༌ལ༌ ཤགས༌པ༌ སལ༌ལ༌ ཛདས༌། ཁོང༌ངི༌ ཐུག༌རྗེ༌ མ༌ཚད༌ ཤེས༌རབས༌ དང༌ ཧ༌གོའང༌ ང༌དང༌གུན༌ནི༌ཀ༌ སྙིང༌ ཕེས༌ཏེ༌ ལུག༌ག༌ ཛདས༌།
དཀོན༌མཆོག༌གི༌ མ༌ཤི༌ཀ༌ གྱུད༌ཏེ༌ གྲུབ༌ ཅུག༌ག༌ ཛད༌ཅེས༌སི༌ སང༌ཝའེ༌ ཐབས༌ལྡིངས༌པོ༌, ང༌དང༌གུན༌ལ༌ སྔོན༌ ཅུག༌ག༌ ཛདས༌, ཏེ༌ ཐབས༌ལྡིངས༌པོའེ༌ ཁོང༌ངི༌ ཐུག༌གོངས༌ ཟང༌པོ༌ དྲན༌དྲའ༌ གྲུབ༌། 10 ཏེ༌ ཐབས༌ལྡིངས༌པོ༌ ནི༌, ལྡམ༌མ༌ ཛད༌ཁན༌ནི༌ ཏུས༌པོ༌ ལེབ༌བ༌ཅིག༌, ཁོང༌ངི༌ ནམ༌ཁའ༌ དང༌ ཇིག༌རྟེན༌ནི༌ ནང༌ང༌ སྲོག༌ ཡོད༌ཁན༌ ཚང༌མ༌ ཀུགས༌ཏེ༌, མ༌ཤི༌ཀའེ༌ ཝང༌ངི༌ ཡོག༌ག༌ བོར༌ར༌ ཛད༌ཨིན༌། 11 དཀོན༌མཆོག༌གི༌ མ༌ཤི༌ཀ༌ གྱུད༌ཏེ༌ ང༌དང༌གུན༌ ལྡམ༌མ༌ ཛད༌ཏེ༌ ང༌དང༌གུན༌ལ༌ ནམ༌ཁའེ༌ ནང༌ང༌ ནོར༌སྐལ༌གུན༌ ཐོབས༌ཏེ༌ ཨིན༌ནོག༌, ཅིའ༌ཟེར༌ན༌ ཁོང༌ངི༌ སྔུན༌ནེ༌ ཕར༌ལ༌ ཁོང༌ངི༌ ཐུག༌གོངས༌ ནང༌ཞིན༌ ཅི༌ཚང༌མ༌ དྲན༌དྲ༌ གྲུབ༌ཅུག༌ཅེས༌ལ༌ ཐབས༌ ཛད༌ཏེ༌ ཨིན༌པིན༌།
12 དཀོན༌མཆོག༌གི༌ ཐུགས༌དོད༌པོ༌ ནི༌, ང༌ཞའ༌ ཡ༌ཧུ༌དཱ༌པ༌ མ༌ཤི༌ཀའེ༌ཀ༌ ཨིད༌ཤེས༌ ཅོ༌ཁན༌ ཏང༌པོ༌ མི༌གུན༌ནི༌, ཁོང༌ང༌ སྤལ༌ དང༌ སྟོད༌པ༌ ཁྱོང༌ཅེས༌པོ༌ ཨིན༌པིན༌། 13 ཡང༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནིའང༌ ཐར༌པ༌ ཐོབ༌ཅེས༌སི༌ དེན༌བའེ༌ ལོན༌བོ༌ ཚོར༌ཏེ༌, མ༌ཤི༌ཀའེ༌ཀ༌ ཏད༌པ༌ ཅོས༌ པ༌སང༌, དཀོན༌མཆོག༌གི༌ ཁྱོ༌ཞ༌གུན༌ནི༌ཀ༌ ཁོང༌རང༌ངི༌ ཐེ༌ཙེ༌བོ༌ སལས༌, ཀ༌བོ༌ ཁོང༌ངི༌ ཞལ༌ཆད༌ ཛད༌ཁན༌ནི༌ དམ༌པའེ༌ ཐུག༌ཉིད༌ ཨིན༌ནོག༌། 14 དམ༌པའེ༌ ཐུག༌ཉིད༌བོ༌ ནི༌, དཀོན༌མཆོག༌གི༌ ང༌དང༌ང༌ ནམ༌ཁའེ༌ ནོར༌སྐལ༌ སལ༌ལ༌ ཛད༌ཅེས༌ དང༌ ང༌དང༌གུན༌ ཉོའ༌ ཛད༌ཏེ༌, ཁོང༌རང༌ངི༌ མི༌གུན༌ གྱུར༌ ཅུག༌ག༌ ཛད༌ཅེས༌སི༌, ཁོང༌ངི༌ ཁ༌ཆད༌པོ༌ ཨིན༌ནོག༌། ཁོང༌རང༌ང༌ སྤལ༌ དང༌ སྟོད༌པ༌ ཐོབ༌ཅེས༌སི༌ ཕིའ༌, དཀོན༌མཆོག༌གི༌ ཏེ༌བོ༌ ཅོའ༌ ཛདས༌།
ཐུག༌རྗེ༌ཆེ༌ དང༌ མོས༌ལམ༌།
1:15 ནེ༌ 23
15 ཁྱོ༌ཞ༌གུན༌ནི༌ གཙོ༌བོ༌ ཡེ༌ཤུའི༌ཀ༌ ཏད༌པ༌ ཁྱོང༌ཅེས༌ དང༌ དཀོན༌མཆོག༌གི༌ མི༌ དམ༌པ༌ ཚང༌མ༌ལ༌ ཅེས༌པ༌ ཅོ༌རུག༌ ཟེར༌ཏེ༌ ང༌ ཚོར༌པ༌ནེ༌ ཕར༌ལ༌, 16 ངའེ༌ མོས༌ལམ༌གུན༌ནི༌ ནང༌ང༌ ཁྱོ༌ཞ༌གུན༌ ཨིད༌ཏུ༌ ཅོ༌ཨིན༌ ཏུས༌གྱུན༌ ཁྱོ༌ཞ༌གུན༌ནི༌ ཕིའ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌། 17 དཀོན༌མཆོག༌, ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཟིར༌རྗིད༌ཅན༌ནི༌ ཡབ༌བ༌, ཁྱོ༌ཞ༌གུན༌ལ༌ ཁོང༌ མང༌ང༌ གྱལ༌ལ༌ ཤེ༌ཤེས༌སི༌ ཕིའ༌, ཁོང༌ངི༌ ཁྱོ༌ཞ༌གུན༌ལ༌ ཐུག༌ཉིད༌དི༌ ཤེས༌རབས༌ སལ༌ཅེས༌, ཡང༌ ཁོང༌རང༌ ཁྱོ༌ཞ༌གུན༌ལ༌ སྔོན༌ ཅུག༌ག༌ ཛད༌ཅེས༌ལ༌, ངའེ༌ ཏུས༌གྱུན༌ ཞུའ༌ ཕུལ༌ལད༌། 18 དཀོན༌མཆོག༌གི༌ རིན༌ཅན༌ དང༌ སྤལ༌ཅན༌ ནོར༌སྐལ༌ ཨིན༌ཁན༌ནི༌, དམ༌པ༌ མི༌ བོད༌ད༌ ཛད༌ཁན༌གུན༌ལ༌, ཁོང༌ངི༌ སལ༌ཁན༌ནི༌ རེ༌ཝ༌ ཧ༌གོ༌ཅེས༌སི༌ ཕིའ༌, ཁྱོ༌ཞ༌གུན༌ནི༌ སེམས༌པོ༌ འོད༌དི༌ གང༌ ཅུག༌ག༌ ཛད༌ཅེས༌ལ༌ ངའེ༌ མོས༌ལམ༌ ཕུལ༌ལད༌།
19 ཡང༌ ང༌དང༌ ཏད༌པ༌ཅན༌གུན༌ནི༌ དཀོན༌མཆོག༌གི༌ ཧ༌ལས༌ཤེས༌སི༌ ཤེད༌པོའེ༌ ང༌དང༌གུན༌ནི༌ ནང༌ང༌ ཆག༌ལས༌ ཛད༌ཅེས༌པོ༌ གྱུས༌ ཆ༌ཐུབ༌ཅེས༌སི༌ ཕིའང༌ ངའེ༌ མོས༌ལམ༌ ཞུའད༌། ཏེན༌ན༌ ཧ༌ལས༌སི༌ ཤེད༌པོའེ༌, 20 མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌, ནམ༌ཁའེ༌ ནང༌ང༌ དཀོན༌མཆོག༌གི༌ ཆག༌ ཡས༌པའེ༌ ཁྲིས༌སི༌ཀ༌ ཞུག༌ཤུག༌ག༌ ཛདས༌། 21 འི༌ཏུས༌ མ༌ཚད༌ ཡོང༌ཅེས༌ཅན༌ནི༌ ཏུས༌པོའེ༌ ནང༌ངའང༌, མ༌ཤི༌ཀའེ༌ ཝང༌ ནི༌ ནམ༌ཁའ༌ དང༌ སའེ༌ཀ༌ ཡོད༌ཁན༌ནི༌ སྤོན༌བོ༌, ཝང༌སྲུལ༌པ༌, ཝང༌ཆ༌ ཡོད༌ཁན༌ དང༌, འུ༌སྐྱོང༌ གུན༌ནི༌ སང༌ ཐོ༌ཤོག༌པོ༌ ཨིན༌ནོག༌། 22 ཆོས༌ཚོགས༌སི༌ ཕན༌ཐོགས༌སི༌ ཕིའ༌ དཀོན༌མཆོག༌གི༌ ཅི༌ཚང༌མ༌ མ༌ཤི༌ཀའེ༌ ཞབས༌སི༌ ཡོག༌ག༌ སལ༌ཏེ༌, ཁོང༌ ཅི༌ཚང༌མའེ༌ཀ༌ གོ༌སྐྱོང༌ང༌ སྐོའ༌ ཛདས༌། 23 ཆོས༌ཚོགས༌ ནི༌, མ༌ཤི༌ཀའེ༌ སྐུ༌ཟུགས༌ ཨིན༌ནོག༌, ཡང༌ ཁོང༌ ཏེ༌བོའེ༌ ནང༌ང༌ ནས༌ཏེ༌ ཆོས༌ཚོགས༌པོ༌ ཆད༌ལག༌ མེད༌ཁན༌ ཛདས༌། ཁོང༌ངི༌ ཀ༌རུང༌ས༌ ཅི༌ཚང༌མའེ༌ ནང༌ང༌ ཁོང༌རང༌ སྐང༌ང༌ ཛདས༌།