6
ཅིག༌ དང༌ ཅིག༌གི༌ ནགས༌གུན༌ བགོས༌ཏེ༌ ཁུར༌ཅེས༌།
6:1 ནེ༌ 10
1 ཅེས༌པའེ༌ སྤུན༌གུན༌, གལ༌ཏེས༌ ཏད༌པ༌ཅན༌ཞིག༌ སྡིག༌པའེ༌ ནང༌ང༌ གྱེལ༌ན༌, ཁྱོ༌ཞའ༌ དམ༌པའེ༌ ཐུག༌ཉིད༌དི༌ ནང༌ང༌ ལྡན༌ཁན༌གུན༌ནི༌, ཏེ༌ མི༌བོའ༌ པས༌མོ༌ ཉམ༌པོ༌ དྲང༌པོའེ༌ ལམ༌མི༌ཀ༌ ལོགས༌ཏེ༌ ཁྱོང༌གོ༌ཤེས༌ ཨིན༌ནོག༌། ཨིན༌ནའང༌ ཏེན༌ན༌ ཙོགས༌ སྡིག༌པའེ༌ ནང༌ང༌ ཁྱོ༌ཞ༌གུན༌ནའང༌ མི༌གྱེལ༌ཅེས༌ལ༌ ཤང༌ ཅོ༌ཤིག༌། 2 ཅིག༌ དང༌ ཅིག༌གི༌ ཁུ༌རུ༌གུན༌ བགོས༌ཏེ༌ ཁུར༌ཤིག༌། ཏེ༌ཙོགས༌ ཅོ༌ཅེས༌ནེ༌ ཁྱོ༌ཞ༌གུན༌ནི༌ མ༌ཤི༌ཀའེ༌ ཁྲིམས༌པོ༌, གྲུབ༌ཅུགས༌ཏེ༌ ཨིན༌ནོག༌། 3 གལ༌ཏེས༌ ཁྱོ༌ཞ༌རང༌ ཅའང༌ མན༌ཨིན༌ནའང༌ མ༌ ཀྲག༌པོ༌ ཚོར༌ཏེ༌ ཞན༌མ༌གུན༌ལ༌ རོགས༌ ཅོའ༌ མེད༌ན༌, ཁྱོ༌ཞ༌རང༌ངི༌ རང༌ང༌ གོབ༌སྐོར༌ཏེ༌ ཨིན༌ནོག༌།
4 ཁྱོ༌ཞ༌རང༌ངི༌ ལས༌ལ༌ གྱལ༌ལ༌ ཅོས༌ཏེ༌ སྟག༌ཅད༌ ཅོ༌ཤིག༌། ཏེ༌ནེ༌ ཁྱོ༌ཞ༌གུན༌ལ༌ ཞན༌མ༌ ཉམ༌པོ༌ ལྡུར༌ཁན༌ནི༌ སྐྱིད༌པོ༌ མན༌པ༌, ཁྱོ༌ཞ༌རང༌ངི༌ ལས༌ གྱལ༌ལ༌ ཅོ༌ཁན༌ནི༌ སྐྱིད༌པོ༌བོ༌ ཡོང༌ཨིན༌། 5 ཡང༌ ཨིད༌ཏུ༌ ཅོ༌ཤིག༌, མི༌ རེ༌རེའ༌ རང༌རང༌ངི༌ ཁུ༌རུ༌གུན༌ ཁུར༌གོས༌ས༌ནོག༌།
6 ཁྱོ༌ཞ༌གུན༌ལ༌ དཀོན༌མཆོག༌གི༌ བཀའ༌ ལབ༌བ༌ ཛད༌ཁན༌གུན༌ ཉམ༌པོ༌, ཁྱོ༌ཞའ༌ ཡོད༌ཁན༌ ཕན༌ཐོགས༌ཅན༌ ཚང༌མ༌ བགོས༌ཤིག༌།
7 ཁྱོ༌ཞ༌གུན༌ནི༌ རང༌དང༌རང༌ང༌ གོབ༌སྐོར༌ཏེ༌ དཀོན༌མཆོག༌གི༌ ཁྲིམས༌ཅད༌ད༌ ཛད༌ཅེས༌པོའ༌ སྣང༌མེད༌ མ༌ཅོ༌ཤིག༌། ཁྱོ༌ཞ༌རང༌ངི༌ ཏབ༌ཁན༌ནི༌ སྟོན༌ཐོག༌གི༌ བྲས༌བུ༌ ཁྱོ༌ཞ༌གུན༌ནི༌ རྔ༌ཨེན༌། 8 སྡིག༌པའེ༌ དོད༌པ༌གུན༌ དྲན༌དྲ༌ གྲུབ༌ཅེས༌ལ༌ མི༌ཚེ༌ ཕུད༌ཁན༌གུན༌ནི༌, ཏེ༌ སྡིག༌པའེ༌ དོད༌པ༌གུན༌ནི༌ ཀ༌ནེ༌, རུལ༌ཅེས༌ དང༌ ཤི༌ཅེས༌ གུན༌ རྔ༌ཨེན༌། ཨིན༌ནའང༌ དཀོན༌མཆོག༌གི༌ ཐུག༌ཉིད༌ ཐུགས༌ཐད༌ཅུག༌ཁན༌ནི༌ མི༌ཚེ༌ ཕུད༌ཁན༌གུན༌ནི༌, ཐུག༌ཉིད༌ནེ༌ ཐའ༌མེད༌པའེ༌ མི༌ཚེ༌ཞིག༌ རྔ༌ཨེན༌། 9 ཏེ༌ནེ༌ ང༌དང༌ ཟང༌པོ༌ ཅོ༌ཅེས༌ལ༌ སྣང༌ང༌ ཚེར༌ གོ༌ཤེས༌ མ༌ནོག༌, ཅིའ༌ཟེར༌ན༌ གལ༌ཏེས༌ ཟང༌པོ༌ ཅོ༌ཅེས༌པོ༌ ཕང༌ མ༌ཕང༌ན༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཏུས༌པོའེ༌ཀ༌ ང༌དང༌གུན༌ནི༌ ཅིན༌ལབས༌ཅན༌ནི༌ སྟོན༌ཐོག༌པོ༌ རྔ༌ཨེན༌། 10 ཏེ༌བོའེ༌ཕིའ༌ ནམ༌ སྐབས༌ ཐོབ༌ནའང༌, ང༌དང༌གུན༌ནི༌ ཚང༌མ༌ལ༌ ཟང༌པོ༌ ཅོ༌གོ༌ཤེས༌ ཨིན༌ནོག༌, མིག༌སལ༌ལི༌ ཏད༌པ༌ཅན༌ སྤུན༌གུན༌ལ༌།
པ༌འུ༌ལུའི༌ སྟིང༌ཇུག༌གི༌ ཁ༌ད༌།
6:11 ནེ༌ 18
11 ཏ༌ ངའེ༌ ང༌རང༌ངི༌ ལག༌པ༌ ཉམ༌པོ༌ བྲིའ༌ཅིག༌, ལྟོས༌སའང༌, ངའེ༌ བྲི༌ཁན༌གུན༌ ཙམ༌ཤིག༌གི༌ ཆེན༌མོ༌ རིག༌ མི༌དུག༌།
12 སུན༌ནད༌ ཅོ༌གོས༌ས༌ནོག༌ ཟེར༌ཏེ༌ ཁྱོ༌ཞ༌གུན༌ལ༌ ཝང༌ ཏང༌ཁན༌གུན༌ནི༌, ཏེ༌བོ༌ ཁོ༌རང༌གུན༌ ཟང༌པོ༌ ཐོང༌ཅེས༌ མ༌ཚད༌, མ༌ཤི༌ཀ༌ རྐྱང༌ཤིང༌ངི༌ཀ༌ ཀྲོངས༌ཤེས༌ གྱུད༌ཏེ༌ ཐར༌པ༌ ཐོབ༌ཅེས༌ ཅིག༌པོ༌ ལབས༌ཏེ༌, ཁོ༌རང༌གུན༌ལ༌ ནགས༌བར༌དོ༌ མི༌ཐོང༌ཅེས༌སི༌ ཕིའང༌ ཅོའ༌ནོག༌། 13 སུན༌ནད༌ ཅོས༌ཏེ༌ ཡོད༌ཁན༌གུན༌ནིའང༌ ཁྲིམས༌ ཚང༌མའ༌ ཁའ༌ཉན༌ན༌ མ༌ནོག༌། ཨིན༌ནའང༌ ཁྱོ༌ཞའེ༌ སུན༌ནད༌ ཅོ༌ཁན༌བོའེ༌ཀ༌ ཁོང༌གུན༌ལ༌ ཕོ༌སོ༌ ཅོ༌ཉན༌ཅེས༌སི༌ དོད༌པའེ༌ ཞས༌ཏེ༌ ཁོང༌གུན༌ནི༌ ཁྱོ༌ཞའ༌ ཏེ༌བོ༌ ཅོ༌ཅུག༌ག༌ནོག༌།
14 ངའེ༌ དོད༌པ༌ ནི༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ རྐྱང༌ཤིང༌ ཅིག༌པོའེ༌ཀ༌ མ༌སྟོགས༌ ཡང༌ ཅི༌ཞིག༌གི༌ཀའང༌ ངའེ༌ ཕོ༌སོ༌ མ༌ནེ༌ མི༌ཅོ༌། མ༌ཤི༌ཀའེ༌ ཏེན༌ན༌ རྐྱང༌ཤིང༌ངི༌ ཞས༌ཏེ༌ ངའེ༌ ཇིག༌རྟེན༌ནི༌ དོད༌པ༌ ཚང༌མ༌ སད༌ཏེ༌ ཨིན༌། ཡང༌ ངའེ༌ ཕིའ༌ རིན༌ཅན༌ ཨིན༌ཁན༌གུན༌ འི༌ ཇིག༌རྟེན༌པ༌གུན༌ནི༌ རིན༌ཅན༌ སམ༌མ༌ མི༌དུག༌། 15 སུན༌ནད༌ ཅོས༌ཏེ༌ ཡོད༌གྲོ༌ ཡ༌ མེད༌གྲོ༌ ཏེ༌བོའེ༌ ཅའང༌ ཕན༌ཐོགས༌ མེད༌པ༌ ཨིན༌ནོག༌། ཁག༌ཅན༌བོ༌ ནི༌, གྱུར༌ཇ༌ ཁྱོངས༌ཏེ༌ མི༌ཚེ༌ སོ༌མ༌ཞིག༌ ཕུད༌ཅེས༌པོ༌ ཨིན༌ནོག༌། 16 མི༌ཚེའེ༌ སོ༌མའེ༌ ལམ༌མི༌ཀ༌ གྲུལ༌ཁན༌གུན༌ལ༌, དཀོན༌མཆོག༌གི༌ ཞི༌དེ༌ དང༌ སྙིང༌རྗེ༌ གུན༌ ཐོབ༌ཨིན༌། ཏེ༌གུན༌ དཀོན༌མཆོག༌གི༌ དེན༌བའེ༌ མི༌གུན༌ ཨིན༌ནོག༌།
17 དོར༌ལྡུས༌ཏེ༌ ཏ༌ནེ༌ཕར༌ལ༌ ཏེ༌གུན༌ནི༌ སྐོར༌ལ༌, སུ༌ཞིག༌གིའང༌ ངའ༌ ནགས༌ མ༌ལྟན༌ཤིག༌, ཅིའ༌ཟེར༌ན༌ ངའེ༌ ཟུགས༌པོའེ༌ཀ༌ ཡེ༌ཤུའི༌ གྱབ༌ནེ༌ གྲུལ༌ཁན༌ནི༌ རྡུག༌ངལ༌ལི༌ སྟགས༌གུན༌ ཕོག༌ཏེ༌ ཡོད༌།
18 ཅེས༌པའེ༌ སྤུན༌གུན༌, ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌བོ༌, ཁྱོ༌ཞ༌གུན༌ནི༌ ཐུག༌ཉིད༌ ཉམ༌པོ༌ ཞུགས༌ཤིག༌, ཨ༌མེན༌༎