1 ཡ༌ཝའེ༌ སཱ༌ར༌ ཁོང༌རང༌ངི༌ ཞལ༌ཆད༌ ཛད༌ཁན༌ ནང༌ཞིན༌ ཅིན༌ལབས༌ སལས༌། 2 ཁོ༌ སྐྱེ༌ཅེས༌མ༌ཞིག༌ གྱུར༌ ཡང༌ ཨབ༌ར༌ཧམ༌ སྒས༌ཏེ༌ ཡོད༌ནའང༌ དཀོན༌མཆོག༌གི༌ མོལ༌ཁན༌ནི༌ ཏུས༌པོའེ༌ཀ༌ ཁོའེ༌ ན༌མ༌ སཱ༌རའ༌ བུ༌ཚ༌ཞིག༌ སྐྱེས༌། 3 ཨབ༌ར༌ཧམ༌མི༌ སཱ༌རའ༌ སྐྱེ༌ཁན༌ནི༌ ཁོའེ༌ བུ༌ཚའེ༌ མིང༌ང༌ ཨི༌སཱག༌ ཏགས༌། 4 ཡང༌ ཨི༌སཱག༌ག༌ ཞག༌པོ༌ རྒྱད༌ ཆའ༌ཅིག༌, ཨབ༌ར༌ཧམ༌མི༌ ཁོའ༌ སུན༌ནད༌ ཅོས༌ ཀ༌ཟུག༌ དཀོན༌མཆོག༌གི༌ བཀའ༌ སལ༌ཏེ༌ ཨིན༌པིན༌། 5 ཨི༌སཱག༌ སྐྱེ༌ ཟ༌ནེ༌ ཨབ༌ར༌ཧམ༌མ༌ ལོ༌ གྱ༌ ཆའད༌པིན༌།

6 ཡང༌ སཱ༌རའེ༌ ཟེརས༌, "དཀོན༌མཆོག༌གི༌ ངའ༌ སྐྱིད༌པོ༌ དང༌ ཧབ༌གོད༌ ཁྱོང༌ང༌ ཛདས༌། འི༌ ནས༌ཚུལ༌ ཚོར༌ཁན༌ ཚང༌མ༌ ང༌ ཉམ༌པོ༌ གའ༌མོ༌ ཅོས༌ཏེ༌ གོད༌ཨིན༌།" 7 ཏེ༌ནེ༌ ཁོའེ༌ ཟེརས༌, "སཱ༌རའེ༌ ཕྲུ༌གུ༌གུན༌ལ༌ པི༌བི༌ ཏང༌ཨིན༌ སམས༌ཏེ༌ སུའི༌ ཨབ༌ར༌ཧམ༌མ༌ ཟེར༌ཉན༌ཨིན༌? རྒད༌པོའེ༌ ཏུས༌ལའང༌ ངའེ༌ ཁོའ༌ བུ༌ཚ༌ཞིག༌ ཏངས༌པིན༌།"

8 ཕྲུ༌གུ༌ ལྡན༌ཨིན༌ སོང༌ ཡང༌ ཕྲུ༌གུའ༌ པི༌བི༌ ཅདས༌, ཏེ༌ ཞག༌ག༌ ཨབ༌ར༌ཧམ༌མི༌ གྲོན༌ ཆེན༌མོ༌ཞིག༌ ཏངས༌། 9 ཨིན༌ནའང༌ སཱ༌རའེ༌ ཨབ༌ར༌ཧམ༌མི༌ བུ༌ཚ༌, ཨི༌ཇིབ༌པ༌ ཡོག༌མོ༌ ཧཱ༌གར༌ལ༌ སྐྱེ༌ཁན༌ ཨིཤ༌མ༌ཨེལ༌ལི༌ ཨི༌སཱག༌ག༌ ཁྲེལ༌གོད༌ ཏང༌ཨིན༌ ཐོང༌པ༌ 10 སཱ༌རའེ༌ ཨབ༌ར༌ཧམ༌མ༌ ཟེརས༌, "འི༌ ཚེ༌ཡོག༌ བུ༌མོ༌ དང༌ ཁོའེ༌ བུ༌ཚ༌བོ༌ ཕིངས༌ཏེ༌ ཡང༌ ནས༌ས༌ ཞིག༌ག༌ ལམ༌ཅུག༌། ངའེ༌ བུ༌ཚ༌ ཨི༌སཱག༌ག༌ ཐོབ༌ཅེས༌ཅན༌ནི༌ ནོར༌སྐལ༌བོ༌ འི༌ ཚེ༌ཡོག༌གི༌ བུ༌ཚ༌ ཉམ༌པོ༌ བགོ༌ མ༌གོས༌།"

11 ཏེ༌བོའེ༌ ཨབ༌ར༌ཧམ༌མ༌ ཚེར༌ཁའ༌ སྲན༌ཏྲེ༌ ཡོངས༌ ཅིའ༌ཟེར༌ན༌ ཨིཤ༌མ༌ཨེལ༌ལའང༌ ཁོའེ༌ བུ༌ཚ༌ ཨིན༌པིན༌། 12 ཨིན༌ནའང༌ དཀོན༌མཆོག༌གི༌ ཁོའ༌ མོལས༌, "ཁོ༌རང༌ངི༌ བུ༌ཚ༌ དང༌ ཚེ༌ཡོག༌ ཧཱ༌གར༌རི༌ ཕིའ༌ ཚེར༌ མ༌ཚེར༌། ཁྱོ༌རང༌ངི༌ སཱ༌རའེ༌ ཟེར༌ཁན༌བོ༌ ཅོས༌, ཅིའ༌ཟེར༌ན༌ ངའེ༌ ཁ༌ཆད༌ ཅོས༌ཁན༌ ནང༌ཞིན༌ ཁྱོ༌རང༌ངི༌ པུར༌གྱུད༌གུན༌ ཨི༌སཱག༌ གྱུད༌ཏེ༌ ཕེལ༌ཨིན༌། 13 ངའེ༌ ཚེ༌ཡོག༌གི༌ བུ༌ཚའང༌ པུར༌གྱུད༌ མང༌པོ༌ ཏངས༌ཏེ༌ ཁོང༌གུན༌ གྱལ༌ཁམས༌ གྱུར༌ཨིན༌ ཅིའ༌ཟེར༌ན༌ ཁོའང༌ ཁྱོ༌རང༌ངི༌ བུ༌ཚ༌ ཨིན༌ནོག༌།"

14 ཐོ༌རེ༌ཟུག༌པོ༌ ངོ༌ཏོག༌ ང༌མོ༌ནེ༌ ཨབ༌ར༌ཧམ༌མི༌ ཧཱ༌གར༌ལ༌ ཟའ༌ཅེས༌ དང༌ སྐྱལ༌པའེ༌ ནང༌ང༌ ཆུ༌ སྐངས༌ཏེ༌ ཁོའེ༌ གྱབ༌བ༌ ཀལས༌ ཡང༌ ཕྲུ༌གུ༌ ཉམ༌པོ༌ ཁོ༌ ལམ༌ཅུགས༌། ཁོང༌གུན༌ བེར༌ཤེ༌བའེ༌ རི༌སྟོང༌ངི༌ ནང༌ང༌ ཁྱམས༌ཏེ༌ སོང༌།

15 ཆུ༌ ཚང༌མ༌ ཚར༌ར༌ཅིག༌ བུ༌མོའེ༌ ཁོ༌རང༌ངི༌ ཕྲུ༌གུ༌བོ༌ ཆུ༌ངུན༌ ལྕང༌མའེ༌ སིལ༌ལ༌ བོརས༌། 16 ཏེ༌ནེ༌ ཧ༌ལམ༌ མི༌ཀྲར༌ གུབ༌ཅུ༌ ཟམ༌ཤིག༌ ཐག༌རིང༌ང༌ སོང༌ཏེ༌ དུགས༌, ཅིའ༌ཟེར༌ན༌ ཁོའེ༌ སམ༌, "ངའེ༌ ང༌རང༌ངི༌ བུ༌ཚ༌ ཤི༌ཨིན༌ ལྟ༌ཉན༌ཅེས༌ མེ༌རག༌།" ཡང༌ ཁོ༌ ཏེ༌ཀ༌ དུགས༌ཏེ༌ ངུས༌།

17 དཀོན༌མཆོག༌གི༌ བུ༌ཚ༌ ངུ༌ཁན༌བོ༌ སནས༌ ཡང༌ ནམ༌ཁའ༌ནེ༌ དཀོན༌མཆོག༌གི༌ ཕོ༌ཉའེ༌ ཧཱ༌གར༌ལ༌ མོལས༌, "ཧཱ༌གར༌ ཁྱོ༌རང༌ང༌ ཅི༌ སོང༌? ཇིགས༌ མ༌ཇིགས༌། དཀོན༌མཆོག༌གི༌ བུ༌ཚ༌ ངུ༌ཅེས༌པོ༌ སན༌ན༌ ཛད༌ཏེ༌ ཨིན༌ནོག༌། 18 རང༌ངི༌ བུ༌ཚ༌ ལངས༌ཏེ༌ ལག༌པ༌ ཐམས༌ཏེ༌ སོང༌། ངའེ༌ ཁོའེ༌ པུར༌གྱུད༌གུན༌ གྱལ༌ཁམས༌ བྲག༌པོ༌ གྱུར༌ཅུག༌ ཨིན༌།"

19 ཏེ༌ནེ༌ དཀོན༌མཆོག༌གི༌ བུ༌མོའེ༌ མིག༌པོ༌ ཕེའ༌ ཛདས༌ ཡང༌ ཁོའ༌ ཆུ༌དོང༌ཞིག༌ ཐོང༌། ཁོ༌ སོང༌ཏེ༌ སྐྱལ༌པ༌ ཆུའི༌ སྐངས༌ཏེ༌ བུ༌ཚ༌ ཆུ༌ ཐུང༌ང༌ ཏངས༌། 20 བུ༌ཚ༌ ལྡན༌ཨིན༌ སོང༌ ཡང༌ དཀོན༌མཆོག༌ ཁོ༌ ཉམ༌པོ༌ ཡོད༌པིན༌། ཁོ༌ པ༌རན༌ ཟེར༌སའེ༌ རི༌སྟོང༌ངི༌ ནང༌ང༌ དུགས༌ ཡང༌ དའ༌ ཞུ༌ ཀོལ༌ཁན༌ མ༌ ཁས༌པ༌ཞིག༌ གྱུར༌། 21 ཁོང༌གུན༌ ཏེ༌རུ༌ ཡོད༌ ཟ༌ནེ༌ ཁོའེ༌ ཨ༌མའེ༌ ཁོའེ༌ ཕིའ༌ ན༌མ༌ ཨི༌ཇིབ༌ནེ༌ ཁྱོངས༌།

22 ཏེ༌ ཏུས༌ལ༌ ཨ༌བི༌མེ༌ལེག༌ དང༌ ཁོའེ༌ མག༌མི༌གུན༌ནི༌ འུ༌སྐྱོང༌ ཕི༌ཀོལ༌ལི༌ ཨབ༌ར༌ཧམ༌མ༌ ཟེརས༌, "ཁྱོ༌རང༌ངི༌ ཅོ༌ཁན༌ ཚང༌མའེ༌ ནང༌ང༌ དཀོན༌མཆོག༌ ཁྱོ༌རང༌ ཉམ༌པོ༌ ཡོད༌ཏེ༌ ཨིན༌ནོག༌། 23 ངའ༌, ངའེ༌ ཕྲུ༌གུ༌གུན༌ དང༌ ངའེ༌ མིར༌གྱུད༌གུན༌ལ༌ གོབ༌སྐོར༌ མི༌ཏང༌ ཟེར༌ཏེ༌ དཀོན༌མཆོག༌གི༌ སྐུ༌དུན༌ལ༌ ཁྱོ༌རང༌ངི༌ ནའ༌ ཁུར༌། ངའེ༌ ཁྱོ༌རང༌ང༌ ཐུག༌རྗེ༌ ཅོ༌ཁན༌ ཙོགས༌ ཁྱོ༌རང༌ངིའང༌ འི༌ གྱལ༌ཁམས༌ ཉམ༌པོ༌ ཅོས༌ ཀ༌རུ༌ ཁྱོ༌རང༌ དུགས༌ཏེ༌ ཡོད༌།"

24 ཨབ༌ར༌ཧམ༌མི༌ ཟེརས༌, "ངའེ༌ ནའ༌ ཁུར༌རད༌།"

25 ཨབ༌ར༌ཧམ༌མི༌ ཨ༌བི༌མེ༌ལེག༌ག༌ ཁོའེ༌ ཡོག༌པོ༌གུན༌ནི༌ ཆུ༌དོང༌ ཀོགས༌ཏེ༌ ཁྱེར༌ཁན༌ནི༌ ལས༌ ངན༌པའེ༌ སྐོར༌ལ༌ ཤདས༌། 26 ཨ༌བི༌མེ༌ལེག༌གི༌ ཟེརས༌, "ངའ༌ གྱུས༌མེད༌, འི༌བོ༌ སུའི༌ ཅོས༌། ཁྱོ༌རང༌ངི༌ ངའ༌ ཤད༌ད༌ མེ༌རག༌ ཡང༌ ངའ༌ དི༌རིང༌ མ༌ནེ༌ འི༌བོའེ༌ སྐོར༌ལ༌ མ༌ ཚོར༌།"

27 ཏེ༌ནེ༌ ཨབ༌ར༌ཧམ༌མི༌ ཨ༌བི༌མེ༌ལེག༌ག༌ ལུག༌ དང༌ བ༌ལང༌ གུན༌ ཏངས༌ ཡང༌ ཁོང༌ ཉིས༌ཀོའེ༌ ཆད༌དོན༌ ཅོས༌། 28 ཁོའེ༌ ལུག༌ཁྱུའི༌ ཕྲོ༌ནེ༌ ལུ༌གུ༌ རྡུན༌ སོ༌སོའ༌ ཕེས༌, 29 ཡང༌ ཨ༌བི༌མེ༌ལེག༌གི༌ ཁོའ༌ ཏྲིས༌, "ཁྱོ༌རང༌ངི༌ ལུག༌ཁྱུའི༌ ཕྲོ༌ནེ༌ ལུ༌གུ༌ རྡུན༌ སོ༌སོའ༌ ཕེ༌ཅེས༌སི༌ དོན༌བོ༌ ཅི༌ ཨིན༌?"

30 ཨབ༌ར༌ཧམ༌མི༌ ལན༌སལས༌, "འི༌ ལུ༌གུ༌ རྡུན༌བོ༌ ལེན༌ན༌ ཛད༌ཏེ༌ འི༌ ཆུ༌དོང༌ ངའེ༌ བྲུས༌ཏེ༌ ཨིན༌ཁན༌བོའེ༌ སྤང༌པོ༌ སལ༌ཅེས༌སི༌ ཆད༌དོན༌ ཅོས༌།

31 ཏེ༌བོའེ༌ཕིའ༌ ཏེ༌ ས༌ཆ༌བོའ༌ བེར༌ཤེ༌བ༌ *21:31 ཨིབ༌རི༌པའེ༌ སྐད༌དི༌ ནང༌ང༌ བེར༌ཤེ༌བའེ༌ ཏོན༌ ནའ༌ ཁུར༌སའེ༌ ཆུ༌དོང༌ ཨིན༌ནོག༌། ཟེརས༌ ཅིའ༌ཟེར༌ན༌ ཏེ༌ཀ༌ ཁོང༌ ཉིས༌ཀོའེ༌ དམ༌ཆའ༌ ཅོས༌།

32 ཁོང༌གུན༌ནི༌ བེར༌ཤེ༌བའེ༌ ནང༌ང༌ དམ༌ཆ༌ ཅོས༌ཏེ༌ སྟིང༌ནེ༌, ཨ༌བི༌མེ༌ལེག༌ དང༌ ཁོའེ༌ མག༌མི༌གུན༌ནི༌ འུ༌སྐྱོང༌ ཕི༌ཀོལ༌ ལོགས༌ཏེ༌ ཕི༌ལིས༌ཏིའ༌ སོང༌། 33 ཨབ༌ར༌ཧམ༌མི༌ བེར༌ཤེ༌བའེ༌ ནང༌ང༌ ཀྲ༌མ༌རིག༌གི༌ ལྕང༌མ༌ ཙུགས༌ ཡང༌ ཡ༌ཝའ༌, ཐའ༌མེད༌པའེ༌ དཀོན༌མཆོག༌ ཅོལས༌། 34 ཕི༌ལིས༌ཏིའ༌ ནང༌ང༌ ཨབ༌ར༌ཧམ༌ ཏུས༌ མང༌པོ༌ ཞན༌ཡུལ༌ལི༌ མི༌ ཙོགས༌ལ༌ དུགས༌།