1 ཨབ༌ར༌ཧམ༌མི༌ ཀེ༌ཏུ༌ར༌ ཟེར༌ཁན༌ནི༌ ཡང༌ བུ༌མོ༌ཞིག༌ ཉམ༌པོ༌ ན༌མ༌ ཅོས༌། 2 ཏེ༌ བུ༌མོ༌བོ༌ གྱུད༌ཏེ༌ ཁོའ༌ བུ༌ཚ༌ དྲུག༌ ཇོར༌ ཁོང༌གུན༌ ནི༌ ཟིམ༌རན༌, ཡོག༌ཤན༌, མི༌དིའན༌, མི༌དིའན༌, འིཤ༌བག༌, དང༌ ཤུའ༌ ཨིན༌པིན༌། 3 ཡོག༌ཤན༌, ཤི༌བ༌ དང༌ དི༌དན༌ ནི༌ ཨ༌བ༌ ཨིན༌པིན༌ ཡང༌ ཨ༌ཤུ༌རམ༌པ༌, ལི༌ཏུ༌ཤམ༌པ༌ དང༌ ལིའུ༌མིམ༌པ༌ གུན༌, དི༌དན༌ ནི༌ པུར༌གྱུད༌གུན༌ ཨིན༌ནོག༌། 4 མི༌དིའན༌ ནི༌ བུ༌ཚ༌གུན༌ ཨི༌ཕ༌, ཨི༌ཕེར༌, ཧ༌ནོག༌, ཨ༌བི༌ད༌ དང༌ འེལ༌ལྡ༌ གུན༌ ཨིན༌པིན༌། ཁོང༌ ཚང༌མ༌ ཀི༌ཏུ༌རའ༌ གྱུད༌ཏེ༌ ཨབ༌ར༌ཧམ༌མི༌ པུར༌གྱུད༌གུན༌ ཨིན༌ནོག༌། 5 ཨབ༌ར༌ཧམ༌མི༌ ཁོའ༌ ཡོད༌ཁན༌ ཚང༌མ༌ ཨི༌སཱག༌ག༌ ཏངས༌། 6 ཨིན༌ནའང༌ ཨབ༌ར༌ཧམ༌ མ༌ཤིའ༌ ཡོད༌ཏུས༌, ཁོའེ༌ ཚེ༌ཡོག༌ ན༌མ༌གུན༌ གྱུད༌ཏེ༌ སྐྱེ༌ཁན༌ནི༌ བུ༌ཚ༌གུན༌ལ༌ སྐྱེས༌ ཏངས༌ཏེ༌ ཤར༌ཆོགས༌ལ༌ ཡོད༌ཁན༌ནི༌ ནས༌སའ༌ ཨི༌སཱག༌ནེ༌ ཐག༌རིང༌ང༌ ལམ༌ཅུགས༌།

7 མི༌ཚེ༌ རིང༌མོ༌ གྱལ༌ལ༌ཞིག༌ ཕུད༌ཏེ༌ ལོ༌ 175 སོང༌ཏེ༌ 8 ཨབ༌ར༌ཧམ༌ ཤི༌ ཡང༌ ཁོ༌རང༌ངི༌ ཕ༌མེས༌པོ༌གུན༌ ཉམ༌པོ༌ ཛོམས༌། 9 ཁོའེ༌ བུ༌ཚ༌ ཨི༌སཱག༌ དང༌ ཨིཤ༌མ༌ཨེལ༌ལི༌ ཁོང༌ མེཁ༌ཕི༌ལའི༌ གྲག༌ཕུགས༌ ཀ༌བོ༌ ཧེད༌པ༌ ཟོ༌ཧར༌རི༌ བུ༌ཚ༌ ཨེ༌ཕོ༌རོན༌ནི༌ ཞིང༌ མམ༌རེའེ༌ ཤར༌ཆོགས༌ལ༌ ཡོད༌ཁན༌བོའེ༌ ནང༌ང༌ སུབས༌། 10 འི༌བོ༌ ཨབ༌ར༌ཧམ༌མི༌ ཧེད༌པ༌གུན༌ནི༌ ཀ༌ནེ༌ ཉོས༌ཁན༌ནི༌ ཞིང༌བོ༌ ཨིན༌པིན༌། ཏེ༌ནང༌ང༌ ཨབ༌ར༌ཧམ༌ ཁོ༌རང༌ངི༌ ན༌མ༌ སཱ༌རའ༌ ཉམ༌པོ༌ སུབས༌། 11 ཨབ༌ར༌ཧམ༌ ཀྲོངས༌ཏེ༌ སྟིང༌ནེ༌ དཀོན༌མཆོག༌གི༌ ཁོའེ༌ བུ༌ཚའ༌ ཨི༌སཱག༌ག༌ ཅིན༌ལབས༌ སལས༌ ཡང༌ ཏེ༌ཏུས༌ ཁོ༌ བེར༌ལ༌ཧཱའི༌རོའི༌ ནང༌ང༌ དུག༌གད༌པིན༌།"

12 འི༌བོ༌ ཨབ༌ར༌ཧམ༌མ༌ ཧཱ༌གར༌ ཨི༌ཇིབ༌མ༌ སཱ༌རའེ༌ ཚེ༌ཡོག༌ གྱུད༌ཏེ༌ ཇོར༌ཁན༌ ནི༌ ཨིཤ༌མ༌ཨེལ༌ལི༌ པུར༌གྱུད༌གུན༌ནི༌ ཐོ༌ ཨིན༌། 13 སྐྱེ༌ཚིར༌ལ༌ ཨིཤ༌མ༌ཨེལ༌ལི༌ བུ༌ཚ༌གུན༌ནི༌ མིང༌ ནི༌ ནི༌བེ༌འོད༌, ཀི༌དར༌, ཨད༌བིལ༌, མིབ༌སམ༌, 14 མིཤ༌མ༌, དུ༌མཧ༌, མས༌ས༌, 15 ཧ༌དད༌, ཏི༌མ༌, ཡི༌ཏུར༌, ན༌ཕིཤ༌ དང༌ ཀི༌དི༌མཧ༌ གུན༌ ཨིན༌། 16 ཁོང༌གུན༌ ཨིཤ༌མ༌ཨེལ༌ལི༌ བུ༌ཚའེ༌ སྡེ༌, ཝང༌སྲུལ༌པ༌ ཅུག༌ཉིས༌སི༌ ཕ༌མེས༌པོ༌གུན༌ ཨིན༌པིན༌, ཁོང༌གུན༌ནི༌ མིང༌ ཁོང༌རང༌གུན༌ནི༌ གྲོང༌སེབས༌ དང༌ དུག༌སའི༌ ས༌ཆ༌གུན༌ ནང༌ཞིན༌ ཐོགས༌། 17 ལོ༌ 137 སོན༌ཏེའ༌ ལུས༌ཏེ༌ སྟིང༌ནེ༌ ཨིཤ༌མ༌ཨེལ༌ ཤི༌ ཡང༌ ཁོ༌རང༌ངི༌ ཕ༌མེས༌པོ༌གུན༌ ཉམ༌པོ༌ ཛོམས༌། 18 ཨིཤ༌མ༌ཨེལ༌ལི༌ པུར༌གྱུད༌གུན༌ ཧ༌ཝི༌ལ༌ ནེ༌ ཤུར༌ ཚག༌པ༌, ཀ༌བོ༌ ཨི༌ཇིབ༌ ཤར༌ཆོགས༌, ཨ༌ཤུར༌ ཆོགས༌ལ༌ ཡོད༌པིན༌། ཁོང༌གུན༌ ཨབ༌ར༌ཧམ༌མི༌ ཞན༌ པུར༌གྱུད༌གུན༌ ཉམ༌པོ༌ ཐུན༌ན༌ མེད༌པིན༌།

19 འི༌བོ༌ ཨི༌སཱག༌གི༌ བུ༌ཚ༌གུན༌ནི༌ སྐོར༌, ཨི༌སཱག༌ ནི༌ ཨབ༌ར༌ཧམ༌མི༌ བུ༌ཚ༌ ཨིན༌། 20 ཨི༌སཱག༌ག༌ ལོ༌ 40 ཆའད༌པིན༌ ནམ༌ ཁོའེ༌ ར༌བེ༌ཀ༌ ཉམ༌པོ༌ བག༌སྟོན༌ ཅོས༌། ར༌བེ༌ཀ༌ པ༌དམ༌ཨ༌རམ༌ནེ༌ ཨིན༌ཁན༌ ཨ༌རམ༌པ༌ བེ༌ཐུལ༌ལི༌ བུ༌མོ༌ དང༌ ལ༌བན༌ནི༌ སྲིང༌མོ༌ ཨིན༌པིན༌། 21 ཨི༌སཱག༌གི༌ ར༌བེ༌ཀ༌ ཕིའ༌ ཡ༌ཝའ༌ མོས༌ལམ༌ ཞུས༌ ཅིའ༌ཟེར༌ན༌ ཁོའ༌ ཕྲུ༌གུ༌ མེད༌པིན༌། ཡ༌ཝའེ༌ ཁོའེ༌ མོས༌ལམ༌མ༌ ལན༌སལ༌ཏེ༌ ར༌བེ༌ཀ༌ སྐྱེ༌ཅེས༌མ༌ཞིག༌ གྱུར༌། 22 ཁོའེ༌ ཁོག༌པའེ༌ ནང༌ང༌ ཙག༌ཕྲུག༌གུན༌ ནོལ༌ པ༌སང༌ ཁོའེ༌ ཟེརས༌, "འི༌ཟུག༌ ང༌ ཉམ༌པོ༌ ཅིའ༌ སོང༌ཏེ༌ ཨིན༌ནོག༌?" ཏེ༌བོའེ༌ཕིའ༌ ཁོའེ༌ ཡ༌ཝའ༌ ཏྲིས༌, 23 ཡ༌ཝའེ༌ ཁོའ༌ མོལས༌, "གྱལ༌ཁམས༌ ཉིས༌ ཁྱོ༌རང༌ངི༌ ནང༌ང༌ ཡོད༌, ཁྱོ༌རང༌ང༌ སྐྱེ༌ཁན༌ ཉིས༌ཀོ༌ མ༌ནེ༌ མི༌ཐུན༌། ཅིག༌པོ༌ ཞན༌བོའེ༌ སང༌ མང༌ང༌ ཤེད༌ཅན༌ ཡོང༌ཨིན༌, ཆེའ༌བོའེ༌ ཆུ༌ངུན༌བོའ༌ ཞབ༌སྟོག༌ ཞུ༌ཨིན༌། 24 ཕྲུ༌གུ༌གུན༌ སྐྱེ༌ཅེས༌སི༌ ཏུས༌པོ༌ ལེབ༌བ༌ཅིག༌ ཁོའ༌ བུ༌ཚ༌ ཙག༌ཕྲུག༌ སྐྱེས༌། 25 གོ༌མ༌ སྐྱེ༌ཁན༌བོ༌ མར༌པོ༌ཞིག༌ ཡང༌ ཁོའེ༌ ཟུགས༌པོ༌ སྤུ༌ཅན༌ནི༌ ཀོས༌ལག༌ ཙོགས༌ ཡོད༌པིན༌, ཏེན༌ན༌བོའེ༌ཕིའ༌ ཁོའེ༌ མིང༌ང༌ ཨི༌སུ༌ ཏགས༌། 26 ཏེ༌སྟིང༌ནེ༌ ཁོའེ༌ ནོ༌ སྐྱེ༌ཁན༌བོའེ༌ ཨི༌སུའི༌ རྐང༌པའེ༌ སྟིང༌པའ༌ ཐམས༌ཏེ༌ ཡོད༌ པ༌སང༌ ཁོའེ༌ མིང༌ང༌ ཡ༌ཀོབ༌ ཏགས༌། ར༌བེ༌ཀའ༌ ཁོང༌གུན༌ སྐྱེ༌ ཟ༌ནེ༌ ཨི༌སཱག༌ག༌ ལོ༌ དྲུག༌ཅུ༌ ཆའད༌པིན༌།

27 བུ༌ཚ༌གུན༌ ལྡན༌ ཡང༌ ཨི༌སུ༌ ལིངས༌པ༌ ཁས༌པ༌ཞིག༌ གྱུར༌ ཡང༌ ཁོ༌ ཕི༌ལོག༌ག༌ ཆའ༌ ཐད༌ཁན༌ ཨིན༌ནའང༌ ཡ༌ཀོབ༌ ཉམ༌ཤུང༌ ནང༌ང༌ དུག༌ག༌ ཐད༌ཁན༌ ཡོད༌པིན༌། 28 ཨི༌སཱག༌གི༌ ཨི༌སུའ༌ མང༌ང༌ ཡ༌ཤ༌ ཅོའད༌པིན༌ ཅིའ༌ཟེར༌ན༌ ཁོ༌ ཨི༌སུའི༌ སད༌ཁན༌ནི༌ སེམས༌ཅན༌གུན༌ནི༌ ཤ༌ ཟའ༌ཅེས༌ལ༌ ཐད༌དད༌པིན༌ ཨིན༌ནའང༌ ར༌བེ༌ཀའེ༌ ཡ༌ཀོབ༌བ༌ ཡ༌ཤ༌ མང༌ང༌ ཅོའད༌པིན༌།

29 ཞག༌ཅིག༌ ཡ༌ཀོབ༌བི༌ ཐུག༌པ༌ སྐོལ༌ཨིན༌ ཡོད༌ ཟ༌ནེ༌ ཨི༌སུ༌ ལིངས༌ནེ༌ ལོགས༌ཏེ༌ ཡོངས༌ ཡང༌ ཁོ༌ མ༌སྲན༌ཏེ༌ སྟོགས༌ཏེ༌ ཡོད༌པིན༌།

30 ཁོའེ༌ ཡ༌ཀོབ༌བ༌ ཟེརས༌, "ང༌ མ༌སྲན༌ཏེ༌ སྟོགས༌ས༌རག༌ ངའ༌ ཐུག༌པ༌ མར༌པོ༌ ཐུང༌ང༌ལ༌ ཏོང༌ངའང༌།" ༼ཏེ༌བོའེ༌ཕིའ༌ ཁོའེ༌ མིང༌ང༌ ཨི༌དོམ༌ ཐོགས༌ ཀ༌བོའེ༌ དོན༌ མར༌པོ༌ ཨིན༌ནོག༌།༽

31 ཡ༌ཀོབ༌བི༌ ལན༌ཏངས༌, "ཁྱོ༌རང༌ གོ༌མ༌ སྐྱེ༌ཁན༌ནི༌ ཐོབ༌ཏང༌བོ༌ ངའ༌ ཏང༌ན༌ ངའེ༌ འི༌བོ༌ ཁྱོ༌རང༌ང༌ ཏང༌ཨིན༌།" 32 ཨི༌སུའི༌ ཟེརས༌, "ང༌ སྟོགས༌ཏེ༌ ཤི༌ཅེས༌རག༌, གོ༌སྐྱེས༌སི༌ ཐོབ༌ཏང༌ངི༌ ངའ༌ ཅི༌ ཕན༌ཐོགས༌ ཨིན༌?"

33 ཡ༌ཀོབ༌བི༌ ཟེརས༌, "གོ༌མ༌ ནའ༌ ཁུར༌།" ཏེ༌ནེ༌ ཨི༌སུའི༌ ནའ༌ ཁུར༌ཏེ༌ ཁོ༌རང༌ངི༌ གོ༌སྐྱེས༌སི༌ ཐོབ༌ཏང༌བོ༌ ཡ༌ཀོབ༌བ༌ ཙོངས༌། 34 ཏེ༌ནེ༌ ཡ༌ཀོབ༌བི༌ ཁོའ༌ ཏ༌གི༌ ཁ༌ཅིག༌ དང༌ སྲན༌མའེ༌ ཐུག༌པ༌ ཏངས༌པ༌ ཁོའེ༌ ཟོས༌ ཡང༌ ཐུངས༌། ཏེ༌ནེ༌ ལངས༌ཏེ༌ ཕི༌ལོག༌ག༌ སོང༌། ཏེན༌ན༌ཟུག༌གི༌ ཨི༌སུའི༌ ཁོ༌རང༌ངི༌ གོ༌སྐྱེས༌སི༌ ཐོབ༌ཏང༌བོའ༌ རིན༌མེད༌ ཐེས༌།