1 ཡ༌ཀོབ༌བ༌ ལ༌བན༌ནི༌ བུ༌ཚ༌གུན༌ནི༌, "ཡ༌ཀོབ༌བི༌ ང༌དང༌ངི༌ ཨ༌བའེ༌ ཨིན༌ཁན༌ ཚང༌མ༌ ཁྱེར༌ཏེ༌ ཨིན༌ནོག༌, ཡང༌ ང༌དང༌ངི༌ ཨ༌བའེ༌ ཞས༌ཏེ༌ ཁོའ༌ གྱུ༌ནོར༌ མང༌པོ༌ ཇོར༌ཏེ༌ ཨིན༌ནོག༌" ཟེར༌ཨིན༌ ཚོར༌། 2 ཡང༌ ལ༌བན༌ནི༌ ལྟ༌ཝ༌ ཁོའེ༌ ཆོགས༌ལ༌ སྔུན༌མ༌ ཙོགས༌ མེད༌ཁན༌བོ༌ ཡ༌ཀོབ༌བ༌ ཧ༌གོ༌།

3 ཏེ༌ནེ༌ ཡ༌ཝའེ༌ ཡ༌ཀོབ༌བ༌ མོལས༌, "ཁྱོ༌རང༌ ཁྱོ༌རང༌ངི༌ ཕ༌མེས༌པོ༌ དང༌ ཉེན༌གྲུང༌ གུན༌ ཡོད༌སའེ༌ ས༌ཆ༌ ལོགས༌ཏེ༌ སོང༌ ཡང༌ ང༌ ཁྱོ༌རང༌ ཉམ༌པོ༌ ཡོད༌།"

4 ཏེན༌ན༌བོའེ༌ཕིའ༌ ཡ༌ཀོབ༌བི༌ རེ༌ཅལ༌ དང༌ ལི༌ཨ༌, ཁོའེ༌ སེམས༌ཅན༌ནི༌ ཁྱུ༌ ཡོད༌སའེ༌ ཞིང༌ངི༌ཀ༌ ཡོང༌ཅེས༌ལ༌ ལོན༌ ཀལས༌། 5 ཁོའེ༌ ཁོང༌གུན༌ལ༌ ཟེརས༌, "ཁྱོ༌ཞའེ༌ ཨ༌བའེ༌ ལྟ༌ཝ༌ ངའེ༌ ཕིའ༌ གྱུར༌ཏེ༌ ཡོད༌ཁན༌བོ༌ ངའ༌ ཐོང༌དུག༌, ཨིན༌ནའང༌ ངའེ༌ ཨ༌བའེ༌ དཀོན༌མཆོག༌ ང༌ ཉམ༌པོ༌ ཞུགས༌ཏེ༌ ཡོད༌། 6 ཁྱོ༌ཞའེ༌ ཨ༌བའེ༌ ཕིའ༌ ངའེ༌ རྩོན༌གྲུས༌ ཉམ༌པོ༌ ལས༌ ཅོས༌ཁན༌བོ༌ ཁྱོ༌ཞའ༌ གྱུས༌ཨིན༌ནོག༌། 7 ཁོའེ༌ ངའེ༌ ལ༌ཆའེ༌ ནང༌ང༌ ལན༌ རྕུ༌ གྱུར༌ཇ༌ ཁྱོངས༌ཏེ༌ ངའ༌ གོབ༌སྐོར༌ ཏངས༌། ཨིན༌ནའང༌ དཀོན༌མཆོག༌གི༌ ཁོའ༌, ངའ༌ ནོད༌སྐྱལ༌ ཅུག༌ག༌ མ༌ཛད༌། 8 ལ༌བན༌ནི༌ ར༌ལུག༌ ཁྲ༌འོ༌ ཚང༌མ༌ ཁྱོ༌རང༌ངི༌ ལ༌ཆ༌ ཨིན༌ ཟེར༌ར༌ཅིག༌, ཏེ༌གུན༌ལ༌ ལུ༌གུ༌ དང༌ རི༌གུ༌ གུན༌ ཁྲ༌འོ༌ སྐྱེས༌, ཡང༌ ཁོའེ༌ ནག༌ཐིག༌ཅན༌ ཚང༌མ༌ ཁྱོ༌རང༌ངི༌ ལ༌ཆ༌ ཨིན༌ ཟེར༌ར༌ཅིག༌, ཏེ༌གུན༌ལ༌ ལུ༌གུ༌ དང༌ རི༌གུ༌ གུན༌ ནག༌ཐིག༌ཅན༌ སྐྱེས༌། 9 དཀོན༌མཆོག༌གི༌ ཁྱོ༌ཞའེ༌ ཨ༌བའེ༌ ཀ༌ནེ༌ སེམས༌ཅན༌ གུན༌ ཁྱེར༌ར༌ ཛད༌ཏེ༌ ངའ༌ སལ༌ཏེ༌ ཨིན༌ནོག༌། 10 ཁྱུའི༌ གྱུད༌སྤེལ༌ལི༌ ཏུས༌ ངའ༌ ཉི༌ལམ༌ཞིག༌ ཐོང༌ ཡང༌ ཏེ༌ནང༌ང༌ ར༌མ༌ ཉམ༌པོ༌ གྱུད༌སྤེལ༌ ཅོ༌ཁན༌ནི༌ ར༌བོ༌ གུན༌ ཁྲ༌འོ༌ དང༌ ནག༌ཐིག༌ཅན༌ དུག༌པིན༌། 11 ཏེ༌ ཉི༌ལམ༌མི༌ ནང༌ང༌ དཀོན༌མཆོག༌གི༌ ཕོ༌ཉའེ༌ ངའ༌ མོལས༌, 'ཡ༌ཀོབ༌' ངའེ༌ ཟེར༌པིན༌, 'ངའ༌ འི༌ཀ༌ནེ༌ ཡོད༌ལེ༌།' 12 ཁོང༌ངི༌ མོལས༌, 'ལྟོས༌, ཁྱོ༌རང༌ངི༌ ར༌མ༌གུན༌ ཉམ༌པོ༌ གྱུད༌སྤེལ༌ ཅོ༌ཁན༌ནི༌ ར༌བོ༌ ཚང༌མ༌, ཁྲ༌འོ༌ དང༌ ནག༌ཐིག༌ཅན༌ དུག༌, ཅིའ༌ཟེར༌ན༌ ལ༌བན༌ནི༌ ཁྱོ༌རང༌ང༌ ཅོ༌ཁན༌ ཚང༌མ༌ ངའེ༌ ཐོང༌། 13 ང༌ ཁྱོ༌རང༌ང༌ བེ༌ཐེལ༌ལི༌ ནང༌ང༌ ཐོང༌ཁན༌ནི༌ ཏེན༌ན༌ དཀོན༌མཆོག༌པོ༌ ཨིན༌, ཀ༌རུ༌ ཁྱོ༌རང༌ངི༌ རྡོའ༌ ལངས༌ཏེ༌ ཏེ༌ཀ༌ ཨོ༌ལིཝ༌ཝི༌ མར༌ནག༌ ལུགས༌ཏེ༌ ནའ༌ ཁུར༌ཏེ༌ ཨིན༌པིན༌། ཏ༌ དག༌ས༌རང༌ འི༌ ས༌ཆའ༌ ཕངས༌ཏེ༌ ཁྱོ༌རང༌ སྐྱེས༌སའེ༌ ནས༌ས༌ ལོགས༌ཏེ༌ སོང༌།' "

14 རེ༌ཅལ༌ དང༌ ལི༌ཨའེ༌ ཡ༌ཀོབ༌བ༌ ལན༌ཏངས༌, "ཨ༌བའེ༌ ཀ༌ནེ༌ ང༌ཞའ༌ ཅའང༌ ནོར༌སྐལ༌ ཐོབ༌ཅེས༌ མེད༌། 15 ཁོང༌ངི༌ ང༌ཞ༌གུན༌ལ༌ ཞན༌མ༌ ཙོགས༌ལ༌ མ༌ཐེས༌ས༌? ཁོང༌ངི༌ ང༌ཞའ༌ ཙོངས༌ ཡང༌ ང༌ཞའེ༌ ཕིའ༌ ཏང༌ཁན༌ནི༌ པེ༌ནེ༌ ཚང༌མ༌ སྐྱགས༌། 16 དཀོན༌མཆོག༌གི༌ ང༌ཞའེ༌ ཨ༌བའེ༌ ཀ༌ནེ༌ ཁྱེར༌ར༌ ཛད༌ཁན༌ནི༌ གྱུ༌ནོར༌ ཚང༌མ༌ ང༌ཞའ༌ དང༌ ང༌ཞའེ༌ ཕྲུ༌གུ༌གུན༌ནི༌ ཨིན༌ནོག༌། དཀོན༌མཆོག༌གི༌ ཉེ༌རང༌ང༌ ཅོས༌ མོལ༌ཁན༌བོ༌ ཅོས༌ལེ༌།"

17 ཏེ༌ནེ༌ ཡ༌ཀོབ༌བི༌ ཁོ༌རང༌ངི༌ ཕྲུ༌གུ༌གུན༌ དང༌ ན༌མ༌གུན༌ རྔ༌བོང༌གུན༌ནི༌ཀ༌ སྐྱོནས༌, 18 ཡང༌ ཁྱུ༌ ཚང༌མ༌ ཁོ༌རང༌ངི༌ སང༌ སྔུན༌ལ༌ སྲུལ༌ཨིན༌ ཁྱེརས༌, ཏེ༌གུན༌ མ༌ཚད༌ ཁོའ༌ པ༌དན༌ ཨ༌རམ༌མི༌ ནང༌ང༌ ཇོར༌ཁན༌ ཞན༌ ནོར༌ ཚང༌མའང༌ ཁུར༌ཏེ༌ ཁོ༌རང༌ངི༌ ཨ༌བ༌ ཨི༌སཱག༌ ཡོད༌སའེ༌ ནས༌ས༌ ཀེ༌ནན༌ལ༌ སོང༌།

19 ཡ༌ཀོབ༌ ཉམ༌པོ༌ ཆའེ༌སང༌ སྔུན༌ལ༌, ལ༌བན༌ ཁོ༌རང༌ངི༌ ལུག༌གུན༌ནི༌ བལ༌ བྲག༌ག༌ ཆའ༌ཅིག༌ རེ༌ཅལ༌ལི༌ ཨ༌བའེ༌ ཁང༌པའེ༌ ནང༌ང༌ ཡོད༌ཁན༌ནི༌ སྐུན༌དྲ༌གུན༌ རྐུས༌། 20 ཡ༌ཀོབ༌བི༌ ཨར༌མི༌ཡན༌པ༌ ལ༌བན༌ལ༌ ཁོ༌ ཆའད༌ ཟེར༌ཏེ༌ མ༌ཤད༌ད༌ ཁོའ༌ གོབ༌སྐོར༌ ཏངས༌། 21 ཁོའེ༌ ཁོ༌རང༌ང༌ ཡོད༌ཁན༌ ཚང༌མ༌ ཁུར༌ཏེ༌ གྱོགས༌པ༌ ཡུཕ༌རེ༌ཀྲས༌ ལྩངས༌པོ༌ རྒལ༌ཏེ༌ རི༌ ཡུལ༌ གི༌ལེད༌ ཆོགས༌ལ༌ སོང༌།

22 ཞག༌པོ༌ སུམ༌མི༌ སྟིང༌ནེ༌ ལ༌བན༌ལ༌ ཡ༌ཀོབ༌ ཤོར༌ཏོག༌ ཟེར༌ཏེ༌ ཚོར༌། 23 ཁོའེ༌ ཁོ༌རང༌ངི༌ ཉེན༌གྲུང༌གུན༌ ཁྲིད༌ཏེ༌ གི༌ལེད༌དི༌ རི༌ ཡུལ༌ལ༌ ཡ༌ཀོབ༌ ཐུག༌ཐུག༌ ཚོག༌པ༌ ཞག༌པོ༌ རྡུན༌ ཁོའེ༌ གྱབ༌ནེ༌ སོང༌། 24 ཨིན༌ནའང༌ ཚན༌ལ༌ ཨར༌མི༌ཡན༌པ༌ ལ༌བན༌ལ༌ ཉི༌ལམ༌མི༌ ནང༌ང༌ དཀོན༌མཆོག༌གི༌ སྤང༌ པུད༌ད༌ ཛད༌ཏེ༌ མོལས༌, "སྤེ༌ར༌ ངན༌པ༌ ཟེར༌ཏེ༌ ཡ༌ཀོབ༌བ༌ ཇིགས༌ནང༌ མ༌ལྟན༌།"

25 གི༌ལེད༌དི༌ རི༌ ཡུལ༌ལ༌ ཡ༌ཀོབ༌བི༌ ཀུར༌གུན༌ ཙུགས༌ཏེ༌ ཡོད༌སའ༌ ལ༌བན༌ དང༌ ཁོའེ༌ ཉེན༌གྲུང༌གུན༌ ལེབ༌བ༌ཅིག༌ ཁོང༌གུན༌ནིའང༌ ཀུར༌ ཙུགས༌། 26 ལ༌བན༌ནི༌ ཡ༌ཀོབ༌བ༌ ཟེརས༌, "ངའ༌ གོབ༌སྐོར༌ ཏངས༌ཏེ༌ ཁྱོ༌རང༌ངི༌ ཅི༌ ཅོས༌ཏེ༌ ཨིན༌? ཁྱོ༌རང༌ངི༌ ངའེ༌ བུ༌མོ༌གུན༌ མག༌གི༌ ནང༌ང༌ ཟུམ༌ཁན༌ནི༌ ཙོན༌པ༌གུན༌ ཙོགས༌ལ༌ ཟུམས༌ཏེ༌ ཁྱེརས༌། 27 ཁྱོ༌རང༌ངི༌ ངའ༌ གོབ༌སྐོར༌ཏེ༌ ངའ༌ མ༌ཤད༌ད༌ ཅི༌ཕིའ༌ ཤོར༌པིན༌? ངའེ༌ ཁྱོ༌རང༌ ཐད༌པོ༌ ཉམ༌པོ༌ ཀྲམ༌བུ༌རིན༌ དང༌ ཧརྦ༌ ཕུས༌ཏེ༌ ལུ༌ ཏང༌ཨིན༌ ལམ༌ཅུགས༌ཏེ༌ ཡོད༌གྲོ༌། 28 ཁྱོ༌རང༌ངི༌ ངའེ༌ ཚ༌འོ༌གུན༌ལ༌ པུག༌ ཡང༌ ངའེ༌ བུ༌མོ༌གུན༌ལ༌ ཇུ༌ ཟེར༌ མ༌ཅུག༌ག༌ སམ༌བ༌ མེད༌ཁན༌ནི༌ ལས༌ ཅོས༌ཏེ༌ ཨིན༌ནོག༌། 29 ངའ༌ ཁྱོ༌རང༌ང༌ ནོད༌ སྐྱལ༌ཅེས༌སི༌ ཁྱུད༌ ཡོད༌ ཨིན༌ནའང༌ དའང༌ ཚན༌ལ༌ ཁྱོ༌རང༌ངི༌ ཨ༌བའེ༌ དཀོན༌མཆོག༌གི༌ ངའ༌ མོལ༌ལ༌རག༌, 'སྤེ༌ར༌ ངན༌པ༌ ཟེར༌ཏེ༌ ཡ༌ཀོབ༌བ༌ ཇིགས༌ནང༌ མ༌ལྟན༌།' 30 ང༌ ཧ༌གོ༌, ཁྱོ༌རང༌ང༌ ཁྱོ༌རང༌ངི༌ ཨ༌བ༌ ཡོད༌ས༌ ལོགས༌ཏེ༌ ཆ༌ཅེས༌སི༌ དོད༌པ༌ སྲན༌ཏྲེ༌ ཡོད༌པ༌ ཁྱོ༌རང༌ ཤོར༌ ཨིན༌ནའང༌ ཁྱོ༌རང༌ངི༌ ངའེ༌ སྐུན༌དྲ༌གུན༌ ཅིའ༌ རྐུས༌ཏེ༌ ཁྱེར༌པིན༌?"

31 ཡ༌ཀོབ༌བི༌ ལན༌ཏངས༌, "ཉེ༌རང༌ངི༌ རང༌ངི༌ བུ༌མོ༌གུན༌ ངའེ༌ ཀ༌ནེ༌ ཝང༌ ཉམ༌པོ༌ ཀོགས༌ཏེ༌ ཁྱེར༌ར༌ནོག༌ སམ༌ཏེ༌ ང༌ ཇིགས༌། 32 ཨིན༌ནའང༌ གལ༌ཏེས༌ ཉེ༌རང༌ང༌ སུ༌ཞིག༌གི༌ ལག༌ག༌ ཉེ༌རང༌ངི༌ སྐུན༌དྲ༌གུན༌ ཐོབ༌ན༌, ཁོ༌ སོད༌། ང༌དང༌ངི༌ ཉེན༌གྲུང༌གུན༌ནི༌ དུན༌ལ༌, ང༌ཞའེ༌ ལག༌ག༌ ཉེ༌རང༌ངི༌ ཅི༌ཞིག༌ ཡོད༌ནའང༌ ཙལ༌ཏེ༌ ཁྱེར༌ར༌ཛད༌།" ཡ༌ཀོབ༌བ༌ རེ༌ཅལ༌ལི༌ སྐུན༌དྲ༌གུན༌ སྐུ༌ཁན༌བོ༌ གྱུས༌ མེད༌པིན༌།

33 ལ༌བན༌ ཡ༌ཀོབ༌, ལི༌ཨ༌ དང༌ ཡོག༌མོ༌ ན༌མ༌ ཉིས༌ཀོའེ༌ ཀུར༌ གུན༌ནི༌ ནང༌ང༌ ཙལ༌ལ༌ སོང༌ ཨིན༌ནའང༌ ཁོའ༌ ཅའང༌ མ༌ཐོབ༌། ཏེ༌ནེ༌ ཁོ༌ རེ༌ཅལ༌ལི༌ ཀུར༌རི༌ ནང༌ང༌ སོང༌། 34 རེ༌ཅལ༌ལི༌ སྐུན༌དྲ༌གུན༌ རྐུས༌ཏེ༌ ཁོ༌རང༌ངི༌ རྔ༌བོང༌ངི༌ གྱབ༌ཆའེ༌ ནང༌ང༌ སྦས༌ཏེ༌ ཁོ༌ གྱབ༌ཆའེ༌ཀ༌ དུགས༌ཏེ༌ ཡོད༌པིན༌། ལ༌བན༌ནི༌ ཀུར༌རི༌ ནང༌ང༌ ཙལས༌ ཨིན༌ནའང༌ ཁོའེ༌ ཅའང༌ མ༌ཐོབ༌།

35 རེ༌ཅལ༌ལི༌ ཁོ༌རང༌ངི༌ ཨ༌བ༌ ཟེརས༌, "ཐུགས༌སྲོ༌ མ༌སྐྱོད༌ སྤོན༌བོ༌ལེ༌, ང༌ ཉེ༌རང༌ངི༌ དུན༌ལ༌ ལང༌ཉན༌ཅེས༌ མེད༌ ཅིའ༌ཟེར༌ན༌ ང༌ ཟུགས༌པོ༌ ཞིག༌ཅེས༌སི༌ ཏུས༌པོའེ༌ ནང༌ང༌ ཨིན༌།" ཏེ༌ནེ༌ ལ༌བན༌ནི༌ ཀ༌རུང༌ས༌ ཙལས༌ ཨིན༌ནའང༌ ཁོའེ༌ སྐུན༌དྲ༌གུན༌ མ༌ཐོབ༌།

36 ཏེ༌ནེ༌ ཡ༌ཀོབ༌བ༌ སྲོ༌ ཡོངས༌ ཡང༌ ལ༌བན༌ལ༌ ཁའ༌ སྐྱེས༌ཏེ༌ ཟེརས༌, "ངའེ༌ ཅི༌ ཁྲིམས༌གལ༌ ཅོས༌? ཁྱོ༌རང༌ངི༌ ང༌ འི༌ ཚག༌པ༌ ཏེད༌ཏེ༌ ཁྱོང༌ཅེས༌ ངའེ༌ ཅི༌ སྡིག༌པ༌ ཅོས༌ཏོག༌?" 37 ཏ༌ ཁྱོ༌རང༌ངི༌ ངའེ༌ ཅ༌ལག༌ ཚང༌མ༌ ལོངས༌ཏེ༌ ཁྱོ༌རང༌ང༌ ཁྱོ༌རང༌ངི༌ ཨིན༌ཁན༌ ཅ༌ལག༌ ཅི༌ ཐོབ༌? ང༌དང༌ངི༌ ཉེན༌གྲུང༌གུན༌ནི༌ དུན༌ལ༌ ཁྱོང༌ ཡང༌ ང༌དང༌ ཉིས༌ཀོའེ༌ ནང༌ནེ༌ སུ༌ དྲང༌པོ༌ ཨིན༌ཁན༌བོ༌ ཁོང༌གུན༌ལ༌ ཐག༌ཅད༌ཅུག༌།"

38 "ང༌ ཁྱོ༌རང༌ ཉམ༌པོ༌ ལོ༌ ཉི༌ཤུ༌ དུགས༌པིན༌། ཏེ༌ཏུས༌ ཁྱོ༌རང༌ངི༌ ལུག༌ དང༌ ར༌མ༌གུན༌ནི༌ ལུ༌གུ༌ དང༌ རི༌གུ༌གུན༌ མ༌ནེ༌ མ༌སྐྱུརས༌ མ༌ཚད༌ ངའེ༌ ཁྱོ༌རང༌ངི༌ ཁྱུའི༌ ནང༌ནེ༌ ར༌བོ༌ གུན༌ནི༌ ཤ༌ མ༌ཟོས༌པིན༌། 39 རི༌ སེམས༌ཅན༌ནི༌ སད༌ཁན༌ནི༌ ར༌ལུག༌གུན༌ ཁྱོ༌རང༌ངི༌ཀ༌ མ༌ཁྱོང༌ང༌ ཏེ༌གུན༌ནི༌ ཀོད༌ཀ༌ ང༌རང༌ངི༌ ཁུར༌པིན༌། ཉི༌མ༌ ཡ༌ ཚན༌ལ༌ རྐུས༌ཏེ༌ ཁྱེར༌ཁན༌གུན༌ལ༌ ངའ༌ རིན༌ ཤལ༌ཅུགས༌། 40 ཏུས༌ མང༌པོ༌ ཉི༌མའེ༌ ཚད༌ དང༌ ཚན༌ ཀྲང༌མོའི༌ བར༌དོ༌ ངའ༌ ཐོང༌, ཡང༌ ཚན༌ མང༌པོ༌ ཉིད༌ མེད༌པ༌ ལུས༌། 41 བུད༌ཁན༌ནི༌ ལོ༌ ཉི༌ཤུ༌ ཁྱོ༌རང༌ ཉམ༌པོ༌ ང༌ དུག༌ ཟ༌ནེ༌ ཏེན༌ན༌ ཙོགས༌ སོང༌། ངའེ༌ ཉེ༌རང༌ངི༌ བུ༌མོ༌གུན༌ནི༌ ཕིའ༌ ལོ༌ ཅུབ༌ཞི༌ ལས༌ ཅོ༌པིན༌ ཡང༌ ཁྱོ༌རང༌ངི༌ ཁྱུ༌གུན༌ནི༌ ཕིའ༌ ལོ༌ དྲུག༌, ཏེ༌བོ༌ མ༌ཚད༌ ཁྱོ༌རང༌ངི༌ ངའེ༌ ལ༌ཆའེ༌ ནང༌ང༌ ལན༌ རྕུ༌ གྱུར༌ཇ༌ ཁྱོངས༌། 42 གལ༌ཏེས༌ ངའེ༌ ཨ༌བ༌ དང༌ ཨབ༌ར༌ཧམ༌མི༌ དཀོན༌མཆོག༌ ཀ༌བོའ༌ ཨི༌སཱག༌ ཇིགས༌སད༌, ང༌ ཉམ༌པོ༌ ཞུགས༌ཏེ༌ མེད༌པིན༌ན༌ ཁྱོ༌རང༌ངི༌ ང༌ ལག༌པ༌ སྟོང༌པ༌ ལམ༌ཅུག༌ཏེ༌ ཡོད༌གྲོ༌། ཨིན༌ནའང༌ དཀོན༌མཆོག༌གི༌ ངའེ༌ རྡུག༌ངལ༌ དང༌ རྩོན༌གྲུས༌ གུན༌ ཛིགས༌ཏེ༌ དའང༌ ཚན༌ལ༌ ཁོང༌ངི༌ ཁྱོ༌རང༌ང༌ ཁའ༌སྐྱེའ༌ ཛདས༌།

43 ལ༌བན༌ནི༌ ཡ༌ཀོབ༌བ༌ ལན༌ཏངས༌, "འི༌ ན༌ཆུང༌གུན༌ ངའེ༌ བུ༌མོ༌, འི༌ ཕྲུ༌གུ༌གུན༌ ངའེ༌ ཚ༌འོ༌ དང༌ ཚ༌མོ༌ ཡང༌ འི༌ ཁྱུ༌གུན༌ ངའེ༌ ཁྱུ༌ ཨིན༌། འི༌ཀ༌ ཁྱོ༌རང༌ངི༌ ཐོང༌ཁན༌ ཚང༌མ༌ ངའེ༌ ཨིན༌ནོག༌། ཏ༌ ངའ༌ ང༌རང༌ངི༌ བུ༌མོ༌གུན༌ དང༌ ཁོང༌གུན༌ནི༌ ཕྲུ༌གུ༌གུན༌ལ༌ ཅའང༌ ཅོ༌ མི༌ཉན༌། 44 ཡོང༌ངའང༌ ང༌དང༌ ཉིས༌ཀོའེ༌ པར༌ལ༌ ཆད༌དོན༌ ཞིག༌ ཅོ༌ཨིན༌ ཀ༌བོ༌ ང༌དང༌གུན༌ནི༌ པར༌ལ༌ སྤང༌པོ༌བོ༌ ཨིན༌ནོག༌།

45 ཏེ༌ནེ༌ ཡ༌ཀོབ༌བི༌ རྡོའ༌ཞིག༌ ཁུར༌ཏེ༌ ཏེ༌བོ༌ ཀ༌ཝ༌ ཙོགས༌ལ༌ ལངས༌། 46 ཁོའེ༌ ཁོ༌རང༌ངི༌ ཉེན༌གྲུང༌གུན༌ལ༌ ཟེརས༌, "རྡོའ༌ སྤུང༌ཤིག༌།" ཁོང༌གུན༌ནི༌ རྡོའ༌ སྤུངས༌ ཡང༌ ཏེ༌བོའེ༌ དུན༌ལ༌ ཁར༌ཇི༌ ཟོས༌། 47 ལ༌བན༌ནི༌ ཏེ༌ ནས༌ས༌བོའ༌ ཡི༌གར༌ ཤ༌ཧ༌དུ༌ཐ༌ *31:47 ཨ༌རམ༌པའེ༌ སྐད༌དི༌ ནང༌ང༌ ཡི༌གར༌ ཤ༌ཧ༌དུ༌ཐའེ༌ ཏོན༌ "སྤོངས༌ཁན༌ནི༌ སྤང༌པོ༌" ཨིན༌ནོག༌། མིང༌ང༌ ཏགས༌ ཨིན༌ནའང༌ ཡ༌ཀོབ༌བི༌ ཏེ༌ ས༌ཀྱད༌པོའེ༌ མིང༌ང༌ གེ༌ལིད༌ †31:47 ཨིབ༌རི༌པའེ༌ སྐད༌དི༌ ནང༌ང༌ གེ༌ལིད༌དི༌ ཏོན༌ "སྤོངས༌ཁན༌ནི༌ སྤང༌པོ༌" ཨིན༌ནོག༌། ཏགས༌།

48 ལ༌བན༌ནི༌ ཟེརས༌ "དི༌རིང༌ ང༌དང༌ ཉིས༌ཀོའེ༌ པར༌ལ༌ འི༌ རྡོའ༌ སྤུང༌ཁན༌བོ༌ སྤང༌པོ༌ ཨིན༌ནོག༌།" ཏེན༌ན༌བོའེ༌ ཕིའ༌ ཏེ༌ ས༌ཆ༌བོའ༌ གེ༌ལིད༌ ཟེར༌ར༌ནོག༌། 49 ཁོང༌གུན༌ནི༌ ཏེ༌ ནས༌སའེ༌ མིང༌ང༌ མིཟ༌ཕའང༌ ཏགས༌, ཅིའ༌ཟེར༌ན༌ ལ༌བན༌ནི༌ ཟེརས༌, "ང༌དང༌གུན༌ བེ༌ཏེ༌ ཆའ༌ཅིག༌ ཡ༌ཝའེ༌ ང༌དང༌གུན༌ལ༌ ཟིགས༌ཤིག༌། 50 གལ༌ཏེས༌ ཁྱོ༌རང༌ངི༌ ངའེ༌ བུ༌མོ༌གུན༌ལ༌ ནགས༌ ལྟན༌ན༌ ཡ༌ ཁྱོ༌རང༌ངི༌ ཞན༌ བུ༌མོ༌ ཉམ༌པོ༌ ན༌མ༌ ཅོ༌ན༌, ངའ༌ ཁྱོ༌རང༌ ཉམ༌པོ༌ མེད༌ནའང༌ ཨིད༌ཏུ༌ བོར༌ དཀོན༌མཆོག༌གི༌ ང༌དང༌ངི༌ ལས༌ ཅོ༌ཁན༌གུན༌ལ༌ ཟིགས༌ས༌ནོག༌།"

51 ལ༌བན༌ནི༌ ཡ༌ཀོབ༌བ༌ ཟེརས༌, "འི༌ཀ༌ རྡོའ༌ སྤུངས༌ཏེ༌ ང༌དང༌ ཉིས༌ཀོའེ༌ པར༌ལ༌ ཀ༌ཝ༌ ཙོགས༌ལ༌ ལངས༌ཏེ༌ ཨིན༌། 52 སྤུང༌གོལ༌ ཅོ༌ཅེས༌ལ༌ ངའ༌ འི༌ རྡོའ༌ སྤུང༌ཁན༌བོ༌ རྒལ༌ཏེ༌ ཁྱོ༌རང༌ ཆོགས༌ལ༌ མི༌ཡོང༌ ཡང༌ ཁྱོ༌རང༌ འི༌བོ༌ རྒལ༌ཏེ༌ ང༌ ཆོགས༌ལ༌ མི༌ཡོང༌ཅེས༌ལ༌, འི༌ རྡོའ༌ སྤུང༌ཁན༌བོ༌ ང༌དང༌ ཉིས༌ཀོའེ༌ པར༌ལ༌ སྤང༌པོ༌ ཨིན༌ནོག༌། 53 ཨབ༌ར༌ཧམ༌ དང༌ ན༌ཧོར༌རི༌ དཀོན༌མཆོག༌, ཡང༌ ཁོང༌གུན༌ནི༌ ཨ༌བའེ༌ དཀོན༌མཆོག༌གི༌ ང༌དང༌ ཉིས༌ཀོའ༌ ཁྲིམས༌ཅད༌ ཛད༌ཤིག༌།"

ཏེ༌ནེ༌ ཡ༌ཀོབ༌བི༌ ཁོའེ༌ ཨ༌བ༌ ཨི༌སཱག༌གི༌ ཇིགས༌སི༌ ནང༌ང༌ རྩི༌ཝ༌ ཅོ༌ཁན༌ དཀོན༌མཆོག༌གི༌ ཚན༌ནི༌ ནང༌ང༌ ནའ༌ ཁུརས༌། 54 ཁོའེ༌ ཏེ༌ རི༌ཀ༌ དཀོན༌མཆོག༌ག༌ སེམས༌ཅན༌ ཆོད༌པའ༌ ཕུལ༌ཏེ༌ ཁོ༌རང༌ངི༌ ཉེན༌གྲུང༌གུན༌ གྲོན༌ལ༌ བོདས༌། ཁོང༌གུན༌ནི༌ དོན༌ཏང༌ ཟོ༌ཚར༌ཏེ༌ ཁོང༌གུན༌ནི༌ ཏེ༌ ཚན༌བོ༌ རི༌ཀ༌ ཕུདས༌། 55 ཐོ༌རེ༌ཟུག༌པོ༌ ང༌མོ༌ནེ༌ ལ༌བན༌ནི༌ ཁོ༌རང༌ངི༌ ཚ༌འོ༌, ཚ༌མོ༌ དང༌ བུ༌མོ༌ གུན༌ལ༌ པུག༌ ཏངས༌ཏེ༌ ཇུ༌ ཟེརས༌ ཡང༌ ཁོ༌རང༌ངི༌ ཁང༌པ༌ ལོགས༌ཏེ༌ སོང༌།