38
ཡ༌ཧུ༌དཱ༌ དང༌ ཏ༌མར༌།
1 ཏེན༌ན༌ ཏུས༌ཤིག༌ག༌ ཡ༌ཧུ༌དཱ༌ ཁོ༌རང༌ངི༌ ཨ༌ཅོ༌ནོ༌གུན༌ བོར༌ཏེ༌ ཨ༌དུ༌ལམ༌པ༌ ཧི༌རཧ༌ ཟེར༌ཁན༌ནི༌ མི༌བོ༌ ཉམ༌པོ༌ དུག༌ག༌ སོང༌། 2 ཏེ༌རུ༌ ཡ༌ཧུ༌དཱ༌ ཀེ༌ནན༌མ༌ ཤུའ༌ ཟེར༌ཁན༌ནི༌ བུ༌མོ༌ ཐུག༌ ཡང༌ ཁོའེ༌ ཏེ༌ བུ༌མོ༌ ཉམ༌པོ༌ བག༌སྟོན༌ ཅོས༌ཏེ༌ ལུས༌བྲེལ༌ ཅོས༌། 3 ཁོ༌ སྐྱེ༌ཅེས༌མ༌ གྱུར༌ཏེ༌ ཁོའ༌ བུ༌ཚ༌ཞིག༌ ཇོར༌ ཡང༌ ཡ༌ཧུ༌དཱའེ༌ ཁོའེ༌ མིང༌ང༌ ཨེར༌ ཏགས༌། 4 བུ༌མོ༌ ཡང༌སྐྱར༌ སྐྱེ༌ཅེས༌མ༌ གྱུར༌ ཡང༌ ཁོའ༌ བུ༌ཚ༌ཞིག༌ ཇོར༌། ཁོའེ༌ བུ༌ཚའེ༌ མིང༌ང༌ འོ༌ནན༌ ཏགས༌། 5 ཀ༌ཟིབ༌ གྲོང༌ཁྱེར༌རི༌ ནང༌ང༌ ཁོའ༌ བུ༌ཚ༌ སུམ༌པ༌ ཇོར༌ ཡང༌ ཁོའེ༌ མིང༌ང༌ ཤེ༌ལག༌ ཏགས༌།
6 ཡ༌ཧུ༌དཱའེ༌ ཁོའེ༌ གོ༌བུ༌ བུ༌ཚ༌ ཨེར༌ལ༌ ཏ༌མར༌ ཟེར༌ཁན༌ནི༌ བུ༌མོ༌ ན༌མའ༌ ཁྱོངས༌། 7 ཨིན༌ནའང༌ ཡ༌ཧུ༌དཱའེ༌ གོ༌བུ༌ བུ༌ཚ༌ ཨེར༌རི༌ སྕོད༌པ༌ ཡ༌ཝའེ༌ སྐུན༌དུན༌ལ༌ ངན༌པ༌ ཡོད༌པ༌ ཡ༌ཝའེ༌ ཁོ༌ ཤི༌ཅུག༌ག༌ ཛདས༌། 8 ཏེ༌ནེ༌ ཡ༌ཧུ༌དཱའེ༌ འོ༌ནན༌ལ༌ ཟེརས༌, "སོང༌ ཡང༌ ཁྱོ༌རང༌ངི༌ ཨ༌ཅོའེ༌ པུར༌གྱུད༌ ལུས༌ཤེས༌ལ༌ ཁོའེ༌ ན༌མ༌ ཉམ༌པོ༌ བྲེལ༌ བོར༌ཏེ༌ ཁོའེ༌ མག༌པའེ༌ ནོ༌ ཨིན༌ཁན༌ནི༌ ཁག༌པོ༌ དྲན༌དྲའ༌ ཅོས༌། 9 ཨིན༌ནའང༌ འོ༌ནན༌ལ༌ ཕྲུ༌གུ༌ ཇོར༌ཁན༌གུན༌ ཁོའེ༌ པུར༌གྱུད༌ མི༌ གྱུར༌ཅེས༌པོ༌ ཧ༌གོ༌པ༌ ཁོའེ༌ ཨ༌ཅོའེ༌ ན༌མའ༌ ཉམ༌པོ༌ ལུས༌བྲེལ༌ ཅོ༌ ཟ༌ནེ༌ ཕྲུ༌གུ༌ མི༌ཇོར༌ཅེས༌ལ༌ ཁོའེ༌ ཐིག༌ལེ༌བོ༌ སའེ༌ཀ༌ ཕོའད༌པིན༌། 10 ཨིན༌ནའང༌ ཁོའེ༌ ཅོ༌ཁན༌ནི༌ ལས༌པོ༌ ཡ༌ཝའེ༌ སྐུན༌དུན༌ལ༌ ངན༌པ༌ ཨིན༌ པ༌སང༌ ཡ༌ཝའེ༌ ཨོ༌ནན༌ནའང༌ ཤི༌ཅུག༌ག༌ ཛདས༌།
11 ཏེ༌ནེ༌ ཡ༌ཧུ༌དཱའེ༌ ཁོ༌རང༌ངི༌ བུ༌ཚའེ༌ ན༌མ༌ ཏ༌མར༌ལ༌ ཟེརས༌, "ངའེ༌ བུ༌ཚ༌ ཤེ༌ལག༌ ཆེན༌མོ༌ ཆ༌ཆ༌ ཚག༌པ༌ ཁྱོ༌རང༌ ཁྱོ༌རང༌ངི༌ ཨ༌བའེ༌ ཁང༌པ༌ ཡུག༌ས༌མོ༌ ཚུལ༌ལ༌ དུག༌" ཅིའ༌ཟེར༌ན༌ ཁོའེ༌ སམ༌, "ཁོའང༌ ཁོ༌རང༌ངི༌ ཨ༌ཅོ༌གུན༌ ཙོགས༌ལ༌ ཤི༌སྲིད༌ཅེས༌ ཨིན༌ནོག༌།" ཏེ༌ནེ༌ ཏ༌མར༌ ཁོ༌རང༌ངི༌ ཨ༌བའེ༌ ཁང༌པ༌ དུག༌ག༌ལ༌ སོང༌།
12 ལོ༌ མང༌པོ༌ཞིག༌གི༌ སྟིང༌ནེ༌ ཤུའི༌ བུ༌མོ༌, ཡ༌ཧུ༌དཱའེ༌ ན༌མ༌ ཤི༌། ཉ༌ངན༌ནི༌ ཏུས༌པོ༌ ཚར༌ཏེ༌ ཁོ༌རང༌ངི༌ ཛ༌འོ༌ ཨ༌དུ༌ལམ༌པ༌ ཧི༌རཧ༌ ཉམ༌པོ༌ ཡ༌ཧུ༌དཱ༌ ཏིམ༌ནཧ༌ ཡུལ༌ལ༌ ཁོ༌རང༌ངི༌ ལུག༌གི༌ བལ༌ བྲག༌ཁན༌གུན༌ ཡོད༌ས༌ སོང༌།
13 ཏ༌མར༌ལ༌ ཤདས༌, "ཁྱོ༌རང༌ངི༌ མག༌པའེ༌ ཨ༌བ༌ ཏིམ༌ནཧ༌, ཁོ༌རང༌ངི༌ ལུག༌གུན༌ནི༌ བལ༌ བྲག༌ག༌ལ༌ ཆ༌རུག༌།" 14 ཁོའེ༌ ཁོ༌རང༌ གོན༌ཁན༌ནི༌ ཡུག༌ས༌མོའི༌ ཀོས༌པོ༌ ཞེབས༌ཏེ༌ མི༌ ཤེ༌ཤེས༌སི༌ ཕིའ༌ ཁོ༌རང༌ངི༌ ལྡོང༌བོ༌ རས༌ ཉམ༌པོ༌ ཀབས༌ ཡང༌ ཏིམ༌ནཧ༌ ཆ༌སའེ༌ ལམ༌མི༌ཀ༌ ཨི༌ནེམ༌ གྲོང༌ཁྱེར༌ལ༌ ཆ༌སའེ༌ཀ༌ དུགས༌། ཅིའ༌ཟེར༌ན༌ ཡ༌ཧུ༌དཱའེ༌ བུ༌ཚ༌ ཤུའ༌ ལྡན༌ཏེ༌ ཡོད༌ནའང༌ ཁོ༌ ཉམ༌པོ༌ བག༌སྟོན༌ ཅོ༌ཅེས༌ལ༌ མ༌ཏང༌ང༌ ཨིན༌ཁན༌བོ༌ ཁོའ༌ ཧ༌གོ༌།
15 ཡ༌ཧུ༌དཱའེ༌ བུ༌མོ༌བོ༌ ཐོང༌ང༌ཅིག༌ ཁོའེ༌ ཁོ༌ ཟུགས༌ཙོང༌མ༌ཞིག༌ ཨིན༌ནོག༌ སམ༌ ཅིའ༌ཟེར༌ན༌ ཁོའེ༌ ལྡོང༌བོ༌ ཀབས༌ཏེ༌ ཡོད༌པིན༌། 16 ཡང༌ ཁོའེ༌ བུ༌ཚའེ༌ ན༌མ༌ ཨིན༌ཁན༌བོ༌ མ༌ཤས༌པ༌ ཁོ༌ ཏེ༌ བུ༌མོའེ༌ དུན༌ལ༌ སོང༌ཏེ༌ ཟེརས༌, "ལུས༌བྲེལ༌ ཅོའ༌ལ༌ ངའ༌ ཉམ༌པོ༌ ཡོང༌།"
ཁོའེ༌ ཏྲིས༌, "ཉེ༌རང༌ ཉམ༌པོ༌ དུག༌ཅེས༌ལ༌ ཉེ༌རང༌ངི༌ ང༌ ཅི༌ ཏང༌ཨིན༌?"
17 ཁོའེ༌ ལན༌ཏངས༌, "ང༌རང༌ངི༌ ཁྱུའི༌ ནང༌ནེ༌ རི༌གུ༌ཞིག༌ ཀལ༌ཨིན༌།
བུ༌མོའེ༌ ཟེརས༌, "ཉེ༌རང༌ངི༌ དམ༌ཆའེ༌ ཚུལ༌ལ༌ ང༌ ཅི༌ཏོང༌ཤིག༌ སལ༌།"
18 ཁོའེ༌ ཏྲིས༌, "དམ༌ཆའེ༌ ཚུལ༌ལ༌ ངའེ༌ ཁྱོ༌རང༌ང༌ ཅི༌ ཏང༌?"
བུ༌མོའེ༌ ལན༌ཏངས༌, "ཉེ༌རང༌ངི༌ ཐེ༌ཙེ༌ སེར༌དུབ༌, ཏེ༌བོ༌ ཏགས༌ཁན༌ནི༌ རས༌ཀུད༌ དང༌ ཁུར༌ཁན༌ནི༌ བེར༌ཀ༌ གུན༌ སལ༌།"
ཁོའེ༌ ཏེ༌ ཚང༌མ༌ ཁོའ༌ ཏངས༌ཏེ༌ ཁོ༌ ཉམ༌པོ༌ ལུས༌བྲེལ༌ ཅོས༌པ༌ བུ༌མོ༌བོ༌ སྐྱེ༌ཅེས༌མ༌ གྱུར༌། 19 ཏ༌མར༌ ལོགས༌ཏེ༌ ཁང༌པ༌ སོང༌ ཡང༌ ལྡོང༌ང༌ ཀབ༌ཁན༌བོ༌ ཕུད༌ཏེ༌ ཁོ༌རང༌ངི༌ ཡུག༌ས༌མོའི༌ ཀོས༌པོ༌ གོནས༌།
20 ཡ༌ཧུ༌དཱའེ༌ ཁོ༌རང༌ངི༌ ཛ༌འོ༌ ཨ༌དུ༌ལམ༌པ༌ ཧི༌རཧ༌ ཏེ༌ བུ༌མོའ༌ རི༌གུ༌ ཁྱེར༌ཏེ༌ དམ༌ཆ༌ ཅོས༌ཏེ༌ ཏང༌ཁན༌ནི༌ ཅ༌ལག༌གུན༌ ལོགས༌ཏེ༌ ཁྱོང༌ཅེས༌ལ༌ ལམ༌ཅུགས༌, ཨིན༌ནའང༌ ཁོའ༌ བུ༌མོ༌བོ༌ མ༌ཐོབ༌། 21 ཁོའེ༌ ཏེ༌རུ༌ དུག༌ཁན༌ནི༌ མི༌ ཁ༌ཅིག༌ག༌ ཏྲིས༌, "ཨི༌ནེམ༌མི༌ དུན༌ལ༌ འི༌ ལམ༌མི༌ཀ༌ དུག༌ཁན༌ནི༌ ཟུགས༌ཙོང༌མ༌བོ༌ ཀ༌རུ༌ སོང༌?"
ཁོང༌གུན༌ནི༌ ལན༌ཏངས༌, "འི༌རུ༌ ཟུགས༌ཙོང༌མ༌ཞིག༌ མ༌ནེ༌ མེད༌པིན༌།
22 ཁོ༌ ལོགས༌ཏེ༌ ཡ༌ཧུ༌དཱ༌ ཡོད༌ས༌ སོང༌ ཡང༌ ཟེརས༌, "ངའ༌ ཏེ༌ བུ༌མོ༌བོ༌ མ༌ཐོབ༌, ཡང༌ ཏེ༌རུ༌ དུག༌ཁན༌གུན༌ནི༌ 'འི༌རུ༌ ཟུགས༌ཙོང༌མ༌ཞིག༌ མ༌ནེ༌ མེད༌' ཟེར༌ར༌རག༌།"
23 ཡ༌ཧུ༌དཱའེ༌ ཟེརས༌, "ཁོའེ༌ ལག༌ག༌ ཡོད༌ཁན༌ ཚང༌མ༌ ཁོའ༌ བོར༌ཅུག༌ ཏེ༌ མན༌ན༌ ང༌དང༌གུན༌ སམ༌བ༌ མེད༌ཁན༌ ཐེས༌ཏེ༌ ཁྲེལ༌བ༌ ཆེན༌། ངའེ༌ ཁ༌ཆད༌ ཅོ༌ཁན༌ ནང༌ཞིན༌ རི༌གུ༌ ཀལ༌པིན༌ ཨིན༌ནའང༌ ཁྱོ༌རང༌ང༌ ཁོ༌ མ༌ཐོབ༌།"
24 ཟླ༌ཝ༌ སུམ༌མི༌ སྟིང༌ནེ༌ ཡ༌ཧུ༌དཱའ༌ ཁོ༌རང༌ངི༌ བུ༌ཚའེ༌ ན༌མ༌ ཏ༌མར༌ ཟུགས༌ཙོང༌མ༌ གྱུར༌ཏེ༌ ཁོའ༌ ཕྲུ༌གུ༌ སྐྱེ༌ཅེས༌དུག༌ ཟེར༌ཏེ༌ ཚོར༌།
ཡ༌ཧུ༌དཱའེ༌ ཟེརས༌, "བུ༌མོ༌བོ༌ ཕི༌ལོག༌ག༌ ཕིངས༌ཏེ༌ མེའ༌ སྲགས༌ཏེ༌ སོད༌།"
25 བུ༌མོ༌བོ༌ ཕི༌ལོག༌ག༌ ཁྱོང༌ ཟ༌ནེ༌ ཁོའེ༌ ཁོ༌རང༌ངི༌ མག༌པའེ༌ ཨ༌བ༌ ལོན༌ ཀལས༌། ཁོའེ༌ ཟེརས༌, "འི༌ ཅ༌ལག༌གུན༌ནི༌ དག༌པོའེ༌ ང༌ སྐྱེ༌ཅེས༌མ༌ གྱུར༌ཅུགས༌། ཟིགས༌སའང༌, འི༌ ཐེ༌ཙེ༌, ཏེ༌བོ༌ ཏགས༌ཁན༌ནི༌ རས༌ཀུད༌ དང༌ བེར༌ཀ༌ གུན༌ སུའི༌ ཨིན༌ནོག༌?"
26 ཡ༌ཧུ༌དཱའེ༌ ཏེ༌གུན༌ ཤེས༌ ཡང༌ ཟེརས༌, "ང༌ སང༌ མང༌ང༌ བུ༌མོ༌བོ༌ དྲང༌པོ༌ ཨིན༌ནོག༌, ཅིའ༌ཟེར༌ན༌ ངའེ༌ ཁོའ༌ ང༌རང༌ངི༌ བུ༌ཚ༌ ཤེ༌ལག༌ ཉམ༌པོ༌ བག༌སྟོན༌ ཅོ༌ མ༌ཅུག༌ག༌ ཨིན༌ནོག༌།" ཡང༌ ཡ༌ཧུ༌དཱའེ༌ ཁོ༌ ཉམ༌པོ༌ ཡང༌སྐྱར༌ ལུས༌བྲེལ༌ མ༌ཅོས༌།
27 ཏ༌མར༌ལ༌ ཕྲུ༌གུ༌ སྐྱེ༌ཅེས༌སི༌ ཏུས༌པོ༌ ལེབ༌བ༌ཅིག༌ ཁོའེ༌ ཁོག༌པའེ༌ ནང༌ང༌ ཚག༌ཕྲུག༌ ཡོད༌པིན༌། 28 ཁོའ༌ ཕྲུ༌གུ༌ སྐྱེ༌ ཟ༌ནེ༌ ཅིག༌པོའེ༌ ལག༌པ༌ བིང༌ང༌ཅིག༌ ཡ༌ཏོ༌ ཅོ༌ཁན༌བོའེ༌ སྐུད༌པ༌ མར༌པོ༌ཞིག༌ ལྡམས༌ཏེ༌ ཟེརས༌, "འི༌ བུ༌ཚ༌བོ༌ གོ༌མ༌ སྐྱེས༌།" 29 ཨིན༌ནའང༌ ཁོའེ༌ ལག༌པ༌ ལོགས༌ཏེ༌ ནང༌ཀུག༌ག༌ ཁྱེརས༌ ཡང༌ ཁོའེ༌ སང༌ སྔུན༌ལ༌ ཡང༌ ཅིག༌པོ༌ སྐྱེས༌། ཏེ༌ནེ༌ ཡ༌ཏོ༌བོའེ༌ ཟེརས༌, "ཁྱོ༌རང༌ ཝང༌ ཀོལ༌ཏེ༌ ཕི༌ལོག༌ག༌ བིང༌།" ཏེ༌བོའེ༌ཕིའ༌ ཁོའེ༌ མིང༌ང༌ པེ༌རེཟ༌ * 38:29 ཨིབ༌རི༌པའེ༌ སྐད༌དི༌ ནང༌ང༌ པེ༌རེཟ༌སི༌ ཏོན༌ "ཝང༌ ཀོལ༌ཏེ༌ བིང༌ཅེས༌" ཨིན༌ནོག༌། ཏགས༌། 30 ཏེ༌ནེ༌ ཁོའེ༌ ནོ༌ ལག༌པའ༌ སྐུད༌པ༌ མར༌པོ༌ ལྡམས༌ཁན༌བོ༌ སྐྱེས༌ ཡང༌ ཁོའེ༌ མིང༌ང༌ ཟི༌རཧ༌ † 38:30 ཨིབ༌རི༌པའེ༌ སྐད༌དི༌ ནང༌ང༌ ཟི༌རཧའེ༌ ཏོན༌ "ཁྲག༌ ཙོགས༌ མར༌པོ༌ ཡ༌ མ༌ ལྡང༌ཤན༌" ཨིན༌ནོག༌། ཏགས༌།