1 ཏེ༌ནེ༌ ཡོ༌སེབ༌ སོང༌ཏེ༌ ཨི༌ཇིབ༌བི༌ གྱལ༌པོ༌ ཕེ༌རོའ༌ ཟེརས༌, "ངའེ༌ ཨ༌བ༌ དང༌ ཨ༌ཅོ༌ནོ༌གུན༌ ཀེ༌ནན༌ནེ༌ སེམས༌ཅན༌ནི༌ ཁྱུ༌ དང༌ ཁོ༌རང༌གུན༌ལ༌ ཡོད༌ཁན༌ ཚང༌མ༌ ཉམ༌པོ༌ ཡོངས༌ཏེ༌ དག༌ས༌ གོ༌ཤེན༌ནི༌ ཡུལ༌ཇོངས༌སི༌ ནང༌ང༌ ཡོད༌།"

2 ཁོའེ༌ ཁོ༌རང༌ ཉམ༌པོ༌ ཡོད༌ཁན༌ ཨ༌ཅོ༌ རྔ༌བོ༌ གྱལ༌པོའེ༌ དུན༌ལ༌ ཁྱོངས༌།

3 གྱལ༌པོའེ༌ ཁོང༌གུན༌ལ༌ ཏྲིས༌, "ཁྱོ༌ཞ༌གུན༌ནི༌ ལས༌སྣ༌ ཅི༌ ཨིན༌?

ཁོང༌གུན༌ནི༌ ལན༌ཏངས༌, "སྤོན༌བོ༌ལེ༌, ང༌ཞ༌གུན༌ ང༌ཞའེ༌ ཕ༌མེས༌པོ༌གུན༌ ཙོགས༌ལ༌ ལུག༌རྫི༌ ཨིན༌། 4 ཀེ༌ནན༌ནི༌ ནང༌ང༌ མུ༌གེ༌ ཀྲག༌པོ༌ ལངས༌ཏེ༌ སེམས༌ཅན༌གུན༌ལ༌ ཟའ༌གྱུ༌ མེད༌ པ༌སང༌ ང༌ཞའ༌ ཏུས༌བན༌ཤིག༌ འི༌ ཡུལ༌ལ༌ དུག༌ག༌ ཡོངས༌པིན༌། ཇུ༌ཇུ༌ ང༌ཞ༌གུན༌ གོ༌ཤེན༌ནི༌ ཡུལ༌ཇོངས༌སི༌ ནང༌ང༌ དུག༌ཅེས༌ལ༌ གོངས༌པ༌ སལ༌།"

5 གྱལ༌པོའེ༌ ཡོ༌སེབ༌བ༌ ཟེརས༌, "ཁྱོ༌རང༌ངི༌ ཨ༌བ༌ དང༌ ཨ༌ཅོ༌ནོ༌གུན༌ ཁྱོ༌རང༌ ཡོད༌ས༌ ཡོངས༌ཏེ༌ ཨིན༌ནོག༌། 6 ཨི༌ཇིབ༌བི༌ ས༌ཆ༌ གང༌པོ༌ ཁྱོ༌རང༌ངི༌ དུན༌ལ༌ དུག༌, ཏ༌ ཁོང༌གུན༌ ས༌ཆ༌ ཚང༌མའེ༌སང༌ གྱལ༌ཤོག༌ གོ༌ཤེན༌ནི༌ ནང༌ང༌ ནས༌ཏེ༌ དུག༌ཅུག༌། ཡང༌ ཁོང༌གུན༌ནི༌ ཕྲོ༌ནེ༌ ཁས༌པ༌གུན༌ལ༌ ངའེ༌ སེམས༌ཅན༌ནི༌ ཁྱུ༌གུན༌ནི༌ ལྟ༌སྟོག༌ ཅོ༌ཅེས༌སི༌ ཁག༌ ཀོལ༌།"

7 ཏེ༌ནེ༌ ཡོ༌སེབ༌བི༌ ཁོ༌རང༌ངི༌ ཨ༌བ༌ ཡ༌ཀོབ༌ གྱལ༌པོའ༌ དུན༌ལ༌ ཁྱོངས༌ ཡང༌ ཡ༌ཀོབ༌བི༌ གྱལ༌པོའ༌ ཅིན༌ལབས༌ ཏངས༌། 8 གྱལ༌པོའེ༌ ཁོའ༌ ཏྲིས༌, "ཉེ༌རང༌ང༌ ལོ༌ ཙམ༌ ཆ༌ཅེན༌?"

9 ཡ༌ཀོབ༌བི༌ ལན༌ཏངས༌, "ཇིག༌རྟེན༌ནི༌ ནང༌ང༌ ཁོར༌ཨིན༌ དུགས༌ཏེ༌ ངའ༌ ལོ༌ གྱ༌ དང༌ སུམ༌ཅུ༌ སོང༌། ངའེ༌ མི༌ཚེའེ༌ རྡུག༌ངལ༌ཅན༌ ཡང༌ ངའེ༌ ཕ༌མེས༌པོ༌གུན༌ ཙོགས༌ལ༌ རིང༌མོ༌ཞིག༌ མེད༌པ༌ ཨིན༌ནོག༌།" 10 ཏེ༌ནེ༌ ཡ༌ཀོབ༌བི༌ གྱལ༌པོའ༌ ཅིན༌ལབས༌ ཏངས༌ཏེ༌ ཁོའེ༌ དུན༌ནེ༌ སོང༌།

11 ཕེ༌རོའེ༌ བཀའ༌ ནང༌ཞིན༌ ཡོ༌སེབ༌བི༌ ཁོ༌རང༌ངི༌ ཨ༌བ༌ དང༌ ཨ༌ཅོ༌ནོ༌གུན༌ ཨི༌ཇིབ༌བི༌ ས༌ཆ༌ ཚང༌མའེ༌སང༌ གྱལ༌ཤོག༌ རམ༌སིས༌སི༌ *47:11 གོ༌ཤེན༌ནི༌ ནས༌ས༌བོའ༌ རམ༌སིས༌སའང༌ ཟེར༌ར༌ནོག༌ ཡུལ༌ཇོངས༌སི༌ ནང༌ང༌ ཚུགས༌ཏེ༌ དུག༌ཅུགས༌། 12 ཡང༌ ནང༌ཚངས༌སི༌ ནང༌མི༌ སྤེས༌ཏེ༌ ཡོ༌སེབ༌བི༌ ཁོ༌རང༌ངི༌ ཨ༌བ༌ དང༌ ཨ༌ཅོ༌ནོ༌གུན༌ ཡང༌ ཁོང༌གུན༌ནི༌ ནང༌ཚངས༌གུན༌ལ༌ ཟའ༌གྱུ༌གུན༌ནའང༌ རིགས༌།

13 མུ༌གེ༌ མ༌སྲན༌ཏྲེ༌ ཡོང༌ཅེས༌པོའེ༌ ཨི༌ཇིབ༌ དང༌ ཀེ༌ནན༌ནི༌ ནང༌ང༌ ཟའ༌གྱུ༌ མེད༌པིན༌། ནས༌ས༌ གང༌པོའེ༌ ནང༌ང༌ མི༌གུན༌ལ༌ སྟོག༌རི༌ སྲན༌ཏྲེ༌ ཐོང༌ངད༌པིན༌། 14 ཨི༌ཇིབ༌པ༌ དང༌ ཀེ༌ནན༌པ༌ གུན༌ལ༌ གྲུ༌ ཙོང༌ཁན༌ནི༌ པེ༌ནེ༌ ཚང༌མ༌ ཡོ༌སེབ༌བི༌ སགས༌ཏེ༌ ཕེ༌རོའེ༌ ཁར༌ལ༌ ཁྱེར༌རད༌པིན༌། 15 ཨི༌ཇིབ༌པ༌ དང༌ ཀེ༌ནན༌པ༌ གུན༌ལ༌ པེ༌ནེ༌ ཚང༌མ༌ ཚར༌ར༌ཅིག༌, ཨི༌ཇིབ༌པ༌གུན༌ ཡོ༌སེབ༌ ཡོད༌ས༌ ཡོངས༌ཏེ༌ ཟེརས༌, "ང༌ཞ༌གུན༌ལ༌ ཟའ༌གྱུ༌ སལ༌། ཉེ༌རང༌ངི༌ མིག༌གི༌ དུན༌ལ༌ ང༌ཞ༌གུན༌ ཤི༌ ཅུག༌ག༌ མ༌ཛད༌། ང༌ཞའེ༌ པེ༌ནེ༌གུན༌ ཚར༌།"

16 ཡོ༌སེབ༌བི༌ ཟེརས༌, "གལ༌ཏེས༌ ཁྱོ༌ཞ༌གུན༌ནི༌ པེ༌ནེ༌ ཚང༌མ༌ ཚར༌ཏེ༌ མེད༌ན༌ ཁྱོ༌ཞའེ༌ སྲལ༌ཁན༌ནི༌ སེམས༌ཅན༌གུན༌ ཁྱོང༌ ངའེ༌ ཏེ༌གུན༌ནི༌ ཚབས༌ལ༌ ཟའ༌གྱུ༌ ཏང༌ཨིན༌།" 17 ཏེ༌བོའེ༌ཕིའ༌ ཁོང༌གུན༌ནི༌ སེམས༌ཅན༌ སྲལ༌ཁན༌གུན༌ ཁྱོངས༌ ཡང༌ ཁོའེ༌ ཁོང༌གུན༌ནི༌ ཁྱོང༌ཁན༌ རྟ༌, ལུག༌ དང༌ ར༌མ༌, བ༌ལང༌ དང༌ བུང༌བུ༌ གུན༌ནི༌ ཚབས༌ལ༌ ཟའ༌གྱུ༌ ཏངས༌། ཏེ༌ ལོ༌བོ༌ ཁོའེ༌ ཁོང༌ ཚང༌མ༌ལ༌ སེམས༌ཅན༌ སྲལ༌ཁན༌གུན༌ནི༌ ཚབས༌ལ༌ ཟའ༌གྱུ༌ ཏངས༌།

18 ཏེ༌ ལོ༌ ཚར༌ཏེ༌ སྟིང༌མ༌ ལོ༌ ཁོང༌གུན༌ ཡོ༌སེབ༌ ཡོད༌ས༌ ཡོངས༌ཏེ༌ ཟེརས༌, "སྤོན༌བོ༌ལེ༌, ང༌ཞའེ༌ པེ༌ནེ༌ ཚར༌ ཡང༌ ང༌ཞའེ༌ སེམས༌ཅན༌ ཚང༌མ༌ ཉེ༌རང༌ངི༌ གྱུར༌ཁན༌བོ༌ ང༌ཞའ༌ སྦས༌ཏེ༌ བོར༌ མི༌ཉན༌། ཏ༌ ང༌ཞ༌རང༌ངི༌ ཟུགས༌པོ༌ དང༌ ས༌ཀྱད༌པོ༌ མ༌ནེ༌ ཅའང༌ ལུས༌ཏེ༌ མེད༌། 19 ཉེ༌རང༌ངི༌ མིག༌གི༌ དུན༌ལ༌ ང༌ཞའ༌ དང༌ ང༌ཞའེ༌ ཞིང༌གུན༌ ཤི༌ ཅུག༌ག༌ མ༌ཛད༌། ང༌ཞའ༌ དང༌ ང༌ཞའེ༌ ས༌ཀྱད༌གུན༌ནི༌ ཚབས༌ལ༌ ང༌ཞའ༌ ཟའ༌གྱུ༌ སལ༌ལ༌ ཛད༌དའང༌, ང༌ཞའེ༌ ས༌ཀྱད༌ དང༌ ང༌ཞ༌གུན༌ གྱལ༌པོའེ༌ ཚེ༌ཡོག༌ གྱུར༌ཨིན༌། ང༌ཞ༌གུན༌ སོན༌ཏེའ༌ ལུས༌ཤེས༌ ཡང༌ ཞིང༌གུན༌ རི༌སྟོང༌ མི༌གྱུར༌ཅེས༌སི༌ ཕིའ༌ ང༌ཞ༌གུན༌ལ༌ གྲུ༌ སལ༌ལ༌ ཛད༌།"

20 ཏེ༌ནེ༌ ཡོ༌སེབ༌བི༌ ཨི༌ཇིབ༌བི༌ ས༌ཆ༌ ཚང༌མ༌ གྱལ༌པོའེ༌ ཕིའ༌ ཉོས༌། མུ༌གེ༌ མ༌སྲན༌ཏྲེ༌ གྱས༌པ༌ ཨི༌ཇིབ༌པ༌ ཚང༌མའེ༌ ཁོ༌རང༌གུན༌ནི༌ ས༌ཀྱད༌ ཙོངས༌ ཡང༌ ས༌ཀྱད༌ ཚང༌མ༌ ཕེ༌རོའེ༌ གྱུར༌། 21 ཡོ༌སེབ༌བི༌ ཨི༌ཇིབ༌ གང༌པོའེ༌ མི༌གུན༌ གྱལ༌པོའེ༌ ཚེ༌ཡོག༌ གྱུར༌ཅུགས༌། 22 ཨིན༌ནའང༌ ཁོའེ༌ བླ༌མ༌གུན༌ནི༌ ས༌ཀྱད༌ མ༌ཉོས༌ ཅིའ༌ཟེར༌ན༌ གྱལ༌པོའེ༌ ཁོང༌གུན༌ལ༌ ཐག༌ཅད༌ཁན༌ནི༌ ལ༌ཆ༌ ཏང༌ངད༌པིན༌ ཏེ༌བོའེ༌ཕིའ༌ ཁོང༌གུན༌ལ༌ ཟའ༌གྱུ༌ ཉོ༌ཅེས༌ལ༌ ཁོ༌རང༌གུན༌ནི༌ ས༌ཀྱད༌ ཙོང༌ མ༌གོས༌།

23 ཡོ༌སེབ༌བི༌ མི༌གུན༌ལ༌ ཟེརས༌, "ཏ༌ ངའེ༌ ཁྱོ༌ཞ༌གུན༌ དང༌ ཁྱོ༌ཞ༌གུན༌ནི༌ ས༌ཀྱད༌ གྱལ༌པོའེ༌ ཕིའ༌ ཉོས༌ཏེ༌ ཨིན༌, འི༌ཀ༌ནེ༌ ས༌འོན༌, ཁྱེར༌ཏེ༌ ཞིང༌ ཏོབ༌ཤིག༌། 24 སྟོན༌ཐོག༌ སྨིན༌ན༌ཅིག༌ ཁྱོ༌ཞ༌གུན༌ནི༌ ཁག༌ ལྔའེ༌ ནང༌ནེ༌ ཅིག༌ གྱལ༌པོའ༌ ཏང༌གོས༌། ལུས༌ཁན༌ནི༌ ཁག༌ ཞི༌ ཁྱོ༌ཞའེ༌ ནང༌ཚངས༌གུན༌ནི༌ ཁར༌ཇི༌ དང༌ ཞིང༌ངི༌ ས༌འོན༌ནི༌ ཕིའ༌ ཀོལ༌།"

25 ཁོང༌གུན༌ནི༌ ལན༌ཏངས༌, "ཉེ༌རང༌ངི༌ ང༌ཞ༌གུན༌ནི༌ སྲོག༌ སྐྱོབས༌ཏེ༌ ཨིན༌ནོག༌། སྤོན༌བོ༌ལེ༌, ཉེ༌རང༌ངི༌ ང༌ཞའེ༌ཀ༌ ཐུག༌རྗེ༌ ལྟན༌ཅེས༌པོའེ༌ ང༌ཞ༌གུན༌ གྱལ༌པོའེ༌ ཚེ༌ཡོག༌ གྱུར༌ཨིན༌།"

26 ཏེན༌ན༌བོའེ༌ཕིའ༌ ཡོ༌སེབ༌བི༌ ཨི༌ཇིབ༌བི༌ ས༌ཀྱད༌ ནང༌ བྲེལ༌ཏེ༌ བཀའ༌ཁྲིམས༌ཤིག༌ ཅོས༌ ཀ༌བོ༌ སྟོན༌ཐོག༌གི༌ ཁག༌ ལྔའེ༌ ནང༌ནེ༌ ཅིག༌ གྱལ༌པོའ༌ ཏང༌གོ༌ཤེས༌། ཏེ༌ ཁྲིམས༌པོ༌ དག༌སའང༌ ཡོད༌ཏེ༌ ཨིན༌ནོག༌། བླ༌མ༌གུན༌ནི༌ ས༌ཀྱད༌ ཅིག༌པོ༌ གྱལ༌པོའེ༌ མ༌གྱུར༌།

27 ཨིས༌ར༌ཨེལ༌པ༌གུན༌ གོ༌ཤེན༌ནི༌ ཡུལ༌ཇོངས༌སི༌ ནང༌ང༌ ཚུགས༌ཏེ༌ དུགས༌། ཏེ༌རུ༌ ཁོང༌གུན༌ལ༌ གྱུ༌ནོར༌ ཇོར༌ཏེ༌ ཁོང༌གུན༌ནི༌ ཀྲངས༌ཀ༌ ཕེལ༌ཨིན༌ སོང༌།

28 ཡ༌ཀོབ༌ ཨི༌ཇིབ༌བི༌ གོ༌ཤེན༌ ཡུལ༌ཇོངས༌སི༌ ནང༌ང༌ ལོ༌ ཅུབ༌དུན༌ སོན༌ཏེའ༌ ལུས༌ ཡང༌ ཁོའ༌ ལོ༌ གྱ༌ དང༌ ཞིབ༌ཅུ༌ཞབ༌དུན༌ ཆའད༌པིན༌། 29 ཤི༌ཅེས༌སི༌ ཏུས༌པོ༌ ཉེ༌མོའ༌ ལེབ༌བ༌ཅིག༌ ཡ༌ཀོབ༌བི༌ ཁོ༌རང༌ངི༌ བུ༌ཚ༌ ཡོ༌སེབ༌ བོད༌ཏེ༌ ཁོའ༌ ཟེརས༌, "གལ༌ཏེས༌ ཁྱོ༌རང༌ངི༌ ངའ༌ ཅམས༌པ༌ ཅོའད༌ན༌ ཁྱོ༌རང༌ངི༌ ལག༌པ༌ ངའེ༌ ཇང༌བར༌ལ༌ བོར༌ཏེ༌ ངའ༌ ཐུག༌རྗེ༌ དང༌ ལོ༌ཁྱེལ༌ ལྟན༌ཏེ༌ ངའེ༌ ཟེར༌ཁན༌བོ༌ ཅོ༌ཅེས༌ལ༌ ཁ༌ཆད༌ ཅོས༌། ངའ༌ ཨི༌ཇིབ༌བི༌ ནང༌ང༌ མ༌སུབ༌། 30 ང༌ ཤིའ༌ཅིག༌ ངའེ༌ ཟུགས༌པོ༌ ཨི༌ཇིབ༌ནེ༌ ཕི༌ལོག༌ག༌ ཁྱེར༌ཏེ༌ ངའེ༌ ཕ༌མེས༌པོ༌གུན༌ སུབ༌སའེ༌ ནས༌སའེ༌ཀ༌ སུབ༌ཅུག༌།"

ཡོ༌སེབ༌བི༌ ཟེརས༌, "ངའེ༌ ཉེ༌རང༌ངི༌ མོལ༌ཁན༌ ནང༌ཞིན༌ ཅོ༌ཨིན༌།"

31 ཡ༌ཀོབ༌བི༌ ཟེརས༌, "ཏེ༌བོ༌ ཅོ༌ཅེས༌ལ༌ ཁྱོ༌རང༌ངི༌ ནའ༌ ཁུར༌།" ཡོ༌སེབ༌བི༌ ནའ༌ ཁུརས༌ ཡང༌ ཡ༌ཀོབ༌བི༌ མལ༌ཙེ༌ཀ༌ གོ༌གུས༌ཏེ༌ དཀོན༌མཆོག༌ག༌ ཅོལས༌།