48
མ༌ནས༌སེཧ༌ དང༌ ཨེཕ༌ར༌ཡིམ༌།
1 ཏུས༌བན༌ཤིག༌གི༌ སྟིང༌ནེ༌ ཡོ༌སེབ༌བ༌, "ཁྱོ༌རང༌ངི༌ ཨ༌བ༌ ཟུ༌མོ༌ དུག༌" ཟེར༌ཏེ༌ ཤདས༌པ༌ ཁོ༌ ཁོ༌རང༌ངི༌ བུ༌ཚ༌ མ༌ནས༌སེཧ༌ དང༌ ཨེཕ༌ར༌ཡིམ༌ ཁྲིད༌ཏེ༌ ཨ༌བ༌ ཐུག༌ག༌ལ༌ སོང༌། 2 ཡ༌ཀོབ༌བ༌, "ཁྱོ༌རང༌ངི༌ བུ༌ཚ༌ ཡོ༌སེབ༌, ཁྱོ༌རང༌ང༌ ཐུག༌ག༌ལ༌ ཡོངས༌ཏེ༌ དུག༌" ཟེར༌ཏེ༌ ཤད༌ད༌ཅིག༌ ཁོའེ༌ ཟུགས༌པོའེ༌ ནང༌ང༌ ཤེད༌ ཡོངས༌ཏེ༌ ཁོ༌ མལ༌ཙེ༌ཀ༌ ལངས༌ཏེ༌ དུགས༌།
3 ཡ༌ཀོབ༌བི༌ ཡོ༌སེབ༌བ༌ ཟེརས༌, "ངའ༌ ཀེ༌ནན༌ནི༌ ས༌ཆ༌ ལུཟ༌སི༌ ནང༌ང༌ དཀོན༌མཆོག༌ ཀུན༌ཝང༌ ཇལས༌ ཡང༌ ཁོང༌ངི༌ ངའ༌ ཅིན༌ལབས༌ སལ༌ཏེ༌ 4 མོལས༌, 'ངའེ༌ ཁྱོ༌རང༌ང༌ ཕྲུ༌གུ༌ མང༌པོ༌ ཇོར༌ ཅུགས༌ཏེ༌ གྱས༌ཅུག༌ ཨིན༌། ཁྱོ༌རང༌ངི༌ པུར༌གྱུད༌གུན༌ གྱལ༌ཁམས༌ མང༌པོ༌ གྱུར༌ཏེ༌ ངའེ༌ འི༌ ས༌ཀྱད༌ ཏུས༌གྱུན༌ ལུས༌ཤེས༌སི༌ གྱུ༌ནོར༌རི༌ ཚུལ༌ལ༌ ཁོང༌གུན༌ལ༌ ཏང༌ཨིན༌།' "
5 "ང༌ འི༌རུ༌ ཡོང༌ངི༌ སང༌ སྔུན༌ལ༌ ཁྱོ༌རང༌ང༌ ཨི༌ཇིབ༌བི༌ ནང༌ང༌ སྐྱེས༌ཁན༌ནི༌ བུ༌ཚ༌ ཨེཕ༌ར༌ཡིམ༌ དང༌ མ༌ནས༌སེཧ༌ ཉིས༌ཀོ༌ ངའེ༌ བུ༌ཚ༌ རའུ༌བེན༌ དང༌ སི༌མེ༌འོན༌ ཙོགས༌ལ༌ ང༌རང༌ངི༌ ཨིན༌། 6 ཁོང༌གུན༌ནི༌ སྟིང༌ནེ༌ ཁྱོ༌རང༌ང༌ སྐྱེས༌ཁན༌ནི༌ ཞན༌ བུ༌ཚ༌གུན༌ ཁྱོ༌རང༌ངི༌ ཨིན༌ནོག༌ ཡང༌ ཁོང༌གུན༌ལ༌ ཨེཕ༌ར༌ཡིམ༌ དང༌ མ༌ནས༌སེཧ༌ ཡོད༌ཁན༌ནི༌ ས༌ཆ༌གུན༌ནེ༌ ནོར༌སྐལ༌ ཐོབ༌ཨིན༌། 7 ཏུས༌མང༌པོའེ༌ སྔུན༌ལ༌ ང༌ པ༌དན༌ ཨ༌རམ༌ནེ༌ ལོགས༌ཏེ༌ ཡོང༌ ཟ༌ནེ༌ ཁྱོ༌རང༌ངི༌ ཨ༌མ༌ རེ༌ཅལ༌, ལ༌མ༌ ཀེ༌ནན༌ནི༌ ཡུལ༌ལི༌ ནང༌ང༌ ཤི༌ ཀ༌བོ༌ ཨེ༌ཕ༌རེད༌ནེ༌ ཐག༌རིང༌ ཡོད༌པིན༌། ངའེ༌ ཁོ༌ ཏེ༌རུ༌ ཨེ༌ཕ༌རེད༌ལ༌ ཡོང༌སའེ༌ ལམ༌མི༌ཀ༌ སུབས༌པིན༌" ༼ཏེ༌བོ༌ དག༌ས༌ བེད༌ལེ༌ཧེམ༌ ཨིན༌ནོག༌།༽
8 ཡ༌ཀོབ༌བི༌ ཡོ༌སེབ༌བི༌ བུ༌ཚ༌གུན༌ ཐོང༌ང༌ཅིག༌ ཁོའ༌ ཏྲིས༌, "ཁོང༌གུན༌ སུ༌ ཨིན༌?"
9 ཡོ༌སེབ༌བི༌ ལན༌ཏངས༌, "ཁོང༌གུན༌, དཀོན༌མཆོག༌གི༌ ངའ༌ ཨི༌ཇིབ༌བི༌ ནང༌ང༌ སལ༌ཁན༌ནི༌ ངའེ༌ བུ༌ཚ༌གུན༌ ཨིན༌།"
ཏེ༌ནེ༌ ཡ༌ཀོབ༌བི༌ ཟེརས༌, "ཅིན༌ལབས༌ ཏང༌ཉན༌ཅེས༌ལ༌ ཁོང༌གུན༌ ངའེ༌ དུན༌ལ༌ ཁྱོང༌།"
10 རྒད༌པོ༌ ཡོད༌ཅེས༌པའེ༌ ཡ༌ཀོབ༌བ༌ མིག༌ནེ༌ ལག༌མོ༌ ཐོང༌ང༌ མེད༌པིན༌། ཏེ༌བོའེ༌ཕིའ༌ ཡོ༌སེབ༌བི༌ བུ༌ཚ༌གུན༌ ཨ༌བའེ༌ དུན༌ལ༌ ཁྱོངས༌ ཡང༌ ཁོའེ༌ ཁོང༌གུན༌ལ༌ ཁྲིལ༌ཏེ༌ པུག༌ ཏངས༌།
11 ཡ༌ཀོབ༌བི༌ ཡོ༌སེབ༌བ༌ ཟེརས༌, "ང༌ ཁྱོ༌རང༌ ཡང༌སྐྱར༌ ཐོང༌ཅེས༌སི༌ རེ༌ཝ༌ མེད༌པིན༌། ཨིན༌ནའང༌ དཀོན༌མཆོག༌གི༌ ངའ༌ ཁྱོ༌རང༌ངི༌ ཕྲུ༌གུ༌གུན༌ནའང༌ ཐོང༌ ཅུག༌ག༌ ཛད༌།"
12 ཏེ༌ནེ༌ ཡོ༌སེབ༌བི༌ བུ༌ཚ༌གུན༌ ཨ༌བའེ༌ པིག༌མོའེ༌ དུན༌ནེ༌ ཐེན༌ཏེ༌ ཨ༌བའེ༌ དུན༌ལ༌ ཁོ༌རང༌ངི༌ གོ༌ ས༌ ཐུག༌ ཅུགས༌ཏེ༌ སྒུས༌། 13 ཡོ༌སེབ༌བི༌ ཨེཕ༌ར༌ཡིམ༌ ཁོ༌རང༌ངི༌ ཡས༌པ༌ ཡ༌ཀོབ༌བི༌ ཡོ༌མ༌ ཆོགས༌ལ༌ ཡང༌ མ༌ནས༌སེཧ༌ ཁོ༌རང༌ངི༌ ཡོ༌མ༌ ཡ༌ཀོབ༌བི༌ ཡས༌པ༌ ཆོགས༌ལ༌ བོརས༌། 14 ཡོ༌མ༌ ཆོགས༌ལ༌ ཡོད༌ཁན༌ ཨེཕ༌ར༌ཡིམ༌ བུ༌ཚ༌ ཆུ༌ངུན༌བོའེ༌ གོའེ༌ཀ༌ ཡ༌ཀོབ༌བི༌ ཁོ༌རང༌ངི༌ ལག༌པ༌ ཡས༌པ༌བོ༌ བོརས༌, ཡང༌ ཡས༌པ༌ ཆོགས༌ལ༌ ཡོད༌ཁན༌ མ༌ནས༌སེཧ༌ བུ༌ཚ༌ ཆེན༌མོའེ༌ གོའེ༌ཀ༌ ཡ༌ཀོབ༌བི༌ ཁོ༌རང༌ངི༌ ལག༌པ༌ ཡོ༌མ༌བོ༌ བོརས༌།
15 ཏེ༌ནེ༌ ཡོ༌སེབ༌བ༌ ཅིན༌ལབས༌ ཏང༌ཨིན༌ ཟེརས༌,
"ངའེ༌ མེ༌མེ༌ ཨབ༌ར༌ཧམ༌ དང༌ ཨ༌བ༌ ཨི༌སཱག༌གི༌
ཞབ༌སྟོག༌ ཞུ༌ཁན༌ནི༌ དཀོན༌མཆོག༌,
ངའེ༌ མི༌ཚེ༌ གང༌པོའ༌ སྲུང༌སྐྱོབ༌ ཛད༌ཁན༌ནི༌ ངའེ༌ ལུག༌རྫི༌,
16 ང༌ ནོད༌པ༌ ཚང༌མ༌ནེ༌ སྐྱོབ༌བ༌ ཛད༌ཁན༌ནི༌ ཕོ༌ཉ༌,
ཁོང༌ངི༌ འི༌ བུ༌ཚ༌གུན༌ལ༌ ཅིན༌ལབས༌ སལ༌ལ༌ ཛད༌ཤིག༌།
འི༌ བུ༌ཚ༌གུན༌ གྱུད༌ཏེ༌ ཨབ༌ར༌ཧམ༌ དང༌ ཨི༌སཱག༌གི༌ ཚན༌
ཡང༌ ངའེ༌ མིང༌ ལུས༌ཤིག༌།
ཁོང༌གུན༌ལ༌ ཕྲུ༌གུ༌ མང༌པོ༌ ཇོར༌ཏེ༌
ཇིག༌རྟེན༌ནི༌ཀ༌ ཁོང༌གུན༌ནི༌ མིར༌གྱུད༌ མང༌པོ༌ ཕེལ༌ཤིག༌།"
17 ཡོ༌སེབ༌བ༌ ཨ༌བའེ༌ ལག༌པ༌ ཡས༌པ༌བོ༌ ཨེཕ༌ར༌ཡིམ༌མི༌ གོའེ༌ཀ༌ བོར༌ཁན༌བོ༌ ཐོང༌ང༌ཅིག༌ ཁོ༌ མ༌ཐད༌ ཡང༌ ཁོའེ༌ ཨ༌བའེ༌ ལག༌པ༌ ཨེཕ༌ར༌ཡིམ༌མི༌ གོའེ༌ ཀ༌ནེ༌ ཐེན༌ཏེ༌ མ༌ནས༌སེཧ༌ཧེ༌ གོའེ༌ཀ༌ བོར༌ཅེས༌ ཅོས༌ཏེ༌ 18 ཟེརས༌, "ཨ༌བ༌ལེ༌, བུ༌ཚ༌ ཆེན༌མོ༌ འི༌བོ༌ ཨིན༌ ཁོའེ༌ གོའེ༌ཀ༌ ཉེ༌རང༌ངི༌ ལག༌པ༌ ཡས༌པ༌བོ༌ བོར༌ར༌ ཛད༌།"
19 ཨིན༌ནའང༌ ཨ༌བའེ༌ མ༌བོརས༌ ཡང༌ ཟེརས༌, "ང༌ གྱུས༌ཡོད༌ བུ༌ཚ༌, ང༌ གྱུས༌ཡོད༌། མ༌ནས༌སེཧ༌ མིར༌གྱུད༌གུན༌ནའང༌ ཀྲག༌པོ༌ གྱུར༌ཨིན༌། ཨིན༌ནའང༌ ཁོའེ༌ ནོ༌ ཁོའེ༌ སང༌ མང༌ང༌ ཀྲག༌ག༌ གྱུར༌ཏེ༌ ཁོའེ༌ མིར༌གྱུད༌གུན༌ གྱལ༌ཁམས༌ མང༌པོ༌ གྱུར༌ཨིན༌།" 20 ཁོའེ༌ ཁོང༌གུན༌ལ༌ ཏེ༌ ཞག༌ག༌ ཅིན༌ལབས༌ སལ༌ཏེ༌ ཟེརས༌,
"ཨིས༌ར༌ཨེལ༌པ༌གུན༌ནི༌ ཅིན༌ལབས༌ ཏང༌ ཟ༌ནེ༌
ཁྱོ༌ཞའེ༌ མིང༌ ཀོལ༌ཏེ༌ ཟེར༌ཨིན༌,
'དཀོན༌མཆོག༌གི༌ ཁྱོ༌རང༌གུན༌ ཨེཕ༌ར༌ཡིམ༌
དང༌ མ༌ནས༌སེཧ༌ ཙོགས༌ གྱུར༌ཅུག༌ག༌ ཛད༌ཤིག༌།'"
ཏེན༌ན༌ཟུག༌གི༌ ཡ༌ཀོབ༌བི༌ ཨེཕ༌ར༌ཡིམ༌མི༌ སང༌ མ༌ནས༌སེཧ༌ ཁག༌ཅན༌ ཐེས༌།
21 ཏེ༌ནེ༌ ཡ༌ཀོབ༌བི༌ ཡོ༌སེབ༌བ༌ ཟེརས༌, "ང༌ ཤི༌ཀྱིས༌ ཨིན༌ནོག༌ ཨིན༌ནའང༌ དཀོན༌མཆོག༌ ཁྱོ༌རང༌ ཉམ༌པོ༌ ཞུགས༌ཏེ༌ ཁྱོ༌རང༌ ཁྱོ༌རང༌ངི༌ ཕ༌མེས༌པོའི༌ ས༌ཆ༌ ཀེ༌ནན༌ལ༌ ལོགས༌ཏེ༌ ཁྱེར༌ར༌ ཛད༌ཨིན༌། 22 ཁྱོ༌རང༌ངི༌ ཨ༌ཅོ༌གུན༌ནི༌ སང༌ ངའེ༌ ཁྱོ༌རང༌ང༌ ས༌ཆ༌ ཉི༌ལྡབ༌ ཏང༌ཨིན༌ ཀ༌བོ༌ ངའེ༌ ར༌འི༌ དང༌ ཞུ༌ ཉམ༌པོ༌ ཨ༌མོར༌པ༌གུན༌ནི༌ ཀ༌ནེ༌ ལེན༌ཏེ༌ ཨིན༌པིན༌།"