5
ཆུག༌པོ༌གུན༌ལ༌ སྤང༌ པུདས༌།
5:1 ནེ༌ 6
མི༌ ཆུག༌པོ༌གུན༌ ཉོན༌ཤིག༌, ཆི༌མ༌ ཏང༌ཨིན༌ ངུས༌མང༌ ཏོང༌ཤིག༌, ཅིའ༌ཟེར༌ན༌ ཁྱོ༌ཞ༌གུན༌ལ༌ སྲན༌ཏྲེ༌ ནགས༌ དང༌ བར༌དོ༌ ཐོང༌ཨིན༌། ཁྱོ༌ཞ༌གུན༌ནི༌ གྱུ༌ནོར༌གུན༌ རུལ༌ཏེ༌, ཡང༌ ཁྱོ༌ཞའེ༌ རིན༌ཅན༌ ཀོས༌གུན༌ལ༌ མུག༌པ༌ ཏབས༌ཏེ༌ ཨིན༌ནོག༌། ཁྱོ༌ཞ༌གུན༌ནི༌ སེར༌ དང༌ མུལ༌ གུན༌ རིན༌མེད༌ གྱུར༌ཏེ༌ ཨིན༌ནོག༌། ཁྱོ༌ཞའེ༌ རེ༌ཝ༌ བོར༌ཁན༌ནི༌ ཏེན༌ན༌ གྱུ༌ནོར༌བོའེ༌, མེ༌ ནང༌ང༌ ཚིག༌ག༌ ཙོགས༌ལ༌ ཁྱོ༌ཞའེ༌ ཤ༌གུན༌ ཟོས༌ཏེ༌ མེད༌ཁན༌ ཅོ༌ཨིན༌། ཁྲིམས༌ཅད༌དི༌ ཞག༌ག༌, ཁྱོ༌ཞའེ༌ སགས༌ཏེ༌ བོར༌ཁན༌ནི༌ ཏེན༌ན༌ གྱུ༌ནོར༌གུན༌ནི༌ ཁྱོ༌ཞའེ༌ སྡིག༌པའེ༌ སྤང༌པོ༌ ཏང༌ཨིན༌། ཏ༌ ཞིང༌ངི༌ཀ༌ ལས༌ ཅོ༌ཁན༌ནི༌ ལ༌ཆའེ༌ ནང༌ང༌ ཁྱོ༌ཞའེ༌ གོབ༌སྐོར༌ ཏང༌ཁན༌གུན༌ནི༌ ཀུ༌ཅོ༌ དང༌ ངུ༌ཅེས༌ གུན༌ལ༌ ཉོན༌ཤིག༌, ཁྱོ༌ཞའེ༌ མ༌ཏང༌ང༌ བོར༌ཁན༌ནི༌ ཏེ༌ ལ༌ཆ༌གུན༌ནི༌, ཁྱོ༌ཞ༌རང༌ངི༌ གྱབ༌གལ༌ལ༌ སྤང༌པོ༌ ཏང༌ཨིན༌ ཨིན༌ནོག༌། ཁྱོ༌ཞའེ༌ ཞིང༌རྔ༌ཁན༌གུན༌ནི༌ ཀུ༌ཅོ༌ དང༌ ངུ༌ཅེས༌ གུན༌, གཙོ༌བོ༌ དཀོན༌མཆོག༌གི༌ སན༌ན༌ ཛད༌ཏེ༌ ཨིན༌ནོག༌།
ཁྱོ༌ཞ༌གུན༌ནི༌ འི༌ ཇིག༌རྟེན༌ནི༌ཀ༌ ནོར༌ མང༌པོ༌ དང༌ རང༌རང༌ངི༌ དོད༌པ༌ ཡོད༌ཁན༌ ཚང༌མ༌ དྲན༌དྲ༌ གྲུབ༌ཅུག༌ཨིན༌ མི༌ཚེ༌ ཕུད༌ཏེ༌ ཨིན༌ནོག༌། ར༌མ༌ དང༌ ལུག༌ གུན༌ སད༌ཅེས༌སི༌ ཕིའ༌ གྱགས༌པ༌ ཆ༌ཅུག༌ཅེས༌ ཙོགས༌ལ༌ ཁྱོ༌ཞ༌གུན༌ནིའང༌ སད༌ཅེས༌ལ༌ ཁྱོ༌ཞ༌རང༌ གྱགས༌པ༌ ཆ༌ཅུགས༌ཏེ༌ ཨིན༌ནོག༌། ཁྱོ༌ཞ༌གུན༌ནི༌ ནོངས༌མེད༌ཁན༌ནི༌ མི༌གུན༌ སད༌ཅེས༌སི༌ ཁྲིམས༌ཅད༌ ཏངས༌ཏེ༌ སད༌ད༌ནོག༌, ཀ༌གུན༌ནི༌ ཁྱོ༌ཞའེ༌ གྱབ༌གལ༌ མ༌ཅོས༌།
ཟོད༌པ༌ གོམ༌ཅེས༌།
5:7 ནེ༌ 18
ངའེ༌ ཅེས༌པའེ༌ སྤུན༌གུན༌ ཁྱོ༌ཞ༌གུན༌ གཙོ༌བོ༌ ཡེ༌ཤུ༌ ལོགས༌ཏེ༌ སྐྱོད༌ཅེས༌ ཚག༌པ༌ ཟོད༌པ༌ ཉམ༌པོ༌ སྲུངས༌ཏེ༌ དུག༌ཤིག༌། ཞིང༌བད༌པ༌ ལྟོས༌ཤིག༌, ཀ༌བོ༌ སྟོན༌ དང༌ སྤིད༌ ཉིས༌ཀོ༌ ཟོད༌པ༌ ཉམ༌པོ༌ ཆར༌པའ༌ སྲུངས༌ཏེ༌ ཁོ༌རང༌ངི༌ རིན༌ཅན༌ སྟོན༌ཐོག༌གུན༌ ཚོས༌ཏེ༌ རྔའ༌ལ༌ རིངས༌སད༌། ཁྱོ༌ཞ༌གུན༌ནིའང༌ ཟོད༌པ༌ ཅོས༌ཏེ༌ སྙིང༌གུན༌ལ༌ སྤོས༌པ༌ སྐྱེ༌ཅུག༌ཤིག༌, ཅིའ༌ཟེར༌ན༌ གཙོ༌བོ༌ ཡེ༌ཤུ༌ ལོགས༌ཏེ༌ ཕེབ༌ཤེས༌སི༌ ཏུས༌པོ༌ ཉེ༌མོའ༌ ལེབས༌ཏེ༌ ཨིན༌ནོག༌།
སྤུན༌གུན༌ ཅིག༌ དང༌ ཅིག༌གི༌ གྱབ༌གལ༌ལ༌ ཟེར༌རྒྱུ༌ མ༌ཏང༌ཤིག༌། གལ༌ཏེས༌ ཏང༌ན༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌ཞ༌གུན༌ལ༌ ཁྲིམས༌ཅད༌ སལ༌ལ༌ ཛད༌ཨིན༌། ལྟོས༌ཤིག༌གའང༌ ཁྲིམས༌ཅད༌ཁན༌བོ༌ སྒོའེ༌ དུན༌ལ༌ ཞངས༌ཏེ༌ དུག༌།
10 སྤུན༌གུན༌ རྡུག༌ངལ༌ལི༌ ནང༌ངའང༌ ཟོད༌པ༌ ཉམ༌པོ༌ གཙོ༌བོ༌ དཀོན༌མཆོག༌གི༌ ཝང༌ངི༌ ནང༌ང༌ སྤེ༌ར༌ སལ༌ཁན༌ནི༌ ལུང༌སྟོན༌པ༌གུན༌ སྤེ༌ཞིག༌གི༌ ཚུལ༌ལ༌ ལྟོས༌ཤིག༌། 11 ཁྱོ༌ཞ༌གུན༌ལ༌ གྱུས༌ ཨིན༌ནོག༌, དཀོན༌མཆོག༌གི༌ ཟོད༌པ༌ ཉམ༌པོ༌ རྡུག༌ངལ༌ ཁུར༌ཁན༌གུན༌ལ༌ ཅིན༌ལབས༌ སལ༌ལ༌ ཛད༌ཏེ༌ ཨིན༌ནོག༌། སྤེར༌ན༌ སྙིང༌རུས༌ཅན༌ནི༌ མི༌ ཡོབ༌བ༌, གཙོ༌བོ༌ དཀོན༌མཆོག༌གི༌ སྟིང༌ཇུག༌པོའེ༌ཀ༌ སྔུན༌ནི༌ སང༌ མ༌མང༌པོ༌ སལ༌ལ༌ ཛདས༌ཁན༌བོའེ༌ སྐོར༌ལ༌ ཁྱོ༌ཞ༌གུན༌ནི༌ ཚོར༌ཏེ༌ ཨིན༌ནོག༌། གཙོ༌བོ༌ ནི༌ ཐུག༌རྗེ༌ དང༌ སྙིང༌རྗེ༌ གངས༌ཏེ༌ ཨིན༌ནོག༌།
12 ཨིན༌ནའང༌ ངའེ༌ སྤུན༌གུན༌, ཚང༌མའེ༌སང༌ ཁག༌ཅན༌བོ༌, ནམ༌ཁའ༌ ཡ༌ ཇིག༌རྟེན༌ ཡ༌ ཞན༌ ཅི༌ཞིག༌གིའང༌ ནའ༌ མ༌ནེ༌ མ༌ཁུར༌ཤིག༌། ཏེ༌བོའེ༌ ཚབས༌ལ༌ ཁྱོ༌ཞ༌གུན༌ནི༌ ཨིན༌ན༌ ཨིན༌, ཡ༌ མན༌ན༌ མན༌ ཟེར༌ཤིག༌, ཏེ༌ མ༌ནེ༌ ཁྱོ༌ཞ༌གུན༌ལ༌ ཁྲིམས༌ཅད༌ ཕོག༌ཨིན༌།
13 ཅི༌ ཁྱོ༌ཞའེ༌ ཕྲོ༌ནེ༌ སུ༌ཞིག༌ རྡུག༌པོའེ༌ ནང༌ང༌ ཡོད༌ད༌? ཏེ༌ནེ༌ དཀོན༌མཆོག༌ག༌ མོས༌ལམ༌ ཞུ༌ཤིག༌། ཅི༌ ཁྱོ༌ཞ༌གུན༌ ཐད༌པོ༌ ཨིན༌ན༌? ཏེ༌ནེ༌ དཀོན༌མཆོག༌ག༌ སྟོད༌པའེ༌ ལུ༌ ཕུལ༌ཤིག༌། 14 ཅི༌ ཁྱོ༌ཞའེ༌ ཕྲོ༌ནེ༌ སུ༌ཞིག༌ག༌ ཟུ༌མོ༌ ཡོད༌ད༌? ཏེ༌ནེ༌ ཁྱོ༌རང༌ངི༌ ཆོས༌ཚོགས༌སི༌ འུ༌སྐྱོང༌གུན༌ལ༌ བོད༌, ཡང༌ ཁོང༌གུན༌ལ༌ ཁྱོ༌རང༌ང༌ གཙོ༌བོའེ༌ ཚན༌ ཝང༌ཅན༌ནི༌ ནང༌ང༌ མར༌ ལུགས༌ཏེ༌ མོས༌ལམ༌ ཞུ༌ཅུག༌ཤིག༌། 15 ཏེ༌ཙོགས༌སི༌ མོས༌ལམ༌ ཏད༌པ༌ ཉམ༌པོ༌ ཕུལ༌ཁན༌བོའེ༌ ནད༌པོ༌ གྱལ༌ཏེ༌ གཙོ༌བོའེ༌ ཁྱོ༌རང༌ ཕན༌ཅུག༌ག༌ ཛད༌ཨིན༌། གལ༌ཏེས༌ ཁྱོ༌རང༌ངི༌ སྡིག༌པ༌ ཅོས༌ཏེ༌ ཡོད༌ནའང༌ ཁྱོ༌རང༌ང༌ ཤགས༌པ༌ སལ༌ལ༌ ཛད༌ཨིན༌།
16 ཁྱོ༌ཞ༌གུན༌ གྱལ༌ཅེས༌སི༌ ཕིའ༌ ཁྱོ༌ཞའེ༌ སྡིག༌པ༌གུན༌ ཤད༌ཏེ༌ ཅིག༌ དང༌ ཅིག༌གི༌ ཕིའ༌ མོས༌ལམ༌ ཞུ༌ཤིག༌། མི༌ དྲང༌པོའེ༌ མོས༌ལམ༌ ཕུལ༌ཁན༌བོའ༌ མ༌སྲན༌ཏྲེ༌ ཁྱུད༌ ཡོད༌ཏེ༌ བྲས༌བུ༌ ཧ༌ལས༌ཤེས༌ སྨིན༌ན༌ནོག༌། 17 ལུང༌སྟོན༌པ༌ ཨེ༌ལི༌ཡཱ༌ ཨིད༌ཏུ༌ ཅོ༌ཤིག༌, ཁོང༌ ནི༌ ང༌དང༌ ཙོགས༌ལ༌ མི༌ཞིག༌ ཞུགས༌ཏེ༌ ཨིན༌པིན༌། ནམ༌ ཁོང༌ངི༌ སྙིང༌ནེ༌ དཀོན༌མཆོག༌ག༌ ཨིས༌ར༌ཨེལ༌ལི༌ ནང༌ང༌ ཆར༌པ༌ མི༌བབས༌ཤེས༌ལ༌ མོས༌ལམ༌ ཕུལ༌པ༌, ལོ༌ སུམ༌ ནང༌ ཕེད༌ ཆར༌པ༌ མ༌བབས༌། 18 ཏེ༌ནེ༌ ཡང༌སྐྱར༌ ཁོང༌ངི༌ ཆར༌པ༌ ཕབ༌ཅེས༌ལ༌ མོས༌ལམ༌ ཕུལ༌ལ༌ཅིག༌, ཆར༌པ༌ བབས༌ཏེ༌ སའེ༌ཀ༌ སྟོན༌ཐོགས༌ སྨིན༌།
ཏད༌པ༌ སྟོར༌ཁན༌ ཏད༌པའེ༌ ནང༌ང༌ ལོགས༌ཏེ༌ ཁྱོང༌ཅེས༌།
5:19 ནེ༌ 20
19 ངའེ༌ སྤུན༌གུན༌, གལ༌ཏེས༌ ཁྱོ༌ཞ༌གུན༌ནི༌ ཕྲོ༌ནེ༌ སུ༌ཞིག༌ དཀོན༌མཆོག༌གི༌ དེན༌བའེ༌ ལམ༌མི༌ ཀ༌ནེ༌ ནུར༌ཏེ༌ སོང༌ཏེ༌, ཞན༌མ༌ཞིག༌གི༌ ཁོ༌ ཏད༌པའེ༌ ནང༌ང༌ ལོགས༌ཏེ༌ ཁྱོངས༌ཏེ༌ ཡོད༌ན༌, 20 ལོགས༌ཏེ༌ ཁྱོང༌ཁན༌བོའེ༌ ཏེ༌ སྡིག༌ཅན༌བོ༌ ཉལ༌ཝའེ༌ ནང༌ནེ༌ ཐར༌ཅུགས༌ཏེ༌ སྡིག༌པ༌ མང༌པོ༌ཞིག༌གི༌ ཀ༌ནེ༌ ཤགས༌པ༌ ཐོབ༌ཅུགས༌ཁན༌བོ༌ ཁྱོ༌ཞ༌གུན༌ལ༌ ཏན༌ཏན༌ གྱུས༌ ཡོང༌གོས༌༎