14
ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ སེམས༌སོ༌ སལས༌།
14:1 ནེ༌ 4
1 གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, "ཁྱོ༌ཞ༌གུན༌ནི༌ སེམས༌ལ༌ ནགས༌ མ༌ལྟན༌། དཀོན༌མཆོག༌གི༌ཀ༌ ཨིད༌ཤེས༌ ཅོས༌ ཡང༌ ངའེ༌ཀའང༌ ཨིད༌ཤེས༌ ཅོས༌། 2 ངའེ༌ ཡབ༌བི༌ ཁང༌པའེ༌ ནང༌ང༌ ནས༌ས༌ མང༌པོ༌ ཡོད༌། གལ༌ཏེས༌ མེད༌པིན༌ན༌ ངའེ༌ ཅིའ༌ ཟེར༌ཨིན༌ ང༌ ཁྱོ༌ཞ༌གུན༌ནི༌ ཕིའ༌ ཏེ༌རུ༌ ནས༌ས༌ གྲལ༌གྲིག༌ ཅོའ༌ ཆའད༌། 3 གལ༌ཏེས༌ ང༌ སོང༌ཏེ༌ ནས༌ས༌ གྲལ༌གྲིག༌ ཅོ༌ན༌, ང༌ ལོགས༌ཏེ༌ ཡོངས༌ཏེ༌ ཁྱོ༌ཞ༌གུན༌ ང༌རང༌ ཉམ༌པོ༌ ཁྲིད༌ཏེ༌ ཁྱེར༌ཨིན༌, ཏེ༌ནེ༌ ང༌ ཡོད༌ས༌ ཁྱོ༌ཞ༌གུན༌ནའང༌ དུག༌ཨིན༌། 4 ཁྱོ༌ཞ༌གུན༌ལ༌ ང༌ ཆ༌ཅེས༌སི༌ ནས༌སའེ༌ ལམ༌བོ༌ གྱུས༌ཡོད༌།"
ཡབ༌བི༌ཀ༌ ཆ༌ཅེས༌སི༌ ལམ༌བོ༌ ཡེ༌ཤུ༌ ཨིན༌།
14:5 ནེ༌ 14
5 ཐོ༌མཱས༌སི༌ གཙོ༌བོ༌ ཡེ༌ཤུའ༌ ཟེརས༌, "གཙོ༌བོ༌, ང༌ཞའ༌ ཉེ༌རང༌ ཀ༌རུ༌ སྐྱོད༌ད༌ ཛད༌ཅེས༌པོ༌ གྱུས༌མེད༌, ཏེ༌ནེ༌ ང༌ཞའ༌ ཀ༌ཟུག༌གི༌ ཏེ༌ ལམ༌བོ༌ ཤེས༌ཨིན༌།"
6 ཡེ༌ཤུའི༌ མོལས༌, "ང༌ ནི༌ ལམ༌བོ༌, དེན༌བ༌བོ༌ དང༌ ཚེ༌བོ༌ ཨིན༌, ང༌ ཅིག༌པོ༌ གྱུད༌ཏེ༌ མ༌ནེ༌ སུ༌ཞིག༌གའང༌ ཡབ༌བི༌ སྐུན༌དུན༌ལ༌ མི༌ལེབ༌། 7 གལ༌ཏེས༌ ཁྱོ༌ཞ༌གུན༌ནི༌ ང༌ སུ༌ ཨིན༌ཁན༌བོ༌ ཏན༌ཏན༌ ཤེས༌ཏེ༌ ཨིན༌པིན༌ན༌, ཁྱོ༌ཞ༌གུན༌ནི༌ ངའེ༌ ཡབ༌བའང༌ ཤེས༌ཏེ༌ ཡོད༌གྲོ༌། ཏ༌ནེ༌ཕར༌ལ༌ ཁྱོ༌ཞའེ༌ ཁོང༌ ཤེས༌ཏེ༌ ཡང༌ ཇལ༌ཏེ༌ ཨིན༌ནོག༌།"
8 ཕི༌ལིབ༌བི༌ ཟེརས༌, "གཙོ༌བོ༌ ང༌ཞའ༌ ཡབ༌ དཀོན༌མཆོག༌ ཇལ༌ཅུག༌ག༌ ཛད༌དའང༌, ཡང༌ ཏེ༌བོ༌ ང༌ཞའེ༌ ཕིའ༌ ཙམ༌ ཐད༌ཐད༌ ཨིན༌།
9 ཡེ༌ཤུའི༌ ཕི༌ལིབ༌བ༌ མོལས༌, "ང༌ ཁྱོ༌ཞའ༌ ཉམ༌པོ༌ འི༌ཟམ༌ ཏུས༌ མང༌པོ༌ དུགས༌ཏེའང༌ ཁྱོ༌རང༌ང༌ ཏ༌རུང༌ངའང༌ ང༌ མ༌ཤེས༌ས༌? ང༌ ཐོང༌ཁན༌གུན༌ནི༌ ཡབ༌བའང༌ ཇལ༌ཏེ༌ ཨིན༌། ཏེ༌ནེ༌ ཁྱོ༌རང༌ངི༌ ཀ༌ཟུག༌ག༌ ཟེར༌རད༌ 'ང༌ཞའ༌ ཡབ༌ ཇལ༌ཅུག༌' ཟེར༌ཏེ༌? 10 ཁྱོ༌རང༌ང༌ ང༌ ཡབ༌བི༌ ནང༌ང༌ ཡང༌ ཡབ༌ ངའེ༌ ནང༌ང༌ ཡོད༌ཁན༌བོ༌ དེན༌ཤེས༌ས༌ མེ༌རག༌ག༌? ངའེ༌ ཅི༌ སྤེ༌ར༌ཞིག༌ ཁྱོ༌ཞ༌གུན༌ལ༌ ཟེར༌རད༌ ཏེ༌གུན༌ ངའེ༌ ཆོགས༌ནེ༌ མན༌པ༌ ངའེ༌ ཡབ༌བི༌ ཆོགས༌ནེ༌ ཨིན༌, ཁོང༌ ངའེ༌ ནང༌ང༌ ཞུགས༌ཏེ༌ ཁོང༌རང༌ངི༌ ཆག༌ལས༌ ཛད༌དད༌། 11 ངའེ༌ ང༌ ཡབ༌བི༌ ནང༌ང༌ ཡང༌ ཡབ༌ ངའེ༌ ནང༌ང༌ ཨིན༌ ཟེར༌ཁན༌བོའ༌ དེན༌ཤེས༌ཤིག༌། འི༌བོའ༌ དེན༌ མ༌ཤེས༌ནའང༌ ངའེ༌ སྐོར༌ལ༌ སྤང༌པོ༌ ཏང༌ཁན༌ནི༌ ཛད༌པ༌གུན༌ ཐོང༌ཏེ༌ དེན༌ཤེས༌ཤིག༌། 12 ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ཀ༌ ཏད༌པ༌ ཅོ༌ཁན༌གུན༌ནི༌ ངའེ༌ ཅོ༌ཁན༌ནི༌ ལས༌གུན༌ ཙོགས༌ ཅོ༌ཨིན༌, མ༌ཚད༌ ཏེ༌སང༌ ཀྲག༌ག༌ ལས༌གུན༌ ཅོ༌ཨིན༌, ཅིའ༌ཟེར༌ན༌ ང༌ ནི༌ ཡབ༌བི༌ཀ༌ ཆའད༌། 13 སྲས༌སི༌ ཡབ༌བ༌ སྤལ༌ ཁྱོང༌ཅེས༌སི༌ ཕིའ༌ ཁྱོ༌ཞ༌གུན༌ནི༌ ཅི༌ཞིག༌ ངའེ༌ མིང༌ངི༌ ནང༌ང༌ ཞུ༌ཝ༌ ཕུལ༌ནའང༌ ངའེ༌ ཁྱོ༌ཞའ༌ ཏང༌ཨིན༌། 14 ཁྱོ༌ཞའེ༌ ཅི༌ཞིག༌གི༌ ཕིའ༌ ངའེ༌ མིང༌ངི༌ ནང༌ང༌ ངའ༌ ཞུ༌ཝ༌ ཕུལ༌ནའང༌, ངའེ༌ ཏེ༌བོ༌ ཅོ༌ཨིན༌།"
ཡེ༌ཤུའི༌ དམ༌པའེ༌ ཐུག༌ཉིད༌ སལ༌ཅེས༌སི༌ ཞལ༌ཆད༌།
14:15 ནེ༌ 31
15 གཙོ༌བོ༌ ཡེ༌ཤུའི༌ མོལས༌, "གལ༌ཏེས༌ ཁྱོ༌ཞའེ༌ ང༌ ཅམས༌པ༌ ཅོའད༌ན༌ ཁྱོ༌ཞའེ༌ ངའེ༌ བཀའ༌ ཏང༌ཁན༌གུན༌ སྲུང༌ཨིན༌, 16 ངའེ༌ ཡབ༌བ༌ ཞུ༌ཝ༌ ཕུལ༌ཨིན༌ ཡང༌ ཁོང༌ངི༌ ཁྱོ༌ཞ༌གུན༌ལ༌ ཞན༌ རོགས༌ ཛད༌ཁན༌ཞིག༌ སལ༌ལ༌ ཛད༌ཨིན༌, ཁོང༌ ཏུས༌གྱུན༌ ཁྱོ༌ཞའ༌ ཉམ༌པོ༌ ཞུགས༌ཨིན༌། 17 ཁོང༌ ནི༌ མི༌གུན༌ དྲང༌པོའེ༌ ཆོགས༌ལ༌ ཁྲིད༌ཁན༌ དམ༌པའེ༌ ཐུག༌ཉིད༌བོ༌ ཨིན༌། ཇིག༌རྟེན༌པ༌གུན༌ནི༌ ཁོང༌ངི༌ ནང༌ང༌ ཏད༌པ༌ མི༌ཅོ༌ ཅིའ༌ཟེར༌ན༌ ཁོང༌གུན༌ནི༌ ཁོང༌ ཐོང༌ང༌ མ༌ནོག༌ ཡང༌ ཤེས༌སའང༌ མ༌ནོག༌། ཨིན༌ནའང༌ ཁྱོ༌ཞའེ༌ ཁོང༌ ཤེས༌ས༌ནོག༌ ཅིའ༌ཟེར༌ན༌ ཁོང༌ ཁྱོ༌ཞའེ༌ ནང༌ང༌ ནས༌ཏེ༌ ཁྱོ༌ཞའ༌ ཉམ༌པོ༌ ཞུགས༌ས༌ནོག༌། 18 ངའེ༌ ཁྱོ༌ཞའ༌, ཏཱོ༌ཙེ༌ ཙོགས༌ལ༌ མི༌ཕང༌, ང༌ ཁྱོ༌ཞ༌གུན༌ ཡོད༌ས༌ ཡོང༌ཨིན༌། 19 ཙ༌པིག༌ཤིག༌ནེ༌ ཇིག༌རྟེན༌པ༌གུན༌ནི༌ ང༌ མི༌ཐོང༌, ཨིན༌ནའང༌ ཁྱོ༌ཞའེ༌ ང༌ ཐོང༌ཨིན༌། ང༌ སོན༌ཏེའ༌ ཨིན༌ཅེས༌པོའེ༌ ཁྱོ༌ཞ༌གུན༌ནའང༌ སོན༌ཏེའ༌ ལུས༌ཨིན༌། 20 ང༌ སོན༌ཏེའ༌ ལང༌ངི༌ ཞག༌ག༌, ང༌ ཡབ༌བི༌ ནང༌ང༌ ཡང༌ ཁྱོ༌ཞ༌གུན༌ ངའེ༌ ནང༌ང༌ ཡང༌ ང༌ ཁྱོ༌ཞའེ༌ ནང༌ང༌ ཨིན༌ཁན༌བོ༌ ཁྱོ༌ཞའེ༌ ཧ༌གོ༌ཨིན༌། 21 ངའེ༌ བཀའ༌གུན༌ ཉན༌ཏེ༌ སྲུང༌ཁན༌གུན༌ ནི༌ ངའ༌ ཅམས༌པ༌ ཅོ༌ཁན༌གུན༌ ཨིན༌ནོག༌། ངའ༌ ཅེས༌པ༌ ཅོ༌ཁན༌གུན༌ལ༌ ངའེ༌ ཡབ༌བིའང༌ ཅེས༌པ༌ ཅོའ༌ ཛད༌ཨིན༌, ཡང༌ ངེའང༌ ཁོང༌གུན༌ལ༌ ཅམས༌པ༌ ཅོས༌ཏེ༌, ང༌རང༌ ཁོང༌གུན༌ལ༌ སྔོན༌ཅུག༌ཨིན༌།"
22 ཏེ༌ནེ༌ ཡུ༌དཱའེ༌ ༼ཀར༌ཡོད༌པ༌ མན༌ཁན༌བོའེ༌༽ ཟེརས༌, "ཀྱེ༌ གཙོ༌བོ༌, ཉེ༌རང༌ ང༌ཞ༌གུན༌ལ༌ སྔོན༌ཅུག༌ཅེས༌ ཡང༌ ཇིག༌རྟེན༌པ༌གུན༌ལ༌ སྔོན༌ མི༌ཅུག༌ཅེས༌པོ༌ ཅི༌ཕིའ༌ ཨིན༌?"
23 ཡེ༌ཤུའི༌ ལན༌སལས༌, "ང༌ ཅམས༌པ༌ ཅོ༌ཁན༌གུན༌ནི༌ ངའེ༌ ལབ༌ཞ༌གུན༌ནི༌ཀ༌ ལག༌ལེན༌ ཅོ༌ཨིན༌། ངའེ༌ ཡབ༌བི༌ ཁོང༌གུན༌ལ༌ ཅམས༌པ༌ ཛད༌ཨིན༌ ཡང༌ ང༌ཞའ༌ ཉིས༌ཀོ༌ ཁོང༌གུན༌ནི༌ཀ༌ ཡོངས༌ཏེ༌ ཁོང༌གུན༌ ཉམ༌པོ༌ དུག༌ཨིན༌། 24 ང༌ ཅམས༌པ༌ མ༌ཅོ༌ཁན༌གུན༌ནི༌ ངའེ༌ ལབ༌ཞ༌གུན༌ སྲུང༌ང༌ མ༌ནོག༌། ཁྱོ༌ཞའེ༌ ཚོར༌ཁན༌ནི༌ འི༌ ལོན༌བོ༌ ང༌རང༌ངི༌ མན༌, ང༌ ཀལ༌ལ༌ ཛད༌ཁན༌ནི༌ ངའེ༌ ཡབ༌བི༌ ཆོགས༌ནེ༌ ཨིན༌། 25 ང༌ ཁྱོ༌ཞ༌གུན༌ ཉམ༌པོ༌ ཡོད༌ ཟ༌ནེ༌ ངའེ༌ འི༌ ཚང༌མ༌ ཟེར༌ཏེ༌ ཨིན༌། 26 ཨིན༌ནའང༌ ཡབ༌བི༌ ངའེ༌ ཚབས༌ལ༌ རོགས༌ ཛད༌ཁན༌, དམ༌པའེ༌ ཐུག༌ཉིད༌ ཁྱོ༌ཞའ༌ ཀལ༌ལ༌ ཛད༌ཨིན༌། ཁོང༌ངི༌ ཁྱོ༌ཞ༌གུན༌ལ༌ ཅི༌ཚང༌མ༌ ལབ༌བ༌ ཛད༌ཏེ༌ ངའེ༌ ཤད༌ཁན༌ ཚང༌མ༌ ཁྱོ༌ཞ༌གུན༌ལ༌ ཨིད༌ཏུ༌ སྐུལ༌ཨིན༌། 27 ཞི༌དེ༌, ངའེ༌ ཁྱོ༌ཞའ༌ ཉམ༌པོ༌ བོར༌རད༌, ངའེ༌ ཞི༌དེ༌བོ༌ ཁྱོ༌ཞའ༌ ཏང༌ངད༌, ངའེ༌ ཞི༌དེ༌བོ༌ ཇིག༌རྟེན༌པའེ༌ ཞི༌དེ༌ ཙོགས༌ མན༌། ཁྱོ༌ཞ༌གུན༌ནི༌ སེམས༌ལ༌ ནགས༌ མ༌ལྟན༌ ཡང༌ ཇིགས༌ མ༌ཇིགས༌། 28 ང༌ ཆའད༌ ཡང༌ ཁྱོ༌ཞའེ༌ཀ༌ ལོགས༌ཏེ༌ ཡོང༌ཨིན༌ ངའེ༌ ཟེར༌ཁན༌བོ༌ ཁྱོ༌ཞའེ༌ ཚོར༌ཏེ༌ ཨིན༌ནོག༌། གལ༌ཏེས༌ ཁྱོ༌ཞའེ༌ ང༌ ཅམས༌པ༌ ཅོའད༌ན༌ ང༌ ཡབ༌བི༌ཀ༌ ཆ༌ཅེས༌ལ༌ ཁྱོ༌ཞའ༌ ཐད༌པོ༌ ཡོད༌གྲོ༌, ཅིའ༌ཟེར༌ན༌ ཡབ༌ ངའེ༌ སང༌ ཀྲག༌ག༌ ཨིན༌། 29 ཏེ༌གུན༌ བྱུང༌ང༌ཅིག༌ ཁྱོ༌ཞའེ༌ ངའེ༌ཀ༌ ཏད༌པ༌ ཁྱོང༌ཅེས༌སི༌ ཕིའ༌ འི༌ ཚང༌མ༌ བྱུང༌ངི༌ སང༌ སྔུན༌ལ༌ ངའེ༌ ཁྱོ༌ཞ༌གུན༌ལ༌ ཤད༌ཏེ༌ ཨིན༌། 30 ངའ༌ ཁྱོ༌ཞ༌གུན༌ལ༌ སྤེ༌ར༌ ཏང༌ཅེས༌སི༌ ཏུས༌ མང༌པོ༌ཞིག༌ མེད༌, ཅིའ༌ཟེར༌ན༌ འི༌ ཇིག༌རྟེན༌ནི༌ ཝང༌སྲུལ༌པ༌བོ༌ ཡོང༌དུག༌, ཁོའ༌ ངའེ༌ཀ༌ ཅའང༌ ཝང༌ མེད༌། 31 ཨིན༌ནའང༌ ངའེ༌ ཡབ༌བ༌ ཅམས༌པ༌ དང༌ ཁོང༌ངི༌ ང༌ བཀའ༌ སལ༌ལ༌ ཛད༌ཁན༌གུན༌ དྲན༌དྲ༌ ཅོ༌ཅེས༌པོ༌ ཇིག༌རྟེན༌པ༌གུན༌ལ༌ གྱུས༌ ཡོང༌གོས༌། ཏ༌ ལོངས༌ ང༌དང༌གུན༌ འི༌ཀ༌ནེ༌ ཆེན༌།"