15
རྒུན༌ནི༌ ལྕང༌མ༌ དང༌ ཡལ༌ག༌།
15:1 ནེ༌ 17
1 གཙོ༌བོ༌ ཡེ༌ཤུའི༌ མོལས༌, "ང༌ ནི༌ རྒུན༌ནི༌ ལྕང༌མ༌ དེན༌བ༌ དང༌ ངའེ༌ ཡབ༌ ཚས༌ཁན༌བོ༌ ཨིན༌། 2 བྲས༌བུ༌ མ༌ཆགས༌ཁན༌ནི༌ ཡལ༌ག༌གུན༌ ངའེ༌ ཀ༌ནེ༌ ཅད༌ཏེ༌ ཕང༌ང༌ ཛད༌དུག༌, ཡང༌ བྲས༌བུ༌ ཆགས༌ཁན༌ནི༌ ཡལ༌ག༌གུན༌ལ༌ མང༌ང༌ ཆགས༌ཤེས༌སི༌ ཕིའ༌ གོར༌ར༌ ཛད༌དུག༌། 3 ངའེ༌ ཁྱོ༌ཞའ༌ ཤད༌ཁན༌ནི༌ ལབ༌ཞ༌གུན༌ནི༌ ཁྱོ༌ཞ༌གུན༌ རྩང༌མ༌ ཅོ༌ ཚར༌ཏེ༌ ཨིན༌། 4 ངའེ༌ ནང༌ང༌ དུག༌ཤིག༌ ཡང༌ ང༌ ཁྱོ༌ཞའེ༌ ནང༌ང༌ དུག༌ཨིན༌། ཡལ༌ག༌ ཅིག༌པོའ༌ བྲས༌བུ༌ ཆགས༌ ཉན༌ན༌ མ༌ནོག༌, ཏེ༌བོ༌ རྒུན༌ནི༌ ལྕང༌མའེ༌ ནང༌ང༌ ནས༌ཏེ༌ ལུས༌གོས༌། ཏེན༌ན༌ ཙོགས༌ལ༌ གལ༌ཏེས༌ ཁྱོ༌ཞའ༌ ངའེ༌ ནང༌ང༌ མ༌དུག༌ན༌ ཁྱོ༌ཞ༌གུན༌ནའང༌ བྲས༌བུ༌ མི༌ཆགས༌།
5 ང༌ ནི༌ རྒུན༌ནི༌ ལྕང༌མ༌ ཡང༌ ཁྱོ༌ཞའ༌ ངའེ༌ ཡལ༌ག༌གུན༌ ཨིན༌། ངའེ༌ ནང༌ང༌ ནས༌ཁན༌ ཡང༌ ང༌ ཁོང༌གུན༌ནི༌ ནང༌ང༌ ནས༌ཁན༌གུན༌ལ༌ བྲས༌བུ༌ མང༌པོ༌ ཆགས༌ཨིན༌, ང༌ནེ༌ བེ༌ཏེ༌ ཁྱོ༌ཞ༌གུན༌ལ༌ ཅའང༌ ཅོ༌ མི༌ཉན༌། 6 ངའེ༌ ནང༌ང༌ མ༌དུག༌ཁན༌གུན༌, སྐམས༌ཁན༌ནི༌ ཡལ༌ག༌ ཐག༌རིང༌ང༌ ཕངས༌ཁན༌ ཙོགས༌ ཨིན༌, ཏེ༌གུན༌ ལྡུས༌ཏེ༌ མེ༌ ནང༌ང༌ ཕངས༌ཏེ༌ སྲག༌ཨིན༌། 7 གལ༌ཏེས༌ ཁྱོ༌ཞའ༌ ངའེ༌ ནང༌ང༌ ནས༌ཏེ༌ ངའེ༌ ལབ༌ཞ༌གུན༌ ཁྱོ༌ཞའེ༌ སེམས༌སི༌ ནང༌ང༌ ལུས༌ན༌, ཁྱོ༌ཞའེ༌ དོད༌པ༌ ཅོས༌ཏེ༌ ཅི༌ཞིག༌ ཏོང༌ ཟེར༌ནའང༌ ཁྱོ༌ཞའ༌ སལ༌ཨིན༌། 8 ཁྱོ༌ཞའ༌ བྲས༌བུ༌ མང༌པོ༌ ཆགས༌ཏེ༌ ངའེ༌ དེན༌བའེ༌ ལོབ༌ཕྲུགས༌ ཨིན༌ཁན༌བོ༌ ལྟན༌ན༌ཅིག༌ ངའེ༌ ཡབ༌བ༌ སྤལ༌ ཐོབ༌ཨིན༌།
9 ཡབ༌བི༌ ང༌ ཅམས༌པ༌ ཛད༌ད༌ ཙོགས༌ལ༌ ངའེ༌ ཁྱོ༌ཞའ༌ ཅམས༌པ༌ ཅོའད༌། ངའེ༌ ཅམས༌པའེ༌ ནང༌ང༌ ནས༌ཏེ༌ དུག༌ཤིག༌། 10 གལ༌ཏེས༌ ཁྱོ༌ཞའེ༌ ངའེ༌ བཀའ༌གུན༌ལ༌ ཁའ༌ཉན༌ན༌ ཁྱོ༌ཞ༌གུན༌ ངའེ༌ ཅམས༌པའེ༌ ནང༌ང༌ ལུས༌ཨིན༌ ཀ༌ཟུག༌ ངའེ༌ ང༌རང༌ངི༌ ཡབ༌བི༌ བཀའ༌གུན༌ལ༌ ཁའ༌ཉན༌ཏེ༌ ཁོང༌ངི༌ ཅམས༌པའེ༌ ནང༌ང༌ ལུས༌ཏེ༌ ཨིན༌། 11 ངའེ༌ ཐད༌པོ༌ ཁྱོ༌ཞའེ༌ ནང༌ང༌ ལུས༌ཤེས༌ ཡང༌ ཁྱོ༌ཞ༌གུན༌ལ༌ ཐད༌པོ༌ གང༌པོ༌ ཐོབ༌ཅེས༌སི༌ ཕིའ༌ ངའེ༌ འི༌ སྤེ༌ར༌གུན༌ ཁྱོ༌ཞའ༌ ཟེར༌ཏེ༌ ཨིན༌། 12 ངའེ༌ བཀའ༌ ནི༌ འི༌བོ༌ ཨིན༌, ངའེ༌ ཁྱོ༌ཞ༌གུན༌ལ༌ ཅམས༌པ༌ ཅོ༌ཁན༌ ཙོགས༌ ཁྱོ༌ཞའེ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཤིག༌། 13 ཛ༌འོ༌གུན༌ནི༌ ཕིའ༌ ཁོ༌རང༌ངི༌ སྲོག༌པོ༌ ཏང༌ཅེས༌སི༌ སང༌ ཆེའ༌ ཡ༌ཤ༌ཤིག༌ མེད༌། 14 ངའེ༌ བཀའ༌ ཏང༌ཁན༌གུན༌ ཅོ༌ན༌ ཁྱོ༌ཞའ༌ ངའེ༌ ཛ༌འོ༌ ཨིན༌། 15 ཏ༌ནེ༌ཕར༌ལ༌ ངའེ༌ ཁྱོ༌ཞའ༌ ཡོག༌པོ༌ མི༌ཟེར༌ ཅིའ༌ཟེར༌ན༌ ཡོག༌པོའ༌ སྤོན༌བོའེ༌ ལས༌སི༌ སྐོར༌ལ༌ གྱུས༌ ཡོང༌ང༌ མ༌ནོག༌། ཨིན༌ནའང༌ ཁྱོ༌ཞ༌གུན༌ལ༌ ངའེ༌ ཛ༌འོ༌ ཟེར༌རད༌ ཅིའ༌ཟེར༌ན༌ ཡབ༌ནེ༌ ཚོར༌ཁན༌ ཚང༌མ༌ ངའེ༌ ཁྱོ༌ཞའ༌ ཤད༌ཏེ༌ ཨིན༌། 16 ཁྱོ༌ཞའེ༌ ང༌ ལྡམས༌ཏེ༌ མན༌, ངའེ༌ ཁྱོ༌ཞ༌གུན༌ ལྡམས༌ཏེ༌ ཨིན༌། ཁྱོ༌ཞ༌གུན༌ སོང༌ཏེ༌ ཏུས༌གྱུན༌ ལུས༌ཤེས༌སི༌ བྲས༌བུ༌ སྨིན༌ཅུག༌ཅེས༌ལ༌ ངའེ༌ སྐོས༌ཏེ༌ ཨིན༌། ཏེ༌ནེ༌ ངའེ༌ མིང༌ངི༌ ནང༌ང༌ ཁྱོ༌ཞའེ༌ ངའེ༌ ཡབ༌བ༌ ཅི༌ཞིག༌ ཞུ༌ནའང༌ སལ༌ལ༌ ཛད༌ཨིན༌། 17 ངའེ༌ ཁྱོ༌ཞའ༌ འི༌ བཀའ༌བོ༌ ཏང༌ངད༌, ཅིག༌ དང༌ ཅིག༌ག༌ ཅམས༌པ༌ ཅོས༌།"
ཇིག༌རྟེན༌པ༌གུན༌ནི༌ ཡེ༌ཤུའི༌ ལོབ༌ཕྲུགས༌གུན༌ལ༌ ནཕ༌རད༌ ཅོས༌།
15:18 ནེ༌ 16:4
18 གཙོ༌བོ༌ ཡེ༌ཤུའི༌ མོལས༌, "གལ༌ཏེས༌ ཇིག༌རྟེན༌པ༌གུན༌ནི༌ ཁྱོ༌ཞའ༌ ནཕ༌རད༌ ཅོ༌ན༌ ཨིད༌ཏུ༌ ཅོས༌, ཁོང༌གུན༌ནི༌ ནཕ༌རད༌ ཅོ༌ཁན༌ ཏང༌པོ༌བོ༌ ང༌ ཨིན༌པིན༌། 19 གལ༌ཏེས༌ ཁྱོ༌ཞའ༌ ཇིག༌རྟེན༌པའེ༌ ཨིན༌པིན༌ན༌, ཁོང༌ངི༌ ཁྱོ༌ཞའ༌ ཁོ༌རང༌གུན༌ནི༌ ཕྲུ༌གུ༌ ཙོགས༌ལ༌ ཅེས༌པ༌ ཅོས༌ཏེ༌ ཡོད༌གྲོ༌། ཨིན༌ནའང༌ ཏ༌ ཁྱོ༌ཞའ༌ ཇིག༌རྟེན༌པའེ༌ ཁག༌ཤིག༌ མ༌ནོག༌། ངའེ༌ ཇིག༌རྟེན༌པའེ༌ ཕྲོ༌ནེ༌ ཁྱོ༌ཞ༌གུན༌ ལྡམས༌ པ༌སང༌, ཁོང༌གུན༌ནི༌ ཁྱོ༌ཞའ༌ ནཕ༌རད༌ ཅོའ༌ནོག༌། 20 ངའེ༌ ཁྱོ༌ཞའ༌ འི༌ སྤེ༌ར༌ ཟེར༌ཁན༌བོ༌ ཨིད༌ཏུའ༌ བོར༌ཤིག༌, 'ཡོག༌པོ༌ སྤོན༌བོའེ༌ སང༌ ཆེའ༌ མ༌ནོག༌' གལ༌ཏེས༌ ཁོང༌གུན༌ནི༌ ང༌ ནགས༌བར༌དོ༌ ལྟན༌ཏེ༌ ཨིན༌ན༌ ཏེ༌ནེ༌ ཁོང༌གུན༌ནི༌ ཁྱོ༌ཞའང༌ ནགས༌བར༌དོ༌ ལྟན༌ཨིན༌། གལ༌ཏེས༌ ཁོང༌གུན༌ནི༌ ངའེ༌ ལབ༌ཞ༌གུན༌ནི༌ཀ༌ ལག༌ལེན༌ ཅོས༌པིན༌ན༌ ཏེ༌ནེ༌ ཁྱོ༌ཞའེ༌ ལབ༌ཞ༌གུན༌ནི༌ཀའང༌ ལག༌ལེན༌ ཅོ༌ཨིན༌། 21 ཁྱོ༌ཞའ༌ ངའེ༌ ཨིན༌ཅེས༌པོའེ༌ ཁོང༌གུན༌ནི༌ ཁྱོ༌ཞའ༌ ཏེ༌ཟུག༌ ཅོ༌ཨིན༌, ཅིའ༌ཟེར༌ན༌ ཁོང༌གུན༌ནི༌ ང༌ ཀལ༌ལ༌ ཛད༌ཁན༌བོ༌ ཤེས༌ས༌ མ༌ནོག༌། 22 གལ༌ཏེས༌ ང༌ ཡོངས༌ཏེ༌ ཁོང༌གུན༌ལ༌ ངའེ༌ ཡབ༌བི༌ ལོན༌བོ༌ མ༌ཤད༌པིན༌ན༌ ཁོང༌གུན༌ ཁོང༌རང༌གུན༌ནི༌ སྡིག༌པའེ༌ ཕིའ༌ ནོངས༌ཅན༌ མན༌གྲོ༌། ཨིན༌ནའང༌ ཏ༌ ཁོང༌གུན༌ནི༌ ཁོ༌རང༌ངི༌ སྡིག༌པའེ༌ ཕིའ༌ ཅའང༌ སྐྱོན༌ ཅོ༌ མི༌ཉན༌། 23 ངའ༌ ནཕ༌རད༌ ཅོ༌ཁན༌གུན༌ནི༌ ངའེ༌ ཡབ༌བའང༌ ནཕ༌རད༌ ཅོའ༌ནོག༌། 24 གལ༌ཏེས༌ ངའེ༌ ཁོང༌གུན༌ནི༌ ཕྲོའ༌ ཞན༌ སུའིང༌ མ༌ཅོས༌ཁན༌ནི༌ ཏེ༌ ཧ༌ལས༌ཤེས༌སི༌ ལྟས༌གུན༌ མ༌ལྟན༌པིན༌ན༌, ཁོང༌གུན༌ ཁོང༌རང༌གུན༌ནི༌ སྡིག༌པའེ༌ ཕིའ༌ ནོངས༌ཅན༌ མན༌གྲོ༌། ཨིན༌ནའང༌ ཁོང༌གུན༌ནི༌ ཏེ༌གུན༌ ཐོང༌ཏེའང༌ ང༌ དང༌ ངའེ༌ ཡབ༌ ཉིས༌ཀོའ༌ ནཕ༌རད༌ ཅོས༌། 25 ཁོང༌གུན༌ནི༌ བཀའ༌ཁྲིམས༌སི༌ ནང༌ང༌, 'ཁོང༌གུན༌ནི༌ ངའ༌ ཏོན༌ཏག༌ མེད༌པ༌ ནཕ༌རད༌ ཅོས༌' བྲིས༌ཏེ༌ ཡོད༌ཁན༌བོ༌ དྲན༌དྲ༌ གྲུབ༌དུག༌།
26 ཨིན༌ནའང༌ ངའེ༌ རོགས༌ ཛད༌ཁན༌བོ༌ ཁྱོ༌ཞ༌གུན༌ལ༌ ཀལ༌ཨིན༌། ཁོང༌ ནི༌ མི༌གུན༌ དྲང༌པོའེ༌ ཆོགས༌ལ༌ ཁྲིད༌ཁན༌ དམ༌པའེ༌ ཐུག༌ཉིད༌ ཨིན༌། ཁོང༌ ཡབ༌ དཀོན༌མཆོག༌གི༌ ཆོགས༌ནེ༌ སྐྱོད༌ཏེ༌ ངའེ༌ སྐོར༌ལ༌ སྤང༌པོ༌ སལ༌ཨིན༌། 27 ཁྱོ༌ཞ༌གུན༌ནིའང༌ ངའེ༌ སྐོར༌ལ༌ སྤང༌པོ༌ ཏང༌གོས༌, ཅིའ༌ཟེར༌ན༌ ཁྱོ༌ཞ༌གུན༌ གོ༌མ༌ནེ༌ ཕར༌ལ༌ ང༌ ཉམ༌པོ༌ ཡོད༌ཏེ༌ ཨིན༌ནོག༌།