15
ཡེ༌ཤུ༌ པི༌ལ༌ཏུ༌ ཡོད༌ས༌ ཁྱེརས༌།
15:1 ནེ༌ 15
1 ང༌ཏོག༌ མ༌ ང༌མོ༌ནེ༌ བླ༌མ༌ འུ༌སྐྱོང༌གུན༌, ཡ༌ཧུ༌དཱ༌པའེ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌ གང༌པོའེ༌ གཙོ༌བོ༌ ཡེ༌ཤུ༌ སད༌ཅེས༌ལ༌ ཐག༌ཅདས༌། ཁོང༌གུན༌ནི༌ ཁོང༌ངི༌ ཆག༌ ལྡམས༌ཏེ༌ ཀའ༌ལོན༌ པི༌ལ༌ཏུའི༌ ལག༌ག༌ སྟད༌ད༌ ཁྱེརས༌།
2 པི༌ལ༌ཏུའི༌ ཡེ༌ཤུའ༌ ཏྲིས༌, "ཁྱོ༌རང༌ ཡ༌ཧུ༌དཱ༌པའེ༌ གྱལ༌པོ༌ ཨིན༌ན༌?"
ཡེ༌ཤུའི༌ ལན༌སལས༌, "ཨིན༌, ཉེ༌རང༌ངི༌ ཟེར༌ཁན༌བོ༌ ཨིན༌།"
3 ཏེ༌ནེ༌ བླ༌མ༌ འུ༌སྐྱོང༌གུན༌ནི༌ ཁོང༌ངི༌ གྱབ༌གལ༌ལ༌ ཉད༌གལ༌ མང༌པོ༌ ཀལས༌། 4 པི༌ལ༌ཏུའི༌ ཡང༌སྐྱར༌ ཁོང༌ང༌ ཏྲིས༌, "ཁྱོ༌རང༌ངི༌ ཁོང༌གུན༌ལ༌ ལན༌ཏང༌ང༌ མེད༌ད༌? ལྟོས༌སའང༌! ཁྱོ༌རང༌ངི༌ གྱབ༌གལ༌ལ༌ ཁོང༌གུན༌ནི༌ ཙམ༌ཤིག༌གི༌ སྐྱོན༌རྗོད༌ ཅོ༌རུག༌?" 5 ཨིན༌ནའང༌ ཡེ༌ཤུའི༌ ཅའང༌ ལན༌ མ༌སལ༌པ༌, པི༌ལ༌ཏུ༌ ཧ༌ལས༌།
6 ལུག༌སྲོལ༌ ནང༌ཞིན༌ པེ༌སག༌གི༌ ཏུས༌ཆེན༌ནི༌ ཏུས༌ལ༌, ཀའ༌ལོན༌ནི༌ མི༌གུན༌ནི༌ ཞུ༌ཝ༌ ནང༌ཞིན༌ ཙོན༌པ༌ ཅིག༌ ཕུད༌དད༌པིན༌། 7 ཏེ༌ཏུས༌ལ༌ རོམ༌མི༌ ཞུང༌ངི༌ གྱབ༌གལ༌ལ༌ ངོ༌ལོག༌ ཅོས༌ཏེ༌ མི༌ སད༌ཁན༌ བཱ༌ར༌བས༌ དང༌ ཁོའེ༌ ཕྲོ༌པ༌གུན༌ ཙོན༌ཁང༌ངི༌ ནང༌ང༌ ཡོད༌པིན༌། 8 མི༌ཚོགས༌ པི༌ལ༌ཏུ༌ ཡོད༌ས༌ ཡོངས༌ཏེ༌ ཁོའ༌ ཏུས༌གྱུན༌ ཙོགས༌ལ༌ ཙོན༌པ༌ཞིག༌ ཕུད༌ཅེས༌སི༌ ཕིའ༌ ཟེརས༌།
9 པི༌ལ༌ཏུའི༌ ཏྲིས༌, "ཁྱོ༌ཞའེ༌ ཕིའ༌ ངའེ༌ ཡ༌ཧུ༌དཱ༌པའེ༌ གྱལ༌པོ༌བོ༌ ཕུད༌ད༌?" 10 ༼བླ༌མ༌ འུ༌སྐྱོང༌གུན༌ ཡེ༌ཤུའི༌ཀ༌ ཚིག༌ཅེས༌པོའེ༌, ཁོང༌ ཁོའེ༌ ལག༌ག༌ སྟད༌ཁན༌བོ༌ པི༌ལ༌ཏུའ༌ གྱུས༌སོང༌།༽ 11 ཨིན༌ནའང༌ བླ༌མ༌ འུ༌སྐྱོང༌གུན༌ནི༌ མི༌ཚོགས༌ལ༌ ལྕེ༌ ཀོལ༌ཏེ༌ ཡེ༌ཤུའི༌ ཚབས༌ལ༌ བཱ༌ར༌བས༌ ཕུད༌ཅེས༌སི༌ ཕིའ༌ པི༌ལ༌ཏུའ༌ ཞུ༌ཝ༌ ཕུལ༌ཅུགས༌། 12 པི༌ལ༌ཏུའི༌ ཁོང༌གུན༌ལ༌ ཏྲིས༌, "ཏེ༌ནེ༌ ངའེ༌ ཁྱོ༌ཞ༌གུན༌ནི༌ ཡ༌ཧུ༌དཱའེ༌ གྱལ༌པོ༌ ཟེར༌ཁན༌ནི༌ མི༌བོའ༌ ཅི༌ ཅོ༌?"
13 ཁོང༌གུན༌ནི༌ ཀུ༌ཅོ༌ ཏང༌ཨིན༌ ལན༌ཏངས༌, "ཁོ༌ རྐྱང༌ཤིང༌ང༌ རྐྱོང༌།"
14 པི༌ལ༌ཏུའི༌ ཏྲིས༌, "ཅི༌ཕིའ༌, ཁོའེ༌ ཁྲིམས༌སི༌ གྱབ༌གལ༌ ཅི༌ ཅོས༌ཏོག༌?"
ཨིན༌ནའང༌ མི༌ཚོགས༌སི༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཟེརས༌, "ཁོ༌ རྐྱང༌ཤིང༌ངི༌ཀ༌ རྐྱོང༌།"
15 མི༌ཚོགས༌པོ༌ ཐད༌ཅུགས༌ཏེ༌ པི༌ལ༌ཏུའི༌ ཁོང༌གུན༌ནི༌ ཕིའ༌ བཱ༌ར༌བས༌ ཙོན༌ཁང༌ནེ༌ ཕུད༌ཅུགས༌ ཡང༌ ཡེ༌ཤུའ༌ རྟལ༌ལྕག༌ གྱབ༌ཏེ༌ རྐྱང༌ཤིང༌ངི༌ཀ༌ རྐྱང༌ཅེས༌ལ༌ མག༌མི༌ གུན༌ལ༌ སྟདས༌།
མག༌མི༌གུན༌ནི༌ ཡེ༌ཤུའ༌ ཚིག༌པ༌ སྲགས༌།
15:16 ནེ༌ 20
16 མག༌མི༌གུན༌ནི༌ ཀའ༌ལོན༌ནི༌ ཁར༌, ཀ༌བོའ༌ པརའ༌ཏོ༌རི༌འུམ༌ ཟེར༌རད༌, ཏེ༌ ནང༌ང༌ གཙོ༌བོ༌ ཡེ༌ཤུ༌ ཁྱེར༌ཏེ༌ མག༌ཚོགས༌ གང༌པོའ༌ ཛོམ༌ཅེས༌ལ༌ བོདས༌། 17 ཁོང༌གུན༌ནི༌ ཁོང༌ང༌ གྱལ༌པོ༌ གོན༌ཁན༌ ཙོགས༌སི༌ ནམ༌ཟའ༌ མར༌པོ༌ཞིག༌ སྐོནས༌, ཡང༌ ཚེར༌མའེ༌ ཐོར༌ཤོག༌ སླས༌ཏེ༌ ཁོང༌ངི༌ ཨུའ༌ སྐོནས༌། 18 ཁོང༌གུན༌ནི༌ ཁོང༌ང༌ ཚིག༌པ༌ སྲག༌ཨིན༌ ཟེརས༌, "ཡ༌ཧུ༌དཱ༌པའེ༌ གྱལ༌པོའ༌ ཆག༌ཚལ༌།" 19 ཁོང༌གུན༌ནི༌ ཁོང༌ངི༌ ཨུའ༌ བེར༌ཀ༌ ཉམ༌པོ༌ ལན༌ མང༌པོ༌ རྡུངས༌ཏེ༌ ཁོང༌ང༌ ཆིལ༌མག༌ གྱབས༌, ཡང༌ ཡེ༌ཤུའི༌ དུན༌ལ༌ པིག༌མོའེ༌ཀ༌ གྱེལ༌ཏེ༌ ཁོང༌ང༌ ཆག༌ཕུལ༌ ཟུན༌ཏངས༌། 20 ཚིག༌པ༌ སྲགས༌ཏེ༌ སྟིང༌ནེ༌ ཁོང༌གུན༌ནི༌ ནམ༌ཟའ༌ མར༌པོ༌བོ༌ ཕུད༌ཏེ༌, ཡེ༌ཤུའ༌ ཁོང༌རང༌ངི༌ ནམ༌ཟའ༌བོ༌ སྐོནས༌། ཏེ༌ནེ༌ ཁོང༌ རྐྱང༌ཤིང༌ངི༌ཀ༌ རྐྱང༌ཅེས༌ལ༌ ཁྱེརས༌།
རྐྱང༌ཤིང༌ངི༌ཀ༌ རྐྱངས༌།
15:21 ནེ༌ 32
21 གཙོ༌བོ༌ ཡེ༌ཤུ༌ ཁྲིད༌ཏེ༌ ཁྱེར༌ ཟ༌ནེ༌ ཨ༌ལེག༌ཟན༌དེར༌ དང༌ རུ༌ཕུས༌སི༌ ཨ༌བ༌, ཀི༌རིན༌པ༌ ཤི༌མོན༌ གམ༌ཡུལ༌ནེ༌ གྱལ༌སའེ༌ ནང༌ང༌ ཡོང༌ངད༌པིན༌ ཡང༌ མག༌མི༌གུན༌ནི༌ ཁོའ༌ ཝང༌ ཏངས༌ཏེ༌ ཡེ༌ཤུའི༌ རྐྱང༌ཤིང༌ ཁུར༌ཅུགས༌། 22 ཁོང༌གུན༌ནི༌ ཡེ༌ཤུ༌ གོལ༌གོ༌ཐཱ༌ ༼ཀ༌བོའེ༌ ཏོན༌ཏག༌པོ༌ གོའི༌ རུས༌པའེ༌ ས༌ཀྱད༌༽ ཟེར༌ཁན༌ནི༌ ནས༌སའེ༌ཀ༌ ཁྱེརས༌།" 23 ཏེ༌ནེ༌ ཁོང༌གུན༌ནི༌ ཡེ༌ཤུའ༌ མའེར༌ *15:23 མའེར༌ ཟེར༌ཁན༌བོ༌ རྐྱང༌ཤིང༌ངི༌ཀ༌ རྐྱངས༌ཁན༌ནི༌ མི༌གུན༌ལ༌ ཟུ༌མོ༌ ཉུ༌ངུན༌ ཚོར༌ཅེས༌སི༌ ཕིའ༌ ཐུང༌ང༌ ཏང༌ང༌ནོག༌ ཟེར༌ཁན༌ནི༌ སྨན༌ རྒུན༌ཆང༌ངི༌ ནང༌ང༌ སྲེས༌ཏེ༌ ཏངས༌, ཨིན༌ནའང༌ ཁོང༌ངི༌ ཏེ༌བོ༌ དོན༌ན༌ མ༌ཛདས༌། 24 ཁོང༌གུན༌ནི༌ ཡེ༌ཤུ༌ རྐྱང༌ཤིང༌ངི༌ཀ༌ རྐྱངས༌ ཡང༌ ཁོང༌ངི༌ ནམ༌ཟའ༌ བགོས༌ཏེ༌ སུའ༌ ཐོབ༌དུག༌ ལྟ༌ཅེས༌ལ༌ ཆོ༌ལོ༌ རིལས༌།
25 ཡེ༌ཤུ༌ རྐྱང༌ཤིང༌ངི༌ཀ༌ རྐྱང༌ ཟ༌ནེ༌, ང༌ཏོག༌གི༌ ཆུ༌ཚོད༌ དགུ༌པ༌ ཆའད༌པིན༌། 26 ཁོང༌ངི༌ ཨུའི༌ སྟག༌ག༌ ཉད༌གལ༌ ཀལ༌ཁན༌ནི༌ སྟགས༌པོའེ༌ཀ༌ ཡ༌ཧུ༌དཱ༌པའེ༌ གྱལ༌པོ༌ བྲིས༌ཏེ༌ ཡོད༌པིན༌། 27 ཅག༌པ༌ ཉིས༌ ཁོང༌ ཉམ༌པོ༌ རྐྱང༌ཤིང༌ངི༌ཀ༌ རྐྱངས༌, ཅིག༌པོ༌ ཁོང༌ངི༌ ཡས༌པ༌ ཡང༌ ཅིག༌པོ༌ ཡོ༌མའ༌། 28 †15:28 སྔུན༌མའེ༌ གིརིས༌སི༌ སྤེ༌ཆ༌ ཁ༌ཅིག༌གི༌ ནང༌ང༌ 15:28 "འི༌བོའེ༌ དམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌བོ༌ 'ཁོང༌ སྡིག༌ཅན༌གུན༌ནི༌ ཕྲོའ༌ རྩི༌ཨིན༌' ཟེར༌ཁན༌བོ༌ དྲན༌དྲའ༌ གྲུབ༌ཏེ༌ ཨིན༌ནོག༌" བྲིས༌ཏེ༌ ཡོད༌ཏེ༌ ཨིན༌ནོག༌།
29 ཏེ༌ ནས༌ས༌ གྱུད༌ཏེ༌ གྲུལ༌ཁན༌གུན༌ནི༌ གོ༌ ཡུག༌ཏེ༌ སྨད༌ར༌ ཏང༌ཨིན༌ ཟེརས༌, "ཆོད༌ཁང༌ ཤིགས༌ཏེ༌ ཞག༌ སུམ༌མི༌ ནང༌ང༌ རྩིག༌ཨིན༌ ཟེར༌ཁན༌ ཁྱོད༌, 30 རྐྱང༌ཤིང༌ངི༌ ཀ༌ནེ༌ ཡོག༌ག༌ བབས༌ཏེ༌ རང༌ སྐྱོབ༌བའང༌།"
31 ཏེན༌ན༌ ཙོགས༌ལ༌ བླ༌མ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནིའང༌ ཁོང༌ང༌ ཚིག༌པ༌ སྲག༌ཨིན༌ ཟེརས༌, "ཁོའེ༌ ཞན༌མ༌གུན༌ སྐྱོབས༌, ཨིན༌ནའང༌ ཁོ༌རང༌ སྐྱོབ༌ཉན༌ན༌ མི༌དུག༌། 32 འི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, ཨིས༌ར༌ཨེལ༌པའེ༌ གྱལ༌པོ༌, རྐྱང༌ཤིང༌ངི༌ ཀ༌ནེ༌ དག༌ས༌ བབས༌ཏེ༌ ཡོང༌ན༌, ང༌ཞའེ༌ ཐོང༌ཏེ༌ ཏད༌པ༌ ཅོ༌ཨིན༌།" ཡེ༌ཤུ༌ ཉམ༌པོ༌ རྐྱང༌ཤིང༌ངི༌ཀ༌ རྐྱངས༌ཁན༌གུན༌ནིའང༌ ཁོང༌ང༌ ཚིག༌ ཏངས༌།
གཙོ༌བོ༌ ཡེ༌ཤུ༌ ཀྲོངས༌།
15:33 ནེ༌ 41
33 ཉིང༌གུང༌ནེ༌ ཆུ༌ཚོད༌ སུམ༌པ༌ ཚག༌པ༌ ཡུལ༌ གང༌པོ༌ མུན༌གྲིག༌ སོང༌། 34 ཏེ༌ནེ༌ ཆུ༌ཚོད༌ སུམ༌པའེ༌ཀ༌ ཡེ༌ཤུའི༌ སུང༌སྐད༌ ཆེན༌མོའེ༌ ནང༌ང༌ བོད༌ད༌ ཛདས༌, "ཨེ༌ལོའི༌, ཨེ༌ལོའི༌, ལེ༌མ༌ ས༌བའཅ༌ཐ༌ནི༌?" ཀ༌བོའེ༌ ཏོན༌ཏག༌པོ༌ "ངའེ༌ དཀོན༌མཆོག༌ ངའེ༌ དཀོན༌མཆོག༌ ཉེ༌རང༌ངི༌ ངའ༌ ཅིའ༌ ཕང༌ང༌ ཛད༌ཏེ༌ ཨིན༌?" མོལ༌ཏེ༌ ཨིན༌ནོག༌།
35 ཏེ༌ཀ༌ ཡོད༌ཁན༌གུན༌ནི༌ ནང༌ནེ༌ ཁ༌ཅིག༌གི༌ ཏེ༌བོ༌ ཚོར༌ར༌ཅིག༌ ཟེརས༌, "ཉོན༌ཤིག༌གའང༌ ཁོའེ༌ ལུང༌སྟོན༌པ༌ ཨེ༌ལི༌ཡཱ༌ བོད༌ད༌རག༌།" 36 ཁོང༌གུན༌ནི༌ ཕྲོ༌ནེ༌ ཅིག༌ བང༌ཏངས༌ཏེ༌ སོང༌ ཡང༌ རས༌བལ༌ཞིག༌ རྒུན༌ཆང༌ སྐྱུར༌མོའེ༌ ནང༌ང༌ ཅུགས༌ཏེ༌ བེར༌ཀའེ༌ཀ༌ སྐྱོན༌ཏེ༌ ཡེ༌ཤུའ༌ དོན༌ཅེས༌ལ༌ ཏངས༌། ཞན༌ཅིག༌གི༌ ཟེརས༌, "དུག༌ཅུག༌གའང༌། ལུང༌སྟོན༌པ༌ ཨེ༌ལི༌ཡཱའ༌ ཁོ༌ སྐྱོབ༌བ༌ལ༌ སྐྱོད༌དུག༌ག༌ སྟེན༌བ༌།"
37 ཏེ༌ནེ༌ ཡེ༌ཤུའི༌ སྐད༌ ཆེན༌མོ༌ ཉམ༌པོ༌ ཀུ༌ཅོ༌ སལ༌ཏེ༌ སྟིང༌ཇུག༌གི༌ འུགས༌པོ༌ ནེན༌ན༌ ཛདས༌ ཡང༌ ཀྲོངས༌། 38 ཏེན༌ན༌ ཏུས༌ལ༌ ཆོད༌ཁང༌ངི༌ ཡོ༌ལ༌ ཐུག༌མོ༌བོ༌ ‡15:38 འི༌ ཡོ༌ལ༌བོ༌ ཆོད༌ཁང༌ངི༌ ནང༌ང༌ ཚང༌མའེ༌སང༌ དམ༌པའེ༌ ནས༌ས༌ དང༌ ལུས༌ཁན༌ནི༌ ནས༌སའེ༌ ནང༌ང༌ པར༌ ཕེ༌ཅེས༌ལ༌ ཏངས༌ཏེ༌ ཡོད༌པིན༌། གོ༌ནེ༌ ཇུག༌ ཚོག༌པ༌ ཁག༌ཉིས༌སི༌ ནང༌ང༌ ཆད༌།
39 ཡེ༌ཤུའི༌ དུན༌ལ༌ ཡོད༌ཁན༌ནི༌ མག༌མི༌རྒྱའེ༌ སྤོན༌བོའེ༌ ཁོང༌ ཀྲོངས༌ཚུལ༌བོ༌ ཐོང༌ཏེ༌ ཟེརས༌, "འི༌ མི༌ དཀོན༌མཆོག༌གི༌ སྲས༌ ཨིན༌ཁན༌བོ༌ ཏན༌ཏན༌ ཨིན༌ནོག༌།"
40 ཐག༌རིང༌ཞིག༌ནེ༌ བུ༌མོ༌ ཁ༌ཅིག༌གི༌ ཡེ༌ཤུ༌ ཀྲོང༌ཤེས༌པོ༌ ལྟེན༌ ཡོད༌པིན༌། ཁོང༌གུན༌ནི༌ ཕྲོའ༌ མིར༌ཡམ༌ མག༌དལ༌ལ༌མ༌, ཡོ༌སེབ༌ དང༌ ཁོའེ༌ ནོ༌ ཡ༌ཀོབ༌བི༌ ཨ༌མ༌ མིར༌ཡམ༌ དང༌ ས༌ལོ༌མི༌ གུན༌ ཡོད༌པིན༌། 41 གཱ༌ལིལ༌ལིའི༌ ནང༌ང༌ ཁོང༌གུན༌ ཡེ༌ཤུའི༌ གྱབ༌ནེ༌ གྲུལ༌ཏེ༌ ཁོང༌ངི༌ སྒོས༌དོམ༌གུན༌ རིགས༌ཏེ༌ ཞབ༌ཤི༌ ཞུའད༌པིན༌། ཁོང༌ ཉམ༌པོ༌ ཡེ༌རུ༌ཤ༌ལེམ༌མ༌ ཡོང༌ཁན༌ནི༌ བུ༌མོ༌ མང༌པོ༌ཞིག༌གའང༌ ཏེ༌རུ༌ ཡོད༌པིན༌།
ཡེ༌ཤུའི༌ སྤུར༌ སྤུར༌ཁང༌ངི༌ ནང༌ང༌ བོར༌ར༌ ཛདས༌།
15:42 ནེ༌ 47
42 ཟ༌པ༌སང༌ངི༌ ཞག༌ ༼ཡང༌ན༌ ཤབ༌བད༌དི༌ ངལ༌ཚོའེ༌ ཞག༌གི༌ སང༌ སྔུན༌མའེ༌ ཞག༌པོ༌༽, གྲལ༌གྲིག༌གི༌ ཞག༌ ཨིན༌པིན༌, མུན༌ཅུ༌རུབ༌ཀྱིས༌ ཡོད༌ ཟ༌ནེ༌, 43 ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌ ཁག༌ཅན༌ ཨིན༌ཁན༌ ཨ༌རི༌མ༌ཐཱ༌པ༌ ཡོ༌སེབ༌, ཀ༌བོ༌ དཀོན༌མཆོག༌གི༌ གྱལ༌སྲིད༌ ལེབ༌ཅེས༌ལ༌ སྲུངས༌ཏེ༌ ཡོད༌པིན༌, ཁོའེ༌ ཧམ༌པ༌ ཅོས༌ཏེ༌ པི༌ལ༌ཏུའི༌ཀ༌ སོང༌ཏེ༌ ཁོའ༌ གཙོ༌བོ༌ ཡེ༌ཤུའི༌ སྤུར༌ སལ༌ ཟེར༌ཏེ༌ ཞུ༌ཝ༌ ཕུལས༌། 44 ཡེ༌ཤུ༌ ཀྲོང༌ཚར༌ཁན༌བོ༌ ཚོར༌ཏེ༌ པི༌ལ༌ཏུ༌ ཧ༌ལས༌, ཡང༌ མག༌མི༌རྒྱའེ༌ སྤོན༌བོ༌ བོད༌ཏེ༌ ཡེ༌ཤུ༌ ཀྲོངས༌ཚར༌ཏོག༌ག༌ ཟེར༌ཏེ༌ ཏྲིས༌། 45 ཁོའེ༌ ཀ༌ནེ༌ ཡེ༌ཤུ༌ ཀྲོངས༌ཚར༌ཁན༌བོ༌ ཚོར༌ཏེ༌ སྟིང༌ནེ༌, པི༌ལ༌ཏུའི༌ ཡོ༌སེབ༌བ༌ ཁོང༌ངི༌ སྤུར༌བོ༌ ཁྱེར༌ཅེས༌ལ༌ གོངས༌པ༌ ཏངས༌། 46 ཏེ༌ནེ༌ ཡོ༌སེབ༌བི༌ རས༌ ཀུས༌པོ༌ ཁྱོངས༌ ཡང༌ ཡེ༌ཤུའི༌ སྤུར༌བོ༌ རྐྱང༌ཤིང༌ངི༌ ཀ༌ནེ༌ ཕབས༌ཏེ༌ ཏེ༌ནང༌ང༌ ཏུམས༌, ཡང༌ བྲག༌གི༌ ནང༌ང༌ སྐོས༌ཏེ༌ ཡོད༌ཁན༌ནི༌ སྤུར༌ཁང༌ཞིག༌གི༌ ནང༌ང༌ བོརས༌། ཏེ༌ནེ༌ ཁོའེ༌ སྤུར༌ཁང༌ངི༌ ཁའེ༌ཀ༌ ཁར༌རྡོ༌ ཆེན༌མོ༌ཞིག༌ རིལ༌ཏེ༌ ཀབས༌། 47 མག༌དལ༌ལ༌མ༌ མིར༌ཡམ༌ དང༌ ཡོ༌སེབ༌བི༌ ཨ༌མ༌ མིར༌ཡམ༌མི༌ ཡེ༌ཤུའི༌ སྤུར༌ བོར༌ར༌ ཛད༌ཁན༌ནི༌ ནས༌ས༌བོ༌ ཐོང༌།
*15:23 15:23 མའེར༌ ཟེར༌ཁན༌བོ༌ རྐྱང༌ཤིང༌ངི༌ཀ༌ རྐྱངས༌ཁན༌ནི༌ མི༌གུན༌ལ༌ ཟུ༌མོ༌ ཉུ༌ངུན༌ ཚོར༌ཅེས༌སི༌ ཕིའ༌ ཐུང༌ང༌ ཏང༌ང༌ནོག༌
†15:28 15:28 སྔུན༌མའེ༌ གིརིས༌སི༌ སྤེ༌ཆ༌ ཁ༌ཅིག༌གི༌ ནང༌ང༌ 15:28 "འི༌བོའེ༌ དམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌བོ༌ 'ཁོང༌ སྡིག༌ཅན༌གུན༌ནི༌ ཕྲོའ༌ རྩི༌ཨིན༌' ཟེར༌ཁན༌བོ༌ དྲན༌དྲའ༌ གྲུབ༌ཏེ༌ ཨིན༌ནོག༌" བྲིས༌ཏེ༌ ཡོད༌ཏེ༌ ཨིན༌ནོག༌།
‡15:38 15:38 འི༌ ཡོ༌ལ༌བོ༌ ཆོད༌ཁང༌ངི༌ ནང༌ང༌ ཚང༌མའེ༌སང༌ དམ༌པའེ༌ ནས༌ས༌ དང༌ ལུས༌ཁན༌ནི༌ ནས༌སའེ༌ ནང༌ང༌ པར༌ ཕེ༌ཅེས༌ལ༌ ཏངས༌ཏེ༌ ཡོད༌པིན༌།