2
ཡེ༌ཤུ༌ གྲུལ༌ལ༌ ཛད༌ཁན༌ནི༌ པས༌མོའེ༌ ལམ༌མི༌ཀ༌ གྲུལ༌།
2:1 ནེ༌ 11
1 མ༌ཤི༌ཀའེ༌ ཨིན༌ཅེས༌པོའེ༌ ཁྱོ༌ཞ༌གུན༌ལ༌ སྤོས༌པ༌ མ༌ཐོབ༌བ༌? ཅི༌ མ༌ཤི༌ཀའེ༌ ཅམས༌པའེ༌ ནང༌ང༌ སེམས༌དེ༌ མེ༌རག༌ག༌? ཅི༌ ཁྱོ༌ཞ༌གུན༌ དཀོན༌མཆོག༌གི༌ ཐུག༌ཉིད༌ ཉམ༌པོ༌ བྲེལ༌ཏེ༌ མེད༌ད༌? ཅི༌ ཁྱོ༌ཞ༌གུན༌ལ༌ མ༌ཤི༌ཀའེ༌ ཡ༌ཤ༌ དང༌ སྙིང༌རྗེ༌ མ༌ཐོབ༌བ༌? 2 གལ༌ཏེས༌ ཁྱོ༌ཞའེ༌ ནང༌ང༌ ཏེ༌ ཚང༌མ༌ ཡོད༌ན༌, སྙིང༌ ཅིག༌ གྱུར༌ཏེ༌, ཅིག༌ དང༌ ཅིག༌ག༌ ཅམས༌པ༌ ཅོས༌ཏེ༌, སེམས༌ དང༌ དོད༌པའེ༌ ནང༌ང༌ ཅིག༌ གྱུར༌ཏེ༌ ངའེ༌ ཐད༌པོ༌གུན༌ དྲན༌དྲ༌ གྲུབ༌ཅུག༌ཤིག༌།
3 ཅི༌ཞིག༌གའང༌ རང༌དོད༌ ཡ༌ ཞན༌མའེ༌ རྩི༌ཝ༌ ཐོབ༌ཅེས༌སི༌ རེ༌ཝའེ༌ ནང༌ང༌ མ༌ཅོའ༌, སེམས༌ པས༌མོ༌ ཉམ༌པོ༌ ཞན༌མ༌ རང༌ངི༌ སང༌ མང༌ང༌ རིན༌ཅན༌ སམས༌ཏེ༌ ཅོ༌ཤིག༌། 4 ཁྱོ༌ཞའ༌ རེ༌རེ༌ རང༌དོན༌ ཅིག༌པོ༌ མ༌ཅོའ༌, ཞན༌མའེ༌ ཕན༌ཐོགས༌སི༌ ཕིའང༌ སམ༌བ༌ ཏོང༌ཤིག༌།
5 ཁྱོ༌ཞ༌གུན༌ནི༌ སམ༌ཚུལ༌ མ༌ཤི༌ཀ༌ ཡེ༌ཤུའི༌ ཙོགས༌ ཡོང༌གོ༌ཤེས༌ ཨིན༌ནོག༌།
6 ཞན༌ ཁོང༌ ཁོང༌རང༌ དཀོན༌མཆོག༌ ཨིན༌ཏེའང༌,
ཁོང༌ངི༌ དཀོན༌མཆོག༌ དྲན༌དྲ༌ ཨིན༌ཁན༌ནི༌ ཀོ༌ས༌བོ༌
ཐམས༌ཏེ༌ བོར༌ཨིན༌ མ༌ནེ༌ སམ༌མ༌ མ༌ཛདས༌།
7 ཨིན༌ནའང༌ ཁོང༌ངི༌ ནམ༌ཁའེ༌ ཐོབ༌ཏང༌ ཚང༌མ༌ ཕང༌ང༌ ཛད༌ཏེ༌,
ཡོག༌པོ༌ ཙོགས༌ གྱུར༌ར༌ ཛད༌ཏེ༌, མིའི༌ ཚུལ༌ལ༌ སྐྱེའ༌ ཛདས༌།
8 ཁོང༌རང༌ པས༌མོ༌ ཅོའ༌ ཛད༌ཏེ༌,
ཀྲོངས༌ཀྲོངས༌ ཚག༌པའང༌ དཀོན༌མཆོག༌གི༌ ཁའ༌ཉན༌ན༌ ཛདས༌,
ཡང༌ན༌ མ༌སྲན༌ཏྲེ༌ རྡུག༌ངལ༌ཅན༌ནི༌ རྐྱང༌ཤིང༌ངི༌ཀ༌ ཀྲོང༌ཤེས༌པོའང༌།
9 ཏེན༌ན༌བོའེ༌ཕིའ༌ དཀོན༌མཆོག༌གི༌ ཁོང༌ང༌ ཚང༌མའེ༌སང༌ རྩི༌ཝ༌ཅན༌ནི༌ ནས༌སའེ༌ཀ༌ སྟག༌ག༌ ཛདས༌།
ཡང༌ ཚང༌མའེ༌སང༌ རྩིས༌ཏང༌ཅན༌ནི༌ ཚན༌བོ༌ སལ༌ལ༌ ཛདས༌།
10-11 ཏེན༌ན༌ གྱུན༌ཚན༌བོའེ༌ ཕིའ༌ ཡེ༌ཤུའི༌ ཚན༌ སྔོན༌ ཟ༌ནེ༌,
ནམ༌ཁའེ༌ ནང༌ང༌, ཇིག༌རྟེན༌ནི༌ཀ༌ ཡང༌ སའེ༌ ཡོག༌ག༌,
སྲོག༌ ཡོད༌ཁན༌ ཚང༌མའེ༌ པིག༌དོང༌ ཙུགས༌ཏེ༌
ཡེ༌ཤུ༌ མ༌ཤི༌ཀ༌ ནི༌ གཙོ༌བོ༌ ཨིན༌ནོག༌ ཟེར༌ཨིན༌,
ཏེ༌བོའེ༌ དཀོན༌མཆོག༌ ཡབ༌བ༌ སྤལ༌ ཁྱོང༌ང༌ ཛད༌ཨིན༌།
ཇིག༌རྟེན༌ནི༌ ནང༌ང༌ འོད༌ ཙོགས༌ གྱུར༌།
2:12 ནེ༌ 18
12 ངའེ༌ ཅེས༌པའེ༌ ཛ༌འོ༌གུན༌, ང༌ ཁྱོ༌ཞ༌གུན༌ ཉམ༌པོ༌ ཡོད༌ ཟ༌ནེ༌, ཁྱོ༌ཞའེ༌ ཏུས༌གྱུན༌ ངའེ༌ ལབ༌ཞ༌གུན༌ ཁའ༌ཉན༌ཏེ༌ གྲུལ༌ལ༌ ཙོགས༌ལ༌, ང༌ ཁྱོ༌ཞའ༌ ཉམ༌པོ༌ མེད༌ ཟ༌ནེ༌ ཏེ༌སང༌ མང༌ང༌ ཁའ༌ཉོན༌ཤིག༌། ཡང༌ དཀོན༌མཆོག༌ག༌ རྩི༌ཝ༌ དང༌ ཁོང༌ངི༌ ཇིགས༌སི༌ ནང༌ང༌ ལྟན༌ན༌ ཛད༌ཁན༌ནི༌ ལམ༌མི༌ཀ༌ གྲུལ༌ཨིན༌ ཐར༌པའེ༌ ཕིའ༌ རྩོན༌གྲུས༌ ཅོ༌ཤིག༌། 13 ཅིའ༌ཟེར༌ན༌ དཀོན༌མཆོག༌ ཁོང༌རང༌ངི༌ ཁྱོ༌ཞ༌གུན༌ནི༌ ནང༌ང༌ ཆག༌ལས༌ ཛད༌ཏེ༌ ཁོང༌ ཐུགས༌ཐད༌ཁན༌ནི༌ ལས༌ ཅོ༌ཅེས༌ལ༌ དོད༌པ༌ དང༌ ཁྱུད༌ སལ༌ལ༌ ཛད༌ད༌ནོག༌།
14-15 སུ༌ཞིག༌གིའང༌ ཁྱོ༌ཞ༌གུན༌ལ༌ སྐྱོན༌ ཀལ༌ མི༌ཉན༌ཅེས༌སི༌ ཕིའ༌, ཅི༌ཞིག༌ ཅོ༌ནའང༌ ཟེར༌རྒྱུ༌ མ༌ཏང༌ང༌ ཡ༌ ཟེར༌ལེན༌ མེད༌པ༌ ཅོ༌ཤིག༌། ཡང༌ དཀོན༌མཆོག༌གི༌ ཕྲུ༌གུ༌ ཙོགས༌ལ༌, ཁྱོ༌ཞའེ༌ མི༌ཚེ༌བོ༌ ནོངས༌མེད༌ དང༌, རྩང༌མ༌ཞིག༌ ཕུད༌ཤིག༌། ཏེ༌ནེ༌ གོབ༌སྐོར༌ཁན༌ དང༌ སྡིག༌ཅན༌ གངས༌ཏེ༌ ཡོད༌ཁན༌ནི༌ ཇིག༌རྟེན༌ནི༌ ནང༌ང༌ ཁྱོ༌ཞ༌གུན༌ སྐར༌མ༌ ལྡང༌ཤན༌ ཙོགས༌ལ༌ ཐོང༌ཨིན༌། 16 ཐའ༌མེད༌པའེ༌ མི༌ཚེ༌ ཁྱོང༌ཁན༌ནི༌ བཀའ༌བོ༌ སྟན༌པོ༌ ཐམས༌ཏེ༌ དུག༌ཤིག༌, ཏེ༌ནེ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཅེས༌སི༌ ཞག༌ག༌, ཁྱོ༌ཞ༌གུན༌ནི༌ ཕྲོའ༌ ངའེ༌ རྩོན༌གྲུས༌ ཚང༌མ༌ ཏོན༌མེད༌ལ༌ མ༌ཆའ༌, ང༌ ཁྱོ༌ཞ༌གུན༌ནི༌ཀ༌ ཕོ༌སོ༌ ཚོར༌ཨིན༌། 17 ངའེ༌ མི༌ཚེ༌བོ༌ ཁྱོ༌ཞ༌གུན༌ནི༌ ཏད༌པ༌ཅན༌ནི༌ ཞབ༌སྟོག༌གི༌ ཆོད༌པ༌ ཕུལ༌ཁན༌ནི༌ཀ༌ ཆུ༌ཕུད༌ ཙོགས༌ལ༌ ཕུལ༌ནའང༌ ང༌ ཐད༌པོ༌ རག༌, ཡང༌ ངའེ༌ ཁྱོ༌ཞ༌གུན༌ ཉམ༌པོ༌ སྐྱིད༌པོ༌ ཅོ༌ཨིན༌། 18 འོ༌ན༌, ཁྱོ༌ཞ༌གུན༌ནིའང༌ ང༌ ཉམ༌པོ༌ ཐད༌པོ༌ དང༌ སྐྱིད༌པོ༌ ཅོ༌གོ༌ཤེས༌ ཨིན༌ནོག༌།
ཏི༌མོ༌ཐི༌ དང༌ ཨེ༌པ༌ཕོ༌རོ༌གྲི༌ཀྲུས༌སི༌ སྐོར༌ལ༌།
2:19 ནེ༌ 30
19 གལ༌ཏེས༌ གཙོ༌བོ༌ ཡེ༌ཤུའི༌ གོངས༌པ༌ སལ༌ན༌, ངའེ༌ ཏི༌མོ༌ཐི༌ ཁྱོ༌ཞའེ༌ཀ༌ གྱོགས༌པ༌ ལམ༌ཅུག༌ཅེས༌སི༌ རེ༌ཝ༌ བོར༌རད༌། ཏེ༌ནེ༌ ཁོའེ༌ ཁྱོ༌ཞ༌གུན༌ནི༌ སྐོར༌ལ༌ ནས༌ཚུལ༌ ཤད༌ཏེ༌ ངའ༌ ཐད༌པོ༌ ཆ༌ཅུག༌ཨིན༌། 20 འི༌ཀ༌ ཁྱོ༌ཞ༌གུན༌ ཏད༌པའེ༌ ནང༌ང༌ ལྡན༌ན༌ད༌ ལྡན༌ན༌ མེད༌ སམས༌ཏེ༌ དེན༌བའེ༌ ཚེར༌ཁ༌ ཅོ༌ཁན༌ ཁོ༌ མ༌ནེ༌ ཡང༌སུ༌ཞིག༌གའང༌ མེད༌། 21 ཅིའ༌ཟེར༌ན༌ ཞན༌མ༌ ཚང༌མའེ༌ རང༌དོན༌ མ༌ནེ༌ མ༌ཤི༌ཀ༌ ཡེ༌ཤུའི༌ ཐུགས༌དོད༌དི༌ ཕིའ༌ ཚེར༌ཁ༌ ཅོའ༌ མི༌དུག༌། 22 ཨིན༌ནའང༌ ཁྱོ༌ཞ༌གུན༌ལ༌ ཏི༌མོ༌ཐིའི༌ ཁོ༌རང༌ ཨིད༌ཤེས༌ཅན༌ ལྟན༌ཁན༌བོ༌ གྱུས༌ཨིན༌ནོག༌, ཅིའ༌ཟེར༌ན༌ ཁོའེ༌ བུ༌ཚ༌ཞིག༌གི༌ རང༌ངི༌ ཨ༌བའ༌ ཞབ༌སྟོག༌ ཞུའ༌ ཙོགས༌ལ༌, གའ༌མོའེ༌ ནས༌ཚུལ༌ ཤད༌ཅེས༌སི༌ ནང༌ང༌ ང༌ ཉམ༌པོ༌ ཞབ༌སྟོག༌ ཞུས༌ཏེ༌ ཨིན༌། 23 འི༌ཀ༌ ང༌ ཉམ༌པོ༌ བྱུང༌ཅེས༌པོ༌ ཧ༌གོའ༌ཅིག༌, ངའེ༌ ཁོ༌ ཁྱོ༌ཞའེ༌ཀ༌ ལམ༌ཅུག༌ཅེས༌སི༌ རེ༌ཝ༌ ཨིན༌། 24 ང༌ ལོ༌ཁྱེལ༌ རག༌, གཙོ༌བོའེ༌ ངའང༌ ཁྱོ༌ཞ༌གུན༌ ཡོད༌ས༌ གྱོགས༌པ༌ ཡོང༌ ཅུག༌ག༌ ཛད༌ཨིན༌།
25 ཨིན༌ནའང༌ ངའེ༌ སྤུན༌, ཕྲོ༌པ༌ དང༌ ཕྲོ༌པ༌ མག༌མི༌ ཨིན༌ཁན༌ནི༌ ཨེ༌པ༌ཕོ༌རོ༌གྲི༌ཀྲུས༌ ཁྱོ༌ཞའེ༌ཀ༌ ལོགས༌ཏེ༌ ལམ༌ཅུག༌ཅེས༌པོ༌ ཁག༌ཅན༌ སམ༌། ཁོ༌ ཁྱོ༌ཞའེ༌ ཚབས༌ ཅོས༌ཏེ༌ ངའེ༌ སྒོས༌དོམ༌གུན༌ལ༌ ལྟ༌སྟོག༌ ཅོ༌ཅེས༌སི༌ ཕིའ༌ ཁྱོ༌ཞ༌གུན༌ནི༌ ལམ༌ཅུགས༌ཏེ༌ ཨིན༌པིན༌། 26 ཁོ༌ ཁྱོ༌ཞའ༌ ཚང༌མ༌ སྲན༌ཏྲེ༌ ཐུག༌ཉིན༌ དུག༌, ཡང༌ ཁྱོ༌ཞ༌གུན༌ལ༌ ཁོའ༌ ཟུ༌མོ༌ དུག༌ ཟེར༌ཏེ༌ ཚོར༌ པ༌སང༌, ཁོའེ༌ ཁྱོ༌ཞ༌གུན༌ནི༌ ཕིའ༌ ཚེར༌ཁ༌ ཅོ༌རུག༌། 27 ཏན༌ཏན༌ལ༌ ཁོའ༌ ཟུ༌མོ༌ སྲན༌ཏྲེ༌ ཡོངས༌, ཡང༌ ཤི༌ཅེས༌ ཡོད༌པིན༌། ཨིན༌ནའང༌ དཀོན༌མཆོག༌གི༌ ཁོའེ༌ཀ༌ ཐུག༌རྗེ༌ ཛདས༌, ཁོ༌ ཅིག༌པོའེ༌ཀ༌ མན༌པ༌, ང༌ ཚེར༌ཁའེ༌ཀ༌ ཚེར༌ཁའ༌ མི༌བྱུང༌ཅེས༌སི༌ ཕིའ༌ ངའེ༌ཀའང༌ ཐུག༌རྗེ༌ ཛདས༌།
28 ཁྱོ༌ཞ༌གུན༌ནི༌ ཁོ༌ ཐོངས༌ཏེ༌ ཐད༌པོ༌ ཆ༌ཅེས༌ དང༌ ངའེ༌ སེམས༌སི༌ ནང༌ངའང༌ ཁྱོ༌ཞའེ༌ ཕིའ༌ ཚེར༌ཁ༌བོ༌ ཉུ༌ངུན༌ ཆ༌ཅེས༌ལ༌ ཁོ༌ ཁྱོ༌ཞའེ༌ཀ༌ ལམ༌ཅུག༌ཅེས༌སི༌ ངའ༌ དོད༌པ༌ ཆེན༌མོ༌ རག༌། 29 མ༌སྲན༌ཏྲེ༌ ཐད༌པོ༌ ཉམ༌པོ༌ ཁྱོ༌ཞ༌གུན༌ནི༌ གཙོ༌བོའེ༌ ནང༌ང༌ ཁོའ༌ རང༌ངི༌ སྤུན༌ ཙོགས༌ལ༌ གའ༌སུས༌ ཞུས༌, ཡང༌ ཁོ༌ ཙོགས༌སི༌ མི༌གུན༌ལའང༌ རྩི༌ཝ༌ ཅོས༌། 30 ཅིའ༌ཟེར༌ན༌ མ༌ཤི༌ཀའེ༌ ཞབ༌སྟོག༌གི༌ ནང༌ང༌ ཁོའེ༌ ཁོ༌རང༌ང༌ སྣང༌ང༌ མ༌ཏང༌ང༌, ཁྱོ༌ཞའེ༌ ཚབས༌ལ༌ ངའ༌ རོགས༌ ཅོ༌ཨིན༌ ཁོ༌ ཤི༌ཅེས༌ལ༌ ཐུག༌།