4
ཨབ༌ར༌ཧམ༌མི༌ ཏད༌པའེ༌ སྤེ༌།
4:1 ནེ༌ 25
1 དཀོན༌མཆོག༌གི༌ སྐུན༌དུན༌ལ༌ དྲང༌པོ༌ གྱུར༌ཅེས༌སི༌ སྐོར༌ལ༌ ང༌དང༌གུན༌ནི༌ ཕ༌མེས༌པོ༌, ཨབ༌ར༌ཧམ༌མ༌ ལོབས༌ཁན༌བོའ༌ ང༌ཏི༌ ཅི༌ ཟེར༌གོས༌? 2 གལ༌ཏེས༌ ཁོའེ༌ ལས༌ ཟང༌པོ༌གུན༌ནི༌ ཁོ༌ དཀོན༌མཆོག༌གི༌ སྐུན༌དུན༌ལ༌ དྲང༌པོ༌ ཐེའད༌ན༌, ཏེ༌ནེ༌ ཁོའ༌ ཕོ༌སོ༌ ཅོ༌ཅེས༌སི༌ ཏོན༌ཞིག༌ ཡོད༌གྲོ༌། ཨིན༌ནའང༌ དཀོན༌མཆོག༌གི༌ ཐབས༌པོ༌ ཏེ༌ཟུག༌ མ༌ནོག༌། 3 ཅིའ༌ཟེར༌ན༌ དམ༌པའེ༌ སུང༌རབས༌སི༌ ནང༌ང༌ མོལ༌དུག༌, "ཨབ༌ར༌ཧམ༌མི༌ དཀོན༌མཆོག༌གི༌ ཞལ༌ཆད༌ ཛད༌ཁན༌བོའེ༌ཀ༌ ཏད༌པ༌ ཅོས༌པ༌, ཁོའ༌ དཀོན༌མཆོག༌གི༌ མི༌ དྲང༌པོ༌ཞིག༌ ཐེའ༌ ཛདས༌། *4:3 གོ༌ཟུག༌ ཟེར༌ཁན༌ནི༌ སྤེ༌ཆའེ༌ 15:6 དང༌ 22 "
4 ལས༌ ཅོ༌ཁན༌ནི༌ མི༌ཞིག༌ག༌ ཐོབ༌ཁན༌ནི༌ ལ༌ཆ༌བོ༌ སྐྱེས༌ཤིག༌ མན༌པ༌, ཁོའེ༌ ལས༌ ཅོ༌ཁན༌ནི༌ ཐོབ༌ཏང༌བོ༌ ཨིན༌ནོག༌། 5 ཨིན༌ནའང༌ མི༌གུན༌ ཁོ༌རང༌གུན༌ནི༌ ལས༌སི༌ ཞས༌ཏེ༌ མན༌པ༌, ཁོང༌གུན༌ལ༌ དྲང༌པོ༌ ཅོའ༌ ཛད༌ཁན༌ དཀོན༌མཆོག༌གི༌ ནང༌ང༌ ཏད༌པ༌ ཅོ༌ཅེས༌པོའེ༌ དྲང༌པོ༌ ཐེའ༌ ཛད༌ད༌ནོག༌། 6 ཏེན༌ན༌ ཙོགས༌ལ༌ གྱལ༌པོ༌ དཱ༌བིད༌དིའང༌, ལས༌ མ༌ཅོའ༌, དཀོན༌མཆོག༌གི༌, དྲང༌པོ༌ ཐེའ༌ ཛད༌ཁན༌ ཅིན༌ལབས༌ཅན༌གུན༌ནི༌ སྐོར༌ལ༌ མོལས༌,
7 "ཁའ༌ མི༌ཉན༌ཅེས༌ལ༌ ཤགས༌པ༌ ཐོབ༌ཁན༌གུན༌ དང༌
སྡིག༌པ༌ ཀབ༌བ༌ ཛད༌ཁན༌གུན༌,
ཙམ༌ཤིག༌གི༌ ཅིན༌ལབས༌ཅན༌ མ༌ནོག༌།
8 གཙོ༌བོའེ༌, སྡིག༌པ༌གུན༌ རྩིའ༌ མ༌ཛད༌ཁན༌ནི༌ མི༌བོ༌
ཙམ༌ཤིག༌གི༌ ཅིན༌ལབས༌ཅན༌ མ༌ནོག༌།"†4:8 སུང༌གུར༌རི༌ སྤེ༌ཆའེ༌ 32:1
9 ཏ༌ ཅི༌, འི༌ ཅིན༌ལབས༌པོ༌ ཡ༌ཧུ༌དཱ༌པ༌ ཅིག༌པོའེ༌ ཕིའ༌ ཨིན༌ནོག༌ག༌, ཡ༌ སུན༌ནད༌ མ༌ཅོ༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའང༌? ང༌ཞའེ༌ ཟེར༌རད༌, ཁོའེ༌ ཏད༌པའེ༌ ཞས༌ཏེ༌ ཨབ༌ར༌ཧམ༌མ༌ དཀོན༌མཆོག༌གི༌ དྲང༌པོ༌ ཐེའ༌ ཛདས༌། 10 ཨིན༌ནའང༌ ཏེ༌བོ༌ ནམ༌ བྱུང༌? ཁོ༌ དྲང༌པོ༌ ཐེའ༌ ཛད༌ཅེས༌པོ༌, ཁོའ༌ སུན༌ནད༌ མ༌ཅོའེ༌ སྔུན༌ལ༌ བྱུངས༌ས༌ ཡ༌ སུན༌ནད༌ ཅོས༌ཏེ༌ སྟིང༌ནེ༌ བྱུང༌? ཏེ༌བོ༌ ཁོའ༌ སུན༌ནད༌ ཅོས༌ཏེ༌ སྟིང༌ནེ༌ མན༌པ༌, སྔུན༌ལ༌ བྱུང༌། 11 སུན༌ནད༌ ཅོའེ༌ སང༌ སྔུན༌ལ༌, ཨབ༌ར༌ཧམ༌མ༌ ཏད༌པ༌ ཡོད༌ཅེས༌ ཡང༌ དཀོན༌མཆོག༌གི༌ ཁོའ༌ དྲང༌པོ༌ ཨིན༌ཁན༌, ཁོང༌རང༌ངི༌ ཞལ༌ནེ༌ མོལ༌ལ༌ ཛད༌ཅེས༌པོ༌, སུན༌ནད༌ ཅོ༌ཁན༌ནི༌ སྟགས༌པོ༌ ཨིན༌པིན༌། ཏེན༌ན༌བོའེ༌ཕིའ༌ ཨབ༌ར༌ཧམ༌ ནི༌ སུན༌ནད༌ མ༌ཅོའ༌ ཏད༌པ༌ ཅོ༌ཁན༌གུན༌ནི༌ ཨ༌བ༌ ཙོགས༌ ཨིན༌ནོག༌། ཡང༌ ཏེ༌གུན༌ ཁོང༌རང༌གུན༌ནི༌ ཏད༌པའེ༌ ཞས༌ཏེ༌ དྲང༌པོ༌ ཐེའ༌ ཛད༌ད༌ནོག༌། 12 ཨབ༌ར༌ཧམ༌ སུན༌ནད༌ ཅོ༌ཁན༌གུན༌ནིའང༌ ཨ༌བ༌ ཙོགས༌ ཨིན༌ནོག༌, ཨིན༌ནའང༌ སུན༌ནད༌ ཅོའེ༌ སང༌ སྔུན༌ལ༌ ཨབ༌ར༌ཧམ༌མ༌ ཡོད༌ཁན༌ནི༌ ཏད༌པ༌ ཙོགས༌ ཁོང༌གུན༌ལའང༌ ཡོང༌གོས༌།
13 དཀོན༌མཆོག༌གི༌ ཨབ༌ར༌ཧམ༌ དང༌ ཁོའེ༌ པུར༌གྱུད༌གུན༌ལ༌ ཇིག༌རྟེན༌ གང༌པོ༌ སལ༌ཅེས༌ལ༌ ཞལ༌ཆད༌ ཛདས༌། ཨིན༌ནའང༌ ཏེ༌བོ༌ ཨབ༌ར༌ཧམ༌མ༌ ཁྲིམས༌ ཁའ༌ཉན༌ཅེས༌པོའེ༌ ཞས༌ཏེ༌ མན༌པ༌, ཏད༌པ༌ གྱུད༌ཏེ༌ དཀོན༌མཆོག༌ ཉམ༌པོ༌ དྲང༌པོ༌ བྲེལ༌ ཡོད༌ཅེས༌པོའེ༌ ཐོབ༌ཏེ༌ ཨིན༌ནོག༌། 14 གལ༌ཏེས༌ དཀོན༌མཆོག༌གི༌ ཞལ༌ཆད༌པོ༌ ཁྲིམས༌ ཁའ༌ཉན༌ཁན༌ ཅིག༌པོའེ༌ ཕིའ༌ ཨིན༌པིན༌ན༌, ཏེ༌ནེ༌ ཏད༌པའེ༌ སྒོས༌དོམ༌ མེད༌གྲོ༌ ཡང༌ དཀོན༌མཆོག༌གི༌ ཞལ༌ཆད༌པོ༌ ཏོན༌མེད༌ ཨིན༌གྲོ༌། 15 དཀོན༌མཆོག༌གི༌ ཐུགས༌སྲོ༌, ཁྲིམས༌ ཅག༌ཅེས༌པོའེ༌ ཞས༌ཏེ༌ བབས༌ས༌ནོག༌། ཨིན༌ནའང༌ གལ༌ཏེས༌ ཁྲིམས༌ མེད༌ན༌ ཏེ༌བོ༌ ཀ༌ཟུག༌གི༌ ཅག༌ཨིན༌?
16 ཏེན༌ན༌བོའེ༌ཕིའ༌ ཞལ༌ཆད༌པོ༌ ཏད༌པ༌ གྱུད༌ཏེ༌ ཐོབ༌བ༌ནོག༌། འི༌བོ༌ རིན༌ མ༌ཏང༌ཁན༌ནི༌ སྐྱེས༌ཤིག༌ ཨིན༌ནོག༌། ཡང༌ ཁྲིམས༌པོ༌ ཁའ༌ཉན༌ནད༌གྲོ༌ ཡ༌ མེད༌གྲོ༌, གལ༌ཏེས༌ ང༌དང༌ང༌ ཨབ༌ར༌ཧམ༌ ཙོགས༌ལ༌ ཏད༌པ༌ ཡོད༌ན༌, ང༌དང༌ ཚང༌མ༌ལ༌ ཏེ༌ སྐྱེས༌པོ༌ ཐོབ༌ཅེས༌ ཏན༌ཏན༌ ཨིན༌ནོག༌། ཅིའ༌ཟེར༌ན༌ ཨབ༌ར༌ཧམ༌ ནི༌ ཏད༌པ༌ ཅོ༌ཁན༌ ཚང༌མའེ༌ ཨ༌བ༌ ཨིན༌ནོག༌། 17 ཏེན༌ན༌བོའེ༌ཕིའ༌ དཀོན༌མཆོག༌གི༌ དམ༌པའེ༌ སུང༌རབས༌སི༌ ནང༌ང༌ ཨབ༌ར༌ཧམ༌མ༌ མོལས༌, "ངའེ༌ ཁྱོ༌རང༌ང༌ མིར༌གྱུད༌ མང༌པོའེ༌ ཨ༌བ༌ ཅོའད༌། ‡4:17 གོ༌ཟུག༌ ཟེར༌ཁན༌ནི༌ སྤེ༌ཆའེ༌ 17:5 " འི༌བོ༌ བྱུང༌ ཅིའ༌ཟེར༌ན༌ ཨབ༌ར༌ཧམ༌མི༌ ཤི༌ཁན༌གུན༌ སོན༌པོའ༌ ལང༌ང༌ ཛད༌ཁན༌ ཡང༌ ཅའང༌ མེད༌ཁན༌ནི༌ ནང༌ནེ༌ སོ༌མ༌ བྱུང༌ ཅུག༌ག༌ ཛད༌ཁན༌ནི༌ དཀོན༌མཆོག༌གི༌ ནང༌ང༌ ཏད༌པ༌ ཅོས༌།
18 རེ༌ཝ༌ བོར༌ཅེས༌སི༌ གྱུན༌ཚན༌ མེད༌ ཟ༌ནེའང༌, ཨབ༌ར༌ཧམ༌མི༌ རེ༌ཝ༌ ཅོ༌ཨིན༌ དུགས༌ པ༌སང༌, ཁོ༌ མིར༌གྱུད༌ མང༌པོའེ༌ ཨ༌བ༌ གྱུར༌, ཀ༌ཟུག༌ དཀོན༌མཆོག༌གི༌ ཁོའ༌ མོལས༌, "ཁྱོ༌རང༌ང༌ པུར༌གྱུད༌ མ༌ མང༌པོ༌ཞིག༌ ཡོང༌ཨིན༌། §4:18 གོ༌ཟུག༌ ཟེར༌ཁན༌ནི༌ སྤེ༌ཆའེ༌ 15:5 " 19 ཡང༌ ཨབ༌ར༌ཧམ༌མི༌ ལོ༌ ཧ༌ལམ༌ གྱ༌ ཟམ༌ཤིག༌ སོན༌ཏེ༌ ཁོའེ༌ ཟུགས༌པོ༌ སྒས༌ཏེ༌ ཤི༌ཅེས༌ ཙོགས༌ ཡང༌, ཁོའེ༌ ན༌མ༌ སཱ༌ར༌ ཕྲུ༌གུ༌ ཇོར༌ཅེས༌སི༌ ཁྱུད༌ནེ༌ ཐལ༌ནའང༌, ཨབ༌ར༌ཧམ༌མི༌ ཏད༌པ༌ ཡོལ༌ མ༌ཡོལ༌ལ༌ སྟན༌པོ༌ ལུས༌། 20 ཨབ༌ར༌ཧམ༌མི༌ དཀོན༌མཆོག༌གི༌ ཞལ༌ཆད༌པོའེ༌ཀ༌ ཐེ༌ཚོམས༌ མ༌ནེ༌ མ༌ཅོས༌, མ༌ཚད༌ ཁོའེ༌ ཏད༌པ༌བོ༌ མང༌ང༌ ཤེད༌ཅན༌ གྱུར༌ཏེ༌ ཁོའེ༌ དཀོན༌མཆོག༌ག༌ སྤལ༌ ཁྱོངས༌། 21 དཀོན༌མཆོག༌ག༌ ཞལ༌ཆད༌ ཛད༌ཁན༌བོ༌ དྲན༌དྲ༌ གྲུབ༌ཅུག༌ཉན༌ན༌ ཛད༌ཅེས༌པོའེ༌ཀ༌ ཁོའ༌ ཏན༌ཏན༌ ལོ༌ཁྱེལ༌ ཡོད༌པིན༌། 22 ཡང༌ ཨབ༌ར༌ཧམ༌མི༌ ཏད༌པའེ༌ ཞས༌ཏེ༌ དཀོན༌མཆོག༌གི༌ ཁོའ༌ དྲང༌པོ༌ ཐེའ༌ ཛདས༌། 23 དཀོན༌མཆོག༌གི༌ ཁོའ༌ དྲང༌པོ༌ ཐེའ༌ ཛད༌ཁན༌ བྲིའ༌ཛད༌ཅེས༌པོ༌, ཨབ༌ར༌ཧམ༌ ཅིག༌པོའེ༌ ཕན༌ཐོགས༌སི༌ ཕིའ༌ མན༌པ༌, 24 ང༌དང༌ངི༌ ཕན༌ཐོགས༌སི༌ ཕིའང༌ ཨིན༌པིན༌། གལ༌ཏེས༌ ཡེ༌ཤུ༌ ང༌དང༌གུན༌ནི༌ གཙོ༌བོ༌, ཤི༌ཁན༌གུན༌ནི༌ ཕྲོ༌ནེ༌ ལང༌ང༌ ཛདས༌ཁན༌ དཀོན༌མཆོག༌གི༌ ནང༌ང༌ ང༌ཏི༌ ཏད༌པ༌ ཅོ༌ན༌, ཁོང༌ངི༌ ང༌དང༌གུན༌ནའང༌ དྲང༌པོ༌ ཐེའ༌ ཛད༌ཅེས༌པོ༌ ནི༌, ང༌དང༌ངི༌ ཕན༌ཐོགས༌པོ༌ ཨིན༌ནོག༌། 25 དཀོན༌མཆོག༌གི༌ ཡེ༌ཤུ༌, ང༌དང༌གུན༌ནི༌ སྡིག༌པའེ༌ ཏོན༌ལ༌, ཀྲོངས༌ས༌ལ༌ སྟད༌ད༌ ཛདས༌། ཡང༌ ང༌དང༌གུན༌ དྲང༌པོ༌ གྱུར༌ཅེས༌ལ༌ ཁོང༌ངི༌ ཡེ༌ཤུ༌ སོན༌པོའ༌ ལང༌ང༌ ཛདས༌།