18
Itsitsĩm uteu Ubabirha
1 Akɛrɛ aka amaa umum inyã ipfu itser-Num iyɔɔ iki idzeka afã icipuwa. Iwu nggu nggaa ijee, ikɛi izengge irhange abĩã. 2 Itsarhi irhakngge itsui ivum igɛ,
<<Ubabirha ukugɔng, uku ugbakpɔ, uku ugbakpɔ!
Ukpɔ uku uwu anang isei ípfu iyiki ibewe
nu anang awoyambɔ,
nu ununu uwuku ubewe, uwu ishĩ.
3 Ubinkutsu kishoo abĩã aka ahwambɔ
amɛ̃ inebi akatãrhã aki itoma-daknga.
Ayɛrhe abĩã ikɛi atomumbɔ-dak nggu unga,
awɛ izɛɛ abĩã awe abi ubin
ri ikponi iyiki ibewanga.>>
4 Mɔcɛ umum igũ urhɛm ukpɔɔ uku udzeka afã ugɔr ugɛ,
<<Àka apfudzeka ru unga umbi anermum,
nggee utsur arhimnga agarke umbi,
nggee utsur umbi ayɛimbi ikponga.
5 Ubinkutsu ivɔ̃ arhimnga iki itsĩke ra afã,
Unum aka ayitunga iyiki ibewanga.
6 Àka abvui adzowe unga ru nyaka unga aka adzaa,
ubinkpi unga aka adzowe,
àka afase idiki ivaa ubinkpi unga aka akorhe.
Ru ukpɛwawi unga aka adaka amɛ̃ inebi
umgbɔ ha umbi aka ikũ adaka idikunga ivaa.
7 Àka adzowe unga uver
ru nyaki ikpikpoi ni igũibɛnyɛ unga aka adzowe itsinga.
Ra amɛnnga, unga aka isaka afĩrhã agɛ,
<Umum isei isei iyɛrhe ukutsɛrh,
umum isi iwemum utsɛ̃rhãpfu,
umum isi íseisũ ifakpe!>
8 Nggee ru unuma unying umbɔ awuri ikwɛr unga nggu ikpo,
akpe, ifakpe, nu imerh.
Awuri ikpĩĩwe unga nggu urha,
ubinkutsu Uteijee Unum uwuku utsu uvau unga
awu nggaa uner ijee.
9 <<Ivangyɛ ayɛrhe abĩã aka atoma-dak nggu unga na agashi igũibɛn, umbɔ aba inyãmbɔ azoo ikpikpĩĩanga, umbɔ awuri idɔng na aciu akpenga. 10 Iwei itsu umbɔ adɛ̃ɛ̃ ukuka ru ayetnumnga, awuri idɛ̃ɛ̃ ukuka na aciu agɛ,
<< <Atorh! Atorh, nggaa uteu,
Ubabirha, uteu ijee!
Ri ivanga unying umbɔ aka atsuka ungo uvau!>
11 <<Awɛ izɛɛ abĩã ikɛi aciu akpe na agũ ighongnga, ubinkutsu, unera asi igosha abinmbɔ ikɛi. 12 Unera asi igosha uzinarhimbɔ, nu uazurhfambɔ, nu ikpũ amasarhambɔ akika awu ru ugarh, nu uzeze atorho umbɔ aki iyisa urhini nu usirhiki, nu akika awu aka abãrhã, nu ikpũ acucii isung, nu arhɛrhɛ abin aki anyĩ ini, nu acuciiakɛ umbɔ aka atsɛ̃ aki uhwɛk, nu abin azɔu aka abãrhã, nu abin azɔu, nu abin atarh aka aze, 13 nu ikpũ abin akɔɔ aki ibɔ̃ɔ̃, nu atsei umbɔ aki iyisa umur nu ufirankisen, nu amɛ̃ inebi, nu atsei uzaitun, nu akɔ̃ itsem, nu ínak, nu ídɔi, nu ínyãwã, nu íkar inyãwã, nu igãrhã ngge iki iwe ípfu anera.
14 <<Awɛ izɛɛ agɔr unga agɛ, <Kishoo abin aka aze iyi ha ungo uku utsu amɛnngo iki igwirngge ru ungo. Kishoo abin akika arhang akika awu ru ugarh aka agwirke, ungo usi íbvui ukpoɔ!> 15 Awɛ izɛɛ aki ikpo ubin ri izɛɛmbɔ nggu unga, adɛ̃ɛ̃ ukuka, awuri igũ iwei ayetnumnga. Aciu akpe na adɔng, 16 awuri iciu akpe agɛ,
<< <Atorh! Atorh, oka nggaa uteu ha,
ukpurukpi uku itsim uzeze atorho umbɔ aki iyisa urhini,
nu ikɛi atorho aka abãrhã,
ikɛi na agbɛr idzam nggu uzinarhi,
nu ikpũ atarh akika awu ru ugarh!
17 Ri ivanga unying kishoo nggaa abin akɛrɛ atsĩmke!>
<<Ubɛn abi ukhukhɔɔ akau akagɔng nu abika atsutsĩa nu abika akpayinga nu kishoo abika atɔ̃ itsermbɔ ra akau akagɔng, adɛ̃ɛ̃ ukuka. 18 Ivangyɛ umbɔ aka anyã azoo urha ukpuku ukpĩĩwe uteu ha, agɔr agɛ, <Uteu ukpɔɔ uwekpɔ ru nyaku uteu ukpirɛ?> 19 Umbɔ atsuyi uzurhu nu atsimbɔ na aciu akpe, amɛnmbɔ aghong, atsuyi ivum agɛ,
<< <Atorh! Atorh, oka nggaa uteu!
Uteukpi abi nggaa ukhukhɔɔ amɛ̃ kishoo
iki ikpo ubin ra abinkpɔ!
Bɔr ivanga unying ukpɔ utsĩmkpɔ!
20 Àka agɔm anggɔm ru ukpɔ umbi afã!
Àka agɔm anggɔm, umbi abika adɔsa nu abi itser Uyesu
nu abika asɔm Arherhu-Num!
Unum atsu uvau ru ukpɔ ru nyaka ukpɔ uku uyɔm umbi!> >>
21 Mɔcɛ nggaa ipfu itser-Num iyɔɔ ikerketangge inyãngu nggaa utarh ukpɔɔ ru nyaku nggaa ukɔ igɔ, itare ru ukau ukugɔng, igɔr igɛ,
<<Nggu nggaa avɔm riminɛ umbɔ aka itare Ubabirha nggaa uteu ha,
asi íbvui akpombɔ ukpɔ.
22 Umbɔ asi íbvui agũmbɔ ibar igbɔm
nu abika atsusa ambom,
ibar userhwa nu ibar atsom ru ungo ikɛi.
Asi íbvui anyãmbɔ abi itser abok umɔ,
asi íbvui agũmbɔ irhak igɔ ru ungo ikɛi.
23 Irhirhang usi íbvui irhangngge ru ungo ikɛi.
Asi íbvui agũmbɔ urhɛm utsa uku ufa
use utsɛrh uku ufa ru ungo ikɛi.
Ubinkutsu isha awɛ izɛɛngo umbɔ awe ru ijee ru upfunga kishoo.
Ikɛi ungo urhɛm abĩã kishoo nggu itser igokango!
24 Ru atsĩndĩngo umbɔ aka akpo adzirh abika asɔm Arherhu-Num
nu aki abika adɔsa ha
nu abɔɔ umbɔ aka afɛr ru upfunga.>>