19
Akpoi Unum ra afã
1 Akɛrɛ aka amaa umum igũ abin akɔɔ irhak ake ikeker ugɛɛ nggaa ikikɔng ra afã atsu ivum agɛ,
<<Ukpoi Unum!
Ififɔrh, nu igɔng, nu ijee,
iwu iyi Unummɛn.
2 Ubinkutsu izharha arherhanga iwe idzidzɛrhe ni irhika.
Unga aka atsĩme nggaa unggoyi utsɛrh ha
aka adakuwe abĩã nggu itoma-daknga.
Unga utsuke ufai ru utsɛrh ha
ri ifɛre agãrhã Unum.>>
3 Ikɛi umbɔ abvui atsu ivum agɛ,
<<Ukpoi Unum!
Azookɛ iki idzeyiwa ru unga
awuri ifũrhã afafã ugbagbaa nu ugbagbaa.>>
4 Akakũ isɔka ivaa na anaa hã nggu imimuna abin urhɛ ha ikinanake agba anu na adzowe igɔng ru Unum, uwuku usei nu anang isei ha. Aciu agɛ,
<<Iwerimi! Ukpoi Unum!>>
5 Mɔcɛ urhɛm udzek ra anang isei ha ugɔr ugɛ,
<<Àka akpoi Unummɛn,
kishoo umbi agãrhãnga,
umbi abika agũ iwei unga,
abika agɔng nu abika aci.>>
6 Mɔcɛ umum igũ irhak ru nyaki ikikɔng iyiki igɔng, ru nyaka amɛ̃ azɛ̃ akagɔng aki itĩ, ru nyaku nggaa irhirhare inai, itsu ivum agɛ,
<<Ukpoi Unum!
Ubinkutsu Uteijee Unum Uner Ijee awu Uyɛrhe.
7 Umɛn igɔmanggɔm ni igũibɛn,
ni ikpoi unga!
Ubinkutsu ipfunu Ungwɛ̃ Itsurhi iki iwengge,
nu utsɛrh uwuku ufanga aka agbisha amaanga.
8 Uzeze atorho umbɔ aki iyisa urhini,
aka aterha atɛtɛnake,
umbɔ aka adzowe unga atsim.>>
Uzeze atorho ha ake awu itser irhirhika iyi abika adɔsa.
9 Mɔcɛ ipfu itser-Num hã igɔr umum igɛ, <<Utsɛng, <Idorh iwe iyi abirabɛ umbɔ aka aghwi umbɔ izĩ ipfuna Ungwɛ̃ Itsurhi ha!> >> Ngge itoma igɔr igɛ, <<Akɛrɛ ake awe Arherhu-Num aki idzidzɛrhe.>>
10 Mɔcɛ umum igba inũ ra adaknga idzowe unga igɔng, bɔr unga agɔr umum agɛ, <<Niba ukorhungo rimi! Umum iwu undɔki itser ru ungo nu angwɛ̃mbi nggu anapumbi, abirabɛ aka akpɔm ideka Uyesu. Udzowe igɔng ru Unum! Ubinkutsu ideku Uyesu ngge idzowe ijee iyiki isɔm Arherhu-Num.>>
Uwɔɔ nu inyãwã iyiki iterha
11 Umum inyã afã adɛ̃ɛ̃ iyɛm umum inyã inyãwã iyiki iterha itsok uwuku ufũ ngge igburh Uner Imangmang nu Uner Idzidzɛrhe. Nggu irhirhika unga aka atsu uvau na itang iwa. 12 Ishaa asunga iwu ru nyaki ikon urha, ífur iyɛrhe iwu irhɛirhɛ ni itsinga. Ikɛi awea ri itsok iki itsɛng, unera asi ihwɛnga bɔr unga ikiyikanga ahwɛng. 13 Atsim atorho akagɔng aka abii ra adzirh, itsoknga igburh, Urhɛm Unum. 14 Ukpui abi iwa ra afã udɔsa unga, atsim azeze atorho umbɔ aki iyisa urhini akaterha na awu atɛtɛnake, afũ inyãwã iyiki iterha. 15 Ra angwĩnga ikon iki ider ikɔɔ ighaigharake unga aka akũ azharha abĩã agba. Unga awuri ikũ igbong uzɔu awe Uyɛrhambɔ. Unga awuri ipayi ru nggaa ughwee ukpuku upayi amɛ̃ inebi aki uver avɔm Unum uwu ijee kishoo.*Àka anyã ikɛi: Amb 2.9. 16 Nu atorha akagɔnga nu ijeng adaknga umbɔ atsɛng itsoknga agɛ,
<<UYƐRHE AYƐRHE NU UTEIJEE ATEIJEE.>>
17 Ni inyã ipfu itser-Num iki idɛ̃ɛ̃ ri ishaa unum, itsarhi irhakngge iyisa anunu kishoo aka atĩna ra afafã agɛ, <<Àka aba akɔng ra anang nggaa irhowa iyi Unum. 18 Ngge itsú umbi atãiwe ijuɛ ayɛrha, nu iyi anggbaashi abi iwa, nu iyi aner abika aker, nu iyi inyãwã, nu iyi abika afũrhã ngge, nu ikɛi ijuɛ anera kishoo, agãrhã nu abika afɔn, nu abika agɔng nu abika aci!>>
19 Mɔcɛ umum inyã ijuɛ arhum iyiki ibewe hã nu ayɛrhe abĩã nu abi iwa umbɔ aka akɔng, abee itang iwa nggu uwu ha aka asei nu inyãwã hã, unga nu abi iwanga. 20 Bɔr umbɔ adzur ijuɛ arhum iyiki ibewe ha nggu abika asɔm Arherhu-Num igbɛrangwĩ abirabɛ aka akorhuwe ijuɛ arhum iyiki ibewe hã nggaa atsar abin idzeu. Akũ abin idzeu ha arhɛm abika awe ru idzɛu ijuɛ arhum iyiki ibewe hã, nu abirabɛ aka adzowe igɔng ru usaka ijuɛ arhum iyiki ibewe hã. Umbɔ adzur ijuɛ arhum iyiki ibewe hã nggu uwuku usɔm Arherhu-Num igbɛrangwĩ na atsuke umbɔ ru ukau urha uku uterha. 21 Afɛre abi iwambɔ kishoo nggu ikon iki ider iki idzeka angwĩ uwu ha aka asei ni inyãwã hã, anunu kishoo atãiwe ijuɛ iyormbɔ utsɛku ake iki ishur akarhãrhã.