1 Ara Paula, pana nyorogua tana Tamasa sa sorusiu i Jisu Karisito ko qa kai tinoni tagarunuqu tana sara, beto i Sositenesi na tasida isa sa korapa suvere tavitisiu ara.

2 Na leta api sa lao tamugou na ekelesia tana Tamasa pa Koriniti. Agou sa kukugou ko na ona tinoni na Tamasa sagou, beto ko qu tavalioso ura qu kole kame tavitia i Jisu Karisito. Ko na leta api sa lao tugu vei tadira doru tinoni qai vavaikamu doru ia ketakoi ko qai vatarasaea na oda Bangara i Jisu Karisito, isa na Bangara tadira beto ko tamigei tugu vei.

3 Na vairoqu vaialona beto na bule tana Tamasa na Tamada beto na Bangara i Jisu Karisito mi somana tamugou.

4 Ara qa paranga jongana lao tana qua Tamasa doru totoso ura isa sa vanigou na mana totonai qu kole kame tavitia i Jisu Karisito sagou. 5 Ura pana miu kole kame tavitia na Karisito sa qu tavaisisongo pana doru soana sagou- pana paranga beto pana gigalai. 6 Ko na boboka qu isongoria agou ira sa ulenia sa na vavakatona na Karisito qe ule vanigou agei sa sa sosoto. 7 Ko sa vei sa kepore kai vaivana tana Gagala bu qasania agou tonai qu korapa vera gegelenia sa na bola votuna na oda Bangara i Jisu Karisito. 8 Ko na Karisito tugu vei sa mina vabageregou pana miu rarange tinganai mina kamua na vinabetona, ko mina kepore kai miu pake pana rane tana oda Bangara i Jisu Karisito. 9 Na Tamasa sake boka teteria nona paranga. Ko isa tugu sa na Tamasa sa sorugou ko qu mekarai toa tavitia agou sa na Tuna na Tamasa, i Jisu Karisito na oda Bangara.

10 Ka visa tavitiqu, qa tepa vivitigigou ara pana isongona na oda Bangara i Jisu Karisito sagou ko mu mekarai suvere vaikamu. Ko pana miu mekarai suvere sa muke okoto tapipikata pana gogoto minete, goto mu kame gu pana roroqu beto pana uana. 11 Qai tei ule vatatale vanisiu tu ira na tavitina i Koloe sa na veveina na nonomi sa korapa kole pa vaikorapaimiu agou, ka visa tavitiqu. 12 Na ginuana qa paranga vei pira sa ura agou sa qu okoto vilemiu kalena ko qu okoto parangamiu tu. Kame sa paranga, <<Ara tai Paula,>> sau. Kame mule sa paranga, <<Ara tai Apolosi,>> sau. Kai goto sa paranga, <<Ara tai Pita,>> sau. Kai goto mule sa paranga, <<Ara tana Karisito,>> sau. 13 Kopira sa qu okoto pipikatia pana okokoto minete agou sa kai Karisito gu! Ai vei, i Paula sa sa matenigou pa korosi? Ba pana isongona i Paula sa qu tapaputaiso? 14 Qa paranga jongana lao tana Tamasa sara ura kepore kame agou sa ba paputaisoia ara goto ira Kirisipasi beto i Qaiosi gu. 15 Ko kepore sa kai tinoni mina boka paranga vei isa sa tapaputaiso pa nisongoqu ara biu. 16 Koi dai, na tatamana tugu vei ti Sitepanasi sa qa paputaisoia ara, goto kepore mule sa kame agou qa vanonogai vei ba paputaisoia. 17 Ura na Karisito sake garunusiu sara ko mana vaipaputaiso goto qa tagarunu ko mana taraenia tu na nongoro jongana. Ko qa tagarununia ara ko mana taraenia nake pana paranga gigalai tana tinoni sa na nongoro, ura kita na nongorona na korosi tana Karisito mi tavakokoba nona neqi.

18 Ura na nongorona na Karisito sa mate pa korosi sa kepore sosoto veveina pana tadira qai muma, ba tadagita taqe korapa taalo sa na nongoro isa sa na neqi tana Tamasa. 19 Pira sau sa na Kukuti Tabuna,

20 Ko kopira pai sa na tinoni gigigalai? Pai sa na tinoni tomena pana Vavanau ti Mosese? Pai sa na tinoni pa kasia gusu api sa boboka vivitigi pana vaiguaniria na rorove? Na Tamasa sa vatadogoronia sa na gigigalai tadira na tinoni gigalai sa na gagale pupugu gu. 21 Ura na Tamasa sa gigalai jola ko sa vei sa sa vilea isa sa ira na tinoni pa kasia gusu sa maike boka gigilania pana dia gigalai mekadi ira sa na Tamasa. Ko sa vei sa isa tugu na nongoro sa tagigala na goborona qe taraenia agei sa sa vile varoitia ko sa aloria sira qai vasosoto. 22 Na tinoni Jiu qai tepai kaki roiti vaivagabaradi tu beto mai vasosoto qarigu goto ira Qiriki qai nyaqoa na gigalai tu. 23 Goto agei sa qe taraenia sa na veveina tu na Karisito sa tavamate pa korosi. Ko na nongoro isa sa na patu vaivatatupena tadira na Jiu beto kai sakasa gogoborona tadira na tinoni karovodi; 24 goto tadira sa kukuria na Tamasa, ira na tinoni Jiu beto na Qiriki, sa na nongorona na Karisito sa vatadogoronia sa na neqi tana Tamasa beto na gigalai tana Tamasa. 25 Isa na roiti sa roitinia na Tamasa sa sa vei kai sakasava duduvilina pana dodogoro tadira na tinoni; ba na Tamasa sa sa gigalai jolania na gigalai tadira na tinoni. Beto isa sa roitinia na Tamasa sa sa vei kai sakasava munyalana pana dodogoro tadira na tinoni; ba na Tamasa sa sa neqi jolania na neqi tadira na tinoni.

26 Ego, ka visa tavitiqu, mu doria tu ai tinoni veveimiu sagou totonai sa kukugou na Tamasa ko. Nake sokumiu agou sa na gigalaimiu pana dodogoro tadira na tinoni pa kasia gusu, nake sokumiu agou sa na poreveveimiu, nake sokumiu agou sa na podo lame veimiu pana tatamana poreveveidi. 27 Ba isa tugu na sakasa qai doro veinia na duduvilina ira na tinoni pa kasia gusu sa sa vilea na Tamasa ko sa vakeaniria sira na tinoni gigalaidi; beto ko isa tugu na sakasa qai doro veinia kepore ona neqi ira na tinoni pa kasia gusu sa sa vilea na Tamasa ko sa vakeaniria sira na tinoni neqidi. 28 Beto ko isa tugu qai doro veinia na lame veina pana tatamana nake poreveveina ira na tinoni pa kasia gusu beto na sakasa qai tadoro vagore pale ko na kepore sosoto veveidi qarigunia sa sa vilea na Tamasa ko sa vakepore veveina beto paleria sira qai tadoro vei na poreveveidi. 29 Ko sa vei sa pa moena na Tamasa sa kepore kai tinoni mina boka vaqatania sa ara qa poreveveiqu jola minagu sisa. 30 Na Tamasa sa na kutana na miu kole kame tavitia i Jisu Karisito, ko na Karisito sa na tinonina na gigalai sosotona sa vanigita na Tamasa. Beto ko pana roiti sa roitinia isa taqe tavatuvisi pa moena na Tamasa sa gita, beto sa pikata kalenigita nona tinoni beto sa ruvatagita na Tamasa sa gita. 31 Ko sa vei sa pira sau sa na Kukuti Tabuna, <<Na tinoni sa nyogua vaqata sa mi vaqatania na veveina na Bangara,>> sau.Jeremae 9.24; 2 Koriniti 10.17.