1 Ego qa ule vanigou ina ko muna boka rangea si Poibe, isa kai luluda rereko pana oda kole kame tana Karisito beto ko isa tu sa kai nabulu pana ekelesia pa gusu pa Kenikiria. 2 Ko mu vakamu vatale veinia kai tinoni ta Bangara sisa pana uana garona vei taqe vavakamuria ira na tinoni tana Tamasa beto ko mu doro tokania pana kaki sakasava bi qasania tonai sa korapa tamugou. Ura kai rereko vaitokai vatale tadira na kubo tinoni beto ko taqu tugu vei sisa.

3 Mu pojaniria na qua roroqu tadira Pirisila beto i Akuila na marenena. Ira sa qai mekarai roiti tavitisiu ara pana nabuluna i Jisu Karisito, 4 beto vei ko mai aloa na toa taqu qarigu poni sa qaike matagutu gona pale sosoto na dia toa. Ko nake ara gu mekaqu sa qa paranga lao tadira, goto ira doru ekelesia tugu vei tadira na tinoni karovodi sa qai paranga jongana lao tadira. 5 Mu pojaniria tugu vei na qua roroqu sira na ekelesia qai vavaikamu pana ruma tadira karu.

Mu pojania na roroqu tana qua baere jonga i Ipaenitosi, isa na tinoni momoe pa eqa pa Esia sa vasosotoa na Karisito. 6 Mu pojania na qua roroqu ti Mere, isa sa pavu tale vivivanigou agou. 7 Mu pojaniria na qua roroqu tadira Adoronikosi beto i Iuniasi, ira na Jiu tavitiqu ara beto ko perangana ba qai suvere tavitisiu tu ara pa ruma vaipiu. Na tinoni tagarunudi poreveveidi beto ko tonai tu qa oqoro gigilai na Karisito ara sa qai podalai tutia na Karisito sira.

8 Mu pojania na qua roroqu ti Amipiliatosi, isa na qua baere jongana sa tutia na Bangara. 9 Mu pojania na qua roroqu ti Ubanosi, isa na tinoni sa mekarai roiti tavitigita pana roiti tana Karisito; beto mu pojania tugu vei na qua roroqu ti Sitakusi, isa na qua baere jonga. 10 Mu pojania na qua roroqu ti Apelesi, isa na tinoni nabuna pana ona rarange lao tana Karisito; beto mu pojaniria tugu vei na qua roroqu tadira na puku tatamana ti Arisitobulosi. 11 Mu pojania na qua roroqu ti Herodioni, isa na Jiu tavitiqu; beto mu pojaniria tugu vei na qua roroqu tadira pana puku tatamana ti Nakisosi, ira qai vasosotoa na Bangara.

12 Mu pojaniria na qua roroqu ira karu rereko ira Turupaina beto i Turuposa, ira qai pavu talenia na Bangara; beto mu pojania tugu vei na qua roroqu na rereko i Pesisi, isa na oda baere jonga sa pavu tale vivivania na Bangara. 13 Mu pojania na qua roroqu ti Ruposi, isa na tinoni sa tabata pikatana na ona na Bangara; beto mu pojania tugu vei na qua roroqu tana tinana, isa ara ba sa kopu veinisiu tugu na tuna. 14 Mu pojaniria na qua roroqu tadira Asunikiritosi, i Peleqoni, i Hemesi, i Patorobasi, i Hemasi, beto ko ira doru qai tutia na Karisito qai somana suvere tavitiria ira. 15 Mu pojaniria na qua roroqu tadira Piloloqosi, i Jiulia, i Nereusi beto na luluna rereko, beto i Olumipasi beto ira doru tinoni tana Tamasa qai suvere tavitiria ira.

16 Mu vaigosoro pana uana madina tonai mu vaikamu. Ira doru ekelesia tana Karisito pana ia lani qai garunu laonia na dia roroqu tamugou.

17 Ego qa tepa vivitigigou ara sagou, ka visa tavitiqu, ko mu doro kopuniria sira qai roitiniria na vavaipiarai beto na vavaivavukele. Na dia roiti sa goto pana vaivagigalai isa agou qu tei tekua tu, ko mu ukuniria sira na tinoni vevei inara 18 Ura ira na tinoni vevei inara sa nake oda Bangara na Karisito sa qai nabulunia, goto qai roiti tutia na dia nyorogua gu mekadi. Qai paranga vagigigalai beto qai paranga valolomoso ko qai nyoravaria na roqudi sira sa munyala gu na toni vapirudi. 19 Ba na veveimiu agou qu vatabea na nongoro jongana tana Karisito sa sa tanongoro tadira doru tinoni, ko na veveimiu agou sa qa qerania sara. Ko qa nyoroguanigou sa agou mu tavagigala ko mu roitinia na jongana, beto mu lioso ko mu kilu pale na ikerena. 20 Ko vei muna vei agou poni sa na Tamasa, isa na kutana na bule, sa tata mina vakilasia ko muna bangara jolania agou si Setani. Na vairoqu vaialona ta noda Bangara i Jisu mi somana kole tamugou.

21 Sa garunu laonia nona roroqu tamugou si Timote, isa sa mekarai roiti tavitisiu ara; beto vei tugu ira Lukasi, i Jasoni beto i Sosipatorosi, ira na turaqu ara. 22 Ara Tetiosi, kai tinoni tugu tana Bangara beto qa kuti vagorea na leta api, sa qa garunu laonia na qua roroqu tamugou. 23 I Qaiosi, isa sa vatogasiu ara Paula pana ona ruma beto ko na ekelesia doruna ba sa vavaikamu tugu pana ruma tana, sa sa garunu laonia na ona roroqu tamugou. I Erasitasi, na tinoni kokopu poata tana gusu lavata lani, beto ko i Kuatosi na turada, ba qai garunu laoniria tugu na dia roroqu tamugou.*Kaki kukuti pa moadi na pikata 24 sa kole lani ko pira sau, <<Na vairoqu vaialona ta noda Bangara i Jisu Karisito mi somana kole tamugou doru.>>

25 Isa sa boka vaturu vaneqigou vei sa ulenia na nongoro jongana taqu beto tonai sa tatarae i Jisu Karisito, beto isa vei sa tadogoro votu pana sosoto sa tagolomo pana soku totoso pa moa, 26 ba kopira sa tei bola votu tu pana kukuti tadira na tinoni kokorotai beto ko pana vaigarunu tana Tamasa kole jolana, ko ira doru puku tinoni mai vasosotoa beto mai vatabea sisa, 27 isa sa kai memeka Tamasa gigigalaina jola mi tavatarasae, pana roiti ti Jisu Karisito, kamua na kamua! Agua.