1 Beto ko agou na iviva rereko ba mu tuti viketeria sira na marenemiu. Ko vei ira kaki sa bai oqoro vasosotoa na paranga tana Tamasa poni sa kode mai boka tavagabala ko mai vasosotoa tonai mai batia na uana jongana tamugou na maqotadi. Ko munake kilu pojaniria kai paranga agou sa beto mai tavagabala sira na marenemiu 2 goto tonai gu mai batia na miu uana liosona sa kolea na pangaga. 3 Muke sari vababata jonganaria gu na sakasava vevei na vivinyulu vurungu, na papaku teteri qolo beto na poko sasari sa na peguru tinimiu. 4 Goto na miu uana tu sa koko lame vei pana bulomiu sa mu sarinia na sakasava qaike nyabo vivikere vevei na uana nake tuara beto na uana bubule. Na sari vevei tu pira sa sa doro poreveveina pana tana Tamasa. 5 Ura pa moa sa api tugu sa na soana qai tutia ira na rereko madidi qai totoravusia na taringunguti tana Tamasa. Qai sari vabata jongai sa na dia toa tonai qai suvere viketai pana tadira na marenedi. 6 I Sera sa kai rereko sa vei isa. I Sera sa vainongoro lao ti Ebarahami beto sa kukunia na ona bangara si Ebarahami. Ko agou ba kopira muna vei tugu i Sera vei muna roiti vatale beto vei muneke matagutunia kai sa.

7 Ko agou na iviva marene ba mu gigila vataleria tugu sira na maqotamiu tonai qu suvere tavitiria ura qaike neqi vei agou na marene sira. Mu pangaganiria sira na maqotamiu ura ira beto agou sa kode muna mekarai isongia tugu sa na toa jola isa na vaivana tana Tamasa. Ko muna roiti vei agou aipira sa na miu vavara ba maike takoloso.

8 Na qua vavanau bebetona sapi. Mu mekarai suvere kame pana uana jongana pana toa, mu mekarai kame pana roroquna na goto tinoni, mu mekarai vairoqu vei na tamatasi tana Karisito, mu mekarai isongia na bulo vairoqu, beto mu vaikete mulenigou pana tadira na tinoni. 9 Muke vamule bei vaniria na ikerena sira qai roiti lamenia na ikerena pana tamugou, beto muke gonaniria na parange ikeredi sira qai gonanigou na paranga ikeredi. Goto mu tepa vaniria tu na mana ura na mana tu sa sa kukunigou na Tamasa ko muna teku isongia agou. 10 Inara tu mu toa vei sagou, ura pira sa tei paranga vei tu sa na Kukuti Tabuna,

13 I sei sa mina boka ngangangulugou agou tonai muna ngangalinia na roiti jongana? Bi mija tu kame! 14 Ba vei bu gosoro taleni tapata tu agou sa na tuvisi qu roitinia, sa tamalea sagou. Muke matagutuniria sira qai boka vanigou na tapata, beto muke mamata na takulanga. 15 Goto mu valavatia pa bulomiu sa na Karisito na Bangara. Beto mu vatana doru totoso ko mu oe muleria sira na tinoni mai nanasanigou na veveina na miu vinasosoto sa kole pa bulomiu. 16 Ba tonai mu oeria poni sa mu roitinia pana pangaga beto pana uana viketai beto pana monana jongana, ko tonai mai aja vagogoregou beto mai poja vivikeria sa na miu uana jongana vei qu tutia na Karisito sagou, sa kode mai tavakea mekadi sira. 17 Ura vei mina ona nyorogua tugu na Tamasa sa muna gosoro tapata sagou, poni sa sa jongana jola sa muna gosoro taleni tapata sa na roiti jongana. Isa tu sa sa jongana jolania vei bu gosoro taleni tapata sira na roiti ikeredi.

18 Ura na Karisito sa matenia kai totoso gu sa na sela tana goto tinoni. Isa na tinoni tuvisi sa matepaeniria sira na tinoni sela, ko sa toni vatata laogita tana Tamasa. Na Karisito sa tavamate pana tini ba sa tavatoa pana gagala, 19 ko tonai sa sa gore tarae vevelania isa sa na vinakilasa tadira na gagala qai tapiu vakole. 20 Ira sira na tinoni sa kole vera vamomosoniria na gabaladi na Tamasa pana totoso pa moa tonai sa kole roitinia na aka i Noa. Ira ka vesu tinoni momoqasadi gu sa qai tome pana aka ko ira gu sa sa aloria na Tamasa pana kolo. 21 Ko isa sa gosoria i Noa beto na ona tatamana sa na vinagigila sa udukia sa na paputaiso isa kopira sa alogou agou ura i Jisu Karisito sa tei turu mule tu. Ba na ginuana na paputaiso sa nake vei ko na valioso paleria na paji pana tini ba na ginuana sa gita taqe vasosotoa pana monana jongana sa na Tamasa. 22 Ko i Jisu Karisito sa tei sae tu pa noka ko kopira sa korapa toqo pa kale matuana na Tamasa, beto ko sa bangaraniria sira dorudi na mateana beto ira na okokoto kuta bangara beto na gagala neqidi pa vavagalo eqa.