1 Ko sa vei sa ira na tinoni mamata pa vaikorapaimiu agou sa qa korapa tepa vivitigiria ara. Ara ba kai tino mamata tugu beto ko qa vavakatoniria tugu ara sira na vitigi sa gosororia na Karisito pa korosi beto qa somana isongia tugu ara sa na neqi lavatana isa sa tata mina tabata votu tonai mina mule lame isa. 2 Kai muqisi podeke vei na sepati sa kopuniria na ona sipi, poni sa agou ba mu kopu vataleniria tugu sira na tinoni tana Tamasa qu korapa toniria. Mu kopuniria nake vei ko qu tajutu tarinia gu agou sa, ba mu kopuniria pana bulo malumuna tu isa vei sa nyoroguania na Tamasa. Mu roitinia na roiti api nake vei ko qu nyonyogua teteku tabara gu, goto mu roitinia ura qu nyorogua vaitokai sosoto. 3 Muke toni veiniria na pinausu sira qai kole pana miu kopu, goto mu vabatiniria tu sa na uana jongana mai tutia. 4 Ko tonai mina bola votu sa na kuta sepati na Karisito, sa muna tekua agou sa na pinia sake mumuri na kilangana.

5 Ko agou na tinoni sae korega ba mu suvere vaiketai lao tadira na tinoni mamatuadi, beto pana miu uana viketai mu vainabulu lao lame. Ura pira sau sa na Kukuti Tabuna,

6 Ko sa vei sa agou mu vaiketai mulenigou pa kauru lima evevana na Tamasa, ko isa mina ovulugou sagou pana totoso mina vilea isa. 7 Mu vania isa ko mi jujunoniria sira dorudi na miu takulanga ura isa sa kopu vatalenigou sagou.

8 Muke ilalo lao lame pana miu roroqu, mu suvere gegele! Ura na miu kana isa na bangaradi na tomate sa sa korapa lekogia doru eqa. Sa korapa lekogo vei na laione sa ngangara ko sa korapa nyaqo tinoni ko mi gani pipiararia sau. 9 Mu kole vamauru pana miu rarange beto mu raja kokolosia sisa. Ura qu gigilaimiu agou sira na tinoni tana Tamasa pa kasia gusu sa qai korapa tugu gosororia sira na vitigi pana ginuana qai vasosotoa na Karisito vevei tugu qu korapa gosororia agou. 10 Ba pa liguna muna suvere vitigi pana iapeki totoso papakana, sa na Tamasa mekana isa sa pugelia na vairoqu sa mina tuvaka vatuvisigou, mina sori vamaurugou, mina vaneqigou beto mina vaturu vamaurugou sagou. Isa sa na Tamasa sa kukugou ko muna somana isongia agou sa nona neqi kole jolana, ura qu gigilai agou sa na Karisito. 11 Isa sa na Tamasa sa isongia na binangara kamua na kamua! Agua.

12 I Silovanosi sa kai tinoni tana Karisito sa nago taqu ko qa doro rangea ara ko pana vaitokai tana sa qa kutia ara sa kai leta papakana api. Ko qa paranga vaneneqigou beto qa vavakato vaneqinia ara sa isa na vairoqu vaialona sosotona tana Tamasa api. Ko agou sa mu turu vaneqi pana vairoqu vaialona api.

13 Na ekelesia somana tavilena tugu tana Tamasa pa Babiloni*Na isongo Babiloni api sa udukia pa Romu. Na totoso tapata tadira na tinoni tana Karisito sa tonai sa takuti na leta api ko sake tapoja lodaka sa na isongo Romu. beto na tuqu marene i Maka sa qai garunu laonia na dia roroqu tamugou. 14 Mu vaigosoro qeqera pana vairoqu tana Karisito.

Na bule mi somana pana tamugou na tinoni tana Karisito.