1 Ara Saimone Pita na nabulu beto na tinoni tagarunuqu tai Jisu Karisito.

Na leta api sa qa valaoa tadira na tinoni qai isongia na rarange poreveveina jola veveina tugu qe isongia agei. Sa tei vatuvisigita tu na oda Tamasa beto i Jisu Karisito isa sa alogita sa gita.

2 Na vairoqu vaialona beto na bule mi vovonu tamugou tonai muna gigila vatalea na Tamasa beto i Jisu Karisito na oda Bangara.

3 Pana ona neqi tinamasa na Tamasa sa tei vanigita tu sa doru sakasava pana toa gagala ko tana boka toa beto tana pangagania na Tamasa sau. Ko taqe tei isongoria tu gita sira na sakasava pira ura taqe tei gigilai tu gita sisa. Ko isa sa sa kukugita ko taqe somana pana ona neqi lavatana beto na uana tuvisina. 4 Ura pana ginugua vei aipira sa sa tei vanigita tu isa sira nona taringuguti jojongadi beto na poreveveidi jola. Ko pana soana vei pira sa muna somana isongia agou sa na toa tinamasai tonai muna uku loa pale agou sa na toa lulasana sa koko lame vei pana nyorogua tana kasia gusu.

5 Ko sa vei isa sa agou mu ngangali ko mu vaokoto vatalenia na toa jongana sa na miu rarange, beto mu vatavitinia na gigalaina na nyorogua tana Tamasa sa na jongana. 6 Na gigalaina na nyorogua tana Tamasa sa mu vatavitinia na kopu mulenigou pana ikerena, na kopu mulenigou pana ikerena sa mu vatavitinia na turu vangaju pana tapata. Na turu vangaju sa mu vatavitinia na pangagana na Tamasa. 7 Na pangagana na Tamasa sa mu vatavitinia na vaitamatasi, beto ko na vaitamatasi sa mu vatavitinia na vairoqu. 8 Ura vei mai kole tamugou beto vei muna isongo vamotaria agou sira na toa aipira, sa kode munake qasa beto munake egoronia na miu gigalaina na oda Bangara i Jisu Karisito sagou. 9 Ura na tinoni sa qasaniria na sakasava vei pira sa sa leqa ko sa papaka nona dodogoro, beto ko sa tei muma pale tu isa sa ira nona sela koledi sa qai toi tavulasa tu.

10 Ko inara sa vei, ka visa tavitiqu, ko mu podeke vivitigia ko mu gigila vatalea sa na ginuana sa kukugou beto sa vilegou na Tamasa. Ko vei muna roitiniria agou sira na roiti aipira poni sa kode munake boka tatupe pana miu rarangena na Karisito sagou. 11 Ko na vuana na miu popodeke lavata sa kode muna tekua agou sa na vinamalumu sosotona ko muna tomea sa na binangara kole jolana ta noda Bangara beto na inaalo i Jisu Karisito.

12 Ko sa vei sa nake savana qu tei gigilaimiu tu beto qu tei turu vamauru tu sa pana vaivagigalai sosotona qu isongia sagou, ba ara sa manake beto varoroqunigou sa na sakasava aipira. 13 Qa rove veinia na qua roiti ara sapi ko tonai qa korapa toaqua sa manake beto varoroqunigou sira na sakasava aipira ko muke mumaniria. 14 Ura qa tei gigilai tu sa na rane mana taloa sa nake sovaina beto mina kamu, vei tugu sa tei vakabere vanisiu tugu na oda Bangara i Jisu Karisito. 15 Ara mana popodeke vivitigia pana qua kukuti ko pana liguna mana taloa ara ba munake roqu mumaniria agou sira na sakasava aipira.

16 Ura nake vivinei jojongadi gogoborodi sa qe tutiria agei na tinoni tagarunumei totonai qe ule vanigou sa na veveina na neqi beto na mule lame ta noda Bangara i Jisu Karisito. Goto qe batini matamei sosoto sa nona neqi isa. 17 Ura agei qe korapa tugu sa totonai sa tekua isa sa na vinalavata beto na malakapi pana tana Tamasa na Tamada. Totonai sa na ovovele tana Tamasa lavatana jola sa pira sau, <<Na Tuqu Mekaina isa qa qera vivitiginia ara sapi,>> sau. 18 Ko na ovovele qe nongoria agei api sa sa lagere vei pa noka tonai qe kole suvere tavitia sisa pa batu kubo madina. 19 Ko sa vei isa sa agei qe vasosoto vivitigia sa na nongoro qai pojai ira na tinoni kokorotai pa moa. Ko sa vei sa kode muna tatoka vatale sagou vei munake doro kipunia agou sa na paranga tadira na tinoni kokorotai. Na paranga tadira na tinoni kokorotai isa sa sa vei na juke sa vakaberia na eqa rorodomona pa bulomiu tinganai mina kabere vei tonai sa sae na vovola rane beto sa sagere na seru rane pana vuvugei. 20 Ba api sa na roroqu sa poreveveina ko mu gigila vatalea sapi. Kepore kai kokorotai pana Kukuti Tabuna sa sa tavavukele pana ona ruruvata gu mekana na tinoni. 21 Ura kepore sa kai kokorotai sa votu lame pana ona nyorogua gu mekana na tinoni, goto na Gagala Tabuna tu sa gaitiria sira na tinoni beto sa qai poja votuniria sira na nongoro qai lagere vei tana Tamasa.