1 Ego ira na tinoni kokorotai sesekedi ba qai votu lame tugu sa pa vaikorapaidi ira na tinoni Izireli pa moa, kai muqisi vei tugu ira na tinoni vaivagigalai sesekedi ba kode mai votu lame tugu sa pa vaikorapaimiu agou. Ira sa kode mai mavo vaivagigalai golomoniria sira na vaivagigalai sesekedi beto na vainganguludi beto ko kode mai kilu pale sa na Bangara lavata isa sa tei pajukuria tu pana dia toa sela. Ko tonai mai vei inara sira sa mai teku tariniria mekadi sa na vinakilasa. 2 Ko sokudi ira qai gigala muleniria na tinoni tana Karisito qarigu sa kode mai tutia sa na uana lulasana tadira, ko pana soana vei inara sa na nongoro jongana isa na soana sosotona sa kode mina tapoja vivikere. 3 Beto ko pana ginuana qai nyonyorogua isisongodia gu sa kode mai roiti votuniria sira na soku vaivagigalai nyonyoravadi ko mai tekuria sa na miu poata. Ba na vaituti tadira sa sa tei tavanaqiti vakole tu pa moa tu beto ko na vinakilasa tana Tamasa mai gosoria ira sa sa tei korapa tu veraniria.

4 Ura agou ba qu tei gigilaimiu tu sa na Tamasa sake kole gu dodorona sa tadira na mateana tonai qai roitinia na sela, goto sa gona goreniria pa heli.*Na paranga Qiriki sa tapeluku heli api sa na Tatarusi, ko pa Vinaego Koregana sa lani gu sa kole sa na paranga isa. Pana tadira na tinoni Qiriki sa pa Tatarusi sa na ia pa kauruna pa hedisi (ketakoi na ia tadira na tinoni matedi), ko pa Tatarusi qai tavakilasa sira na tinoni ko ketakoi qai tapiu vakole pa leo rorodomona ko mai verania na vinakilasa. 5 Beto sake kole gu dodoriaona gu isa sa na kasia gusu pa moa, goto sa vadururu paleria isa sira na tinoni ikikeredi tonai. I Noa gu sa kole taraenia na tuvisi beto ko ira ka vitu tinoni gu mule sa qai tavasare. 6 Beto ira na gugusu pa Sodomo pa Qomora sa sa vaganiniria na iku isa ko qai peluku kavu betodia tu. Ko isa sa na vinapapada vinabalau tadira mai toania na toa ikerena. 7 Ko na Tamasa sa aloa si Loti isa kai tinoni tuvisina. I Loti sake tavaraguania sa na toa lulasana tadira na tinoni ikikeredi pa vailivutaina. 8 Na tinoni tuvisina isa sa sa suvere tavitiria ira na tinoni ikikeredi. Ko doru rane na ona toa tuvisina sa kole gosororia sa na vitigi takulanga tonai sa batiria beto sa nongoroniria na dia roiti ikikeredi. 9 Ko na Bangara sa gigilaiona sisa mina roiti vei ko mina teku votuniria pana tapata sira na tinoni tuvisidi, beto sa gigilaiona sisa mina roiti vei ko mina vatananiria na vinakilasa sira na tinoni ikikeredi tinganai mina kamua na rane vaituti. 10 Ko ira qai vaivagigalainiria na nongoro sesekedi sa na tinoni qai toaniria na toa lulasana beto ko qai vakepore veveinaia sa na neqi tana Tamasa.

Ira na tinoni aipira sa qai juju batudi beto qai tututidia roroqu mekadi ko qaike matagutu poja vivikeria sira na sakasava madidi jola. 11 Ba ira tu na mateana qai neqi jola beto qai viva jolaniria sira na tinoni vaivagigalai sesekedi pira ba qaike tuma vamoroanaria pana moena na Bangara sira na sakasava madidi pira. 12 Goto ira na tinoni vavaivagigalai sesekedi aipira sa qai vei na manugu mamade nenedi sa kepore na roqudi. Ko na ginuana sa qai podo ko mai gosoria tugu na mate sira. Qai poja vivikereria sira na sakasava qaike gigila vataleria ko ira sa kode mai tapipiara vei tugu ira na manugu aipira, 13 beto kode mai gosoro taleni vitigi ira sira na vitigi qai roiti laoniria pana tadira na tinoni. Qai doro veinia na sakasava vaivaqerana sa na kole roroitiniria pana rane kabere lavata sira na roiti ikikeredi sa vaqerai na dia toa tini. Ira sa qai vei na opopu ko na dia uana sa paji totonai qai somana tavitigou agou pana miu vavolo. Sa lingiria tu ira sa na kole tututiria na dia soana ikikeredi. 14 Qai nyorogua laoria sira doru rereko qai batiria beto qaike nogoto roitinia na sela. Qai valoposoria sira na tinoni sake neqi na dia rarange. Qai isongia na bulo sa morutu vatalenia nyonyoroguaniria na sakasava. Na tinoni talevedi sira. 15 Ira sa qai loa palea na soana tuvisina ko qai rerege vapiru. Qai tutia sa na soana tai Balamu na tuna i Beo. I Balamu sa sa nyorogua isisongona pana soana ikikerena, 16 ba sa tatoke talenia isa sa nona roiti ikikerena sa kole roroqua ko mina roitinia sau. Ko na dongiki tu sa tabu paranga ba sa paranga votu toa vei na tinoni ko sa vanogotia sa na duduvili tai Balamu na tinoni kokorotai.

17 Ira na tinoni vaivagigalai sesekedi pira sa qai vei na vuvugu pie pidilina beto na pauku sa ivu vajola palea na gava. Ko sa tavanaqiti vaniria ira na tinoni pira sa na rodomo kukunina. 18 Qai paranga vapopoto bati kare beto qai roitiniria sira na nyonyorogua ikikeredi qai vaqerai na toa tini ko qai bako vakatapa muleria pana sela sira qai koni uku loai na toa ikerena. 19 Qai taringunguti vakole vaniria na toa taruvatana sira na goto tinoni ba ira mekadi sa qai korapa pinausu pana dia uana vavaipiarai. Ura gita na tinoni ko na ona pinausu gu na sakasava sake vangongogita. 20 Ko ira na tinoni qai tei uku loa pale mai tu sa na toa pajina pa kasia gusu tonai qai gigilai na oda Bangara beto i Jisu Karisito isa sa alogita beto sa qai tapiunia mule na sela ko sa vapinausuria mule na sela, poni sa na toa qai toania pana totoso liligu sa sa ikere jolania na dia toa pana totoso momoe. 21 Na Tamasa kode mina vakilasa vataleria sa pira, ko vei baike gigilai ira na soana tuvisi sa bi jongana jolania qai tei gigilai tu beto sa qai balinga loa pale sa na garunu liosona qai tavavanaunia. 22 Na toa tadira sa ulenia gu sa na sosotona na paranga gigigalai sosoto api, pira sau, <<Na sie sa gabala mule gania na luana mekana, beto na borogo sa koni ogono valioso sa lao titolo ovovaona pa nyenyelakana,>> sau.