1 Ara Paula na tinoni tagarunuqu tana Karisito i Jisu ko qa tagarunu pana neqi tana Tamasa noda inaalo beto tana Karisito i Jisu isa taqe korapa gelenia.

2 Na leta api sa lao tao Timote ao qu vei na tuqu sosoto pana toa rarange.

Na vairoqu vaialona, na vairoqu vaitokai beto na bule tana Tamasa na Tamada beto tana Karisito i Jisu na oda Bangara mai somana tamu.

3 Isa tugu vei qa tei paranga vaneqinigo tu totonai qa rererege lao vei pa Masidonia sa mu suvere pa Episasi qaunigo, ko mu paranga vaneneqiria sira kaki ketakoi ko mai nogoto vaivagigalainia na vaivagigalai sesekedi 4 beto maike jujuno goboroniria sira na vivinei goborodi gu beto na tututidi ira na dia tite. Ira na sakasava pira sa qai vapodo vavaigua goborodi gu goto qaike ule votunia na vareregena na vaialo tana Tamasa isa sa lame vei pana rarange. 5 Na vinaokotona na vavanau api sa na vairoqu, isa sa koko vei pana bulo liosona beto pana monana jongana beto pana rarange sosotona. 6 Ira kaki pira sa qai tei gabala vapiru tu ko qai gabala vapele laoria sira na vavaigua paranga sa kepore na veveidi. 7 Qai nyoroguania ko bai tinoni vavaivagigalainia na Vavanau sira, ba qaike vakoinoni podekeria ira na sakasa qai pojaria beto ira na sakasava qai paranga vaneneqiniria.

8 Taqe gigilaioda gita sa na Vavanau sa sa jongana vei mina tavaroiti pana vavanau tuvisina. 9 Ko taqe gigilaioda tugu vei gita sa na Vavanau sa sake tavatoqo vania na tinoni tuvisina, goto ira tu na tinoni qai daidia tuti vavanau beto na tinoni duduvilidi, ira qai kilunia na Tamasa beto ira na tinoni seladi, ira qaike toania na toa madina beto qai kanai na Tamasa, ira qai vamatea na tinadi na tamadi beto ira na tinoni vavarivai, 10 ira na tinoni lulasadi beto na marene qai vaivori vei na manugu, ira qai ikiko golomo pinausu, ira qai seseke beto qai maulu seseke, beto ira qai roitiniria na roiti qaike jongana pana vaivagigalai tuvisina. 11 Ko na vaivagigalai isa sa tabata pana nongoro jongana isa sa udukunisiu ara na Tamasa ko mana ulenia, isa sa na nongoro jongana tana Tamasa lavatana sa pada ko mina tavatarasae.

12 Ara qa paranga jongana lao tana Karisito Jisu na oda Bangara. Isa sa vaneqisiu ko qa boka nabulunia beto ko sa doro rangesiu ko sa udukunisiu sa na roiti ninabuluna isa. 13 Pana totoso qai jola lao pori ara sa na tinoni vavaiaja vagorequ, na tinoni nganganguluqu, beto na tinoni vavaipoja vivikerequ sara. Ba na Bangara sa roroqu tokanisiu sara ura totonai sa qa oqoro vasosotoa sisa ko qake gigilai na manugu qa roitinia. 14 Beto noda Bangara sake beto vadogoronisiu nona roroqu lavatana jola ko qa boka rangea sisa beto qa boka roroquria sira na goto tinoni tonai qa kole kame pana tana Karisito i Jisu. 15 Na paranga tarangena sapi ko sa pada ko mina tateku vakatapa: na Karisito i Jisu sa lame pa kasia gusu ko mi aloria sira na tinoni seladi sau. Ko ara tugu sa kame na tinoni ikikerequ jola. 16 Ba na ginuana sa roroqu tokanisiu ara sa na Bangara sa pira gu sa vei. Pana taqu sa vatadogoro momoenia na Karisito i Jisu sa na veveina isa sa boka vera vamomosonia sa na tinoni ikikeredi vevei ara. Ko ara sa kai dodogoro tutina tadira mai rangea sisa ko mai tekua sa na toa jola. 17 Na Bangara lavata na kole jolana, sake boka mate, sa pae, beto kai memekai Tamasa sosotona, isa sa mi kole na panganga beto na vinalavata kamua na kamua. Agua.

18 Na vavanau api sa qa varangenigo ao Timote na tuqu marene, ko muke mumaniria sira na kokorotai veveimu ao qai pojaria ira na tinoni kokorotai tonai qu tavamadi, ko ira tugu sa mai vabokago ko muna vaiperania na vaipera jongana, 19 beto mu kopunia na mua rarange beto na monana jongana. Ira kaki sa qai kilu pale sa na roroqu tuvisina ko na dia rarange sa vei na vaka sa jule vivikerenia pa mati. 20 Karu ira na tinoni vevei pira sa ira Humenaiosi beto i Alekezada. Ko ira karu pira sa qa tei loa laoniria tu ti Setani ara ko mai tavagigala ko maike poja vivikeria sa na Tamasa.