1 Ego na vinaokotona, ka visa tavitimei, sa agou mu vavara tokanigei agei ko na paranga tana Bangara mi rerege sisiqarai beto mi tadoro valavata, kai muqisi podeke vei tugu qu veinia agou tonai qu tekua sa na paranga tana. 2 Mu vavara tokanigei tugu vei sagei ko me tavasare tadira na tinoni ikikeredi, ura nake ira doru qai vasosotoa sa na nongoro jongana. 3 Ba na tarangena sa na Bangara, isa mina vaturu neqigou beto mina vasaregou pana tana kutana nikerena. 4 Na mei vinasosoto tana Bangara na veveimiu agou sa isa qe paranga vaneneqinigou sa qu tei korapa tu roitinia ko kode muna kole roitinia tugu. 5 Na Bangara mi totolinia na bulomiu ko mu gigila vatalea na vairoqu tana Tamasa beto mu isongia na turu vangaju tana Karisito.

6 Ka visa tavitimei, agei qe paranga vaneneqinigou pa isongona na oda Bangara i Jisu Karisito ko muke nago sa tadira doru tavitimiu qai toania na toa udapelu beto qai dainiadia toania sa na uana tututidi qai teku vakarovia tamigei. 7 Agou mekamiu qu gigila vataleamiu sa sa poreveveina sa mu doro tutigei agei, ura agei ba qeke toania na toa udapelu tonai qe suvere tavitigou sagou 8 beto na gagani ba qeke teku gobororia tadira na tinoni, goto qe roiti na rane na bongi ko qe pavu beto qe gosoroni tapata tu ko meke vejujunogou agou na goto tinoni qeu. 9 Nake vei ko sa keporenigei na mei neqi ko be tepa sa, goto qe toa vei api sagei ko mu doro tutigei agei sagou qeu. 10 Ura tonai qe suvere tavitigou sa qe paranga vaneneqi veinigou pira: <<Na tinoni sa daiona roiti sa minake gagani,>> qeunigou.

11 Ura qe nongoronia sa kaki agou sa qai toania na toa ududapeluna beto qai daidia roiti goto qai kole roiti susula gu pana ona roitina na goto tinoni. 12 Ira na tinoni vevei ira sa qe garunu vaneneqiria beto qe paranga vaneqiria pa korapa isongona na Bangara i Jisu Karisito ko mai mavo roiti votunia sa na gagani mai gania.

13 Goto, ka visa tavitimei, agou sa muke munyalania na roiti jongana. 14 Na tinoni sa daiona nongoria sa na paranga qe kuti laonia pa leta api, poni sa mu dogoro viloto vatalea sa na tinoni isa ko muke nagoa ko mi keania sa nona roiti. 15 Ba muke doro veinia na miu kana, goto mu vavanau veinia tu kai tavitimiu.

16 Na Bangara bule mekana mi vanigou na bule pa dorudi totoso, bi pana totoso jongadi babi na ikeredi. Na Bangara mi vavaburogou agou doru. 17 Na qua roroqu lavata lao tamugou api sa pa limaqu mekaqu qa kutinia. Na kukuti vinagigila vevei api sa qa vakolea pa bebetodi dorudi na qua leta. Ko pira qa kuti veinia sa na vinagigila api.

18 Na vairoqu vaialona ta noda Bangara i Jisu Karisito mi somana tamugou doru.