1 Qe tepagou agei sagou, ka visa tavitimei, ko na veveina na mule lamena na oda Bangara i Jisu Karisito beto tonai tana vaikamu gosoria gita sisa 2 sa muke oqani tajou vaneneqerenia babu takulanganiria agou sa kaki nongoro goborodi na lame veidi tana Gagala Tabuna, na vavakato babi na leta sa koko lame vei tamigei qarigu ko qai ulenia sa tei lame tu sa na rane tana Bangara qarigunigou.

3 Muke vaniria na lolomo sira na tinoni ko mai vasianagou, ura minake tei lame tu sa na rane isa tinganai mina kamua mai tu sa na totoso vuvukele riudia tadira na tinoni beto ko na kana tana Tamasa, na isongona na Tinoni Ikikerena Jola, isa mina tapipiara vakilasa sa mina votu lame mai tu. 4 Ko na Tinoni Ikikerena Jola isa sa mina paranga vakekeporeria sira doru sakasava qai tapopoja tamasa babi na sakasava qai tavatarasae, beto sa mina lao tome toqo pa zelepade madina tana Tamasa ko mina gigalia mekana sa isa sa na Tamasa minagu.

5 Ai vei quke roqu vakoititia tu agou sa perangana qa korapa suvere tavitigou sa qa tei pojanigou tu sa na veveidi aipira? 6 Ko kopira qu tei gigilaimiu tu agou sa isa sa aru vatogolia na Tinoni Ikikerena Jola ko tinganai mina kamua tu sa na ona totoso totonai mina votu vakabere sisa. 7 Na neqi ikikerena sa tei korapa tu roiti pa soana golomona, ba mina tateku varijo mai tu sa na tinoni sa aru vatogolia isa beto sa mina votu vakabere sa na tinonina. 8 Ko pa liguna tu mina tateku varijo na tinoni isa sa mina votu vakabere sa na Tinoni Ikikerena Jola api, ko i Jisu mina ivu vamatea beto mina vakilasania na ona kabere tonai mina bola votu lame sisa. 9 Na Tinoni Ikikerena Jola isa sa mina lame tavitia na neqi ti Setani ko mina roitiniria na roiti neqidi, na vinagigila sesekedi beto na roiti vaivagabara sesekedi. 10 Ko mina varoitiria doru soana seseke ikeredi tadira na tinoni mai gosoria na vinakilasa. Kode mai tavakilasa sira na tinoni ira ura isa tugu na sosoto bi aloria sa qai dainiadia. 11 Ko sa vei sa na Tamasa sa garunu tariniria na neqi vaitoni vapiru sira ko qai vasosotoa sa na seseke 12 ko ira doru qaike vasosotoa na sosoto beto qai tavaraguaniria sira na roiti ikikeredi sa kode mai gania na vinakilasa.

13 Ka visa tavitimei, agei qe doro vaporeveveinai ko qe paranga jonganania tana Tamasa sa na veveimiu agou, ura na Bangara sa roroqugou sagou ko pa popodalaina tu sa vilegou na vua moena na Tamasa sagou ko muna isongia sa na inaalo, ko na Gagala Tabuna sa vamadigou sagou qu vasosotoa na vaivagigalai sosotona. 14 Isa sa na toa sa kukunigou na Tamasa pana nongoro jongana qe taraenia agei tamugou ko agou muna somana isongia sa na toa jongana ta noda Bangara i Jisu Karisito. 15 Ko inara sa vei sa, ka visa tavitimei, mu turu vamauru beto mu aru tamanaria sira na uana tututidi qe vagigalainigou pana mei vavakato beto pana mei leta. 16 Na Tamasa sa roroqugita beto pana ona vairoqu vaialona sa vanigita na manoto kole jolana beto na vangaju ko ta boka vera gegelenia gita sira na sakasa jongadi. Na Bangara i Jisu Karisito mekana beto na Tamasa na Tamada sa 17 mi vaneqiria na bulomiu ko mu turu vaneqiniria doru roiti jongadi beto na paranga jongadi.