1 Ara Paula beto ira Silovanosi i Timote.

Na leta api sa lao tamugou na ekelesia pa Tesalonika, agou sa isongogou na Tamasa na Tamada beto na Bangara i Jisu Karisito.

2 Na vairoqu vaialona beto na bule tana Tamasa na Tamada beto tana Bangara i Jisu Karisito mi somana tamugou.

3 Ka visa tavitimei, qe doro vagaroa ko qe paranga jongana laonia tana Tamasa doru totoso agei sa na veveimiu agou. Ko sa tuvisina gu sa qe vei inana agei ura sa ijoko vatale sa na rarange tamugou beto sa vovonu sa na vairoqu tamugou. 4 Ko agei mekamei qe vavaqatania tadira na ekelesia tana Tamasa sa na veveimiu agou, ura qu gosororia sira na tapata beto na vitigi ba qu turu vangaju beto qu neqi pana miu rarange sagou.

5 Ko api sa ule votunia sa na vaituti tana Tamasa na tuvisina beto ko na Tamasa mina dogoro vapadagou pa nona binangara isa qu korapa gosoro taleni vitigi sagou. 6 Na Tamasa sa na tuvisina, ko kode mina bei vaniria tugu na vitigi sira qai vatakulangagou agou. 7 Goto agou qu gosororia na vitigi beto agei sa kode na Bangara i Jisu mina vamanotogita totonai mina votu lagere vei pa noka tavitiria ira na ona mateana neqidi jola. 8 Kode mina lagere tavitia na iku vuvurunguna ko mina vakilasaria sira qai kilunia na Tamasa beto ira qaike vatabea na nongoro jongana ta noda Bangara i Jisu. 9 Ko ira sa mai gosoria sa na vinakilasa tana pipiara kole jolana beto ko mai tapikata vasou pale pana tana Bangara beto pana ona neqi poreveveina lavatana 10 totonai mina mule lame sisa. Ko totonai mina mule lame si Jisu sa ira nona tinoni taviledi beto ira qai rangea isa sa mai vatarasaea beto mai valavatia sisa. Ko agou ba kode muna somana tavitiria tugu sira nona tinoni ura qu vasosotoa agou sa na nongoro qe vavakato vanigou agei.

11 Ko sa vei inara sa agei doru totoso qe vavara tokanigou sagou, ko na Tamasa mi doro vapadanigou isa vei sa kukunigou beto ko mi vagore voturia sira dorudi na miu nyorogua jongadi beto na vuana na miu rarange, 12 ko mu valavatia na isongona na oda Bangara i Jisu, beto isa ba mina valavatagou tu sagou ura sa roroqugou na oda Tamasa beto na oda Bangara i Jisu Karisito sagou.