1 Ara na tinoni mamata qa kuti lao tamu na iviva rereko tavilemu beto tadira na mua koburu. Agou sa qa roroqugou sosoto, ko nake ara gu mekaqu goto ira doru qai gigilai na sosoto ba qai roroqugou tugu vei sagou, 2 ura na sosoto sa togasa tadagita beto ko mina kole tadagita kamua na kamua.

3 Na vairoqu vaialona, na vairoqu vaitokai, beto na bule tana Tamasa na Tamada beto ti Jisu Karisito na Tuna na Tamada sa mai kole somana tadagita pa sosoto beto pa vairoqu.

4 Ara qa qera vivitigi ura qa batia sa ira kaki koburu tamu qai tutia na sosoto, ko qai tutia sa isa tugu na garunu taqe tekua tana Tamada. 5 Ko kopira qa tepago ara sao, na iviva rereko: gita ta mekarai vairoqu. Nake kai garunu koregana sa qa korapa kuti laonia ara tamu api, goto isa tugu taqe isongia pa popodalaina tu. 6 Ko api sa na vairoqu: gita ta tutiria sa na garunu tana. Na garunu qu tei nongoria tu pa popodalaina sa api: agou mu tutia na vairoqu.*Pa paranga Qiriki na kipa rorove api mina boka tapeluku vei api: agou mu tutia na garunu.

7 Ura soku tinoni vaitoni vapiru sa qai tei votu lao tu pa kasia gusu. Ira na tinoni pira sa qaike ule votunia sa i Jisu Karisito sa lame toa masa na orungu. Na tinoni sa vei ina sa na tinoni vaitoni vapiru beto na kana tana Karisito sisa.

8 Mu kopu mulenigou mekamiu ko maike mumuri sira qu roitiniria goto muna tekua tu agou sa na tabara okotona.

9 Na tinoni sa kasopo vajola lao ko sake togasa pa vaivagigalai veveina na Karisito api sa sake isongia sa na Tamasa. Goto na tinoni sa togasa pa vaivagigalai api sa sa isongia sa na Tamana beto na Tuna. 10 Na tinoni sa lame tamugou ko sake pogosia sa na vaivagigalai api, sa muke vatogai pa ruma beto muke paranga gogosoria. 11 Ura na tinoni sa paranga gogosoria sisa, sa sa somananiria tugu isa sa na roiti ikeredi tana.

12 Qai soku sira na ginugua qa nyorogua kuti laoniria ara tamugou, ba qake nyorogua vavakatoniria pa pepa beto pa peni. Goto qa gigila vatalea sa ara mana lao kamugou, ko tonai tu tana vaigosoro sosoto poni sa tana kole mekarai vaivavakato, ko mi okoto sa na oda qeqera. 13 Ira na koburu tamu ao na lulumei tavilemu sa qai garunu laonia na dia roroqu tamugou.