1 Ara na tinoni mamata sa qa kuti laonia na leta api tao Qaiosi na qua baere jonga, ao qa roroqugo sosoto. 2 Qua baere jonga, na vavara taqu sa ao mu suvere vatale beto mu toa vajonga sa vei tugu na gagalamu sa korapa toa vataleona. 3 Ura qa qera vivitigi sara totonai qai lalame ira kaki turada ko qai vavavakatonia sa na sosoto sa kole tamu sa vei tugu qu korapa tutia na sosoto ao. 4 Kepore mule sa kai qeqera bi lavata jolania sa na qeqera taqu totonai qa nongoroniria sira na qua koburu qai tutia na sosoto.

5 Qua baere jonga, ao qu tarange pana roiti qu roiti tokaniria ira na turada beto na tinoni gotodi tu. 6 Ira na tinoni aipira qai vavakatonia pa ekelesia api sa na veveina na vairoqu tamu. Ko ira na tinoni aipira sa sa jongana jola beto sa garo tana na Tamasa sa ao mu vatana tokaniria pana dia rererege. 7 Ura na isongona na Karisito sa qai votu laonia sira ko qaike tekua kai vaitokai tadira na tinoni rodomo. 8 Ko sa vei sa gita tugu sa sa pada tana vatogaria sira na tinoni vevei aipira, ko ta mekarai roiti tavitiria ira pa sosoto.

9 Ara qa tei kuti lao tu tana ekelesia, ba i Dioterepesi isa sa nyonyorogua vavaporeveveinaia mekana sa sa daiona vatogagei sagei. 10 Ko tonai mana lame kamu ketakoi poni sa mana lodaka vania ara sira na sakasa sa roitiniria ura agei ba sa vakesa goboronigei na paranga ikikeredi sisa. Ba nake ketakoi gu sa noso sa, goto sa daiona tugu vei vatogaria sira na turada beto ira qai nyoroguania ko bai vatogaria sira na turada qarigu ba sa suquturia tugu beto sa iju votu paleniria tugu pa ekelesia.

11 Qua baere jonga, muke dogoro tutia na ikerena goto na jongana tu. Na tinoni sa roitinia na jongana sa na ona na Tamasa; na tinoni sa roitinia na ikerena sa sake batia sa na Tamasa sisa. 12 Ira doru qai vavakatonia sa na toa tai Demetiriasi sa sa jongana jola qarigu ko na sosoto pana ona toa ba sa ulule mekana. Ko agei ba qe vatamo laonia gu sa na mei vavakato jongana na veveina isa, ko ao ba qu gigilaimua sa na vavakato tamigei sa na sosotona.

13 Qai soku sira na ginugua sa nyorogua kuti laoniria ara tamu, ba qake nyorogua vavakatoniria ara pa pepa beto pa peni. 14 Qa gigila vatalea ara sa mina oqoro sovai sa kode mana batigo gu, ko tonai tu tana vaigosoro sosoto poni sa tana kole mekarai vaivavakato.

15 Na bule mi somana tamu. Ira na oda baere pira sa qai garunu laonia na dia roroqu tamu. Mu okoto pojaniria na mei roroqu ira na oda baere ketakoi.