1 Ego ko totonai sa korapa pa Koriniti si Apolosi, sa sa rerege soloso karovo si Paula ko sa lao gore kamu pa Episasi. Ko ketakoi sa gosororia isa sa kaki tinoni tana Bangara, 2 ko sa nanasaria, <<Ai vei qu tei tekua tu agou sa na Gagala Tabuna toto vei qu vasosoto?>> sauniria.

Poni qai oe lao sira, <<Qokolo, ko na Gagala Tabuna gu vei bi koleona sisa ba qe oqoro isongo nongoro podekia agei,>> qarigu.

3 Poni pira sauniria i Paula sira, <<Ko na paputaiso sa gu sa qu tapaputaisonia agou?>> sau.

Poni qai paranga, <<Na paputaiso tai Jone,>> qarigu.

4 Poni sa paranga si Paula, <<I Jone sa vaipaputaisonia sa na paputaiso sa ulenia qai gabala ira na tinoni, beto sa pojaniria sira na tinoni ko mai vasosotoa sisa sa korapa tuti ligu lame isa sau, ko i Jisu sisa saunia isa,>> sauniria. 5 Ko totonai qai nongoria inara sau isa, poni sa qai tapaputaiso sira pa isongona na Bangara i Jisu. 6 Beto sa vaoponiria na limana i Paula sira, poni sa goreria na Gagala Tabuna sira, ko qai okoto parangania na paranga gotona beto qai ule votunia ira sa na paranga tana Tamasa. 7 Ko ka manogarua sira doru tinoni ira.

8 Ego ko pa korapana kue popu sa sa lalao paranga varenenia i Paula pa ruma vavaikamuna sa na Bangara, ko sa tale vatataleria sira na tinoni beto sa ule vakakabere vaniria sa na veveina na binangara tana Tamasa. 9 Ba ira kaki sa qai vapatua na bulodi ko qai daidia sosoto vainongoro, beto ko qai poja tarini paranga ikikeredi pa moedi ira na vaikamu tinoni sa na veveina na Soana tana Bangara. Poni sa loa paleria i Paula sira, goto sa teku kaleniria gu sira na tinoni tana Bangara ko na vaituti rane gu sa sa kole vagigalairia pa lose vavaivagigalaina ti Turanosi. 10 Ko na karu aoro sa sa kole roiti vei pira si Paula, ko ira doru qai suvere pa ia pa Esia sa qai nongoria sa na paranga tana Bangara, ira na Jiu beto na tinoni karovodi tugu vei.

11 Ego ko ira na roiti vavaivagabaradi qaike tababata sa sa roitiniria na Tamasa pa roiti ti Paula. 12 Ko ira qai mo sa ira tu na ona taolo susubina beto nona poko roiti ba qai pogoso riu vaniria tugu, ko qai taloa pa tinidi ira na tinoni sira na mo beto ko ira na gagala ikikeredi sa qai taiju vavotu paleria.

13 Ko ira kaki tinoni Jiu, ira qai lelekogo ijiju paleria na tomate ikikeredi, sa qai podekia tugu kuku tariniria na isongona na Bangara i Jisu sira na tinoni sa koleria na gagala ikikeredi. Ko pira qai paparanga vei, <<Qa iju palegou ara pa isongona i Jisu isa sa taraenia i Paula sagou,>> qarigu. 14 Ko ira ka vitu tuna marene i Sikeva, kai kuta iama tadira na tinoni Jiu, sa qai roiti vei isa. 15 Ba sa oeria na gagala ikerena sira, pira sauniria, <<I Jisu sa qa gigilaiqua beto ko i Paula ba qa gigaliaqua tugu, goto agou sa i sei sagou?>> sauniria. 16 Ko sa togaria na tinoni sa kolea na gagala ikerena sira pori, ko sake vangongoria ko sa vakilasa vatataleria, ko na gagale gagadodi na papalekadi sa qai uku votu pa ruma isa ko qai oqai na taba.

17 Ko totonai qai nongoria ira doru tinoni Jiu na tinoni karovodi na suveredi pa Episasi sisa, sa qai matagutu vivitigi sira doru ko qai valavatia ira sa na isongona na Bangara i Jisu. 18 Kubodi ira qai tei vasosoto tu sa qai lame vavaja uleniria sira na dia roiti. 19 Na motadi tugu ira sa poredia potana ikikeredi sa qai okoto pogoso vaikamuniria sira na dia buka potana, ko qai vurungu paleria pa moedi ira doru tinoni. Ko na anye vaikamuna na vaidi doru buka ira sa ka limangavuluputa tina poata siliva. 20 Ko pa roiti neqina vei pira tana Bangara, sa sa lekogo sa na paranga tana Bangara beto ko qai mota tugu lalaodia sira qai vasosotoa na Bangara.

21 Ego ko pa ligudi qai jola na sakasava aipira, sa roroqu vataleona i Paula sa mina rerege vei pa Masidonia beto pa Akaia beto sa mina gore pa Jerusalema sau. Ura sa pojaiona isa sa pa liguna mana kamu ketakoi sa beto pa Romu tugu vei sa mana batia ara sau. 22 Ko pa liguna sa garunu momoe laoniria pa Masidonia sira karu ona tinoni vaitokai, ira Timote i Erasitasi, sa isa mekana sa suvere jolaona mai tu iapeki totoso pa pikata gugusu pa Esia.

23 Ego ko pa totoso tugu isa sa sa pidoko votu sa kai vaigua nake leleo na veveina na Soana tana Bangara. 24 Kai tinoni na isongona i Demetiriasi sa kai tinoni roroiti patu siliva. Ko pa patu siliva sa roiti tuti veinia na zelepade madina tana tamasa rereko Atemisi isa, sa sa dori vaisisongoria sira nona tinoni roiti. 25 Ko sa kuku vaikamuniria isa sira na ona tinoni roiti beto ira kaki tinoni mule qai junonia ka sakasava vei inara, ko pira sauniria, <<Ka visa tinoni! Qu tei gigilaimiu tu agou sa pa roiti tugu api sa votu sa na isisongo tadagita! 26 Beto ko qu tei batiamiu tu na nongoriamiu tu agou sa nake pa Episasi mekana goto doru eqa pa Esia si Paula api sa tei toni vapiruria tu sira na mota tinoni, ura sa pojaniria sa nake tamasa sira na sakasava qai taroiti pa lima inara sauniria. 27 Ko nake mekana gu na tapoja vivikerena na roiti tadagita sa na tapata tana gosoria gita, goto na zelepade tana tamasa rereko lavata i Atemisi sa kode minake taroqu vaporeveveina tugu vei. Ko na vinalavata tana isa vei qai vatarasaea ira doru pa Esia sa kopira ba mina lumuona sosoto,>> sauniria.

28 Ko totonai qai nongoria ira na tinoni inara sau sisa, poni sa sa pugeleria na kokora ko qai irangia ira sa neqa, pira qarigu, <<Na lavatana jola si Atemisi tadira pa Episasi!>> qarigu. 29 Ko sa pugelia na viuveo sa na gugusu lavata pa Episasi. Qai aru tamanaria sira Qaiosi i Arisitakosi, karu tinoni Masidonia qai rererege tavitia i Paula, ko qai mekarai ragata sasuru laoniria pa ia vavaikamuna lavata pa gugusu isa. 30 Poni sa nyorogua votu lao pa moena na vaikamu tinoni si Paula, ba ira na tinoni tana Bangara ketakoi qai vanosoa. 31 Beto ko kaki ira na qavuna pa pikata ia pa Esia, ira na baere tugu ti Paula, ba qai valaoa tugu sa na dia paranga ti Paula ko minake votu lao tabata pa ia vavaikamuna qarigunia.

32 Ira kaki sa kai sakasava sa qai kole kuku vevelania, goto ira kaki sa na goto sakasava tu. Ko qai okoto vaivarura betodia sira na minete tinoni qai vaikamu, goto ira kaki sa qaike isongo gigilai tugu na sa sa qai vaikamunia ira. 33 Ira kaki pa vaikamu sa qai rorovea sa palu i Alekezada mina tagorenia sa na vaikamu api qarigu, ura qai toni sae vaturua pa momoe ira na tinoni Jiu sisa. Ko sa alaka saenia na limana si Alekezada ko mi podalai paranga totoke suqutunia mekana sau. 34 Ba totonai qai dogoro gigalia ira na vaikamu tinoni sa na tinoni Jiu sisa, poni sa qai mekarai ovuluria gu sa na ovoveledi sira qai vaikamu ko qai mekarai iranga vevelai ira sa na padana karu aoa tu, pira qai kole iranga vei, <<Na lavatana jola si Atemisi tadira pa Episasi!>> qarigu.

35 Ego ko sa sovai tu beto sa boka vanosoria na tinoni sa kopuniria na vinaturu pa gugusu isa sira na tinoni, ko pira sauniria, <<Ka visa tinoni pa Episasi! Ira doru tinoni qai tei gigilai betoadia tu sa na gugusu Episasi gu sa sa kopunia sa na zelepade tana tamasa lavata i Atemisi beto ko isa na patu tabuna lavata sa vukele lagere vei pa noka! 36 Kepore kai tinoni mina vasekeria sa aipira, ko mu noso beto muke nenekenia na roiti sake jongana. 37 Ira karu tinoni qu toni lameniria lani sa qaike isongo iko sakasava pa leona na oda zelepade beto qaike isongo poja vivikeria tugu vei sa na oda tamasa. 38 Goto i Demetiriasi beto ira na ona tinoni roiti sa vei mina koledia ginugua mai jutunia na tinoni, poni sa qai korapa suveredia sira tinoni vaituti beto ko koledia sira na ia ketakoi qai vaikamu vaituti, ko ketakoi tu sa mai vaipogoso lao vaitale ira. 39 Goto vei kaki goto sakasava mule tu sa bu nyoroguania agou, poni sa pa vaikamu tuvisina tu ko pa soana momosona tu mina tapopo vatale sisa. 40 Goto isa na ginugua sa podo pa ngeni pa rane api sa kode tana tajutu talenia taqe vakeporeria ira na tinoni mamata sa gita, ura kepore na kutana ko tanake boka talegasania gita sa na vaikamu goborona api,>> sauniria. 41 Ko pa liguna sa poja veiniria inara, sa beto sa pojaniria sira qai vaikamu ko qai okoto taloloa riudia.