1 Ego ko pa liguna sa jola sa na kokora tadira na tinoni pa Episasi, poni sa sa kuku vaikamuniria i Paula sira na tinoni tana Bangara ko sa sovutu vaneqiria, beto sa sa paranga loloaria beto sa taloa lao pa Masidonia sisa. 2 Ko sa reregeria isa sira na gugusu ketakoi ko sa vaneneqiria pa ona paranga sira, beto sa sa jola lao pa Qirisi 3 ko kue popu sa suvere ketakoi sisa. Ko sa korapa tugu vatana toka lao pa Siria sau sisa poni sa sa nongoronia sa ira na tinoni Jiu qai kukitinia sisa, poni sa sa rovea sa mi mule vei tu ropi pa Masidonia sau. 4 Ko ira pira sira na tinoni qai tutia i Paula: i Sopatorosi na tuna marene i Pirasi, na tinoni pa Berea; ira Arisitakosi i Sekudosi, karu tinoni Tesalonika; i Qaiosi, na tinoni Debe; i Timote; beto ira Tukikosi i Toropimosi, karu tinoni Esia. 5 Ira pira sa qai lao momoe veranigei pa Toroasi. 6 Goto agei sa pa liguna na vavolo Bereti Nake Kovuruna sa qe toka taloa pa Pilipae, ko sa jola tu ka lima rane beto qe lao kamu pa Toroasi. Ko ketakoi qe suvere ka vitu rane.

7 Ego pa rane momoe pa vuiki totonai qe vaikamu teteku baere, sa sa kole tarae tadira si Paula. Ko sa nyoroguania mina toka riu gu na vuvugei sau sisa ko sa dori vakakasia tu isa sa na tinarae ko sa kamua tu na korapa bongi. 8 Qai kubo jola sira na juke qai toa pa lose pa nulu ketakoi qe vaikamu agei. 9 Ego ko sa korapa tugu toqona pa vuida ketakoi sa kai koburu marene koregana, na isongona i Iutikasi, sa korapa toqo dodokiona. Ko totonai sa kakasa tugu lalaona sa na paranga ti Paula, sa sa puta muma gu sa na tinoni api ko sa vukele koko pa vinue sape pa nulu ko sa gore tu dugalania pa peso. Ko qai teku vaiolia qarigu sa sa tei mate tu. 10 Poni sa gore si Paula ko sa opo taria sa na tinina isa ko sa boru tekua, beto pira sau, <<Muke takulanga, sa korapa toaona sapi!>> sau. 11 Beto sa kesa sae ligu pa lose pa nulu si Paula, ko sa kikipai sa na bereti ko qai teteku. Pa liguna na teteku sa sa kole gu paranga sisa ko tinganai sa rane kabere, beto sa sa toka riuona sisa. 12 Goto ira na tinoni qai toni riunia na toana sa na koburu marene korega sa vukele, beto qai dori tavamanoto sira na tinoni ketakoi.

13 Ego ko agei sa qe toka lao momoe pa Asosi, ko ketakoi tu sa mene surania si Paula qeu. Ura sa tei pojanigei tu sa agei mene koi lao momoe goto isa sa mina soloso karovo lao ketakoi saunigei. 14 Ko tonai sa lame gosorogei pa Asosi, poni sa qe surania sisa ko qe jola lao pa Mitulene. 15 Ko ketakoi qe ipumeka beto sa qe toka ko qe lao paro pa kai kalena pa Kiosi. Ko ketakoi qe ipumeka mutu beto sa qe toka karovo lao sa pa nusa Samosi, ko qe ipumeka mutu pa Samosi beto sa qe toka lao paro pa gugusu pa Miletosi. 16 Ura na roroqu ti Paula sa meneke paro pa Episasi, ura kita me gona pale goboro totoso pa Esia sau. Ura sa sisiqarai ko vei bi boka sa bi tei suvere tu pa Jerusalema beto bi kamua sa na rane Penitikositi sau.

17 Ego ko pa Miletosi sa valao nongoro pa Episasi si Paula ko sa valameria sira na tinoni mamata pa ekelesia ketakoi. 18 Ko totonai qai lame kamu tana, sa sa parangaria, pira sauniria, <<Qu tei gigila vataleamiu tugu agou sa ai sa vevei na susuvere taqu totonai qa suvere tavitigou agou, podalai tugu na rane momoe qa tete pa Esia ara. 19 Pana uana viketai beto pa oni kolo mata qa nabulunia ara sa na Bangara, beto qa gosororia tugu ara sira na tapata qai valameria ira na tinoni Jiu qai kukitinisiu. 20 Qu gigilaimiu tugu agou sa qake golomia ara sa kai sakasava vei mina boka tokanigou, goto qa ule vanigou beto qa vagigalainigou pa vaikamu tinoni beto pa okokoto miu ruruma. 21 Qa poja vaneneqinigou ara sa ira na Jiu beto ira na tinoni Qiriki tugu vei ko mai gabala lao tana Tamasa beto ko mai vasosotoa sa na oda Bangara i Jisu qau.

22 Ko kopira qa tatoni tana Gagala Tabuna sara ko qa korapa gore pa Jerusalema, ba qake gigilai ara sa na sa mina raja lame taqu. 23 Goto isa gu vei qa gigilai sa pa doru gugusu qa laoria, sa na Gagala Tabuna sa poja vaneneqinisiu sa na tapiu beto na tapata gu sa qai korapa veranisiu pa ia isa saunisiu. 24 Ba qake isongo roqu vaporeveveinaia ara sa na qua toa mekaqu, goto isa gu sa poreveveina taqu sa make nganganyania goto ma vaokotia gu sa na roiti ninabulu sa vanisiu na Bangara i Jisu, ko ma ule vaneneqinia ara sa na nongoro jongana na vairoqu vaialona tana Tamasa.

25 Ko kopira qa gigila vataleaqua ara sa munake isongo bati ligua na isumataqu ara sagou doru qa lekogo taraenia tamugou na binangara tana Tamasa. 26 Ko inara sa vei sa ma ule vatale vanigou pa ngeni pa rane api ara sagou: ara mana talegasania sa na toa tadira doru mai muma. 27 Ura kepore kai sa ba aru mulenia sara, goto qa ule vanigou sa doru nyorogua tana Tamasa. 28 Ko mu kopu mulenigou mekamiu vei tugu ira doru sipi qai kole pa miu kopu. Na Gagala Tabuna tu sa vatinoni kopugou sagou ko muna doro kopunia sa na ekelesia tana Tamasa, isa na ekelesia pa orunguna tu na Tuna Mekai sa pajuku tekunia isa. 29 Ara qa gigilaiqua sa pa liguna mana taloa riu ara sa kode mai kamu tamugou sira na tinoni vaivagigalai sesekedi qai vei na manugu mamade nenedi pirudi, ko kode mai tome nganguluria sira na puku tinoni qu kopuniria. 30 Beto kode pa vaikorapaimiu gu agou mai turu sira kaki tinoni mai vaivagigalai vapiru ko mai toni vapipiruria sira na tinoni tana Bangara. 31 Ko sa vei sa mu suvere gegele sagou beto mu roqu vakoititia sa kue aoro sa qake koroto na rane na bongi sa qa vavanaugou ara taviti kolo mataqu sagou doru.

32 Ko kopira ara qa vakole laogou tana Tamasa beto pa ona nongorona na vairoqu vaialona sagou. Ko na nongoro isa sa mina ovulugou beto mina boka vatekunigou na mana sa vanaqitia na Tamasa ko mina vaniria ira na ona tinoni isa. 33 Kepore sa na qolo na siliva babi na poko tana kai tinoni ba doro roronia ara. 34 Agou mekamiu qu gigilaimiu sa na limaqu aipira qai roiti ko qai vatoasiu sara beto ira na tinoni qai tututisiu. 35 Ira doru kai sa qa vabatinigou sa tana pavu talenia gita beto sa kode tana boka tokaniria sira qai munyala. Mu roqu vakoititiria sira na paranga tana Bangara i Jisu tonai pira sau, <Na vaiia sa na mana sa lavata jolania na tekuona na tinoni,> sau,>> sau si Paula.

36 Ko totonai sa beto paranga si Paula, sa sa ovoro gore sori tutungu tavitiria ira ko sa vavara. 37 Qai lukana uui beto sira doru beto qai borua beto qai aoa ira si Paula. 38 Isa qai takulanga vivitiginia ira sa na paranga sa pojaria isa na veveina kode maike isongo bati ligua ira sa na isumatana isa sauniria. Ego beto sa qai tutia ko qai riu loai pa vaka.