1 Agou na koburu, sa mu vataberia na tinamiu na tamamiu pana toa tutina na Bangara, ura isa sa na tuvisi. 2 Na garunu tana Tamasa sa pira sau, <<Mu valavataria na tinamiu na tamamiu,>> ura isa sa na garunu momoe sa kolea na taringunguti jongana, ko na taringunguti isa sa pira sau, 3 <<Ko vei sa muna toa vatale beto muna toa vakakasa pa peso,>> sau.Votu 20.12; Vavanau 5.16; Matiu 15.4.

4 Agou na tamadi na koburu, muke vavatagigiriria sira na tumiu. Goto mu toni vataleniria tu pana vaivagigalai tuvisina beto pana vavanau tana Bangara.

5 Agou na pinausu, sa mu vataberia ira na tinoni qai bangaranigou, ko na miu vinatabe mi tavitia na pangaga beto na matagutu. Beto mu vatabe pana miu roroqu sosotona kai muqisi podeke vei tugu bu korapa roiti vania na Karisito. 6 Nake pana totoso gu mai korapa dogoro kopunigou ira na miu bangara sa mu roiti. Muke vaqera tinoni gu pana miu roiti. Goto na pinausu tana Karisito sagou ko mu roitinia pana miu roroqu sosotona sa isa vei sa nyoroguania na Tamasa. 7 Mu nabulu qeqera kai muqisi podeke vei qu korapa nabulunia nake tinoni gu goto na Bangara tu. 8 Mu vakoinonoa agou sa na veveina na Bangara mina vaokotoniria na pinia sira na tinoni pana dorudi na dia roiti jongadi. Ko bi na pinausu babi na tinoni taruvatana tu ba kode mina dogoria tugu isa sa na dia roiti jongadi.

9 Beto agou na bangaradi ira na pinausu, sa mu vadogoroniria tugu na uana jongana beto mu nogoto siru gegeretanaria sira na miu pinausu. Mu vakoinonoa sapi: agou beto ira na miu pinausu sa kame gu na miu Bangara pa noka ko na Bangara isa sake boka totoka kalenia kame tonai sa vaipitu.

10 Ego pana vinaokotona sa, agou mu pasusu vaneqi lao tana Bangara beto pana ona neqi lavatana jola. 11 Mu vasaeria sira doru sakasava vaipera tana Tamasa, ko mu boka turu vangajuria sira na boko vinaturu ikikeredi tana bangaradi ira na tomate ikikeredi. 12 Ura nake tinoni sa koleria na masa na orungu sa taqe rajaria gita, goto ira tu na okoto babangara na okokoto neqi, na gagala ikeredi qai bangara pa kasia gusu pana totoso rodomo pira, beto ira na gagala ikeredi pa vavagalo eqa. 13 Ko sa vei isa sa mu vasaeria sira doru sakasava vaipera tana Tamasa, ko mu boka turua na mua tuturuna pana rane ikeredi beto tonai mina jola sa na vaipera poni sa muna korapa tugu turu varenemiu sagou.

14 Ko vei sa mu turu ko mu doko vamaurunigou vei na beleti sa na toa sosotona, beto mu vasae veinia na poko sa susuqutia na raraqomiu sa na uana tuvisina. 15 Mu soba veinia na buti vaipera pana nenemiu sa na vanaqitina ko muna vareregia na nongoro jongana veveina na bule tana Tamasa. 16 Doru totoso mu pogoso veinia na naqe sa na miu rarange lao tana Tamasa, ko na rarange isa sa muna boka taleniria sira na tupi vuvurungudi tana isa na kutana nikerena. 17 Mu teku soba veinia na tarapae vaipera pana batumiu sa na vinasosotona qu tei tekua tu agou sa na inaalo tana Tamasa, beto mu arua ko mu varoitia sa na paranga tana Tamasa isa na benete tana Gagala Tabuna. 18 Doru sakasava aipira sa mu vatavitinia na vavara beto na tetepa lao tana Tamasa. Doru totoso mu vavara pana vaitoni tana Gagala Tabuna. Ko vei beto muna boka roitinia agou sa vei isa sa muke suvere muma beto muke koroto vavara tokaniria sira na tinoni tana Tamasa. 19 Ara ba mu vavara tokanisiu tugu, ko na Tamasa mi vanisiu na paranga mana pojai totonai mana paranga lao tadira na tinoni, beto make tamatari sa tonai ma vakaberia na gigalai golomona sa kole pa nongoro jongana. 20 Ura na nongoro jongana tugu isa sa qa turu toqonia ko qa tapiu talenia ara. Mu vavara tokanisiu, ko ma paranga vaneqinia ara sa isa vei sa pada ko mana ule votu veinia sa na nongoro jongana.

21 Qa nyoroguania ko agou ba mu gigilaria sira doru vavakato veveiqu ara beto na qua roiti. Ko kode i Tukikosi tu mina ule vanigou sira doru vavakato ira. Isa sa na tavitida qe qerania beto kai nabulu tarangena pana roiti tana Bangara. 22 Ko sa vei isa sa qa korapa garunu laonia ara tamugou sisa, ko mi vaneqia na bulomiu tonai mina vavakato vanigou sa na veveimei agei.

23 Mai kole somana tamugou na tamatasi tana Karisito sa na bule beto na vairoqu sa tavitia na rarange qai lame vei tana Tamasa na Tamada beto na oda Bangara i Jisu Karisito. 24 Na vairoqu vaialona mi somana kole jola tamugou dodoru qu roroqua na oda Bangara i Jisu Karisito.