1 Ara Paula beto i Timote, agei karu na nabulu tai Jisu Karisito.

Na leta api sa qa valaoa tadira doru tinoni tana Tamasa qai tutia i Jisu Karisito, beto tadira na tinoni kopu beto ira na tinoni vaitokai pa ekelesia pa Pilipae.

2 Na vairoqu vaialona beto na bule tana Tamasa na Tamada beto na Bangara i Jisu Karisito mi kole somana tamugou.

3 Ara qa paranga jongana jola lao tana qua Tamasa pana doru totoso tonai qa gigalagou sagou. 4 Pana doru qua vavara sa qa tetepa vanigou sagou doru. Qa tetepa taviti qera 5 ura podalai tugu pana rane momoe qu vasosoto ko sa kamua kopira sagou qu kole somana tokanisiu ara pana vareregena na nongoro jongana. 6 Ura qa vasosoto vatalea ara sa api, na Tamasa isa sa podalainia na roiti jongana tamugou sa isa kode minake beto roitinia sa na roiti jongana isa tinganai ko mina kamua na rane mule lame tai Jisu Karisito. 7 Qa isongogou pa buloqu ara sagou doru, ko na tuvisina tugu mana roroqu vaporeveveinagou api ara sagou. Ko bi vei pana qua tapiu pa ruma vaipiu kopira babi pana qua nanaqenia beto na paranga vamaurunia na nongoro jongana, sa agou doru qu somana tokanisiu ara pana roiti tana Tamasa. 8 Na Tamasa sa gigila vatalesiuona sa ara qa roroqu vivitiginigou na bulo vairoquna na Karisito Jisu sagou.

9 Ko isa qa vavarania ara sa api: na miu vairoqu beto na miu roquna na Tamasa sa mike koroto pugele nyonyoania na gigalai pugelena beto doru roroqu tavagigaladi. 10 Ko mu boka viloto vaegoa agou sisa sa vavagua jola, ko mu lioso beto muke tajutunia kai sela pana rane mule tana Karisito. 11 Totonai sa muna tei tavapugelenia tu na vuana na tuvisi- isa na vua sa lame vei ti Jisu Karisito, ko na vua mina vabangaria beto mina vatarasaea sa na Tamasa.

12 Ego qa nyoroguanigou ko mu gigilai agou, ka visa tavitiqu, sa na tapata qa gosororia ara sa qaike suqutia goto qai tokania ko qai vareregia tu sa na nongoro jongana. 13 Ko sa tagigila tadira doru tinoni sadere pana ruma tana kuta bangara beto tadira doru tinoni pa gugusu lani sa na ginuana qa tapiu ara sa ura ara qa nabulunia na Karisito. 14 Beto ko na motadi ira na tavitiqu qai tutia na Bangara sa qai tavaneqinia sa na tapiu taqu, ko kopira sa qai varenenia beto qaike pangongoronia sa na ovelainia na paranga tana Tamasa.

15 Sosoto, ira kaki sa qai tarae vevelania na Karisito pana uana kokono beto na vaipipiarai, goto ira kaki sa qai taraenia sa na Karisito pana nyorogua jongana. 16 Ira qai tarae pana vairoqu sa qai gigilai sa ara na Tamasa tu sa udukunisiu sa na roiti nanaqenia na sosotona na nongoro jongana. 17 Ira qai taraenia na Karisito pana uana kokono, nake uana liosona, sa qai vei ko mai vatamo vanisiu na tapata ara tonai qa korapa pa ruma vaipiu qarigu.

18 Ko na sa na jongana sa vavotua sa vei inara? Pira gu sa vei: ai tu soana veveina sa taroiti sisa, bi pana uana ikikerena babi pana tuvisina, ba na poreveveina gu sa na Karisito sa tatarae, ko isa sa qa qerania ara. Ko, e, mana qera sara, 19 ura qa gigila vatalea ara sa isa qa gosoria ara sa kode mina vua votunia na inaalo taqu ura agou qu vavara tokanisiu beto na Gagala i Jisu Karisito sa tokanisiu. 20 Na qua kuta nyorogua lavata gu, sa kepore kai sa ma roitinia vei ko ma tavakeania sara. Ko kopira beto vei tugu doru totoso sa maneke isongo matagutu paranga, ko vei ba toa lalaoqua ba vei ba mate poni sa na Karisito sa mina tavalavata pana qua toa qau. 21 Ura taqu na toa sa na Karisito, beto na mate sa sa pore vuana. 22 Ba vei mana toa lalaoqua pana toa tini sara, poni sa kode mina boka vua na qua roiti nabuluna na Karisito. Ko qake gigilai sa isa mana vilea. 23 Ara qa tabako pana vaikorapaidi ira karu nyorogua aipira. Qa nyorogua vivitiginia ko ba taloaqua pana toa tini api ko ba lao suvere tavitia na Karisito ura isa sa sa jongana jola qau. 24 Ba vei mana toa mutu pana toa tini api sa kode mina poreveveina jola sa tamugou qau. 25 Ko qa vasosoto vataleaqua sa api, ko qa gigilai sa kode manake taloa. Kode mana kole tugu suvere tavitigou agou doru, ko ma tokania na ijoko sae pana miu toa ko mu qeqera pana miu rarange. 26 Ko tonai ma lame kamugou mule ara, poni sa na miu qeqeranisiu ara mi pugele nyonyoa votu pana miu tutina i Jisu Karisito.

27 Isa sa poreveveina jola sa mu toania na uana sa doro garo pana nongoro jongana tana Karisito. Ko vei ba lame dogorogou ba bake suvere tavitigou goto ba nongoronigou, ba mana gigilai ara sa agou qu turu vamauru pana kai gagala beto pana kai nyorogua qu mekarai vaisori vamauru pana vinasosotona na nongoro jongana, 28 beto ma nongoronigou sa quke matagutu ukuniria sira qai kanagou. Api sa na vinagigila sa mai tapipiara sira goto agou sa kode muna taalo, ko na Tamasa tu mina vagore votua sapi. 29 Ura agou tu sa tei vanigou tu na Tamasa sa na vaivana nabuluna na Karisito, ko nake mekana vei ko muna vasosotoa gu sisa goto muna somana gosoro talenia tugu vei na vitigi sisa. 30 Qu korapa gosororia agou sa ira tugu na tapata perangana qu batiria qa tomeria ara beto ko kopira qu nongoroniria mutugu qa gosororia ara.