1 Ara Paula kai tinoni tagarunuqu, ko nake ira na tinoni qai garunusiu babi na lame veiqu pana tana kai tinoni sara, goto ara sa na tavilequ pana tai Jisu Karisito beto tana Tamasa tu isa sa vaturu mulea isa pana mate.

2 Na leta api sa ara beto ira doru tavitiqu aipira qe valaoa tamugou na okokoto ekelesia pa ia pa Qelesia.

3 Na vairoqu vaialona beto na bule tana Tamasa na Tamada beto ti Jisu Karisito na Bangara mi kole somana tamugou. 4 Isa sa vamalumia mekana ko sa mate paeniria sira noda sela, ko sa ruvatagita pana toa ikikerena qai korapa toania ira na sasae tinoni kopira. Ko tonai sa roiti vei poni sa sa vatabea isa sa na nyorogua ta noda Tamasa na Tamada, 5 isa mi tavatarasae kamua na kamua. Agua.

6 Qa gabara vivitiginigou ara sagou! Na beko vei tu ko quke ruavo tugu loa palea agou sa na Tamasa isa sa tei kukugou tu pana vairoqu lavata tana Karisito, ko qu tutia mutu agou sa kai goto vaivagigalai qai vagigalania na nongoro jongana. 7 Ba kepore mule sa kai goto nongoro jongana sa sosoto, goto pira qa paranga vei sara ura koledia sira kaki qai korapa vanigou na tapata beto qai nyorogua ngangangulia sa na nongoro jongana veveina na Karisito. 8 Ba vei bi agei na tinoni tagarunumei tu sa vilegei na Tamasa babi kai mateana koko veina tu pa noka sa bi vaivagigalainia sa kai vaivagigalai sa goto pana nongoro jongana qe tei ule vanigou tu agei, poni sa na tinoni isa sa mi gosoriagana tu na vinakilasa tana Tamasa. 9 Ma kai pojanigou mule sa isa vei qe tei ule vanigou tu. Vei bi kai tinoni bi vaivagigalainia sa kai vaivagigalai sa goto pana nongoro jongana qu tei teku vakatapia tu agou ina, poni sa na tinoni isa sa mi gosoriagana tu na vinakilasa tana Tamasa.

10 Ai vei, qa korapa nyaqoa ara sa vei beto mai vatarasaesiu ira na tinoni qau? Dai! Na Tamasa tu sa qa korapa nyogua vaqerai ara. Ba ai vei qa korapa paranga vei ko ma vaqeraria gu ira na tinoni qau sara? Vei ba korapa tugu nyorogua vaqeraria ira na tinoni sara, poni sa nake padaqu ko mana nabulunia ara sa na Karisito.

11 Ka visa tavitiqu, qa nyoroguania ara ko mu gigila vatalea agou sapi. Na nongoro jongana qa vaivagigalainia ara sa nake koko lame veina pana rorove tadira na tinoni. 12 Nake tadira na tinoni qa tekunia ara babi ira kaki tinoni bai vagigalainisiu ara sapi, goto na Tamasa tu mekana sa vatadogoronisiu si Jisu Karisito.

13 Qu tei nonongoroniamiu tu agou sa na toa taqu pa moa totonai qa korapa tututia ara sa na tututi pana vinatarasae tadira na Jiu. Qa kokole komiti vivikereria ara sira na tinoni tana Tamasa, beto qa kokole popodeke vivitigia ko ba piara paleria qau. 14 Qa boboka jolaniria ara sira na Jiu agei kakai sae beto qa tuti vikivokoto betoria ara sira na uana tututidi tadira na qua tite. 15 Ko inara tu qa toa vei sara ba na Tamasa sa roroqu vivitigisiu ko tonai tu qa oqoro pore ara sa sa toi vile kalenisiu tu mana nabulunia ara sisa. 16 Ko tonai sa vadogoronisiu sa i Jisu na Tuna ko ma taraenia tadira na tinoni karovodi ara sa na nongoro jongana na veveina isa sau, poni sa qake lao nanasania mule tadira kaki tinoni ara sa na veveina api. 17 Beto ko qake oqani sae mutugu sa pa Jerusalema ko ba nanasaria sira qai tavile na tinoni tagarunudi momoe. Goto na totoso tugu isa sa qa taloa riu pa qega kaloina pa Arabia sara beto pa liguna sa qa kai mule kamu mutugu pa Damasikasi.

18 Pa liguna sa jola kue aoro tu beto sa qa sae pa Jerusalema ko qa dogoria na suvere tavitia mai ka manogalima rane gu ara si Pita. 19 I Jekopi na tasina gu na oda Bangara gu mule sa qa kamua totonai, goto ira kaki tinoni tagarunudi sa qake batiria. 20 Kopira qa maulunia pa moena na Tamasa ara sira na veveidi na sakasava qa kuti vanigou aipira: qake korapa sesekegou sara. 21 Ego ko pa liguna qa taloa pa Jerusalema sa qa sae pa ia pa Siria beto pa Silisia sara. 22 Ko pa totoso isa sa ira na okokoto ekelesia tana Karisito pa Jiudia sa qai oqoro gigila vatalesiu sara. 23 Qai nonongoronia gu sa pira qarigu ira na tinoni, <<Isa tugu na tinoni sa kokomiti vivikeregita pa visa ina sa kopira sa vaivagigalainia mutugu sa na nongoro jongana, ba pa visa gu ina sake tavaraguaniria sira qai vasosotoa na Karisito!>> qarigu. 24 Ko tonai qai batia ira sa na bei sa roitinia na Tamasa pana qua toa poni sa qai vatarasaea ira sa na Tamasa.